2015թ. սեպտեմբերի 24-ին կայացավ ԵՊՀ գիտխորհրդի՝ այս ուստարվա առաջին նիստը՝ օրակարգային 8 հարցերով:

Մայր բուհի գիտխորհրդի նիստում քննարկվեց նաև մասնաճյուղի` 2016-2017 ուստարվա ընդունելության մասնագիտությունների ցանկը:

Տարածաշրջանում մասնագետների պահանջարկով պայմանավորված` ԵՊՀ Իջևանի մասնաճյուղի ընդունելության մասնագիտությունների ցանկում կատարվել են որոշ փոփոխություններ, որոնց անդրադարձել է ԵՊՀ Իջևանի մասնաճյուղի տնօրեն Սամվել Առաքելյանը:

Մասնավորապես նշվել է, որ ցանկից հանվել են «Հոգեբանություն» և «Կիրառական արվեստ» մասնագիտությունները:

Փոխարենը առաջարկվել են նոր մասնագիտություններ` «Նախազորակոչային զինպատրաստություն» մասնագիտությունը, որը պետք է կադրեր պատրաստի դպրոցների (զինղեկներ) և զինկոմիսարիատների համար, «Տարրական կրթություն և մեթոդիկա», «Սոցիալական աշխատանք», «Համակարգչային գրաֆիկա»:

«Սերվիս» մասնագիտությունը փոխարինվել է «Զբոսաշրջության կառավարում»-ով:

2015թ. սեպտեմբերի 25-ին ԵՊՀ Իջևանի մասնաճյուղում տնօրեն Սամվել Առաքելյանը հանդիպեց Իջևանի ավագ դպրոցի մի խումբ աշակերտների հետ:

Հանդիպմանը ներկա էին նաև Իջևանի ավագ դպրոցի տնօրեն Ա.Խոջայանը, ուսուցիչներ, մասնաճյուղի մասնագիտական կրթության և պրակտիկայի կազմակերպման բաժնի վարիչ Վ.Աղաբաբյանը, աշխատակիցներ, ուսանողներ:

Հանդիպման նպատակն էր մասնագիտական կողմնորոշման հարցում աջակցել աշակերտներին, բուհում գործող մասնագիտությունների վերաբերյալ տալ տեղեկատվություն:

Մասնաճյուղի տնօրենն ընդգծեց մասնագիտության ճիշտ ընտրության կարևորությունը մարդու կյանքում, ներկայացրեց ԵՊՀ ԻՄ-ի` 2016-2017 ուստարվա բակալավրի կրթական ծրագրով մասնագիտությունները, անդրադարձավ դրանց առանձնահատկությունններին և աշխատաշուկայում ունեցած պահանջարկին:

Հատկանշվեց, 2016 թվականին ԵՊՀ Իջևանի մասնաճյուղը, գործող մասնագիտություններից բացի, ընդունելություն է իրականացնելու 5 նոր մասնագիտություններով` «Տարրական մանկավարժություն և մեթոդիկա», «Նախնական զինվորական պատրաստություն», «Սոցիալական աշխատանք», «Զբոսաշրջության կառավարում» և «Համակարգչային գրաֆիկա»:

Յուրաքանչյուր մասնագիտության համար ներկայացվեց ընդունելության քննությունների ցանկը:

Ընդգծվեց, որ 2016-2017 ուստարվա համար ԵՊՀ Իջևանի մասնաճյուղում օտար լեզուների հետ կապված կատարվել են փոփոխություններ («Անգլերեն լեզու և գրականություն» մասնագիտության ուսանողները հավասար ժամաքանակով կանցնեն ֆրանսերեն և հակառակը), որոնց արդյունքում մասնաճյուղը կտա 2 օտար լեզվի համահավասար իմացությամբ շրջանավարտներ:

Հանդիպման վերջում ավագ դպրոցի տնօրեն Ա.Խոջայանը շնորհակալություն հայտնեց պարոն Առաքելյանին` աշակերտներին մասնագիտական կողմնորոշում տալու, ավագ դպրոցի հետ համագործակցելու համար:

2015թ. սեպտեմբերի 22-ին ԵՊՀ ԻՄ-ի տնօրեն, պատմ. գիտ. թեկնածու, դոցենտ Սամվել Առաքելյանը հանդիպում ունեցավ մասնաճյուղի ուսանողական կառույցների` ուսանողական խորհրդի, ուսանողական գիտական ընկերության, «Տավուշ» ռազմահայրենասիրական ակումբի ներկայացուցիչների հետ: 

Հանդիպմանը ներկա էին նաև տնօրենի օգնական Նաթելլա Գրիգորյանը, հասարակայնության հետ կապերի և մամուլի պատասխանատու Հասմիկ Վանյանը:

Տնօրենը ուսանողներին կոչ արեց լինել ուսումնատենչ, ակտիվ, նպատակասլաց, հաճախակի կազմակերպել միջոցառումներ, գիտաժողովներ, բանավեճեր, ինտելեկտուալ խաղեր, մասնակցել տարբեր մրցույթների:

«Ուսանողը պիտի ունենա մե՛կ նպատակ` ստանալ որակյալ կրթություն, իսկ այն, որ մեր համալսարանը պատրաստ է տալու նման կրթություն, դա ակնհայտ է. վկան մեր լավագույն շրջանավարտներն են, որոնք հաջողությամբ աշխատում են հասարակական կյանքի տարբեր ոլորտներում, պետական և հանրային կառույցներում, բանկային համակարգում,- իր խոսքում ընդգծեց Ս.Առաքելյանը: -Մենք ամեն ջանք ու եռանդ գործադրում ենք մասնաճյուղում կրթության անհրաժեշտ որակ ապահովելու համար»:

Հանդիպման ընթացքում ուսանողներն առաջադրեցին ուսումնական գործընթացին վերաբերող խնդիրներ, ստացան իրենց հետաքրքրող հարցերի պատասխանները:

2015թ. սեպտեմբերի 17-ին Երևանում ներկայացվեցին ԵԱՀԿ աջակցությամբ իրականացված ուսումնասիրության արդյունքներն ու առաջարկությունները:

Ուսումնասիրության նպատակն էր բացահայտել ուսանողների տեղեկացվածության աստիճանը ու վերաբերմունքը Հայաստանում իրականացվող կրթական բարեփոխումների վերաբերյալ:

Հետազոտությունը իրականացվել է 1723 ուսանողների շրջանում՝ Երևանի և մարզերի 37 պետական (այդ թվում` ԵՊՀ Իջևանի մասնաճյուղի), մասնավոր և միջկառավարական բարձրագույն ուսումնական հաստատությունների մասնակցությամբ:

Անհատական հարցազրույցները իրականացվել էին 2014թ. հոկտեմբերից 2015թ. ապրիլի ժամանակահատվածում:

Ուսումնասիրության արդյունքում հայտնաբերվել է, որ Բոլոնյայի բարեփոխումները Հայաստանում իրականացվում են բավարար մակարդակի վրա:

Ուսանողների 57% կարծում է, որ կրթական համակարգում իրականացվել են խորը և էական փոփոխություններ: Սակայն, ուսանողների մեծ մասը չի կարող հստակ բացատրել, թե ինչ են իրենցից ներկայացնում Բոլոնիայի բարեփոխումները և կապում են դրանք նոր գնահատման համակարգի, բարձրագույն կրթության որակի ապահովման կամ ուսանողակենտրոն ուսուցման հետ:

«Կրթության իրավունքը մարդու հիմնարար իրավունքներից մեկն է և սերտ կապված է երկրում անվտանգության հետ»,- նշեց ԵԱՀԿ երևանյան գրասենյակի Մարդու իրավունքների ծրագրերի պատասխանատու Ռադկա Ռուբիլինան: «Կրթական համակարգի վերաբերյալ տեղեկատվությունը պետք է լինի մատչելի և հասկանալի: Նման կրթական համակարգն է առաջադեմ հասարակության և կայուն տնտեսության երաշխիքը»:

Զեկույցը ԵԱՀԿ երևանյան գրասենյակի աջակցությամբ իրականացրել էր Հայաստանի ուսանողական ազգային ասոցիացիան, որը համահավաք մարմին է և ներկայացնում է ուսանողների շահերը 17 տեղական միությունների միջոցով:

Ուսումնասիրությունը տրամադրում է վիճակագրական տվյալներ պետությունում տեղի ունեցող բարեփոխումների վերաբերյալ ուսանողների ընկալումների մասին և առաջարկում փոփոխություններ ներկա իրավիճակը բարելավելու համար:

Հայաստանի ուսանողական ազգային ասոցիացիայի նախագահ Արմեն Ալեքսանյանը հավելեց. «Մեր օրերում գիտելիքն ու կրթությունը ամենակարևոր ռեսուրսներն են, որոնց միջոցով էլ հենց կերտվում է վաղվա ապագան, ինչքան որակյալ լինի այդ ռեսուրսը, այդքան ավելի շատ են երաշխիքները, որ վաղը կունենանք ամուր հիմքերով պետություն: Ուսանողությունը՝ որպես հասարակության ամենակտիվ խավ, պետք է մասնակցի իր կրթության որակի գնահատմանը և ներկայացնի իր տեսակետը գալիք սերունդների համար առավել որակյալ կրթություն ապահովելու համար»:

Մարզերի ուսանողները ավելի գոհ են բարեփոխումների արդյունավետությունից՝ ի տարբերություն մայրաքաղաքի ուսանողությանը, ինչը կարող է պայմանավորված լինել որակյալ կրթություն ստանալու պահանջների տարբերությամբ:

Հետաքրքրական է, որ Բոլոնիայի համակարգի ազդեցության վերաբերյալ դրական ընկալումը նվազում է ուսման տարիներին զուգահեռ:

Ուսանողների թիվը, ում կարծիքով Բոլոնիայի համակարգը մակերեսային է, առանց էական փոփոխությունների, ավելի մեծ է բարձր կուրսի ուսանողների շրջանում՝ թե՛ բակալավրի, և թե՛ մագիստրոսի կրթական ծրագրերում` ի տարբերություն ցածր կուրսերի ուսանողների:

Զեկույցի հայերեն տարբերակը կարող եք գտնել այստեղ: 

Աղբյուրը` www.osce.org