2019թ. հունվարի 29-ին հարցազրույց ունեցանք ԵՊՀ Իջևանի մասնաճյուղի՝ 2008թ. շրջանավարտ, «Ապագա տուր» ՍՊԸ մենեջեր Նարեկ Լևոնի Չատյանի հետ:
-Խնդրում եմ՝ նշեք Ձեր ծննդյան թիվը և վայրը:
-Ծնվել եմ 1988 թվականի հունվարի 17-ին Իջևան քաղաքում:
-Պատմեք, խնդրում եմ, Ձեր ընտանիքի (ծնողների, կնոջ, զավակների) մասին:
-Ես մանկավարժների ընտանիքի զավակ եմ: Հայրս՝ Լևոն Չատյանը, կյանքից հեռացել է, մայրս՝ Հասմիկ Աբազյանը, հայոց լեզվի և գրականության ուսուցչուհի է: Ունեմ քույր և եղբայր. քույրս աշխատում է Մատենադարանում, եղբայրս՝ «Յելլ էքստրիմ պարկ»-ում:
-Փոքր հասակում ի՞նչ եք երազել դառնալ:
-Երազանքներս անընդհատ փոփոխվում էին. ամենատպավորվածները օդաչու և ճարտարապետ դառնալու երազանքներն էին:
-Ի՞նչ կրթություն եք ստացել:
– 2008 թվականին ավարտել եմ ԵՊՀ Իջևանի մասնաճյուղի «Սոցիալ-մշակութային ծառայություն և զբոսաշրջություն» մասնագիտության բակալավրիատը: 2010թ. ավարտել եմ ԵՊՀ մագիստրատուրան՝ ստանալով մշակութաբանության մագիստրոսի աստիճան:
– Ի՞նչ դեր է խաղացել ԵՊՀ ԻՄ–ում ստացած կրթությունը Ձեր կյանքում:
– ԵՊՀ ԻՄ-ում ստացած կրթությունը հիմնական դեր է խաղացել իմ կյանքում և կարիերայում: Դասախոսական անձնակազմի (մեծապես՝ Պ.Ասիլբեկյանի), իմ ուսանող ընկերների՝ կրթության հանդեպ վերաբերմունքն ու սերը դրդեցին ինձ, չնայած սուղ պայմաններին, աշխատելու այն բնագավառում, որը կապված է իմ մասնագիտության հետ:
– Ի՞նչ աշխատանքային փորձ ունեք:
– Իմ աշխատանքային գործունեությունն ամբողջվին կապված է «Ապագա ռեզորթ» հանգստյան գոտու հետ: 2009-ից «Ապագա ռեզորթ»-ում աշխատել եմ որպես ձիավար-ուղեկցող, 2012-ից՝ ադմինիստրատոր, 2015-ից աշխատում եմ որպես մենեջեր:
– Ո՞րն է Ձեր ամենասիրելի գիրքը:
– Հայ գրականությունից՝ Մուրացանի «Գևորգ Մարզպետունի» պատմավեպը, արտասահմանյան գրականությունից՝ Պաուլո Կոելյոյի (Կոելիոյի) «Ալքիմիկոսը» գիրքը:
– Ո՞րն է Ձեր կարդացած վերջին գիրքը:
– Ես մեծ գրքասեր եմ և ափսոսում եմ, որ վերջին տարիներին շատ չեմ հասցնում կարդալ: Վերջերս կարդացել եմ Դեյլ Քարնեգիի «Ինչպես ձեռք բերել բարեկամներ և ազդել մարդկանց վրա» գիրքը:
– Ի՞նչ երաժշտություն եք նախընտրում, և ո՞րն է Ձեր սիրած երգը:
– Երաժշտության հանդեպ տարատեսակ մոտեցում ունեմ. ռաբիզ երաժշտություն այնքան էլ չեմ սիրում, ընդհանրապես, տրամադրությունից կախված, տարբեր ոճերի երաժշտություն եմ լսում, բայց առավել նախընտրում եմ ուրախ տրամադրություն ստեղծող երաժշտություն:
– Ո՞րն է Ձեր սիրած ֆիլմը:
– Սիրում եմ «Միլիոնատերը ետնախորշերից», «Մենք ենք, մեր սարերը», Ս.Փարաջանովի «Նռան գույնը» ֆիլմերը, որոնք կարող եմ մի քանի անգամ դիտել:
– Ունե՞ք նախընտրելի մարզաձև:
– Ֆուտբոլն է իմ նախընտրած մարզաձևը. թե՛ ֆուտբոլ խաղալը, թե՛ դիտելը հոբբի է ինձ համար:
– Ո՞րն է Ձեր սիրած վայրը Հայաստանում և արտերկրում:
– Հայաստանում իմ սիրած վայրը Մակարավանքն է՝ այն վայրը, որը տեսնելու առիթը երբեք բաց չեմ թողնի: Արտասահմանում շատ չեմ եղել. հավանել եմ Սոչիի “Красная Поляна” հանգստյան գոտին:
– Ո՞ր հատկանիշներն եք գնահատում մարդկանց մեջ:
– Ազնվությունը, անկեղծությունը, հավատարմությունը և իհարկե ինտելեկտը:
– Ունե՞ք նախընտրած ասույթ կամ կարգախոս, որով առաջնորդվում եք:
– Առաջնորդող կարգախոս կամ ասույթ չունեմ:
– Ի՞նչ երբեք չեք անի:
– Չեմ դավաճանի, անազնիվ չեմ վարվի:
– Ինչի՞ց եք վախենում:
– Վախենում եմ հարազատ մարդկանց կորցնելուց:
– Ինչի՞ համար եք ափսոսում:
– Եթե լիներ այնպիսի մի երևույթ, որի համար առանձնապես ափսոսայի, կնշեի. երևի իմ կյանքում ամեն ինչ եղել է այնպես, ինչպես պետք է լիներ, թեև ամեն օր էլ կարելի է ափսոսալ արածների և չարածների համար:
– Ի՞նչն է օգնում Ձեզ որոշում կայացնել դժվարին իրավիճակներում:
– Ներքին ձայնիս հետևելը, ինտուիցիայի նկատմամբ հավատն ինձ օգնում է տարբեր իրավիճակներում որոշումներ կայացնելիս:
– Ի՞նչն եք համարում Ձեր կյանքի ամենամեծ ձեռքբերումը:
– Կարծում եմ՝ իմ ամենամեծ ձեռքբերումը դեռ առջևում է. մինչև հիմա բոլոր ձեռքբերումներս կապված են իմ աշխատանքային ոլորտի և ընկերների հետ…
– Ո՞րն է հաջողության հասնելու Ձեր բանաձևը:
– Հավատամքը, կամքի ուժը, նպատակասլացությունը, ուղղությունից չշեղվելու հատկությունը:
– Ո՞րն է Ձեր ստացած ամենաթանկ խորհուրդը:
– Ամենակարևոր խորհուրդները ստացել եմ իմ պապերից: Այդ խորհուրդները մեծ ազդեցություն են ունեցել ինձ վրա և շատ են օգնել ինձ կյանքում, բայց հիմա դրանցից որևէ մեկը չեմ առանձնացնի:
– Ո՞րն է այն հիմնական խորհուրդ–պատգամը, որ Դուք կտաք երիտասարդներին (մասնավորապես՝ ԵՊՀ ԻՄ–ի ուսանողներին):
– Մեր երիտասարդներին խորհուրդ կտամ մասնագիտություն ընտրելիս հենց այնպես չընտրել, անպայման հաշվի առնել տվյալ մասնագիտության հանդեպ սերը և, ինչու չէ, ապագա աշխատանքը: Նրանց կմաղթեմ մեծ կամք և նպատակասլացություն իրենց մասնագիտությամբ աշխատելու համար:
– Շատ շնորհակալ եմ հարցազրույցի համար:
Հարցազրույցը վարեց ԵՊՀ ԻՄ-ի հասարակայնության հետ
կապերի և մամուլի պատասխանատու Հասմիկ Վանյանը:
ԵՊՀ Իջևանի մասնաճյուղը սիրով հրավիրում է Տավուշի մարզի 18-30 տարեկան երիտասարդներին մասնակցելու Այ Էյ Բի Բիզնեսի Միջազգային Ակադեմիայի կողմից իրականացվող «Կոկա-Կոլա Արմենիա» ընկերության «ԵՐԻՏԱՍԱՐԴՆԵՐԻ ԶԱՐԳԱՑՈՒՄ» եռամյա ծրագրի շրջանակներում անցկացվող «Կյանքի հմտություններ» դասընթացին, որը տեղի կունենա 2019թ. փետրվարի 5-ին ԵՊՀ ԻՄ-ի դահլիճում: Սկիզբը՝ ժամը 10:00-ին:
