2015թ. հոկտեմբերի 5-8-ը Երևան քաղաքում կայացավ բադմինթոնի` Հայաստանի Հանրապետության մեծահասակների առաջնություն, որին մասնակցում էին Գյումրիի, Վանաձորի, Իջևանի և Երևանի տարբեր մարզադպրոցների մարզիկներ:

Իջևան քաղաքը ներկայացնում էին երեք մարզիկ, որոնցից երկուսը ԵՊՀ Իջևանի մասնաճյուղից, մեկը` մարզադպրոցից:

  ԵՊՀ ԻՄ-ից հաջող հանդես եկավ «Անգլերեն լեզու և գրականություն» մասնագիտության առաջին կուրսի ուսանողուհի Էմիլիա Փայտյանը, ով զուգախաղերում գրավեց երկրորդ տեղը:

Նա արժանացավ շքանշանի, պատվոգրի և դրամական պարգևի:

2015թ. սեպտեմբերի 20-ից հոկտեմբերի 7-ը ԵՊՀ ԻՄ-ի մինչհամալսարանական կրթության և պրակտիկայի կազմակերպման (ՄԿՊԿ) բաժինը հանդիպումներ է կազմակերպել Տավուշի մարզի մի շարք դպրոցներում (Իջևանի և Դիլիջանի ավագ դպրոցներ, Իջևանի վարժարան, Վազաշենի, Այգեհովտի, Կայանի, Ազատամուտի, Խաշթառակի, Աչաջրի, Սարիգյուղի, Սևքարի, Ն.Ծաղկավանի, Գանձաքարի, Գետահովտի, Գոշի, Հաղարծնի, Թեղուտի միջնակարգ դպրոցներ): 

Հանդիպումների նպատակն էր աշակերտներին տալ մասնագիտական կողմնորոշում, ԵՊՀ ԻՄ-ում գործող մասնագիտությունների վերաբերյալ տեղեկատվություն, ամրապնդել դպրոց-համալսարան կապը:

Հանդիպումներին մասնակցում էին մասնաճյուղի տնօրեն Ս.Առաքելյանը, ՄԿՊԿ բաժնի վարիչ Վ.Աղաբաբյանը, ԱԿԲ վարիչ Ա.Հովհաննիսյանը, դպրոցների տնօրեններ, ուսուցիչներ:

Ողջունելով դպրոցականներին` ՄԿՊԿ բաժնի վարիչը ընդհանուր գծերով ներկայացրեց ԵՊՀ Իջևանի մասնաճյուղի ֆակուլտետները, ամբիոնները, մասնագիտությունները:

 Նշվեց, որ 2016թ. ԵՊՀ Իջևանի մասնաճյուղը, գործող մասնագիտություններից բացի, ընդունելություն է իրականացնելու 5 նոր մասնագիտություններով` «Տարրական մանկավարժություն և մեթոդիկա», «Նախնական զինվորական պատրաստություն», «Սոցիալական աշխատանք», «Զբոսաշրջության կառավարում» և «Համակարգչային գրաֆիկա»:

Յուրաքանչյուր մասնագիտության համար ներկայացվեց ընդունելության քննությունների ցանկը:

Ընդգծվեց, որ 2016-2017 ուստարվա համար ԵՊՀ Իջևանի մասնաճյուղում օտար լեզուների հետ կապված կատարվել են փոփոխություններ («Անգլերեն լեզու և գրականություն» մասնագիտության ուսանողները հավասար ժամաքանակով կանցնեն ֆրանսերեն և հակառակը), որոնց արդյունքում մասնաճյուղը կտա 2 օտար լեզվի համահավասար իմացությամբ շրջանավարտներ:

Քննարկվեցին ընդունելության քննությունների, շտեմարանների, օլիմպիադաների անցկացման և բաց դռների օրերի հետ կապված մի շարք հարցեր:

Հանդիպումներն ընթացան հարց ու պատասխանով: Աշակերտներին հետաքրքրեցին կրթական գործընթացին, ուսման վարձաչափերին, հատկապես սահմանամերձ բնակավայրերի ուսանողների համար նախատեսված զեղչերին ու արտոնություններին, ընդունելության քննությունների մեկ և երկու աստղանիշով առարկաների ընտրությանը վերաբերող տարբեր հարցեր:

Մասնակիցները գոհունակություն արտահայտեցին մասնաճյուղի նման նախաձեռնության համար` ակնկալելով, որ համագործակցությունը կլինի շարունակական:

2015 թ. հոկտեմբերի 2-ին ԵՊՀ ԻՄ-ի Հումանիտար գիտությունների ֆակուլտետում տեղի ունեցավ միջոցառում՝ նվիրված Շահամիրյանների գործունեությանը, «Նոր տետրակ, որ կոչի հորդորակ», «Որոգայթ փառաց» գրքերին: 

Միջոցառումը նախաձեռնել և կազմակերպել էր Հայոց լեզվի և գրականության ամբիոնի վարիչ, բան. գիտ. թեկնածու, դոցենտ Վաչագան Ավագյանը, նրան աջակցել էր ԵՊՀ ԻՄ-ի ուսանողական խորհուրդը:

Ներկա էի մասնաճյուղի Հումանիտար գիտությունների ֆակուլտետի վարչական և պրոֆեսորադասախոսական անձնակազմի ներկայացուցիչներ, ուսանողներ:

Ողջույնի խոսքով հանդես եկավ Վ.Ավագյանը` արժևորելով Շահամիրյանների գործունեությունը, «Նոր տետրակ, որ կոչի Յորդորակ» (1772), «Որոգայթ փառաց» (1773) երկերը, կարևորելով նման միջոցառումների նախաձեռնումը:

Ապա միջոցառման մասնակիցները իրենց պատրաստած զեկուցումներում ներկայացրին Շահամիրյանների գործունեությունը, «Նոր տետրակ, որ կոչի Յորդորակ» գիրքը` որպես հայ իրականության մեջ առաջին հրապարակախոսական տպագիր աշխատություն, որտեղ ներկայացվում են հայ ժողովրդի հերոսական անցյալը, նրա աշխարհագրական լայնարձակ սահմանները և դրան հակադրվում է առկա վիճակը, երբ երկիրը շահագործվում է օտարների կողմից, քննադատվում է միապետական կարգը՝ այն համարվելով հայոց պետականության անկման պատճառներից մեկը:

 Ուսանողներն անդրադարձան «Որոգայթ փառաց» երկին` որպես 18-րդ դարի 2-րդ կեսի հայ լուսավորական մտքի և առաջադիմական գաղափարների արտահայտության, որի ընդարձակ առաջաբանում դատապարտվում են ավատատիրական-միապետական կարգերը, ներկայացվում թուրք-պարսկական բռնակալությունից Հայաստանի ազատագրման ուղիները և այնտեղ բուրժուա-դեմոկրատական կարգերի հաստատման սկզբունքները։

Գրքի երկրորդ և բուն մասում, որ սահմանադրության նախագիծն է, ներկայացվում են ապագա անկախ Հայաստանի հասարակական-պետական կառուցվածքը, կառավարման մարմինների ստեղծման կարգը, նրանց իրավասությունները, քաղաքացիների իրավունքներն ու պարտականությունները, տնտեսության, լուսավորության, զինված ուժերի կազմակերպման հարցերը, ապագա հանրապետության գլխավոր նեցուկը դիտվում է մշտական զորաբանակը:

Այսպես` «Պատմություն» մասնագիտության 4-րդ կուրսի ուսանողուհի Կարինե Էլլարյանը ներկայացրեց 16-17-րդ դդ. Հնդկաստանում հաստատված հայերի կյանքը և Շահամիր Շահամիրյանի ծավալած գործունեությունը: Ընդգծեց Մադրասի հայրենասիրական խմբակի և հայկական տպարանի նշանակությունը հնդկահայ հասարակական-քաղաքական-մշակութային կյանքում:

 «Նոր տետրակ, որ կոչի հորդորակ» գրքի մասին զեկուցումներ կարդացին «Հայոց լեզու և գրականություն» մասնագիտության 2-րդ կուրսի ուսանողուհիներ Վանուհի Աղինյանը, Մարուսյա Դավթյանը, Իսկուհի Շաղբաթյանը, Մերի Սարգսյանը, Ալբինա Սարհատյանը և Տաթևիկ Հովսեփյանը (հեռակա ուսուցման համակարգի համապատասխան կուրսից):

 Ամփոփիչ խոսքով հանդես եկավ նաև Հումանիտար գիտությունների ֆակուլտետի դեկան Վ.Ալեքսանյանը՝ բարձր գնահատելով Շահամիրյանների գործունեությունը, ‹‹Նոր տետրակ, որ կոչի հորդորակ››, «Որոգայթ փառաց» երկերը, ողջունեց ուսանողներին կրթագիտական նման միջոցառման համար:

2015թ. հոկտեմբերի 2-ին ԵՊՀ Իջևանի մասնաճյուղի մարզադահլիճում տեղի ունեցավ բադմինթոնի բաց առաջնություն, որին մասնակցում էին ԵՊՀ ԻՄ-ի և Իջևանի մարզադպրոցի սաները:

Եզրափակիչ դուրս եկան մասնաճյուղի «Անգլերեն լեզու և գրականություն» մասնագիտության առաջին կուրսի ուսանողուհի Էմիլիա Փայտյանը և Իջևանի մարզադպրոցի մարզուհի Աննա Մանուչարյանը:

Հաղթեց Աննա Մանուչարյանը, ով տնօրենության կողմից պարգևատրվեց հուշանվերով:

Երրորդ տեղը գրավեց մասնաճյուղի «Սերվիս» մասնագիտության չորրորդ կուրսի ուսանողուհի Անի Դավթյանը:

Հարգելի՛ համալսարանականներ, Ձեզ ենք ներկայացնում 2015-2016 ուստարվա առաջին կիսամյակի անվանական կրթաթոշակներ ստացող ուսանողների ցանկը.

1. Հումանիտար գիտությունների ֆակուլտետ, ‹‹Պատմություն›› մասնագիտության երկրորդ կուրսի ուսանող Նվեր Վաչագանի Բայրամյան, ‹‹Վազգեն Սարգսյան›› անվանական կրթաթոշակ:

2. Հումանիտար գիտությունների ֆակուլտետ, ‹‹Անգլերեն լեզու և գրականություն›› մասնագիտության 3-րդ կուրսի ուսանողուհի Վարսենիկ Ռաֆիկի Սարգսյան, ‹‹Շառլ Ազնավուր›› անվանական կրթաթոշակ:

3. Հումանիտար գիտությունների ֆակուլտետ ‹‹Մանկավարժություն և հոգեբանություն›› մասնագիտության 3-րդ կուրսի ուսանողուհի Ջուլիետա Հրաչյայի Դովլաթբեկյան, ‹‹Դավիթ Անհաղթ›› անվանական կրթաթոշակ:

4. Տնտեսագիտության ֆակուլտետ, ‹‹Սերվիս›› մասնագիտության չորրորդ կուրսի ուսանողուհի Անի Գագիկի Դավթյան, ‹‹Մոնթե Մելքոնյան›› անվանական կրթաթոշակ:

5. Տնտեսագիտության ֆակուլտետ ‹‹Սերվիս›› մասնագիտության չորրորդ կուրսի ուսանողուհի Նինա Հրայրի Գանջալյան, ‹‹Սահակ Ձորափորեցի›› անվանական կրթաթոշակ:

6. Տնտեսագիտության ֆակուլտետ, ‹‹Տնտեսագիտության տեսություն›› մասնագիտության չորրորդ կուրսի ուսանողուհի Լուիզա Ռաֆիկի Ալեքսանյան, ‹‹Շավարշ Մարգարյան›› անվանական կրթաթոշակ:

7. Կիրառական արվեստի ֆակուլտետ, ‹‹Կիրառական արվեստ›› մասնագիտության չորրորդ կուրսի ուսանողուհի Մարիամ Արայիկի Սարհատյան, ‹‹Սպարտակ Սարգսյան›› անվանական կրթաթոշակ: