2022թ. սեպտեմբերի 30-ին ԵՊՀ Իջևանի մասնաճյուղում Ա.Մակարյանի նախագահությամբ տեղի ունեցավ տնօրենության նիստ, որին մասնակցում էին տնօրենության անդամները, հրավիրված էր Ուսումնամեթոդական վարչության ուսումնական գործընթացի կազմակերպման և վերահսկման բաժնի վարիչ Ն.Առուշանյանը:

Նիստում քննարկվեցին ԵՊՀ ԻՄ-ի տնօրենության տարեկան աշխատանքային պլանի հաստատմանը, 2021-2022 ուստարվա երկրորդ կիսամյակի բակալավրի առկա և բակալավրի ու մագիստրատուրայի հեռակա ուսուցման քննաշրջանների ամփոփմանը, հեռակա ուսուցման համակարգում ուսանողի իրավունքների վերականգնման ընթացքին, մինչև 12 կրեդիտ կուտակած ակադեմիական պարտքերի վերահանձնման գործընթացի կազմակերպման ընթացքին վերաբերող հարցեր:

ԵՊՀ Իջևանի մասնաճյուղի տնօրենի պաշտոնակատար Ա.Մակարյանը ներկայացրեց ԵՊՀ ԻՄ–ի տնօրենության տարեկան աշխատանքային պլանը, որտեղ 71 դրույթներով ամրագրված էին 2022-2023 ուստարվա ուսումնական գործընթացի կազմակերպման հետ կապված հիմնական աշխատանքները՝ իրենց պատասխանատուներով, ժամկետներով, համագործակցող ստորաբաժանումներով: Կատարվել էին իրականացվող գործընթացների ժամկետներով պայմանավորված որոշ դրույթների փոփոխություններ և տեղափոխություններ, որոնք առնչվում էին մասնավորապես 2023-24 ուստարվա ընդունելության քննությունների կարգում փոփոխություններին, ըստ այդմ՝ ավագ դպրոցներ այցերի ժամանակացույցին, բաժինների կողմից տրվող հաշվետվություններին  և այլն: Տնօրենության անդամների կողմից առաջարկվեց հնարավորության դեպքում որոշ գործընթացների իրականացման ժամկետները հստակեցնել՝ նշելով ոչ միայն ամիսը, այլև կոնկրետ ամսաթիվը:

Որոշվեց հաստատել ԵՊՀ ԻՄ–ի տնօրենության տարեկան աշխատանքային պլանը՝ առաջարկված փոփոխություններով հանդերձ:

2021-2022 ուստարվա երկրորդ կիսամյակի բակալավրի առկա և բակալավրի ու մագիստրատուրայի հեռակա ուսուցման քննաշրջանների ամփոփման կապակցությամբ զեկուցեցին Ուսումնամեթոդական վարչության պետ Ա.Դավթյանը և ֆակուլտետների դեկանները:

Մասնավորապես նշվեց, որ 2021-2022 ուստարվա 2-րդ կիսամյակի քննաշրջանն ավարտվել է ս.թ. սեպտեմբերի 22-ին: Քննաշրջանն իրականացվել է սահմանված կարգով, ըստ հաստատված ժամանակացույցի, և արդյունքում ունենք հետևյալ պատկերը:

Քննաշրջանին մասնակցել է բակալավրի կրթական ծրագրով 892 ուսանող (առկա ուսուցման՝ 481, հեռակա ուսուցման՝ 411) և մագիստրոսի կրթական ծրագրով՝ 13 ուսանող:

Առկա ուսուցման համակարգում քննաշրջանի արդյունքում 2 ուսանող (Հումանիտար գիտությունների և Կիրառական արվեստի ֆակուլտետի) ենթակա է հեռացման, 2 ուսանող (Բնական գիտությունների ֆակուլտետի) կուտակել է ակադեմիական պարտքեր:

Հեռակա ուսուցման բակալավրիատում քննաշրջանի արդյունքում հեռացման ենթակա են 14, կրեդիտներ են կուտակել 27 ուսանողներ: Հեռակա ուսուցման մագիստրատուրայում հեռացվել է 1 ուսանող, կուտակած կրեդիտներ չունենք:

Որոշվեց 2021-2022 ուստարվա երկրորդ կիսամյակի բակալավրի առկա և բակալավրի ու մագիստրատուրայի հեռակա ուսուցման քննաշրջանների ամփոփման վերաբերյալ զեկուցողներ Ա.Դավթյանի և ֆակուլտետների դեկանների հաղորդումներն ընդունել ի գիտություն:

ԵՊՀ ԻՄ-ի հեռակա ուսուցման համակարգում ուսանողի իրավունքների վերականգնման ընթացքի մասին զեկուցող Ն.Առուշանյանը ներկայացրեց, որ 1 նախկին ուսանող դիմել է ԵՊՀ ԻՄ-ի հեռակա ուսուցման համակարգում իր ուսանողական իրավունքները վերականգնելու համար: Ուսումնամեթոդական վարչության կողմից ստուգվել են ուսանողի վերականգնման դեպքում առաջացած առարկայական տարբերությունների քանակը կրեդիտներով և նրա ներկայացրած փաստաթղթերի համապատասխանությունը ՀՀ բարձրագույն ուսումնական հաստատությունների ուսանողների հեռացման (ազատման) և վերականգնման կարգին, և նրան թույլատրվում է վերականգնել իր ուսանողական իրավունքները:

Որոշվեց ՀՀ բարձրագույն ուսումնական հաստատությունների ուսանողների հեռացման (ազատման) և վերականգնման կարգի III մասի կետերին համապատասխան՝ վերականգնել ԵՊՀ ԻՄ-ի նախկին ուսանողի ուսանողական իրավունքները: 

Մինչև 12 կրեդիտ կուտակած ակադեմիական պարտքերի վերահանձնման գործընթացի կազմակերպման ընթացքի վերաբերյալ ևս զեկուցեց Ն.Առուշանյանը: Նա մասնավորապես նշեց, որ նախկին կիսամյակներից մինչև 12 կրեդիտ կուտակած ակադեմիական պարտքերը վերահանձնելու համար դիմել էր 20 ուսանող (1-ը՝ առկա, 19-ը՝ հեռակա ուսուցման համակարգի): Այն ուսանողները, ովքեր առաջին լուծարքով չեն հանձնել, երկրորդ անգամ վերահանձնելու հնարավորություն ունեն: 3 ուսանող երկրորդ լուծարքով մարել է կուտակած պարտքերը:

Որոշվեց մինչև 12 կրեդիտ կուտակած ակադեմիական պարտքերի վերահանձնման գործընթացի կազմակերպման ընթացքի մասին Ն.Առուշանյանի հաղորդումն ընդունել ի գիտություն:

2022թ. հուլիսի 14-ին Ա.Մակարյանի նախագահությամբ ԵՊՀ Իջևանի մասնաճյուղում տեղի ունեցավ տնօրենության տարեվերջյան նիստը՝ 2 օրակարգային և 3 ընթացիկ հարցերով:

ԵՊՀ ԻՄ-ի առկա և հեռակա ուսուցման բակալավրի և հեռակա ուսուցման մագիստրատուրայի՝ 2021-2022 ուստարվա երկրորդ կիսամյակի քննաշրջանի ամփոփման մասին զեկուցեցին Ուսումնամեթոդական վարչության պետը և ֆակուլտետների դեկանները:

ՈՒՄՎ պետ Ա.Դավթյանը նշեց, որ 2021-2022 ուստարվա 2-րդ կիսամյակի քննաշրջանն իրականացվել է ըստ ուսումնական գործընթացի կազմակերպման հաստատված ժամանակացույցի՝ ս.թ. հունիսի 7-25-ը: Այն անցկացվել է սահմանված կարգով, առանց ժամանակացույցների խախտումների և վերահսկվել է Ուսումնամեթոդական վարչության կողմից:

Բակալավրի առկա ուսուցման քննաշրջանին մասնակցել է 481 ուսանող, բոլոր առարկաներից դրական են հավաքել 363, անբավարար՝ 118 ուսանողներ: Առաջադիմությունը կազմել է 75.5%, գերազանց առաջադիմություն է ցուցաբերել 43 ուսանող:

Բակալավրի հեռակա ուսուցման քննաշրջանին մասնակցել է 401 ուսանող, բոլոր առարկաներից դրական է հավաքել 162 ուսանող, անբավարար է ստացել 215 ուսանող, 24 ուսանող չի ներկայացել քննաշրջանին: Առաջադիմությունը կազմել է 40.4%, գերազանց առաջադիմություն է ցուցաբերել 3 ուսանող:

Մագիստրատուրայի հեռակա ուսուցման քննաշրջանին մասնակցել է 13 ուսանող: Բոլոր առարկաներից դրական է հավաքել 11 ուսանող: Անբավարար է ստացել 2 ուսանող։ Առաջադիմությունը կազմել է 84.6%:

2021-2022 ուստարվա քննաշրջանը՝ լուծարքայինը ներառյալ, կամփոփվի սեպտեմբերի 22-ին:

Դեկանները ներկայացրին քննաշրջանի արդյունքում ֆակուլտետներում գրանցված առաջադիմության պատկերն՝ ըստ կրթական ծրագրերի:

Հումանիտար գիտությունների ֆալուլտետի դեկանի պաշտոնակատար Կ.Պողոսյանը նշեց, որ առկա ուսուցման անվճար համակարգում, բացառությամբ «Անգլերեն լեզու և գրականություն» 1-ին և «Հոգեբանություն» 2-րդ կուրսերի, գրանցվել է 100% առաջադիմություն: Վճարովի ուսուցման համակարգում 100% առաջադիմություն են ցուցաբերել «Ֆրանսերեն լեզու և գրականություն» և «Ռուսաց լեզու և գրականություն» 1-ին, «Ֆրանսերեն լեզու և գրականություն» 2-րդ, «Պատմություն» 3-րդ, «Տարրական մանկավարժություն և մեթոդիկա» 3-րդ, «Հոգեբանություն» ու «Ռուսաց լեզու և գրականություն» 3-րդ կուրսերը: Անվճար ուսուցման համակարգում ֆակուլտետի բացարձակ առաջադիմությունը կազմում է 96.7%, իսկ վճարովի ուսուցման համակարգում՝ 77.9%: Հեռակա ուսուցման համակարգում չորս կրթական ծրագրերից («Պատմություն», «Հայոց լեզու և գրականություն», «Տարրական մանկավարժություն և մեթոդիկա», «Հոգեբանություն») ոչ մի կուրսում 100% առաջադիմություն չի գրանցվել: Առաջադիմության համեմատաբար բարձր ցուցանիշ ունեն «Տարրական մանկավարժություն և մեթոդիկա» մասնագիտության կուրսերը (4-րդ կուրս՝ 80% առաջադիմություն, 2-րդ՝ 77.8%, 3-րդ՝ 72%, 1-ին՝ 68.8%): Ամենացածր առաջադիմությունը գրանցվել է «Հայոց լեզու և գրականություն» մասնագիտության 2-րդ կուրսում՝ 11.1%:

Կիրառական արվեստի ֆակուլտետի դեկանի պաշտոնակատար Վ.Աղաբաբյանը նշեց, որ առկա ուսուցման անվճար համակարգում գրանցվել է 100% առաջադիմություն՝ «Դիզայն» և «Դեկորատիվ-կիրառական արվեստ» կրթական ծրագրերի կուրսերում: Վճարովի ուսուցման համակարգում 100% առաջադիմություն են ցուցաբերել «Դիզայն» կրթական ծրագրի 1-ին կուրսի ուսանողները: Անվճար ուսուցման համակարգում ֆակուլտետի բացարձակ առաջադիմությունը կազմում է 100%, իսկ վճարովի ուսուցման համակարգում՝ 78.95%, միջինը՝ 86.89%:

Տնտեսագիտության ֆակուլտետի դեկանի պաշտոնակատար Ա.Մարգարյանը ներկայացրեց, որ առկա ուսուցման համակարգում ֆակուլտետի առաջադիմությունն ըստ կուրսերի (ոչ ավարտական) հետևյալն է՝ «Ֆինանսներ» I – 52.6%, «Զբոսաշրջություն» I – 52.4%, «Ֆինանսներ» II – 74.1%, «Զբոսաշրջություն» II – 100%, «Ֆինանսներ» III – 100%, «Զբոսաշրջություն» III – 37.5%:

Առկա ուսուցման համակարգում գրանցվել է 68.4% առաջադիմություն, ընդ որում` անվճար համակարգում՝ 82.6%, իսկ վճարովի համակարգում` 64.8% բացարձակ առաջադիմություն: Հեռակա ուսուցման համակարգում գրանցվել է 37.8% բացարձակ առաջադիմություն, և պատկերն ըստ կուրսերի հետևյալն է՝ «Ֆինանսներ» I – 31.8%, «Զբոսաշրջություն» I – 44.0%, «Ֆինանսներ» II – 21.4%, «Զբոսաշրջություն» II – 50%, «Ֆինանսներ» III – 45.0%, «Զբոսաշրջություն» III – 45.5%, «Ֆինանսներ» IV – 45.0%, «Զբոսաշրջություն» IV – 45.5%:

Բնական գիտությունների ֆալուլտետի դեկանի պաշտոնակատար Մ.Զաքարյանը նշեց, որ առկա ուսուցման անվճար համակարգում «Ինֆորմատիկա և կիրառական մաթեմատիկա» մասնագիտության 2-րդ և 3-րդ կուրսերում գրանցվել է 100% առաջադիմություն, 1-ին կուրսում՝ 85.7%: Ընդհանուր առաջադիմությունը 93.8% է: Վճարովի ուսուցման համակարգում «Ինֆորմատիկա և կիրառական մաթեմատիկա» մասնագիտության 1-ին կուրսում գրանցվել է 40% առաջադիմություն, 2-րդ կուրսում՝ 41.7%, 3-րդ կուրսում՝ 61.5%: Ընդհանուր առաջադիմությունը՝ 46.7% է: Անվճար և վճարովի ուսուցման համակարգում ֆակուլտետի բացարձակ առաջադիմությունը կազմում է 66.7%:

Հեռակա ուսուցման համակարգում՝ «Ինֆորմատիկա և կիրառական մաթեմատիկա», «Բնապահպանություն և բնօգտագործում» մասնագիտությունների ոչ մի կուրսում 100% առաջադիմություն չի գրանցվել: «Ինֆորմատիկա և կիրառական մաթեմատիկա» մասնագիտության 2-րդ կուրսում գրանցվել է 27.8% առաջադիմություն, 3-րդ կուրսում՝ 0.0% առաջադիմություն, 4-րդ կուրսում՝ 35.0%: «Բնապահպանություն և բնօգտագործում» մասնագիտության 3-րդ կուրսում գրանցվել է 50% առաջադիմություն, 4-րդ կուրսում՝ 25.0%: «ԻԿՄ» մասնագիտության ուսանողների ընդհանուր առաջադիմությունը 22.8% է, «ԲԲ» մասնագիտության ուսանողներինը՝ 35.3%: Ընդհանուր առաջադիմությունը 27.5% է:

ԵՊՀ ԻՄ-ի գրադարանի՝ 2021-2022 ուստարվա գործունեության մասին հաշվետվություն ներկայացրեց գրադարանի վարիչ Վ.Պողոսյանը: Մասնավորապես նշվեց, որ 2021-2022 ուստարում գրադարանային ֆոնդը համալրվել է ավելի քան 670 միավոր գրականությամբ, որից 108 միավոր գրականությունը՝ գնման միջոցով, իսկ ավելի քան 562-ը՝ նվիրատվությամբ: 2022թ. հուլիսի 13-ի դրությամբ գրադարանային ֆոնդում առկա է շուրջ 20353 միավոր գրականություն, այդ թվում՝ 2285 էլեկտրոնային գրականություն, ավելի քան 1396 գիտական ամսագրեր և ժողովածուներ, ավելի քան 72 քարտեզ, 16651 հայերեն, անգլերեն, ֆրանսերեն և ռուսերեն գիտական, ուսումնական, ուսումնամեթոդական և գեղարվեստական գրականություն: ԵՊՀ ԻՄ-ի էլեկտրոնային գրադարանի հետ կապված՝ Վ.Պողոսյանը նշեց, որ կայքի կառուցվածքը, բաժինները, գիրք փնտրելու սկզբունքները բավականին մատչելի են: 2022թ. հուլիսի 13-ի դրությամբ էլեկտրոնային գրադարանում առկա է 1054 գիրք, գրանցվել է 11.497.347 այցելություն, 823.338 այցելու: Վերջին 30 օրերին արձանագրվել է 285.163 այցելություն, 16.309  այցելու: Գրադարանային ֆոնդի համալրման գործում կան որոշ խնդիրներ՝ մասնավորապես արտասահմանյան հրատարակությունների ձեռքբերման տեսանկյունից:

Ընթացիկ հարցերից առաջինի կապակցությամբ մասնավորապես նշվեց, որ ընթացքի մեջ է ԵՊՀ ԻՄ-ի դասախոսական անձնակազմի՝ 2022-2023 ուսումնական տարվա անհատական ուսումնական բեռնվածությունների բաշխումը, ըստ այդմ՝ տնօրենը պատասխանատուներին հանձնարարեց անհատապես խոսել բոլոր դասախոսների հետ և սեղմ ժամկետներում ավարտին հասցնել այդ գործընթացը՝ դասացուցակները հստակեցնելու նպատակով:

Երկրորդ ընթացիկ հարցի մասին նշվեց, որ 2021-2022 ուստարվա 2-րդ կիսամյակի առկա ու հեռակա ուսուցման բակալավրի և հեռակա ուսուցման մագիստրատուրայի քննաշրջանի առաջին լուծարքային շրջանը կսկսվի ս.թ. օգոստոսի 30-ից: Տնօրենը ցուցում տվեց ճշգրտել քննական հանձնաժողովների կազմերը, նրանցում ընդգրկել առնվազն երկու մասնագետ և հստակեցնել ժամանակացույցը:

Վերջին ընթացիկ հարցի վերաբերյալ փոխտօրեն Մ.Օթարյանը նշեց, որ 2021-2022 ուստարվա առկա և հեռակա ուսուցման շրջանավարտների ավարտական հանդիսավոր միջոցառումը կմեկնարկի հուլիսի 16-ին՝ ժամը 10:30-ին, ԵՊՀ Իջևանի մասնաճյուղում: Միջոցառման առաջին մասում Մայր բուհի ռեկտոր Հ.Հովհաննիսյանի գլխավորությամբ տեղի կունենա շրջանավարտների դիպլոմների հանձնման հանդիսավոր արարողությունը: Միջոցառման երկրորդ մասը՝ շրջանավարտների ավարտական երեկոն, կսկսվի ժամը 19:00-ին Թևրայում, որտեղ կլինեն հյուրասիրություն, ֆոտոնկարահանում, երաժշտություն, կապահովվի բարձր տրամադրություն:

Տնօրենության տարեվերջյան նիստում զեկուցողների հաղորդումներն ընդունվեցին ի գիտություն:

2022թ. հունիսի 29-ին ԵՊՀ Իջևանի մասնաճյուղում Ա.Մակարյանի նախագահությամբ կայացավ տնօրենության ընդլայնված նիստ՝ օրակարգային 4 և ընթացիկ 2 հարցերով:

Օրակարգի առաջին հարցի՝ 2022-2026 առկա և 2022-2027 հեռակա ուսուցման կրթական ծրագրերի վերանայման աշխատանքների մասին զեկուցեց Կրթական բարեփոխումների և դասախոսների վերապատրաստման բաժնի վարիչ Ն.Գրիգորյանը: Նա ներկայացրեց, որ ԵՊՀ ԻՄ-ի տնօրենի հրամանների (4 § 1, 08.01.2022 և  58 § 4, 11.01.2022) համաձայն՝ հաստատվել են կրթական ծրագրերը վերանայող աշխատանքային խմբերի կազմերը, որոնք մինչև մայիսի 21-ը ԿԲԴՎ բաժին պետք է ներկայացնեին վերանայված կրթական ծրագրերը: ԿԲԴՎ բաժնի կողմից մշակվել և կրթական ծրագրերը վերանայող աշխատանքային խմբերին են տրամադրվել վերանայման աշխատանքային խմբերի աշխատանքային պլանի օրինակելի ձև, որտեղ հստակ գրված է, թե ինչպիսի աշխատանքներ են նախատեսվում իրականացնել, և մոտավոր ժամկետները, որոնք արդեն հստակեցրել են խմբերը: Բաժնի կողմից հունվար-հունիսի ամիսների ընթացում վերահսկվել են աշխատանքային խմբերի աշխատանքները, պարբերաբար կազմակերպվել են հանդիպումներ կրթական ծրագրերի ղեկավարների հետ, տրվել է համապատասխան խորհրդատվություն:

Տնօրենի կողմից սահմանված ժամկետում պատրաստ է եղել միայն երկու կրթական ծրագիր՝ «Պատմություն», «Ֆրանսերեն լեզու և գրականություն»:  Մյուս կրթական ծրագրերը վերանայող աշխատանքային խմբերի համար տնօրենի թույլտվությամբ ժամկետը երկարաձգվել է մինչև հունիսի 11-ը, որից հետո էլ որոշ կրթական ծրագրեր դեռ վերջնական տեսքով չեն ներկայացվել ԿԲԴՎ բաժին:

Բաժնի աշխատակիցների կողմից առկա 2022-2026 թթ. կրթական ծրագրերի հիման վրա կազմվել են նաև հեռակա ուսուցման 6 կրթական ծրագրերը՝ «Պատմություն», «Հայոց լեզու և գրականություն», «Հոգեբանություն», «Տարրական մանկավարժություն և մեթոդիկա», «Զբոսաշրջություն» և «Ֆինանսներ»:

Բոլոր կրթական ծրագրերում կատարվել են բավականին շատ փոփոխություններ, որոնց մի մասը պայմանավորված է ԵՊՀ-ի պահանջներով. «Կիրառական վիճակագրություն և տյալների հետ աշխատանք» դասընթացը հանվել է բոլոր ծրագրերից, «Տեղեկատվական տեխնոլոգիաների կիրառման հմտությունները» դասընթացը դարձել է կամընտրական՝բացառությամբ մի քանի ծրագրերի, «ՏՄՄ», «Ֆինանսներ», «Զբոսաշրջություն» կրթական ծրագրերում «Իրավունքի հիմունքներ» դասընթացը դարձել է կամընտրական:

Այս հարցի հետ կապված՝ տնօրենի պաշտոնակատար Ա.Մակարյանի կողմից գործընթացի պատասխանատուներին հանձնարարվեց խիստ հետևողական լինել, որ մինչև հուլիսի 2-ը բոլոր ծրագրերը վերջնական տեսքով պատրաստ լինեն և ներկայացվեն հաստատման:

Երկրորդ հարցի՝ դասախոսների կարիքների վերհանման, մատուցվող ծառայությունների՝ նրանց կողմից գնահատման վերաբերյալ զեկուցեց Մասնագիտական կրթության որակի ապահովման բաժնի վարիչ Մ.Ճաղարյանը: Նա մասնավորապես նշեց, որ ԵՊՀ ԻՄ-ի դասախոսական կազմի կարիքների վերհանման համար դիտարկվել են Մասնագիտական կրթության որակի  ապահովման բաժնի կողմից 2021թ. հունիսից 2022թ. հունիսն ընկած ժամանակահատվածում տարբեր մեխանիզմներով իրականացված ուսումնասիրությունների (Մասնաճյուղից դասախոսների բավարարվածության, Մասնաճյուղից ուսանողների բավարարվածության հարցումների, ամփոփիչ ատեստավորման հանձնաժողովների նախագահների կարծիքներից հետևող, ամբիոններում իրականացված քննարկումների) արդյունքները: Հավաքագրված խնդիրների և առաջարկների հիման վրա կազմվել է կարիքների փաթեթ, որը ներկայացված է երկու խմբով (1. ուսումնական գործընթացի կազմակերպման, 2. ծառայությունների և ռեսուրսների հետ կապված կարիքներ):

Ուսումնական գործընթացի կազմակերպման հետ կապված կարիքները հիմնականում վերաբերում էին ուսանողների հմտությունների և կարողությունների գնահատման մեթոդների և ձևերի ընտրությանը, դասերին և լրացուցիչ պարապմունքներին ուսանողների մասնակցության ապահովմանը, ուսումնական գործընթացի կազմակերպման միասնական պահանջների սահմանմանը, դասախոսի գիտական հետաքրքրությունների ու ուսումնական փորձի վրա հիմնված դասաբաշխմանը, երկու կիսամյակների, առկա և հեռակա բեռնվածությունների միջև հավասար հարաբերակցության ապահովմանը, հետազոտական աշխատանքներին հատկացված ժամաքանակի ավելացմանը, գրագողության դեմ պայքարի միասնական համակարգված մոտեցմանը և այլն:

Ծառայությունների և ռեսուրսների հետ կապված կարիքներն առնչվում էին գրադարանում առկա և էլեկտրոնային մասնագիտական և այլ գրականության համալրմանը, գրադարանի էլեկտրոնային կայքում հոդվածների բաժնի առկայության ապահովմանը, մասնաճյուղի կայքում եռալեզու (հայերեն, ռուսերեն, անգլերեն) նյութերի տեղադրմանը, տելեգրամյան ալիք ունենալուն, վարձատրման և պարգևավճարների տրամադրման ճկուն համակարգի կիրառմանը, բուհի տեխնիկական հագեցվածության, աշխատանքային ավելի լավ պայմանների ապահովմանը:

Տվյալ հարցի առնչությամբ Ա.Մակարյանի կողմից ՄԿՈԱ բաժնին հանձնարարվեց վերհանված կարիքներն ամփոփ ու համակարգված ձևով ուղարկել համապատասխան ստորաբաժանումներ՝ թերացումների շտկման պլաններ կազմելու և խնդիրներին հնարավոր լուծումներ տալու նպատակով:

Երրորդ հարցի՝ դասալսումների արդյունքների քննարկման կապակցությամբ զեկուցեցին ֆակուլտետների դեկանները և Ուսումնամեթոդական վարչության պետը:

Դեկանները ներկայացրին իրենց ղեկավարած ֆակուլտետներում հաշվետու ժամանակահատվածում ամբիոնների վարիչների իրականացրած դասալսումների արդյունքներն ընդհանրացված տեսքով:

Ուսումնամեթոդական վարչության պետ Ա.Դավթյանը նշեց, որ Աուդիտի հանձնաժողովը հանձնարարել է կիրառել դասալսումների գրանցամատյաններ, ինչը նախատեսված է համապատասխան կարգով:

Հարցի կապակցությամբ արտահայտվեց տնօրենի պաշտոնակատար Ա.Մակարյանը՝ ընդգծելով, որ անհրաժեշտ է ավելի մեծ ուշադրություն դարձնել դասալսումների իրականացմանը, ըստ այդմ՝ դեկաններին հանձնարարեց առավել հետևողական լինել և ըստ գրաֆիկների՝ վերահսկել դասալսումների իրականացման ընթացքը:

Չորրորդ հարցի՝ հեռակա ուսուցման ամփոփիչ ատեստավորման արդյունքների քննարկման վերաբերյալ զեկուցեցին ֆակուլտետների դեկանները:

Այս հարցի վերաբերյալ Ա․Մակարյանը նշեց, որ պետք է ավելի խստապահանջ կազմակերպել ավարտական աշխատանքների նախապաշտպանությունները՝ նախօրոք վեր հանելու անպատրաստ շրջանավարտներին և թույլ չտալու, որ թերի աշխատանքները հայտնվեն հանձնաժողովների առջև: Նա խոստացավ հաջորդ տարի անձամբ մասնակցել բոլոր նախապաշտպանություններին:   

Ընթացիկ առաջին հարցի՝ 2021-2022 ուսումնական տարվա 2-րդ կիսամյակի առկա և հեռակա ուսուցման ուսանողների ուսման վճարների ընդհանուր դինամիկայի մասին զեկուցեց գլխավոր հաշվապահ Մ.Մխիթարյանը: Նա նշեց, որ առկա ուսուցման համակարգում ուսման վճարները ամբողջությամբ մարվել են՝ բացառությամբ մեկ ուսանողի, ով մասնակիորեն է մուծել վճարը: Ընդհանրապես կամ մասամբ վճարում չի կատարել հեռակա ուսուցման 75 ուսանող, որոնց մեծ մասը հեռացման են ենթակա դասապրոցեսին և քննաշրջանին չմասնակցելու պատճառով:

Ընթացիկ երկրորդ հարցի՝ ԵՊՀ ԻՄ-ի շրջանավարտի դիպլոմի անվավեր ճանաչման և կրկնօրինակի տրամադրման վերաբերյալ զեկուցեց Ուսումնամեթոդական վարչության պետ Ա.Դավթյանը: Տվյալ հարցի կապակցությամբ որոշվեց ԵՊՀ ԻՄ-ի շրջանավարտի դիպլոմը ճանաչել անվավեր և վավերացնել որպես կրկնօրինակ տրամադրվող № համարի դիպլոմը:

Տնօրենության նիստում զեկուցողների հաղորդումներն ընդունվեցին ի գիտություն:

2022թ. հունիսի 14-ին ԵՊՀ Իջևանի մասնաճյուղում Ա.Մակարյանի նախագահությամբ կայացավ տնօրենության ընդլայնված նիստ:

Օրակարգային առաջին հարցի` 2021-2022 ուստարվա առկա և հեռակա ուսուցման 2-րդ կիսամյակի հետազոտական աշխատանքների արդյունքների վերլուծության մասին զեկուցեց ԿԲԴՎ բաժնի վարիչ Ն.Գրիգորյանը: Նա մասնավորապես նշեց, որ 2021-2022 ուստարվա 2-րդ կիսամյակում առկա ուսուցման համակարգում հետազոտական բաղադրիչ պարունակող դասընթացների ընդհանուր թիվը 29 է (15՝ եզրափակիչ գնահատումով, 14՝ առանց եզրափակիչ գնահատման), իսկ հեռակա ուսուցման համակարգում դրանց թիվը 18 է, որից 10-ը՝ եզրափակիչ գնահատումով, 8-ը՝ առանց եզրափակիչ գնահատման: Ներկայացվեց, որ Կրթական բարեփոխումների և դասախոսների վերապատրաստման բաժինը պարբերաբար հետևել է հետազոտական աշխատանքների ընթացքին, կազմակերպել է հանդիպումներ հետազոտական բաղադրիչ պարունակող դասընթացները վարող դասախոսների հետ: Այդ հանդիպումների ընթացքում քննարկվել են հետազոտական աշխատանքների թեմաների ընտրության, հաստատման, կատարման ընթացքի և գնահատման չափանիշների վերաբերյալ հարցեր:

Ա.Մակարյանը նշեց, որ ակնկալվում էր՝ հեռակա ուսուցման համակարգում հետազոտական բաղադրիչի ներդնումը կապված կլինի որոշակի խնդիրների հետ, ինչը ցույց է տալիս նաև ներկայացված վերլուծությունը: Անհրաժեշտ է միևնույն մոտեցումները կիրառել և՛ առկա, և՛ հեռակա ուսուցման համակարգում սովորողների համար բոլոր գործընթացներում, և միայն այդ դեպքում է հնարավոր ունենալ լավ արդյունքներ:

Երկրորդ հարցի` ԵՊՀ ԻՄ-ի՝ 2021-2022 ուստարվա առկա ուսուցման շրջանավարտների ամփոփիչ ատեստավորման արդյունքների քննարկման կապակցությամբ զեկուցեցին ֆակուլտետների դեկանները:

Ներկայացվեց, որ 2022թ. մայիսի 21-29-ին տեղի է ունեցել է 2021-2022 ուստարվա առկա ուսուցման ամփոփիչ ատեստավորումը: Մայիսի 21-ին կայացել են «Պատմություն», «Անգլերեն լեզու և գրականություն», «Ֆրանսերեն լեզու և գրականություն», «Զբոսաշրջություն» և «Դիզայն», մայիսի 26-ին, 27-ին և 29-ին՝ «Տարրական մանկավարժություն և մեթոդիկա», «Ֆինանսներ (ըստ ոլորտի)», «Ինֆորմատիկա և կիրառական մաթեմատիկա» կրթական ծրագրերով շրջանավարտների ավարտական աշխատանքների պաշտպանությունները:

Դեկանները ներկայացրին իրենց ֆակուլտետներում ամփոփիչ ատեստավորման ընդհանուր պատկերը, անդրադարձան արդյունքներին, հանձանժողովների նախագահների կարծիքներին, տեսակետներին և առաջարկություններին, որոնք հավաքագրված են Ուսումնամեթոդական վարչության և Մասնագիտական կրթության որակի ապահովման բաժնի կողմից, առկա են ֆակուլտետներում և անպայմանորեն հաշվի կառնվեն որակավորման շնորհման գործընթացի կազմակերպման և իրականացման հետագա բարելավման ընթացքում:

Արդյունքների հետ կապված՝ զեկուցող Կ.Պողոսյանը մասնավորապես նշեց, որ Հումանիտար գիտությունների ֆակուլտետում ամփոփիչ ատեստավորումն իրականացվել է 3 մասնագիտությամբ՝ «Պատմություն», «Օտար լեզու և գրականություն», «Տարրական մանկավարժություն և մեթոդիկա»: «Պատմություն» մասնագիտության 7 շրջանավարտից 1-ը ստացել է «գերազանց», 6-ը՝ «լավ»: «Օտար լեզու և գրականություն» մասնագիտության 10 շրջանավարտից 6-ը ստացել է «գերազանց», 4-ը՝ «լավ»: «Տարրական մանկավարժություն և մեթոդիկա» մասնագիտության 19 շրջանավարտից 6-ը ստացել է «գերազանց», 9-ը՝ «լավ», 4-ը՝ «բավարար»:

Զեկուցող Վ.Աղաբաբյանը ներկայացրեց, որ Կիրառական արվեստի ֆակուլտետում ամփոփիչ ատեստավորումն իրականացվել է միայն 1՝ «Դիզայն»  մասնագիտությամբ: 8 շրջանավարտից 7-ը ստացել է «գերազանց», 1-ը՝ «բավարար»:

Զեկուցող Ա.Մարգարյանը նշեց, որ Տնտեսագիտության ֆակուլտետում ամփոփիչ ատեստավորումն իրականացվել է 2 մասնագիտությամբ՝ «Զբոսաշրջություն» և «Ֆինանսներ»: «Զբոսաշրջություն» մասնագիտության 6 շրջանավարտից 4-ը ստացել է «գերազանց», 2-ը՝ «լավ»: «Ֆինանսներ» մասնագիտության 10 շրջանավարտից 5-ը ստացել է «գերազանց», 5-ը՝ «լավ»:

Զեկուցող Մ.Զաքարյանը ներկայացրեց, որ Բնական գիտությունների ֆակուլտետում ամփոփիչ ատեստավորումն իրականացվել է 1՝ «Ինֆորմատիկա և կիրառական մաթեմատիկա» մասնագիտությամբ: 19 շրջանավարտից 7-ը ստացել է «գերազանց», 2-ը՝ «լավ», 10-ը՝ «բավարար»:

Երրորդ հարցի՝ ուսանողների կրթական և այլ կարիքների վերհանման, մատուցվող ծառայություն­ներից նրանց բավարարվածության գնահատման վերաբերյալ զեկուցեց Մասնագիտական կրթության որակի ապահովման բաժնի վարիչ Մ.Ճաղարյանը՝ ներկայացնելով 2022թ. փետրվար-մայիս ամիսներին բաժնի կողմից իրականացված ուսումնասիրությունների արդյունքում հավաքագրված խնդիրները և ուսանողների առաջարկները: Մասնավորապես անդրադարձ կատարվեց 2022թ. առկա ուսուցման շրջանավարտների՝ մասնաճյուղում ստացած կրթությունից բավարարվածության ուսումնասիրության արդյունքում առանձնացված, ամփոփիչ ատեստավորման հանձնաժողովների նախագահների կարծիքներից վերհանված խնդիրներին, 2021-22 ուստարվա 1-ին կիսամյակի հետազոտական աշխատանքների իրականացման և գնահատման հետ կապված խնդիրներին: Նշվեց, որ հետազոտական աշխատանքների իրականացումից և գնահատումից ուսանողների բավարարվածության առցանց հարցումն անցկացվել է 2022թ. մարտին, արդյունքները վերլուծվել են, քննարկվել ամբիոններում:

Մասնաճյուղում ստացած կրթությունից առկա ուսուցման շրջանավարտների բավարարվածության ուսումնասիրությունները ՄԿՈԱ բաժինն իրականացրել է 2022թ. մայիսին և ուսումնասիրության համար ընտրել է 2 մեթոդ՝ հարցում և խմբային քննարկում: Առկա ուսուցման շրջանավարտների՝ մասնաճյուղում ստացած կրթությունից բավարավածության առցանց հարցման արդյունքները բաժնում արդեն վերլուծվում են, դրանք ըստ կրթական ծրագրերի վերջնական խմբագրելուց հետո կներկայացվեն համապատասխան ամբիոններ՝ քննարկման համար, նաև մանրամասն կներկայացվեն ԵՊՀ ԻՄ-ի գիտական խորհրդում:

Այս հարցի կապակցությամբ տնօրենի կողմից ֆակուլտետների դեկաններին հանձնարարվեց հանգամանորեն ուսումնասիրել ուսանողների կրթական և այլ կարիքները, մատուցվող ծառայություն­ներից նրանց բավարարվածության հարցման արդյունքում վերհանված կարծիք-առաջարկներն ու խնդիրները և ներկայացնել դրանց լուծման վերաբերյալ առաջարկությունների փաթեթ:

Տնօրենության նիստում որոշվեց զեկուցողների հաղորդումներն ընդունել ի գիտություն:

 2022թ. ապրիլի 28-ին ԵՊՀ Իջևանի մասնաճյուղում Ա.Մակարյանի նախագահությամբ տեղի ունեցավ տնօրենության հերթական նիստը, որին մասնակցում էին տնօրենության անդամները, հրավիրված էին ՈՒՄՎ մինչհամալսարանական կրթության և պրակտիկաների կազմակերպման բաժնի վարիչ Լ.Բեգինյանը, Կրթական բարեփոխումների և դասախոսների վերապատրաստման բաժնի վարիչ Ն.Գրիգորյանը:

Օրակարգային 3 հարցերի վերաբերյալ զեկուցեց ՄԿՊԿ բաժնի վարիչ Լ.Բեգինյանը:

Առաջին հարցը վերաբերում էր ավագ դպրոցներում և քոլեջներում սովորողների համար ամենամյա «Բաց դռների օրեր» և ճանաչողական այցեր մասնաճյուղ կազմակերպելուն և ԵՊՀ ԻՄ-ի հետ պայմանագրային հիմունքներով համագործակցող ավագ դպրոցների և քոլեջների  շրջանակն  ընդլայնելուն:

Զեկուցող Լ․Բեգինյանը նշեց, որ 2021-2022 ուստարում ԵՊՀ Իջևանի մասնաճյուղը համագործակցության պայմանագիր է ունեցել Տավուշի մարզի չորս ավագ դպրոցների և չորս պետական քոլեջների (Իջևանի, Դիլիջանի, Նոյեմբերյանի, Բերդի) հետ: Դպրոց-բուհ համագործակցությունն ակտիվ է եղել մասնավորապես Իջևանի ավագ դպրոցի հետ: Իրականացվել է և՛ ԵՊՀ ԻՄ-ի մասնագետների ներգրավվում դպրոցի ուսումնական գործընթացում, և՛ դպրոցականների այցելություն մասնաճյուղ` նպատակ ունենալով աշակերտներին ծանոթացնել մասնաճյուղի գործու­նեությանը և համալսարա­նական միջավայրին, ուսանողական առօրյային, ներկայացնել աշակերտների հետաքրքրու­թյուններին համապատասխանող կրթական ծրագրերը, դասընթացները, տեղեկացնել բուհում գործող կենտրոնների և գործընթացների մասին:

Նախատեսվում է ակտիվացնել աշխատանքները Դիլիջանի ավագ դպրոցի հետ։

Քոլեջների հետ համագործակցության շրջանակներում կատարվել է քոլեջների մասնա­գիտությունների ուսումնական պլանների և մասնաճյուղի կրթական ծրագրերի ուսումնական պլանների հետ համեմատություն` նպատակ ունենալով ապահովել քոլեջներում «լավ» և «գերազանց» առաջադիմություն ունեցող շրջանավարտների ուսուցման շարունակա­կանությունը մասնաճյուղում:

Ս.թ. ապրիլի 22-ին ԵՊՀ Իջևանի մասնաճյուղի և Բերդի բազմագործառութային պետական քոլեջի միջև կնքված հուշագրով ավելի է ընդլայնվում համագործակցության շրջանակը՝ ներառելով տեղեկատվական օրերի կազմակերպում, դասընթացներ և ակնարկային դասա­խոսություններ՝ պրոֆեսորադասախոսական կազմի մասնակցությամբ, մասնագիտական կողմնորոշման դասընթացների կազմակերպում, շրջայց ԵՊՀ ԻՄ-ում, խորհրդատվություն և նախապատրաստական դասընթացներ քոլեջի շրջանավարտների համար:

Երկրորդ հարցը ԵՊՀ-ի և ԵՊՀ ԻՄ-ի դասախոսներին առավելագույնս հանրակրթական ուսումնական հաստատություններում՝ ակնարկային և բովանդակային դասախոսությունների,  թեմատիկ քննարկումների կազմակերպման գործում ներգրավելու մասին էր:

Զեկուցողը ներկայացրեց, որ 2021-2022 ուստարվա ընթացքում դպրոց-բուհ համագործակցության շրջանակներում խնդիր է դրվել դասախոսությունների, թեմատիկ քննարկումների կազմա­կերպմամբ օժանդակել հանրակրթական դպրոցներին: Մինչ այդ առաջարկ է կատարվել Ազատամուտի, Խաշթառակի և Թեղուտի միջնակարգ դպրոցների կողմից: Իրականացվել են դասախոսություններ «Պատմություն» և «Ֆիզիկա» առարկաներից: Վերջին հանդիպումների ընթացքում մարզի մի շարք դպրոցների տնօրենների կողմից առաջարկ է կատարվել մասնաճյուղում «Ֆիզիկա» և «Քիմիա» դասավանդող դասախոսներին ներգրավել դպրոցներում ձևավորվող լաբորատորիաների սկզբնական փորձարկումներում` աշխատանքները ճիշտ կազմակերպելու և անհրաժեշտ խորհրդատվություն ստանալու համար:

Այս հարցի կապակցությամբ ԵՊՀ ԻՄ-ի տնօրենի պաշտոնակատար Ա.Մակարյանն առաջարկեց ակտիվացնել մասնաճյուղի դասախոսների ներգրավվածությունը դպրոցներում՝ ակնարկային դասախոսություններով հանդես գալ, հաճախակի այցեր կազմակերպել, դասավանդել առարկաներ: Դրա շնորհիվ ավելի ակտիվ և արդյունավետ կլինի մասնաճյուղի և դպրոցների համագործակցությունը, հետագայում կխթանի նաև դիմորդների թվի աճը:

Մ.Զուրաբյանն առաջարկեց օգտագտագործել նաև ԵՊՀ ԻՄ-ի բարձր կուրսերի ուսանողների ներուժը՝ դասախոսություններով հանդես գալու, դասավանդման ոլորտում իրենց ուժերը փորձելու և բուհի ու դպրոցների կապն ավելի ամրապնդելու նպատակով:

Երրորդ հարցը վերաբերում էր 2021-2022 ուստարում դիմորդների հավաքագրման աշխատանքների կազմակերպման ընթացքին:

Զեկուցող Լ.Բեգինյանը նշեց, որ ՄԿՊԿ բաժնի կողմից 2021-2022 ուստարվա ընթացքում հանդիպումներ են կազմակերպվել միջնակարգ և ավագ դպրոցների ավարտական դասարանների աշակերտների համար` նպատակ ունենալով տրամադրել տեղեկատվություն 2022-2023 ուստարվա ընդունելության վերաբերյալ: Աշխատանքներն  իրականացվել են Ուսումնամեթոդական վարչության աշխատակիցների, ԵՊՀ ԻՄ-ի ընդունող հանձնա­ժողովի  կազմի և  առաջին անգամ այս աշխատանքներում ընդգրկած ուսանողների մասնակցությամբ: Այցելությունների շրջանակը ներառել է Տավուշի մարզի Իջևանի, Դիլիջանի, Բերդի Նոյեմբերյանի ավագ դպրոցները և գյուղերի միջնակարգ դպրոցները, Գեղարքունիքի մարզի Ճամբարակի ավագ դպրոցը, Դպրաբակ, Թթուջուր, Մարտունի, Գետիկ գյուղերի միջնակարգ դպրոցները (ընդհանուր 40-ից ավել դպրոցներ):

Այցելությունների ընթացում քննարկվել և տրամադրվել են մասնաճյուղի 2022թ. ընդունելությանը (մասնագիտություններին, կրթական ծրագրերին, քննություններին, տեղերին և վարձավճարներին) վերաբերող տեղեկություններ, ինչպես նաև մասնաճյուղի գործունեությունը գովազդող բուկլետներ:

2022-2023 ուստարվա համար մասնաճյուղի դիմորդների վերջնական տվյալները կներկայացվեն դիմում-հայտերի հայտագրման գործընթացի ավարտից հետո:

Նիստում որոշվեց օրակարգային 3 հարցերի վերաբերյալ զեկուցող Լ.Բեգինյանի հաղորդումներն ընդունել ի գիտություն:

Ընթացիկ հարցերը հիմնականում վերաբերում էին ԵՊՀ ԻՄ-ի կրթական ծրագրերի հանրագումարային մոնիթորինգի զեկույցի ներկայացմանը, 2022-2026 ուսումնական պլանների մշակման ընթացքին:

ԵՊՀ ԻՄ-ի կրթական ծրագրերի հանրագումարային մոնիթորինգի զեկույցը ներկայացրեց ԿԲԴՎ բաժնի վարիչ Ն.Գրիգորյանը:

Զեկուցողը նշեց, որ ԵՊՀ ԻՄ-ի կրթական ծրագրերի մոնիթորինգի և վերանայման կարգի և ԵՊՀ ԻՄ-ի տնօրենի «ԵՊՀ ԻՄ կրթական ծրագրերի մոնիթորինգի նպատակով աշխատանքային խմբեր ստեղծելու մասին» (144, § 5) հրամանի համաձայն՝ մասնաճյուղում ձևավորվել է 4 աշխատանքային խումբ՝ բաղկացած 7-ական անդամներից, որոնց մեջ ընդգրկված են կրթական ծրագրերի ղեկավարներ, արտաքին և ներքին շահակիցներ, ֆակուլտետի որակի կառավարման հանձնաժողովի լիազոր-ներկայացուցիչներ: Յուրաքանչյուր ֆակուլտետից ընտրվել է 1-ական կրթական ծրագիր. Հումանիտար գիտությունների ֆակուլտետից ընտրվել է «Ռուսաց լեզու և գրականություն» կրթական ծրագիրը, Բնական գիտությունների ֆակուլտետից՝ «Ինֆորմատիկա և կիրառական մաթեմատիկա», Տնտեսագիտության ֆակուլտետից՝ «Ֆինանսեր», Կիրառական արվեստի ֆակուլտետից՝ «Դեկորատիվ կիրառական արվեստ» կրթական ծրագիրը:

Կրթական ծրագրերի մոնիթորինգի նպատակն է բարելավել կրթական ծրագրերի մատուցման որակը, այն համապատասխանեցնել կրթական ծրագրերի սահմանած նպատակներին ու համապատասխան որակավորումների ոլորտային շրջանակների բնութագրիչներին:

Խմբերը, նախատեսված ընթացակարգի համաձայն, աշխատել են 2021թ. հոկտեմբերից մինչև 2022թ. մարտի 10-ն ընկած ժամանակահատվածը, մոնիթորինգի հաշվետվությունները ներկայացրել են համապատասխան ֆակուլտետների գիտական խորհուրդներում։ Այնուհետև դեկանները տվյալ հաշվետվությունները՝ համապատասխան եզրակացություններով, ներկայացրել են Կրթական բարեփոխումների և դասախոսների վերապատրաստման բաժին: ԿԲԴՎ բաժնի կողմից մարտի 10-24-ն ընկած ժամանակահատվածում ստուգվել է մոնիթորինգի հաշվետվությունների համապատասխանությունը սահմանված չափանիշներին: Ստուգված հաշվետվությունները մի քանի դիտարկումներ և շտկումներ անելուց հետո վերադարձվել են աշխատանքային խմբերին, կատարվել են նախանշված փոփոխությունները, և վերջնական հաշվետությունները ներկայացվել են բաժին:

Հաշվետվությունների վերջում տրված են ծրագրի ուժեղ և թույլ կողմերը՝ SWOT վերլուծության միջոցով: Վերլուծության վերջում ծրագրի որակի բարելավման (բարձրացման) գործողությունների պլանն է, որտեղ ներկայացված են առաջիկա երկու ուսումնական տարիների համար նախատեսված իրականացվելիք աշխատանքները՝ հստակ ժամկետներով և պատասխանատուներով:

Այս հարցի հետ կապված՝ Ա.Մակարյանը նշեց, որ ուշադրություն դարձնեն կրթական ծրագրերի թույլ կողմերին և վտանգներին՝ դրանք շտկելու և վերացնելու համար: Նա առաջարկեց բարելավման պլանները դիտարկել իրականացման տեսակետից՝ ուսումնասիրելով 2022-2026 ուստարիների համար վերանայված կրթական ծրագրերում կատարված փոփոխությունները:

Որոշվեց՝ զեկուցող Ն.Գրիգորյանի հաղորդումն ընդունել ի գիտություն:

2022-2026 ուսումնական պլանների մշակման ընթացքի մասին զեկուցեց Ուսումնամեթոդական վարչության պետ Ա.Դավթյանը: Նա նշեց, որ համաձայն ԵՊՀ ուսումնական գծով պրոռեկտորի՝ ստորաբաժանումներին, այդ թվում՝ ԵՊՀ ԻՄ-ին իջեցրած շրջաբերականի՝ վերանայվել 2022-2026 բակալավրի կրթական ծրագրերի ուսումնական պլանները։ Ըստ այդմ՝ Ուսումնամեթոդական վարչության կողմից պահանջ է իջեցվել մինչև ս․թ․ ապրիլի 25-ը վերանայել մասնաճյուղի ուսումնական պլանները և ներկայացնել վարչություն:

ԵՊՀ ԻՄ-ի առկա ուսուցման՝ 2022-2026 ուսումնական պլանները 12 կրթական ծրագրերից են: Այս պահի դրությամբ 12 կրթական ծրագրերից վերջնական վերնայվել և ՈՒՄՎ է ներկայացվել երկուսը՝ «Պատմություն» և «Ինֆորմատիկա և կիրառական մաթեմատիկա»: Մնացած կրթական ծրագրերում կան խնդիրներ՝ կապված 7-րդ կիսամյակի շարժունության պատուհանի հետ, որոնք շտկման փուլում են: Դրանից ելնելով՝ ՈՒՄՎ-ն միջնորդել է ևս մեկ շաբաթ տրամադրել կրթական ծրագրերի ղեկավարներին՝ ուսումնական պլանները վերջնական տեսքի բերելու և թերությունները շտկերու համար:

Որոշվեց՝ կրթական ծրագրերի ղեկավարներին տալ ևս մեկ շաբաթ՝ կրթական ծրագրերը շտկված և վերանայված տարբերակով ՈՒՄՎ ներկայացնելու համար: