Երևանի պետական համալսարանի Իջևանի մասնաճյուղ

Մասնաճյուղում կայացավ պատանի երկրապահների համար անցկացվող ռազմահայրենասիրական հերթական դասընթացը

2014թ. դեկտեմբերի 16-ին ԵՊՀ ԻՄ-ի կիրառական արվեստի ֆակուլտետի դահլիճում տեղի ունեցավ պատանի երկրապահների համար անցկացվող ռազմահայրենասիրական հերթական դասընթացը, որին մասնակցում էր Իջևանի դպրոցների 94 աշակերտ:

Դասընթացի պատասխանատուն «Պատանի երկրապահ» ակումբի Տավուշի մարզային ջոկատի հրամանատարի տեղակալ Արման Չապուխյանն էր:

Պատանի երկրապահների համար մեկամսյա սերժանտական դասընթացները կազմակերպվում են` հիմք ունենալով ՀՀ կրթության և գիտության ու պաշտպանության նախարարությունների և «Երկրապահ կամավորական միություն» հասարակական կազմակերպության կողմից 2014 թվականի սեպտեմբերի 9-ին կնքված փոխըմբռնման հուշագիրը:

Դեկտեմբերի 16-ին նախատեսված էր «Ռազմական հոգեբանության հիմնախնդիրները» թեմայով դասախոսություն, որն անցկացրեց ՀՀ ՊՆ N զորամասի սպա-հոգեբան, մասնաճյուղի նախկին դասախոս Վահագն Չոբանյանը:

Պատանի երկրապահներին հղելով իր բարեմաղթանքները` Վ.Չոբանյանը ներկայացրեց ռազմական հոգեբանության նպատակներն ու խնդիրները:

Նա կոչ արեց միջոցառման մասնակիցներին չտրվել թշնամու քարոզչական կեղծ հնարքներին, որոնց նպատակը Հայաստանի հասարակությանն ահաբեկելն է, հոգեպես ընկճելն ու բարոյապես պարտության մատնելը, չթերագնահատել թշնամուն ու միշտ զգոն լինել, չգերագնահատել ու չվախենալ նրանից և, ամենակարևորը, սիրել հայ զինվորին, Հայոց բանակն ու պետությունը:

«Ուղեցույց երիտասարդ դեսպանին. Փաստարկներ Հայոց ցեղասպանության մասին» նոր գիրքն առցանց

Լույս է տեսել թուրքագետ, պատմական գիտությունների թեկնածու Արտակ Շաքարյանի հեղինակած «Ուղեցույց երիտասարդ դեսպանին. Փաստարկներ Հայոց ցեղասպանության մասին» գիրքը: 

Ինչպես գրքի նախաբանում է նշվում, թվում է, թե հայ հասարակությունը լիովին տեղեկացված է Հայոց ցեղասպանության մանրամասներին:

Սակայն իրականում Հայոց ցեղասպանության մեր հասարակության անդամների զգալի մասի գիտելիքները ո′չ հիմնավոր են ու ո′չ էլ, առավել ևս, փաստարկված:

Մինչդեռ նշված հիմնախնդիրների վերաբերյալ թերի տեղեկացված հայ երիտասարդները, արտասահմանում զանազան առիթներով հանդիպելով թուրք և ադրբեջանցի՝ համապատասխան կառույցների կողմից նախօրոք պատրաստված անձանց, հաճախ դժվար իրավիճակներում են հայտնվում:

«Ուղեցույց երիտասարդ դեսպանին» աշխատանքը ուղղված է լրացնելու այս բացը:

Առաջնային թիրախ խմբի մեջ մտնում են այս կամ այն ծրագրով արտասահման մեկնող երիտասարդները:

Երկրորդական թիրախ խմբի մեջ են մտնում պատմությամբ հետաքրքրվող լայն շերտերը, ինչպես նաև՝ թեմայի վերաբերյալ հետաքրքրություն ցուցաբերող արտասահմանցիները, քանի որ նյութերը թարգմանվելու են անգլերեն:

Գրքի շրջանակներում ուսումնասիրվել է Հայոց ցեղասպանության մասին թուրքական գրականությունն ու հակահայկական կայքերի քարոզչական բնույթը:

Այս բնագավառի ճանաչված հայ մասնագետների հետ քննարկվել են թուրքական ժխտողական հիմնական թեզերը, համատեղ փորձ է արվել վերջիններից տալ հնարավորինս հիմնավոր, սեղմ և ընդգրկուն պատասխաններ:

Գրքում մասնավորապես քննարկվում են Թուրքիայի ժխտողական քաղաքականությունը, Ցեղասպանությանը զոհ գնացած հայերի թիվը, հայերի ինքնապաշտպանությունները, բռնագաղթի՝ որպես բնաջինջ գործիքի օգտագործումը, ինչպես նաև օսմանյան դատարանի կողմից հայերի կոտորածների դատապարտումը:

Գիրքը նախատեսված է արտասահման մեկնող երիտասարդների համար, ովքեր այս կամ այն ձևաչափով քննարկելու են Հայոց ցեղասպանությունը կամ հանդիպումներ են ունենալու թուրք գործընկերների հետ:

Գիրքն անշուշտ շատ հետաքրքիր և ուսանելի կլինի Հայոց ցեղասպանության պատմությամբ հետաքրքրված ընթերցողների լայն շրջանակի համար:

Աշխատանքը բաժանված է մի շարք մասերի, որոնք թույլ են տալիս անհրաժեշտ խորությամբ և ամբողջական ըմբռնել և հասկանալ գրքում ներկայացվող հիմնախնդիրները:

  • Նախաբան
  • Ժխտումից ժխտում
  • Կանխամտածվածության փաստումը Հայոց ցեղասպանությունում
  • Հայոց ցեղասպանության զոհերի թիվը
  • Բռնագաղթը որպես ցեղասպանություն իրականացնելու միջոց
  • Հայերի ինքնապաշտպանական մարտերը 1915 թվականին և Հայոց ցեղասպանությունը
  • Հայոց ցեղասպանության դատապարտումը օսմանյան դատարանում 1919-1920 թթ.
  • Բաց և փակ հայկական ու թուրքական արխիվները Հայոց ցեղասպանության մասին
  • «Արդար հիշողությունը» և «համատեղ ցավը»
ԳԻՐՔՆ ԱՌՑԱՆՑ

Աղբյուրը` armscoop.com

ԵՊՀ գիտխորհրդի նիստում տնօրեն Ս.Առաքելյանը ներկայացրեց մասնաճյուղի տարեկան գործունեության վերաբերյալ հաշվետվությունը

2014թ. դեկտեմբերի 11-ին կայացավ ԵՊՀ գիտխորհրդի` այս տարվա վերջին նիստը:

Օրակարգային վերջին հարցը վերաբերում էր ԵՊՀ Իջևանի մասնաճյուղին:

Տնօրեն Սամվել Առաքելյանը ներկայացրեց մասնաճյուղի տարեկան գործունեության վերաբերյալ հաշվետվությունը:

Նրա խոսքերով` ինչպես նախկինում, այս տարի ևս կրթական ծառայություններ մատուցելուց բացի`մասնաճյուղի ղեկավարությունն իր առջև դրել է շրջանավարտներին աշխատանքով ապահովելու խնդիրը:

«Մեծ ուշադրություն ենք դարձնում կրթության որակին, ինչի համար էլ աշխատում ենք կրթական ծրագրերը հնարավորինս մոտեցնել Մայր բուհի ծրագրերին: Վերջին մեկ տարվա ընթացքում ֆինանսական, բանկային, հաշվապահական, հարկային, մանկավարժական ոլորտներում աշխատանքի ընդունվածների 90%-ը մեր շրջանավարտներն են: Առայժմ չի ստացվում ցանկալի ցուցանիշներ ապահովել «Սերվիս» մասնագիտության գծով»,- ասում է պարոն Առաքելյանը:

Վերջինիս խոսքերով՝ տարին բավականին արդյունավետ է եղել նաև գիտական աշխատանքներ կատարելու տեսանկյունից:

Անցնող տարվա ընթացքում տպագրվել են մասնաճյուղի աշխատակիցների հեղինակած շուրջ 126 գիտական հոդվածներ, մենագրություններ և մեթոդական ձեռնարկներ:

Իսկ տեղի դասախոսներից 7-ը (որոնցից 5-ը հենց մասնաճյուղի շրջանավարտներ են), պաշտպանել են թեկնածուական ատենախոսություններ:

Հաշվետու տարվա ընթացքում ԵՊՀ Իջևանի մասնաճյուղում հիմնադրվել է նաև «Տավուշ» ուսանողական ռազմահայրենասիրական ակումբը, որը սերտ կապեր է պահում մարզի սահմանապահ զորամասերի հետ: Բավականին ակտիվ են աշխատում նաև ուսանողական կառույցները՝ ՈՒԽ-ն և ՈՒԳԸ-ն:

Սերժանտական դասընթացներ` պատանի երկրապահների համար

2014թ. դեկտեմբերի 6-ին ԵՊՀ ԻՄ-ի կիրառական արվեստի ֆակուլտետի դահլիճում տեղի ունեցավ հանդիպում, որին ներկա էին մասնաճյուղի «Տավուշ» ռազմահայրենասիրական ակումբի անդամները, ուսանողներ, Երկրապահ կամավորական միության շարքերում ընդգրկված Իջևանի դպրոցների սաներ, զինղեկներ:

Հանդիպմանը մասնակցում էին Երկրապահ կամավորականների միության վարչության փոխնախագահ Ղ.Ուլիխանյանը, Տավուշի մարզային խորհրդի նախագահ Ռ.Դավթյանը, Հայ Առաքելական Եկեղեցու Իջևանի հոգևոր հովիվ Տեր Սիմեոնը, մասնաճյուղի տնօրեն Ս.Առաքելյանը, Իջևանի զորամասի հրամանատար, գնդապետ Վ.Հովսեփյանը, Տավուշի մարզային փրկարարական վարչության պետ Վ.Հովսեփյանը, ՀՀ Տավուշի մարզպետարանի կրթության, մշակույթի և սպորտի վարչության պետ Կ.Նազարյանը:

Հանդիպման նպատակն էր օգնել ուսումնական հաստատություններին՝ պատշաճ մակարդակով իրականացնելու ռազմահայրենասիրական դաստիարակություն, պատանի երկրապահների համար կազմակերպելու սերժանտական դասընթացներ: Նախաձեռնության հիմքը ՀՀ կրթության և գիտության ու պաշտպանության նախարարությունների և «Երկրապահ կամավորական միություն» հասարակական կազմակերպության կողմից 2014 թվականի սեպտեմբերի 9-ին կնքված փոխըմբռնման հուշագիրն էր:

Միջոցառումը բացվեց Տեր Սիմեոնի օրհնանքով: Մասնակիցները հոտնկայս հնչեցրին «Հայր մեր»-ը և ՀՀ օրհներգը` Իջևանի զորամասի նվագախմբի ուղեկցությամբ:

Ողջույնի և շնորհավորանքի խոսք ասացին Ղ. Ուլիխանյանը, Վ. Հովսեփյանը, Ս.Առաքելյանը և ուրիշներ:

Մասնաճյուղի տնօրենը, դիմելով պատանի կամավորներին, նշեց. «Այսօր մեզ համար, շատ կարևոր է ունենալ այն սերունդը, որը կկարողանա լիարժեք իրականացնել մեր սահմանների պաշտպանությունը: Դուք առաջին ծիծեռնակներն եք, որ ոտք եք դնում սերժանտական դասընթացների: Ձեզ համար մեծագույն հպարտություն պետք է լինի սերժանտական կոչում կրելը: Փոքր ժողովուրդը կարող է մեծ հաջողություն ունենալ, եթե լավ հիմքերի վրա է դրված ռազմահայրենասիրական դաստիարակությունը: Սրտանց շնորհավորում եմ ձեզ և շնորհակալություն հայտնում ձեր ծնողներին, ուսուցիչներին` ճիշտ ուղղությամբ դաստիարակելու և ՀՀ պաշտպանության, կրթության և գիտության նախարարություններին, Երկրապահ կամավորական միությանը` նման նախաձեռնության համար»:

Պարույր Սևակի ծննդյան 90-ամյակին նվիրված գրական-երաժշտական ցերեկույթ

2014թ. դեկտեմբերի 4-ին Հումանիտար գիտությունների ֆակուլտետում կայացավ Պարույր Սևակի ծննդյան 90-ամյակին նվիրված գրական-երաժշտական ցերեկույթ, որը կազմակերպել էր Օտար լեզուների ամբիոնի ասիստենտ, բան, գիտ. թեկնածու Նունե Դավթյանը:

Ցերեկույթին ներկա էին ԵՊՀ ԻՄ-ի պրոֆեսորադասախոսական և վարչական անձնակազմի ներկայացուցիչներ, ուսանողներ, հյուրեր:

Բացման խոսքով հանդես եկավ Ն.Դավթյանը` Պարույր Սևակի կյանքի մասին զեկուցմամբ գեղարվեստորեն գծագրելով նրա ինքնատիպ կերպարը, գրական և մարդկային ազնիվ նկարագիրը, ցույց տալով նրա պատկառելի վաստակը գրական մտքի անդաստանում:

Այնուհետև «Հայոց լեզու և գրականություն» մասնագիտության տարբեր կուրսերի շնորհալի ուսանողները ներկայացրին Պ.Սևակի խորախորհուրդ բանաստեղծություններից և նրա պոեզիայի հիման վրա ստեղծված երգերից («Հարցաթերթիկ», «Օգնի՜ր ինձ, Մարիա՛մ», «Հո՛վ արեք, սարե՛ր ջան», «Սարերի հովին մեռնեմ», «Դլե յաման», «Երևան դարձած իմ Էրեբունի», «Ու ես հասկացա», «Ես ուզում եմ», «Նամակ», «Հուսահատության պահեր», հատվածներ «Անլռելի զանգակատուն» պոեմից, «Գժվում եմ», «Հրավիրում-ուրախանում եմ», «Կենաց», «Երեքնուկ» և այլն):

«Դլե յաման» երգի հուզիչ կատարմանը դուդուկով նվագակցեց փոքրիկ Տարոնը:

Մասնակիցները ներկայացրին նաև հետաքրքիր բեմականացումներ («Խիղճը և իր մարդկային դիմակը», «Իրերի դատն ու դատաստանը», «Դիմակահանդեսի գլխավորը»):

Վերջում ամփոփիչ խոսք ասաց Ն.Դավթյանը` հայտնելով, որ Պարույր Սևակի ծննդյան 90-ամյակին նվիրված հաջորդ միջոցառումը կանցկացվի գրողի հայրենի գուղում և գրական-երաժշտական ցերեկույթը եզրափակեց Սևակին նվիրված իր հեղինակային` «Աշխարհն ափի մեջ» բանաստեղծությամբ.

Հիմա ափի մեջ բախտ չեն որոնում, սիրելի՛ Սևակ,
Ափով են կերտում, ափով են կերտում ճակատագրեր,
Հիմա չեն ելնում շալակն աշխարհի,
Հիմա աշխարհն են ափի մեջ պահում,
Ուզեն` կնետեն գնդակի նման,
Ուզեն` կայրե՛ն, որ մի քիչ տաքանան,
Ու վերջում թեկուզ, թեկուզ մոխրանան:
Մեկը աշխարհն է ափի մեջ պահում,
Մյուսն աշխարհաձև գլուխը մարդու:
Ոմանք աշխարհն են սպառնում ճզմել,
Ոմանք ճզմում են աշխարհը մարդու:

Աշխարհաձև գլուխ-զրոն չէ դարի տերը,
Դեռ գալու է, Պարու՛յր Սևակ, մարդացման դարը,
Մարդակերպից անցում դեպի մարդու հանճարը:

Մարդկայնության տաճարում է մտքերիդ ջահը,
Դեռ գալու է, Պարու՛յր Սևակ, մեծ մարդադարը: