Yerevan State University Ijevan Branch

Դաշտային հետազոտություն Ենոքավանի «Ապագա Տուր» հյուրանոցային համալիրում

2015թ. նոյեմբերի 3-ին «Սերվիս» մասնագիտության IV կուրսի ուսանողները «Հյուրանոցային և ռեստորանային մարքեթինգ» դասընթացի շրջանակներում այցելեցին Ենոքավան համայնքում գործող հյուրանոցային համալիր: 

Այցի նպատակն էր տեսական գիտելիքները կիրառել գործնականում` կատարել դաշտային հետազոտություն և ստանալ հետևյալ հարցերի պատասխանները.

• ինչպիսի՞ն է հյուրանոցային և ռեստորանային ծառայությունների պահանջարկը,

• ի՞նչ ծառայություններ են մատուցվում. դրանց իրականացման ձևերը,

• ո՞րն է բիզնեսի նպատակային շուկան,

• ի՞նչ գնային քաղաքականություն է կիրառվում,

• ինչպիսի՞ն է մրցակցային դաշտը,

• որքա՞ն է մարքեթինգային բյուջեն,

• ի՞նչ մարքեթինգային ռազմավարությամբ է առաջնորդվում բիզնեսը,

• զարգացման ի՞նչ հեռանկարներ կան:

Ուսանողներին դիմավորեցին համալիրի տնօրենը̀ Տիգրան Չիբուխչյանը, երկու աշխատակիցներ̀ Արամն ու Նարեկը (նա, ի դեպ, ԵՊՀ ԻՄ-ի շրջանավարտ է):

Նրանք նախ ուսանողներին ներկայացրին համալիրի լյուքս, դելյուքս և ստանդարտ տիպի հյուրատները, նրանց հիմնական տարբերությունները, գները և լրացուցիչ ծառայությունները̀ ձիարշավներ, երեկոյան խարույկ, ձկնորսություն, սպորտային խաղեր, այցելություն մարզի տեսարժան վայրեր, ինչպես նաև սեփական արտադրության կաթնամթերք և մսամթերք (էկոսնունդ):

Դաշտային հետազոտություն Ենոքավանի «Ապագա Տուր» հյուրանոցային համալիրում

 Յուրաքանչյուր հյուրատան բաց պատշգամբից բացվում էր աշնանային հիասքանչ բնապատկեր:

Պարոն Չիբուխչյանը նշեց, որ համալիրն ընդգրկում է էկո, գյուղական, ռեկրեացիոն և էքստրեմալ տուրիզմի ձևերը, ներկայացրեց նոր` “Zip Line” ծառայությունը, որն առաջինն է ՀՀ-ում:

Նա անակնկալ մատուցեց ուսանողներին` որպես համալսարանից առաջին այցելուների` հնարավորություն տալով նրանց օգտվել ծառայությունից:

Դաշտային հետազոտություն Ենոքավանի «Ապագա Տուր» հյուրանոցային համալիրում

 

Այցելության վերջում համալիրի տնօրենը կատարեց մի քանի գործնական առաջարկ.

• բիզնես համագործակցություն,

• աշխատատեղ (գիդ, մենեջեր, մատուցող, նկարիչ),

• տուրիստական ծառայությունների ոլորտում կարևոր չորս համակարգչային ծրագրերի ուսուցում համալսարանում և ապագա մենեջերների պատրաստում:

Դեպի «Ապագա Տուր» կատարած այցելությունից ուսանողները վերադարձան հաճելի տպավորություններով, հյուրանոցային տնտեսությանը և ընդհանրապես զբոսաշրջությանը վերաբերող օգտակար գիտելիքներով ու գործնական հմտություններով:

Դաշտային հետազոտություն Ենոքավանի «Ապագա Տուր» հյուրանոցային համալիրում

Տնօրենը հանդիպեց Հեռակա ուսուցման բաժնի ուսանողների հետ

2015թ. նոյեմբերի 3-ին ԵՊՀ ԻՄ-ի տնօրեն Սամվել Առաքելյանը հեռակա ուսուցման դասերի մեկնարկի կապակցությամբ հանդիպեց Հեռակա ուսուցման բաժնի ուսանողների հետ:

Տնօրենը հանդիպեց Հեռակա ուսուցման բաժնի ուսանողների հետ

2015-2016 ուսումնական տարում մասնաճյուղն ընդունեց հեռակա ուսուցմամբ 199 առաջին կուրսեցիների: 

Հանդիպմանը ներկա էին Հեռակա ուսուցման բաժնի աշխատակիցները` Մ.Զուրաբյանի գլխավորությամբ, Անձնակազմի կառավարման բաժնի վարիչ Ա.Հովհաննիսյանը, մասնաճյուղի դասախոսներ, ուսանողներ:

Տնօրենը հանդիպեց Հեռակա ուսուցման բաժնի ուսանողների հետ

Հանդիպման ընթացքում մասնաճյուղի տնօրեն Ս.Առաքելյանը հեռակա ուսուցման համակարգի ուսանողներին և մասնավորապես առաջին կուրսեցիներին շնորհավորեց նոր ուսումնական տարվա կապակցությամբ, նրանց մաղթեց, որ լինեն ուսումնատենչ, աշխատասեր, նպատակասլաց, դառնան երկրի օրինավոր քաղաքացիներ ու հայրենիքի արժանավոր զավակներ:

Տնօրենն ընդգծեց նաև, որ յուրաքանչյուր բուհի գնահատականը նրա շրջանավարտներն են: Իր 20-ամյա գործունեության ընթացքում ԵՊՀ Իջևանի մասնաճյուղը տվել է շուրջ 4000 շրջանավարտ, որոնց մեծամասնությունը հաջողությամբ աշխատում է հասարակական կյանքի տարբեր ոլորտներում, պետական և հանրային կառույցներում, բանկային համակարգում և այլն:

Տնօրենը հանդիպեց Հեռակա ուսուցման բաժնի ուսանողների հետ

Շուրջ մեկ տասնյակ շրջանավարտներ պաշտպանել են թեկնածուական ատենախոսություն և աշխատում են մասնաճյուղում:

Նա ուսանողներին ևս մեկ անգամ կոչ արեց ակտիվորեն մասնակցել ուսանողական նախաձեռնություններին, դառնալ համալսարանական միջավայրի լիիրավ ներկայացուցիչներ, հպարտությամբ կրել ԵՊՀ ԻՄ-ի ուսանող լինելու պատիվն ու պատասխանատվությունը:

Գիտական խորհրդի նիստում

2015թ. հոկտեմբերի 31-ին ԵՊՀ Իջևանի մասնաճյուղում տեղի ունեցավ գիտական խորհրդի նիստ` մասնաճյուղի տնօրեն, գիտական խորհրդի նախագահ Ս.Առաքելյանի նախագահությամբ:

Գիտխորհրդի նիստում քննարկվեցին ԵՊՀ ԻՄ-ի` 2016-2020թթ. ռազմավարական ծրագրի նախագիծը, Հայոց լեզվի և գրականության ամբիոնի ասիստենտ, բ.գ.թ. Գ.Մկրտչյանին ԵՊՀ գիտխորհրդում դոցենտի գիտական կոչման համար երաշխավորելու հարցը, մասնաճյուղի մեթոդական խորհրդի և գիտական խորհրդին կից որակի կառավարման հանձնաժողովի կազմերում փոփոխություններ կատարելու վերաբերյալ մի շարք հարցեր:

Գիտական խորհրդի նիստում

 Ընթացիկ հարցերից հատկանշական են ԵՊՀ ԻՄ-ի կառուցվածքում, մասնաճյուղի ուսանողական նպաստների, պետական և ներբուհական կրթաթոշակների հատկացման կանոնակարգում փոփոխություններ կատարելու, ԵՊՀ ԻՄ-ի գերբի, դրոշի, օրհներգի և ոսկե մեդալի նախագծերն ու էսքիզները նախապատրաստելու մասին հարցերը, որոնց կապակցությամբ որոշվեց ստեղծել համապատասխան հանձնաժողովներ և նրանց աշխատանքներն ամփոփել մասնաճյուղի գիտխորհրդի տարեվերջյան նիստում:

Նիստի ընթացքում հաստատվեցին ԵՊՀ ԻՄ-ի գիտական խորհրդի նոր կանոնակարգը և մասնաճյուղի ֆակուլտետների նոր
կանոնադրությունները:

Ուսանողների միջազգային օրվան նվիրված ցուցահանդես

Ուսանողների միջազգային օրվան նվիրված ցուցահանդես

2015թ. նոյեմբերի 17-ին` ժամը 12:30-ին, Իջևանի քաղաքային պատկերասրահում տեղի կունենա ԵՊՀ ԻՄ-ի կիրառական արվեստի ֆակուլտետի պրոֆեսորադասախոսական անձնակազմի ստեղծագործական աշխատանքների ցուցահանդես՝ նվիրված Ուսանողների միջազգային օրվան:

Բոլորին սիրով հրավիրում ենք: