2017թ. հոկտեմբերի 23-ին ԵՊՀ Իջևանի մասնաճյուղի տնօրեն Ս. Ա. Առաքելյանը հանդիպեց Հեռակա ուսուցման բաժնի աշխատակիցների հետ:

Հանդիպման ընթացքում քննարկվեցին 2017-2018 ուստարվա առաջին կիսամյակի դասերի նախապատրաստական աշխատանքներին վերաբերող հարցեր:

Հեռակա ուսուցման բաժնի վարիչ Մ.Զուրաբյանը նշեց, որ կազմված են բոլոր մասնագիտությունների գծով դասացուցակները, հստակեցված է ողջ լսարանային ֆոնդը, իրականացված են բոլոր անհրաժեշտ աշխատանքները  2017-18 ուստարին պատշաճ դիմավորելու համար:

Տնօրենը բաժնի աշխատակիցներին հանձնարարեց հետևողական լինել ուսանողական զեղչերի դիմումների, ավարտական կուրսերում ամփոփիչ ատեստավորման քննությունների հարցաշարերի և ընդհանրապես այս կիսամյակի ուսումնական գործընթացի կազմակերպմանը վերաբերող հարցերում, ակտիվորեն համագործակցել համապատասխան ամբիոնների և մասնագիտությունների կրթական ծրագրերի պատասխանատուների հետ:   

2017-18 ուստարվա առաջին կիսամյակի դասերի նախապատրաստական աշխատանքներն ամփոփելով ՝ դրանք գնահատվեցին բավարար:

2017թ. հոկտեմբերի 18-21-ը Երևանում  կայացավ «Մեքենայական ուսուցումը՝ գիտական հայտնագործությունների խթան» թեմայով միջազգային աշխատաժողովը, որը կազմակերպել էր Հայաստանի գիտության և տեխնոլոգիաների հիմնադրամը (FAST)՝ ԱՄՆ-ի գիտության ազգային հիմնադրամի (NSF) հետ համագործակցությամբ:

Աշխատաժողովն աշխարհի տարբեր ծագերից իր շուրջն էր համախմբել տվյալագիտության (Data Sciences) և հարակից գիտակարգերով զբաղվող ավելի քան 200 գիտնականի ու մասնագետի, այդ թվում՝ ԵՊՀ Իջևանի մասնաճյուղի ծրագրավորման և ինֆորմացիոն տեխնոլոգիաների ամբիոնի դոցենտ, տեխն., գիտ. թեկնածու Աննա Սմբատի Սիմոնյանին:

Քառօրյա աշխատաժողովի բացման արարողությունը կատարվեց ՀՀ նախագահի ողջույնի խոսքով: Այնուհետև ելույթ ունեցան վարչապետը, Կրթության և գիտության նախարարը, ինչպես նաև հիմնադիրները և կազմակերպիչները:

“FAST”-ի համահիմնադիր, վենչուրային կապիտալիստ, գիտնական Նուբար Աֆեյանը նշեց, որ գործընկերոջ՝ Ռուբեն Վարդանյանի հետ 16 տարի առաջ սկսել են մտածել Հայաստանի տնտեսության զարգացման ուղղությամբ՝ Հայաստանում գիտության ու տեխնոլոգիաների զարգացման միջոցով:

Աշխատաժողովի համանախագահ, ԱՄՆ Իլինոյսի համալսարանի պրոֆեսոր Նաիրա Հովակիմյանը նշեց, որ այս հանդիպումը նաև երիտասարդների գաղափարները լսելուն է ուղղված:

Հարավային Կալիֆորնիայի համալսարանի ինֆորմացիոն գիտության ինստիտուտի մեքենայական բանականության և տվյալագիտության խմբի ղեկավար Արամ Գալստյանն ընդգծեց, որ դժվար է թերագնահատել մեքենաների ուսուցման և տվյալագիտության մեջ տեղի ունեցած հիմնարար վերափոխումները, որոնք մեծապես ազդում են գիտական այլ ճյուղերի ու մարդկանց կյանքի վրա:

ԵՊՀ Իջևանի մասնաճյուղում տրված հարցազրույցի ընթացքում Աննա Սիմոնյանը, խոսելով «Մեքենայական ուսուցումը՝ գիտական հայտնագործությունների խթան» թեմայով միջազգային աշխատաժողովին մասնակցության և արդյունքների վերաբերյալ, մասնավորապես նշեց. «Աշխատաժողովը շատ հագեցած էր մասնագիտական, ուսուցողական թեմաներով: Հերթական արդյունաբերական հեղափոխության ենք ականտես լինում. առանց վարորդ մեքենաներ, ավտոմատացված ապարատային թագմանություններ, կենսագիտության, բժշկական, նույնիսկ հասարագիտության  ոլորտի զարգացումներ, որոնք խթանում են գիտական  և տեխնոլոգիական զարգացումները:

Ինձ համար մեծ պատիվ էր ներկա գտնվել նման բարձրակարգ միջազգային աշխատաժողովի, որի ընթացքում ծանոթացա և շփվեցի բազմաթիվ գիտնականների, մասնավորապես ԱՄՆ Իլինոյսի համալսարանի պրոֆեսոր Նաիրա Հովակիմյանի, Վ.Հարիկյանի  և այլոց հետ: Հանդիպման ընթացքում նաև հրավերք ստացա ուսանողների խմբի հետ հետազոտական դասընթաց անցնել Մոսկվայի պետական տեխնիկական համալսարանում՝ Յուրի Գագարինի անվան հետազոտական կենտրոնում: Հուսով եմ, որ նման փորձը, գիտնականների հետ ցանցի ստեղծումը և շփումները խթան կդառնան մեծացնելու մեր ուսանողների խանդավառությունը ուսումնառության և  գիտատեխնիկական նորույթների նմատմամբ»:

2017թ. հոկտեմբերի 21-ին ԵՊՀ Իջևանի մասնաճյուղ այցելեցին ԵՊՀ աշխարհագրության և երկրաբանության ֆակուլտետի շուրջ 30 ուսանողներ՝ ԵՊՀ սերվիսի ամբիոնի վարիչ, աշխ. գիտ. թեկն., դոցենտ Ս.Սուվարյանի և նույն ամբիոնի ասիստենտ, աշխ. գիտ. թեկնածու Գ.Ալեքսանյանի ուղեկցությամբ:

 Այցելությունը կազմակերպվել էր  ԵՊՀ աշխարհագրության և երկրաբանության ֆակուլտետի ուսանողական գիտական ընկերության նախաձեռնությամբ, Մայր բուհի և նրա մասնաճյուղի նույն («Սերվիս») մասնագիտությամբ ուսանողների միջև համագործակցություն հաստատելու նպատակով:

ԵՊՀ Իջևանի մասնաճյուղում նախ կայացավ հանդիպում՝ հյուրերի և ԵՊՀ ԻՄ-ի տնօրենի, Տուրիզմի կառավարման և մշակութաբանության ամբիոնի դասախոսների, «Սերվիս» մասնագիտության ուսանողների մասնակցությամբ:      

Ելույթ ունեցավ ԵՊՀ ԻՄ-ի տնօրեն Ս. Ա. Առաքելյանը` բարի գալուստ մաղթելով համալսարանականներին, ողջունելով ուսանողների գեղեցիկ նախաձեռնությունը, ընդհանուր գծերով անդրադառնալով մասնաճյուղում գործող «Սերվիս» մասնագիտությանը, տարածաշրջանով ու աշխատաշուկայի պահանջներով պայմանավորված առանձնահատկություններին, կրած փոփոխություններին, մասնավորապես՝ այս տարի «Սերվիս»ը «Զբոսաշրջություն» մասնագիտությամբ փոխարինելու նպատակահարմարությանը և այլն: Տնօրենը ևս մեկ անգամ շնորհակալություն հայտնեց «Սերվիս» մասնագիտության ուսանողներին՝ այցելության համար, համոզմունք արտահայտեց, որ նրանք ճիշտ են կողմնորոշվել՝ ընտրելով այս հեռանկարային մասնագիտությունը, որով ոչ միայն կապահովեն իրենց ընտանիքը, այլև կնպաստեն մեր երկրի տնտեսության զարգացմանը:    

Այնուհետև տեղի ունեցավ Տավուշի մարզի զբոսաշրջային ներուժի վերաբերյալ սեմինար-քննարկում, որի ընթացքում համատեղ զեկուցումով հանդես եկան ԵՊՀ-ի ուսանողներ Անահիտ Սուքիասյանը և Վարդիթեր Հայրապետյանը: Իրենց զեկուցման մեջ Անահիտն ու Վարդիթերն անդրադարձան  մարզում զարգացած և զարգանալու ներուժ ունեցող զբոսաշրջության տեսակներին (էկոտուրիզմ, արկածային տուրիզմ, գյուղական, կրոնական, ռեկրեացիոն, կրթական, մշակութային, կամավորական տուրիզմ), փորձեցին համատեղ պարզել խոչընդոտները և ներկայացնել դրանք վերացնելու ուղղությամբ առաջարկություններ:

Զեկուցմանը հաջորդեց քննարկում, որին ակտիվորեն մասնակցեցին ոչ միայն ուսանողները, այլև դասախոսները՝  ԵՊՀ-ի սերվիսի ամբիոնի վարիչ, ա.գ.թ., դոցենտ Ս.Սուվարյանը, նույն ամբիոնի ասիստենտ, ա.գ.թ. Գ.Ալեքսանյանը, ԵՊՀ ԻՄ-ի տուրիզմի կառավարման և մշակութաբանության ամբիոնի վարիչ, ա.գ.թ., դոցենտ Գ.Հովհաննիսյանը, նույն ամբիոնի դասախոսներ, ա.գ.թ., դոցենտ Ա.Պոտոսյանը, ասիստենտներ Պ.Ասիլբեկյանը և Ա.Ուլիխանյանը:

ԵՊՀ-ի սերվիսի ամբիոնի դասախոս (ծագումով՝ Տավուշի մարզից) Գոռ Ալեքսանյանն ուսանողներին կոչ արեց, համագործակցելով տուրիստական ընկերությունների հետ, կազմակերպել մեծ ներդրում չպահանջող երիտասարդական արշավներ, որոնք հնարավորություն կտան մեծապես ճանաչելի դարձնելու և դեպի իրենց գրավելու մարզի ոչ այնքան հայտնի, բայց զբոսաշրջային հետաքրքրություն ներկայացնող վայրերը:

Քննարկումից հետո ԵՊՀ ԻՄ-ի տուրիզմի կառավարման և մշակութաբանության ամբիոնի ասիստենտ, կրթական ծրագրի պատասխանատու Պավել Ասիլբեկյանը հյուրերին ուղեկցեց Տավուշի մարզի տուրիզմի զարգացման հետազոտական կենտրոն, որտեղ նրանք մոտիկից ծանոթացան կենտրոնի գործունեությանը, նպատակներին ու խնդիրներին:

Երկկողմ համագործակցությունը զարգացնելու նպատակով պայմանավորվածություն ձեռք բերվեց հաջորդ հանդիպումը կազմակերպել ԵՊՀ-ում, որտեղ մասնաճյուղի ուսանողները հանդես կգան զեկուցումներով: 

2017թ. հոկտեմբերի 19-ին` Եղիշե Չարենցի ծննդյան 120-րդ տարեդարձի առթիվ, ԵՊՀ Իջևանի մասնաճյուղում կայացավ «Չարենց. Մի ճրագ մթում» ֆիլմի ցուցադրություն-քննարկումը, որը համատեղ կազմակերպել էին Հումանիտար գիտությունների ֆակուլտետի ուսանողական գիտական ընկերությունը (ՈՒԳԸ) և ԵՊՀ ԻՄ-ի «Հինգշաբթի» գրական-գեղարվեստական ակումբը:

Ներկա էին ԵՊՀ ԻՄ-ի տարբեր մասնագիտությունների (գլխավորապես «Հայոց լեզու և գրականություն» մասնագիտության) ուսանողներ, «Հինգշաբթի» գրական-գեղարվեստական ակումբի անդամները, Հայոց լեզվի և գրականության ամբիոնի դասախոսներ:

«Չարենց. Մի ճրագ մթում» ֆիլմի ցուցադրությանը զուգահեռ  ներկայացվեցին Եղիշե Չարենցի կյանքի և գործունեության հիմնական դրվագները:

Հայոց լեզվի և գրականության ամբիոնի դասախոսներ, բ.գ.թ., դոցենտ Խ. Վարդանյանը և բ.գ.թ., ասիստենտ Ա.Հասանյանը վերհանեցին կենսագրական հետաքրքիր փաստեր, մեծն  Չարենցի հետ կապված ջերմագին հուշեր, արտահայտեցին նրա ստեղծագործության վերաբերյալ իրենց տեսակետները:

Եղիշե Չարենցի ծննդյան 120-րդ տարեդարձը համալսարանականների համար գեղեցիկ առիթ էր ևս մեկ անգամ արժևորելու հայ խոշորագույն գրողի պատկառելի վաստակը, ճանաչելու նրա մարդկային հարուստ կերպարն ու գրական ժառանգությունը: