Երևանի պետական համալսարանի Իջևանի մասնաճյուղ

Մասնաճյուղում կայացավ «Ֆոնդահայթայթում» թեմայով ներածական դասընթաց

   IMG_9793-10-11-18-10-38

 2018թ. նոյեմբերի 9-ին ԵՊՀ Իջևանի մասնաճյուղում կայացավ  «Ֆոնդահայթայթում» թեմայով ներածական դասընթաց, որը վարեց WWF  Հայաստան (World Wildlife Fund, բնության համաշխարհային հիմնադրամ) միջազգային կազմակերպության  ֆոնդահայթայթման և համագործակցության մենեջեր Հայկ Տիրատուրյանը:

Դասընթացին մասնակցում էին ԵՊՀ Իջևանի մասնաճյուղի վարչական ու պրոֆեսորադասախոսական անձնակազմի ներկայացուցիչներ և ուսանողներ:

«Ֆոնդահայթայթում» դասընթացի նպատակն էր ուսանողներին ծանոթացնել «ֆոնդահայթայթում» տերմինին, պարզաբանել ֆոնդահայթայթման տեսակները և միտումները, ներկայացնել ֆինանսավորման համար WWF Հայաստան միջազգային կազմակերպության կողմից ներկայացվող ծրագրերը:

Դասընթացավար Հայկ Տիրատուրյանը բացատրեց «քրաունդֆանդինգ» (Crowdfunding, crowd – բազմություն, fund – ֆինանսավորել) միջազգային եզրույթը, որը համարվում է ֆոնդահայթայթման կարևորագույն տեսակներից մեկը, նշեց վերջինիս առավելությունները, թերություններն ու ռիսկերը:

Ներկայացվեց լավագույնս ֆինանսավորված՝ GPS համակարգ և ներկառուցված տեսախցիկ ունեցող բազմաֆունկցիոնալ դրամապանակներ արտադրող “Volterman” ընկերության մասին, որին երրորդ փորձից հաջողվել է ստանալ 2.677.616 (երկու միլիոն վեց հարյուր յոթանասունյոթ հազար վեց հարյուր տասնվեց) ԱՄՆ դոլար ֆինանսավորում:

Դասընթացի ժամանակ համառոտ ներկայացվեցին նաև WWF Հայաստան կազմակերպության գործառույթները, մի շարք ծրագրեր ու նախագծեր, ինչպիսին է, օրինակ, «Կենդանիների որդեգրում» նախագիծը: Նշվեց, թե ռազմավարական ինչ գործողություններ են կիրառվել այդ նախագիծը ֆինանսավորելու համար (օրինակ՝ ֆինանսավորող անձանց կամ ընկերություններին տրամադրել նվերներ և հավաստագրեր):

«Ֆոնդահայթայթում» թեմայով ներածական դասընթացն ուղեկցվեց ակտիվ քննարկումներով, ուսանողները դասընթացավարին ուղղեցին իրենց հետաքրքրող հարցերը և ստացան սպառիչ պատասխաններ:

Մասնաճյուղում կայացավ «Ծանոթություն PR-ին» թեմայով դասընթաց

IMG_9734-10-11-18-10-24 2018թ. նոյեմբերի 9-ին ԵՊՀ Իջևանի մասնաճյուղում տեղի ունեցավ «Ծանոթություն PR-ին» թեմայով դասընթաց-քննարկում, որը վարեց WWF Հայաստանի հաղորդակցությունների և համագործակցության բաժնի ղեկավար Հերմինե Հակոբյանը:

Քննարկմանը մասնակցում էին ԵՊՀ Իջևանի մասնաճյուղի տարբեր մասնագիտությունների ուսանողներ և աշխատակիցներ:

Դասընթաց-քննարկման նպատակն էր ներկայացնել գրագետ PR-ի (Public Relations – հանրային կապեր) առանձնահատկությունները, ինչպես նաև խոսել PR-ի գործիքների, ժամանակակից աշխարհում դրա ազդեցության և նշանակության մասին:

Սկզբում ներկայացվեցին PR-ի ձևավորման նախադրյալները, հանրային կապերի էությունը, բացատրվեց, թե ինչ է սև PR-ը:

Դասընթացավար Հերմինե Հակոբյանն ընդգծեց, որ PR-ը մի երևույթ է, որը հսկում է քո հեղինակությունը՝ նպատակ ունենալով լսարանից ստանալ աջակցություն, լսարանի կարծիքի և վարքագծի վրա ազդելու հնարավորություն:

Ուսանողներն ակտիվորեն մասնակցեցին քննարկմանը՝ ներկայացնելով թեմայի վերաբերյալ իրենց պատկերացումներն ու տեսակետները: 

Քննարկման վերջում ցուցադրվեց PR-ի պատմության և դրա զարգացման փուլերի վերաբերյալ հոլովակ:

Հերմինե Հակոբյանն իր գոհունակությունն արտահայտեց դասընթացին մեր ուսանողների ակտիվ մասնակցության ու հետաքրքրվածության վերաբերյալ՝ պատրաստակամություն հայտնելով համագործակցությունը շարունակելու հարցում:

Բազկամարտի մասնաճյուղային առաջնության հրավեր

dc-Cover-bsnudco08r3igtj44duecnr7m4-20180420234456.Medi 2018թ. նոյեմբերի 14-ին՝ ժամը 15։00-ին՝ Ուսանողների միջազգային օրվան ընդառաջ, ԵՊՀ Իջևանի մասնաճյուղի  մարզադահլիճում տեղի կունենա բազկամարտի մասնաճյուղային առաջնություն: Մասնակցել ցանկացողները կարող են մինչև ս.թ. նոյեմբերի 13-ը ներառյալ   դիմել Արտակարգ իրավիճակների, մարմնակրթության և սպորտի  ամբիոն՝ դասախոսներ Պ.Կարապետյանին (հեռ.՝ 098 69 29 39) և Ն.Ղարիբյանին (հեռ.՝ 077 37 87 07):

Բոլորին սիրով հրավիրում ենք:

Կայացավ «Մեդիագրագիտություն. լրագրությունն ու հասարակությունը» թեմայով դասընթաց-քննարկում

    DSCN4550

 2018թ.նոյեմբերի 8-ին ԵՊՀ Իջևանի մասնաճյուղում տեղի ունեցավ «Մեդիագրագիտություն. լրագրությունն ու հասարակությունը» թեմայով դասընթաց-քննարկում, որը կազմակերպվել էր Եվրասիա համագործակցություն հիմնադրամի հյուսիսային մասնաճյուղի և «Երևանի պետական համալսարան» հիմնադրամի Իջևանի մասնաճյուղի համատեղ ջանքերով:

Դասընթացը վարեց Եվրասիա համագործակցություն հիմնադրամի հյուսիսային մասնաճյուղի ծրագրերի համակարգող Վարսիկ Ներկարարյանը:
Դասընթաց-քննարկմանը մասնակցում էին ԵՊՀ ԻՄ-ի լրագրության խմբի ուսանողներ, շրջանավարտների և արտաքին շահակիցների հետ տարվող աշխատանքների համակարգողը, հասարակայնության հետ կապերի և մամուլի պատասխանատուն:
Դասընթացի նպատակն էր ուսանողներին ծանոթացնել մեդիայի էությանը, նպատակին ու խնդիրներին, մեդիագրագիտության հիմունքներին, պարզաբանել լրագրություն-հասարակություն կապը և հասարակության վրա մեդիայի ազդեցությունը:
Ներկայացվեց, թե ինչ է մեդիան, որոնք են մեդիա գործիքերը, ինչպես կողմնորոշվել ժամանակակից մեդիահոսքերում, տարբերել ճշմարիտ և կեղծ ինֆորմացիան:
Ընդգծվեց, որ մեդիագրագիտության դասընթացների նպատակը ոչ այնքան գրագետ մեդիա արտադրող, որքան գրագետ մեդիա սպառող ձևավորելն է, իսկ վերջինիս համար նախ և առաջ պետք է հասկանալ, թե ինչպես է ստեղծվում մեդիան:
Այդ նպատակով դասընթացի ժամանակ կազմակերպված խմբային աշխատանքների ու դերային խաղերի միջոցով մասնակիցներին ներկայացվեց, թե ինչպես է իրականում ստեղծվում մեդիան:
Դերային խաղերը մասնակցիներին նաև օգնեցին ավելի լավ հասկանալու, թե ինչպես են մեդիաները թիրախավորում իրենց լսարաններին, և թե ինչպես պետք է որպես մեդիասպառող դա հասկանալ ու խելամիտ որոշումներ կայացնել:
Դասընթացի ժամանակ ծավալվեց նաև արդյունավետ քննարկում Հայաստանի ներկայիս մեդիա ստեղծողների և հասարակության վրա դրանց ունեցած ազդեցությունների շուրջ:
«Մեդիագրագիտություն. լրագրությունն ու հասարակությունը» թեմայով դասընթաց-քննարկման վերջում մասնակիցներին տրվեցին հավաստագրեր:

Հավաստագրերի հանձնման լուսանկարները տե՛ս Պատկերասրահում:

Կայացան ՄԿՊԿ բաժնի հերթական հանդիպումները Տավուշի մարզի դպրոցներում

20181109_093234

 2018թ. նոյեմբերի 7-ին և 9-ին ԵՊՀ ԻՄ-ի մասնագիտական կողմնորոշման և պրակտիկայի կազմակերպման բաժինը հանդիպումներ է ունեցել Տավուշի մարզի Աչաջուր գյուղի միջնակարգ դպրոցի և Դիլիջանի տարածաշրջանի ավագ և միջնակարգ դպրոցների  աշակերտների հետ:

Հանդիպումներին մասնակցել են ԵՊՀ ԻՄ-ի տնօրենի պաշտոնակատար Ա. Վ. Ցուցուլյանը, Ուսումնամեթոդական վարչության պետ Ա.Դավթյանը, ՈՒՄՎ ՄԿՊԿ բաժնի վարիչ Լ.Բեգինյանը, ՈՒՄՎ ՈՒԳՊՎ բաժնի աշխատակից Ա.Մանուչարյանը, դպրոցների տնօ­րեն­ները, ուսուցիչները և աշակերտները:

Հանդիպումների նպատակն էր մաս­նագիտական կողմնորոշման աշխա­տանքներ իրակա­նացնել հանրա­կրթա­կան դպրոցներում, ավարտական դասարանի աշակերտներին իրազեկել մասնաճյուղի՝ 2019թ. ընդունելության մասնագիտությունների և կրթա­կան ծրագ­րերի վերաբերյալ:

Համալսարանականները հանդիպումների ընթացքում դպրոցականներին ընդհանուր գծերով ներկայացրել են ԵՊՀ Իջևանի մասնաճյուղի գործունեության հիմնական ուղղություններն ու ֆա­կուլ­տետները, բուհում գործող մասնագիտությունները, ընդու­նե­լության պայմաններն ու արտոնութ­յուն­ները:

Քննարկվել են 2019թ. ընդունելության կրթական ծրագրերը, նոր առաջարկություններն ու հնարավորությունները (խոսքը վերաբերում է առկա ուսուցմամբ «Բնապահ­պանություն և բնօգտա­գործում», «Կիրառական արվեստ» և «Հոգեբա­նություն» կրթական ծրագրերին),  քննա­կան առարկաները, ընդունելության քննութ­յուն­ներում կատարված փոփո­խությունները: Հատուկ ուշադրություն է դարձվել «Ռուսաց լեզու և գրականություն» կրթական ծրագրի վրա, որը կիրականացվի առաջին անգամ` հաշվի առնելով աշխատաշուկայի պահանջները:

Մասնաճյուղի և տարածաշրջանի հանրակրթական դպրոցների միջև մշտական շփում իրականացնելու, դպրոց-համալսարան կապն ամրապնդելու նպատակով առաջարկվել է պարբերաբար իրականացնել ճանաչողական այցեր, թեմատիկ և ակնարկային դասա­խոսություններ ու քննարկում­ներ, ինչպես նաև օգտվել հեռավար ուսուցման հնարավորություններից:

Հանդիպումներն ընթացել են հարց ու պատասխանով: Աշակերտներին հետաքրքրել են կրթական գործընթացին, ուսման վարձաչափերին, ուսումնառողների համար նախատեսված զեղչերին ու արտոնություններին, ընդունելության քննությունների՝ աստղանիշով առարկաներին վերաբերող տարբեր հարցեր:

Դպրոցների ներկայացուցիչներն իրենց գոհունակությունն են հայտնել համալսարանականներին և ակնկալել, որ համագործակցությունը կլինի շարունակական: