«Մարդն էլ կարծես ծառի պես է,
Բերք տվողին երանի,
…Սուրբ տենչերով
Դեպի բարձունք
Մագլցողին երանի…» Մ.Գասպարյան
2016թ. դեկտեմբերի 22-ին Տավուշի մարզային գրադարանում տեղի ունեցավ «Տարվա լավագույն ստեղծագործող և ընթերցող» մրցույթի արդյունքների ամփոփումը:
Տավուշի մարզային գրադարանի կողմից 2016թ. լավագույն ստեղծագործող և ընթերցող ճանաչվեց ԵՊՀ Իջևանի մասնաճյուղի «Ֆրանսերեն լեզու և գրականություն» մասնագիտության երրորդ կուրսի ուսանողուհի Մերի Գասպարյանը:
Հաղթողին գրադարանի ղեկավարության կողմից հանձնվեց պատվոգիր և հուշանվեր, բացի այդ` Մերիի բանաստեղծությունների համար գրադարանում հատկացվեց առանձին անկյուն, որպեսզի այցելուներն էլ ծանոթանան նրա ստեղծագործություններին:
Գրադարանի տնօրեն Ա.Ղուկասյանը նշեց, որ մարզի սկսնակ գրողներին խրախուսելու նպատակով մարտ ամսին ևս կկազմակերպվի նման միջոցառում, որտեղ կքննարկվեն և կմեկնաբանվեն երիտասարդ հեղինակի ստեղծագործությունները:
Հիշեցնենք, որ նույն թվականի մարտի 3-ին մասնաճյուղում կայացավ Մերի Գասպարյանի անդրանիկ՝ «Մոխրագույն լուսին» (հեղինակի մեկնաբանությամբ` լուսինն իր կարոտն է) գրքի շնորհանդեսը: Գրքույկը նվիրված է իր քեռու՝ Մարատ Բաղինյանի հիշատակին և նրա մեջ զետեղված են թարմ, հետաքրքիր մտքեր ու բանաստեղծություններ` ստեղծագործական ներշնչանքի, սիրո, հայրենասիրության, մարդու և բնության մասին:
ԵՊՀ Իջևանի մասնաճյուղը սիրով շնորհավորում է իր ուսանողուհուն` մաղթելով նրան սուր միտք, բեղուն գրիչ, ստեղածագործական նորանոր հաջողություններ: