2015թ. նոյեմբերի 18-ին ԵՊՀ Իջևանի մասնաճյուղում կայացավ սեղանի թենիսի մասնաճյուղային առաջնություն` նվիրված Ուսանողների միջազգային օրվան:

Առաջնությանը մասնակցում էին թվով 15 մարզիկ-մարզուհիներ:

Խաղերն անցկացվեցին շրջանաձև եղանակով:

Տղաներից եզրափակիչ դուրս եկան Հեռակա ուսուցման բաժնի «Տնտեսագիտության տեսություն» մասնագիտության երրորդ կուրսի ուսանող Շավարշ Կիրակոսյանը և «Սերվիս» մասնագիտության երկրորդ կուրսի ուսանող Անդրանիկ Ղալթախչյանը:

2:0 հաշվով հաղթելով մրցակցին` Շավարշ Կիրակոսյանը գրավեց առաջին տեղը:

Աղջիկներից առաջին տեղը գրավեց «Մանկավարժություն և հոգեբանություն» մասնագիտության երրորդ կուրսի ուսանողուհի Աննա Հարությունյանը` 2:1 հաշվով հաղթելով «Անգլերեն լեզու և գրականություն» մասնագիտության առաջին կուրսի ուսանողուհի Էմիլիա Փայտյանին:

Հաղթողները տնօրենության կողմից պարգևատրվեցին հուշանվերներով:

2015թ. նոյեմբերի 18-ին ԵՊՀ ԻՄ-ի կիրառական արվեստի ֆակուլտետի դահլիճում տեղի ունեցավ Ուսանողների միջազգային օրվան նվիրված գրական-երաժշական միջոցառում, որը նախաձեռնել և կազմակերպել էր մասնաճյուղի ուսանողական խորհուրդը:

Ներկա էին ԵՊՀ ԻՄ-ի վարչական և պրոֆեսորադասախոսական անձնակազմի ներկայացուցիչներ, ուսանողներ, մարզի հոգևոր ոլորտի ներկայացուցիչներ, Իջևանում տեղակայված N զորամասի նվագախմբի տղաները, ծնողներ, հյուրեր:

Միջոցառումն սկսվեց տերունական աղոթքով, ապա բացման խոսք ասաց Ուսանողական խորհրդի նախագահ Ռազմիկ Հովսեփյանը` շնորհավորելով իրենց` ուսանողների տոնը, նշելով, որ ուսանողությունը հասարակության շարժիչ ուժն է, պետության հզորության ու քաղաքացու բարեկեցության գրավականը, ըստ այդմ` ուսանողներին հորդորեց լինել առավել ուսումնատենչ, նպատակասլաց, շեշտեց, որ ուսխորհուրդը ամեն ինչ կանի, որ ավելի հետաքրքիր դարձնի ուսանողական առօրյան:

Այնուհետև մասնաճյուղի շնորհալի ուսանողները հանդես եկան համապատասխան բանաստեղծություններով ու երգերով, պարային գեղեցիկ կատարումներով:

Տոնական դահլիճում թևածեց սիրո մեղեդին, բեմի վրա ալիքվեց նաիրյան աղջկա հեզաճկուն պարը, և պտույտ գործեց շնորհագեղ զույգի խելահեղ վալսը:

Ազգային-հայրենասիրական երգերով ու երաժշտական խրոխտ կատարումներով ուսանողներին միացան Իջևանում տեղակայված զորամասի նվագախմբի տղաները:

Միջոցառումը եզրափակվեց մասնաճյուղի տնօրեն Ս.Առաքելյանի ելույթով:

Ուսանողների միջազգային օրվա կապակցությամբ տնօրենը ողջունեց ու շնորհավորեց բոլոր ուսանողներին, շնորհակալություն հայտնեց կազմակերպված միջոցառման համար, մասնավորապես նշեց, որ երիտասարդությունը բավականին գեղեցիկ, հրաշալի տարիք է, ուսանողական տարիները մարդու կյանքի լավագույն և անմոռանալի տարիներն են, ուսանողներին կոչ արեց լիարժեք ապրել այս կյանքը, մինչև վերջին կաթիլը վայելել ուսանողական տարիները, լինել լավատես, երբևէ չկորցնել վաղվա լավ օրվա` պայծառ գալիքի հանդեպ հավատը:

Միջոցառման բոլոր լուսանկարները տե՛ս Պատկերասրահում:

2015թ. նոյեմբերի 17-ին Իջևանի քաղաքային պատկերասրահում բացվեց ԵՊՀ ԻՄ-ի կիրառական արվեստի ֆակուլտետի դասախոսների ստեղծագործությունների ցուցահանդեսը` նվիրված Ուսանողների միջազգային օրվան:

Ցուցահանդեսի հանդիսավոր բացմանը մասնակցում էին ԵՊՀ ԻՄ-ի տնօրեն Ս.Առաքելյանը, մասնաճյուղի վարչական և պրոֆեսորադասախոսական անձնակազմի ներկայացուցիչներ, Իջևանում տեղակայված N զորամասի զինվորներ` զորամասի հրամանատարի տեղակալ, փոխգնդապետ Հ.Սահակյանի գլխավորությամբ, Իջևանի քաղաքապետարանի կրթության և մշակույթի հարցերով պատասխանատու Լ.Ղալումյանը, քաղաքային պատկերասրահի աշխատակիցներ, ուսանողներ, լրագրողներ, հյուրեր, այցելուներ:

Բացման խոսքով հանդես եկան ՀՀ նկարիչների միության անդամ, ԵՊՀ ԻՄ-ի գծանկարի, գունանկարի և քանդակի ամբիոնի դոցենտ, ցուցահանդեսի անմիջական կազմակերպիչ Հ.Ասատրյանը և մասնաճյուղի տնօրեն Ս.Առաքելյանը` ողջունելով բոլոր մասնակիցներին, ներկայացնելով ցուցահանդեսի կազմակերպման նպատակը, այն է` Ուսանողության միջազգային օրվա առթիվ դասախոսների կողմից գեղեցիկ նվեր մատուցել իրենց սիրելի ուսանողներին, շնորհավորելով նրանց տոնը, հղելով բարեմաղթանքներ:

Ողջույնի, շնորհավորանքի ու երախտիքի խոսք ասացին Իջևանի քաղաքապետարանի կրթության և մշակույթի հարցերով պատասխանատու Լ.Ղալումյանը, Իջևանում տեղակայված զորամասի հրամանատարի տեղակալ, փոխգնդապետ Հ.Սահակյանը:

Ցուցասրահում ներկայացված էին Կիրառական արվեստի ֆակուլտետի դասախոսների շուրջ 60 բազմաոճ ու բազմաժանր (գեղանկար, գրաֆիկական աշխատանք, գոբելեն, կոլաժ, բնանկար, նատյուրմորտ և այլն) աշխատանքներ:

Ցուցահանդեսը, որ կազմակերպված էր բարձր մակարդակով, գեղագիտական հաճույք պատճառեց թե՛ ուսանողներին և թե՛ բոլոր այցելուներին: Այն կտևի մեկ շաբաթ: