Երևանի պետական համալսարանի Իջևանի մասնաճյուղ

Հերթական անգամ կրթաթոշակներ տրվեցին «Ֆրանսերեն լեզու և գրականություն» կրթական ծրագրի ուսանողներին

1. գլխավոր2023թ. սեպտեմբերի 8-ին «Հայ-ֆրանսիական բարեկամություն և փոխանակում» միության անդամ տիկին Վերոնիկ Նուեն ԵՊՀ ԻՄ-ի «Ֆրանսերեն լեզու և գրականություն» կրթական ծրագրով վճարովի ուսուցման համակարգում սովորող տասներկու ուսանողներին հանձնեց կրթաթոշակներ:

Փարիզի Ստեֆան Մալարմեի անվան քոլեջի դասախոս Վերոնիկ Նուեն արդեն երկրորդ անգամ է մասնաճյուղում (http://ijevan.ysu.am/04-03-2023/)՝ ուսանողների համար սեպտեմբերի 5-23-ն ընկած ժամանակահատվածում ֆրանսերենի բանավոր հաղորդակցման հմտությունները զարգացնող դասընթաց վարելու նպատակով: Տիկին Նուեն ԵՊՀ Իջևանի մասնաճյուղ այցելության շրջանակներում ստանձնել էր նաև «Հայ-ֆրանսիական բարեկամություն և փոխանակում» միության կողմից մեր ուսանողներին տրվող կրթաթոշակները հանձնելու առաքելությունը:

Վ.Նուեն կրթաթոշակներ հանձնեց «Ֆրանսերեն լեզու և գրականություն» կրթական ծրագրի ուսանողներ Մալվինա Գագիկի Խաչինյանին, Անուշ Արտակի Ղալթախչյանին, Հասմիկ Նվերի Ջանինյանին, Սվետլանա Արսենի Գասպարյանին, Անահիտ Նիկոլայի Միսկարյանին, Վանուհի Ռոբերտի Մկրտչյանին, Աննա Լևոնի Շահնազարյանին, Կարինա Մհերի Սաքանյանին, Մերի Արսենի Առաքելյանին, Մարիետա Կարենի Գուլլակյանին, Դիանա Գագիկի Գուլումյանին, Սեդա Արմանի Ենգիբարյանին:

Համալսարանականներն առանձնահատուկ շնորհակալություն հայտնեցին «Հայ-ֆրանսիական բարեկամություն և փոխանակում» միության նախագահ տիկին Պոլետ Կուտանին՝ մասնաճյուղի հետ երկարատև համագործակցության, պարբերաբար կրթաթոշակներ տրամադրելու համար, ուսանողները նաև խոստացան լինել ֆրանսերենի դեսպանները Տավուշի մարզում:

ԵՊՀ Իջևանի մասնաճյուղի և «Հայ-ֆրանսիական բարեկամություն և փոխանակում» միության միջև համագործակցությունը ծավալվել է դեռևս 2012 թվականից, երբ նույն թվականի սեպտեմբերի 28-ին մասնաճյուղ այցելած միության անդամներ Պոլետ Կուտանը և Բեռնար Կուտանը ներկայացրել էին կրթության ոլորտին վերաբերող ծրագիր, որը հավանության էր արժանացել ԵՊՀ ԻՄ-ի կողմից: 2021թ․ հոկտեմբերի 2-ին էլ մասնաճյուղի և միության միջև ստորագրվել է համագործակցության համաձայնագիր, ըստ որի՝ ֆրանսիական կողմը շարունակելու է կրթաթոշակներ հանձնել ԵՊՀ ԻՄ-ի «Ֆրանսերեն լեզու և գրականություն» կրթական ծրագրի վճարովի ուսուցման համակարգի ուսանողներին, ինչպես նաև անվճար ուսուցման համակարգում սովորող այն ակտիվ ուսանողներին, ովքեր կնպաստեն մարզի դպրոցներում ֆրանկոֆոնիայի տարածմանը:

Մասնաճյուղում իրականացվում են պարտադիր ատեստավորման ենթակա ուսուցիչների վերապատրաստումներ

1. գլխավոր 2023թ. սեպտեմբերի 5-ից ԵՊՀ Իջևանի մասնաճյուղում նորից մեկնարկեցին պարտադիր ատեստավորման ենթակա ուսուցիչների վերապատրաստումները, որոնք կտևեն մինչև հոկտեմբերի 28-ը:

Վերապատրաստումներն իրականացվում են՝ հիմնվելով ԿԳՄՍ նախարարի՝ ԵՊՀ ԻՄ-ը որպես ատեստավորման ենթակա ուսուցչին վերապատաստող կազմակերպություն երաշխավորելու և դասընթացների ցանկը հաստատելու և ԵՊՀ ԻՄ-ի կողմից ներկայացված հերթական ատեստավորման ենթակա ուսուցիչների վերապատրաստման դասընթացի մոդուլները հաստատելու մասին հրամանների վրա: Դեռևս 2021 թվականին ՀՀ ԿԳՄՍ նախարարության երաշխավորությամբ ԵՊՀ Իջևանի մասնաճյուղը հնարավորություն էր ստացել կազմակերպելու ատեստավորման ենթակա ուսուցիչների վերապատրաստման դասընթացներ:

Վերապատրաստումների մեկնարկից առաջ ուսուցիչներին ողջունեց ԵՊՀ ԻՄ-ի տնօրենի պաշտոնակատար Անուշավան Մակարյանը՝ ընդգծելով իրականացվող վերապատրաստումների դերը ուսուցիչների մասնագիտական կարողությունների ու հմտությունների զարգացման և փորձի փոխանակման գործում, մաղթելով բարի ընթացք:

Հերթական ատեստավորման ենթակա ավելի քան հինգ տասնյակ ուսուցիչների վերապատրաստումները ԵՊՀ ԻՄ-ում իրականացվելու են բոլոր բաղադրիչներով հետևյալ մոդուլների համար.

  1. տարրական դասարաններ,
  2. հայոց լեզու և գրականություն,
  3. պատմություն,
  4. հասարակագիտություն,
  5. աշխարհագրություն
  6. անգլերեն,
  7. ֆրանսերեն,
  8. ռուսաց լեզու,
  9. մաթեմատիկա:

Վերապատրաստումները նպատակ ունեն զարգացնելու ուսուցիչների՝ աշակերտակենտրոն մոտեցումներով և նորարարական մեթոդներով դասավանդման հմտությունները: Դրանք իրականացվելու են առկա եղանակով ԵՊՀ Իջևանի մասնաճյուղի, հանրապետության և մարզի առաջատար ու արհեստավարժ մասնագետների կողմից:

ԵՊՀ ԻՄ-ում տոնական միջոցառմամբ մեկնարկեց նոր՝ 2023-2024 ուսումնական տարին

1. գլխավոր 2023թ. սեպտեմբերի 1-ին ԵՊՀ Իջևանի մասնաճյուղում կայացավ Գիտելիքի և դպրության օրվան նվիրված միջոցառում, որը կազմակերպել էր ԵՊՀ ԻՄ-ի ուսանողական խորհուրդը:

Միջոցառման սկզբում հնչեցին Հայաստանի Հանրապետության օրհներգը և Երևանի պետական համալսարանի հիմնը, 1 րոպե լռությամբ հարգանքի տուրք մատուցվեց Արցախյան 44-օրյա պատերազմում անմահացած մեր հայորդիների հիշատակին:

Գիտելիքի և դպրության օրվա, նոր ուսումնական տարվա մեկնարկի առթիվ ԵՊՀ Իջևանի մասնաճյուղի տնօրենի պաշտոնակատար Անուշավան Մակարյանը շնորհավորական ուղերձ հղեց բոլոր համալսարանականներին՝ բուհի ամբողջ անձնակազմին, ուսանողներին և հատկապես առաջին կուրսեցիներին (տնօրենի ուղերձը տե՛ս այստեղ): Այս տարի Մայր բուհի սահմանապահ մասնաճյուղն իր հարկի տակ ընդունել է 161 առաջին կուրսեցիների:

2023-2024 ուստարում հաճելի անակնկալ էր սպասում ԵՊՀ Իջևանի մասնաճյուղ վճարովի հիմունքներով ընդունված այն 4 դիմորդներին, ովքեր ընդունելության քննություններին հավաքել էին ամենաբարձր միավորներ:

Պարոն Մակարյանը ուսման վճարի լրիվ փոխհատուցման հավաստագրեր հանձնեց «Ֆինանսներ» մասնագիտության առաջին կուրսի ուսանողուհի Լիլիթ Աշոտի Վարդումյանին, «Դեկորատիվ-կիրառական արվեստ» մասնագիտության առաջին կուրսի ուսանողուհի Աստղիկ Գեղամի Ներկարարյանին, «Հոգեբանություն» մասնագիտության աառաջին կուրսի ուսանողուհի Սերինե Գեորգիի Պատառյանին և «Պատմություն» մասնագիտության առաջին կուրսի ուսանողուհի Մերի Հրաչյայի Բաղդասարյանին:

 Միջոցառման շրջանակներում իրականացվեց նաև «Տարվա ուսանող-2023» ամենամյա մրցույթի հաղթողների պարգևատրման արարողությունը. ԵՊՀ ԻՄ-ի «Ինֆորմատիկա և կիրառական մաթեմատիկա» մասնագիտության 4-րդ կուրսի ուսանողուհի Իննա Հրայրի Հարությունյանը պարգևատրվեց արծաթե մեդալով և հավաստագրով, իսկ «Հայոց լեզու և գրականություն» մասնագիտության 2023թ. շրջանավարտ Նարա Արմենի Մելքումյանը ստացավ հաղթողի հավակնորդի հավաստագիր:

Այնուհետև ողջույնի և շնորհավորանքի խոսքով հանդես եկավ ԵՊՀ ԻՄ-ի ուսանողական խորհրդի նախագահ Էռնեստ Խանումյանը՝ ընդգծելով. «Այս տարի Գիտելիքի և դպրության օրը տոնում ենք միասնությամբ և վճռականությամբ՝ վերստին կարևորելով ուսանողների շարունակական հզորացումը, ուսանողակենտրոն նախաձեռնությունների իրականացման անհրաժեշտությունն ու ուսանողների մասնակցությունը համալսարանական կյանքին` բոլոր դրսևորումներով»:

Ապա կայացավ առաջին կուրսեցիների երդման հանդիսավոր արարողությունը: Երդումն ընթերցեց մասնաճյուղի այս տարվա առավելագույն միավորներ հավաքած դիմորդը՝ «Ինֆորմատիկա և կիրառական մաթեմատիկա» մասնագիտության առաջին կուրսի ուսանողուհի Լուիզա Աշոտի Մելիքբեկյանը: Համալսարանականները երդվեցին արժանի լինել ԵՊՀ Իջևանի մասնաճյուղի ուսանող լինելու բարձր կոչմանը, լինել օրինավոր քաղաքացիներ, նպաստել երկրի պետականության զարգացմանը: Պահպանելով ավանդույթը՝ գիտելիքի բանալին 4-րդ կուրսի ուսանողուհի Իննա Հրայրի Հարությունյանը փոխանցեց առաջին կուրսեցի Լուիզա Աշոտի Մելիքբեկյանին:

Միջոցառման ընթացքում հնչեցին երաժշտական կատարումներ:

Տոնական միջոցառումից հետո լսարաններում մեկնարկեցին նոր՝ 2023-2024 ուսումնական տարվա դասերը:

 

 

 

ԵՊՀ ԻՄ-ի տնօրենի ուղերձը Գիտելիքի օրվա և նոր ուսումնական տարվա առթիվ

Տնօրենի ուղերձի նկարը1 Սիրելի՛ համալսարանականներ՝ ուսանողներ, պրոֆեսորադասախոսական և օժանդակ անձնակազմի անդամներ, ջերմորեն շնորհավորում եմ նոր՝ 2023-2024 ուսումնական տարվա ու Գիտելիքի և դպրության օրվա առթիվ, մաղթում նշանակալի ձեռքբերումներ և հաջողություններ, ուսումնատենչ ոգի և նպատակասլացություն, մասնագիտական առաջընթաց և ամենայն բարիք….

Այսօր հիշարժան օր է, մեծ տոն բոլոր համալսարանականներիս և առանձնապես առաջին կուրսեցիների համար, ովքեր դպրոցական 12 երկար տարիներից հետո մուտք են գործել մեծ կյանք, համալսարանական միջավայր: Սիրելի՛ առաջին կուրսեցիներ, թո՛ղ բարի լինի ձեր մուտքը մեր համալսարան՝ Երևանի պետական համալսարանի Իջևանի մասնաճյուղ, թո՛ղ մեր սիրված ջերմ կրթօջախում իրականություն դառնան բոլորիդ նվիրական ցանկությունները, լուսավոր գաղափարներն ու նպատակները:

Յուրաքանչյուր հասարակության շարժիչ ուժը, երկրի զարգացման և առաջընթացի հիմնական գրավականը, հիրավի, կրթված և առաջադեմ երիտասարդներն են: Սիրելի՛ ուսանողներ, ցանկանում և խորապես հավատում եմ, որ ուսանողական տարիները կլինեն ձեր կյանքի լավագույն ու հիշարժան, վառ տպավորությունների, հարուստ գիտելիքների ամբարման, հետաքրքիր մտահղացումների և ստեղծարար նախաձեռնությունների իրականացման, ինքնազարգացման և մասնագիտական աճի տարիներ:

Տարածաշրջանում առաջատար դիրք ու նշանակություն ունեցող մեր կրթօջախում ապահովված են բոլոր անհրաժեշտ պայմանները, մարդկային, մտավոր, նյութատեխնիկական ռեսուրսները (առաջին հերթին բարձրակարգ և արհեստավարժ պրոֆեսորադասախոսական կազմ, ժամանակակից կահավորմամբ լսարաններ, արվեստանոցներ, հարուստ գրադարան, մարզասրահ և այլն) որակյալ կրթություն տրամադրելու, աշխատաշուկայում պահանջված և մրցունակ մասնագետներ պատրաստելու համար:

Եվս մեկ անգամ շնորհավորելով՝ առաջին կուրսեցիներին մաղթում եմ բարի գալուստ ԵՊՀ Իջևանի մասնաճյուղ և բոլոր համալսարանականներիս ցանկանում հաջող և արդյունավետ ուսումնական տարի….

 

ԵՊՀ Իջևանի մասնաճյուղի տնօրենի պաշտոնակատար,

ֆիզ.մաթ. գիտ. թեկն., դոցենտ Անուշավան Մակարյան

Տնօրենության նիստ

1. գլխավոր. IMG_6600 2023թ. օգոստոսի 31-ին ԵՊՀ Իջևանի մասնաճյուղում Ա. Հ. Մակարյանի նախագահությամբ կայացավ տնօրենության նիստ՝ օրակարգային 4 և ընթացիկ 1 հարցերով:

Նիստում քննարկվեցին ԵՊՀ ԻՄ-ի տնօրենության տարեկան աշխատանքային պլանի հաստատմանը, նոր՝ 2023-2024 ուսումնական տարվա նախապատրաստական աշխատանքներին, 2022-2023 ուստարվա 2-րդ կիսամյակի բակալավրի առկա և բակալավրի ու մագիստրատուրայի հեռակա ուսուցման 2-րդ կիսամյակի քննաշրջանի ամփոփմանը (լուծարքային շրջանը ներառյալ), 2023-2024 ուստարվա 2-րդ կիսամյակի անվանական կրթաթոշակների (Վազգեն Սարգսյան, Մոնթե Մելքոնյան) տրամադրմանը վերաբերող հարցեր:

ԵՊՀ ԻՄ-ի տնօրենության տարեկան աշխատանքային պլանում նախանշված էին 2023-2024 ուստարվա ուսումնական գործընթացի կազմակերպման հետ կապված հիմնական աշխատանքները՝ իրենց պատասխանատուներով, ժամկետներով, համագործակցող ստորաբաժանումներով: Ժամկետների փոփոխության առնչությամբ տնօրենության անդամների կողմից կատարվեցին որոշ առաջարկություններ:

Որոշվեց հաստատել ԵՊՀ ԻՄ-ի տնօրենության տարեկան աշխատանքային պլանը՝ առաջարկված փոփոխություններով հանդերձ:

2023-2024 ուսումնական տարվա նախապատրաստական աշխատանքների վերաբերյալ ներկայացվեց, որ իրականացվել են դասացուցակների, դասամատյանների, ըստ կուրսերի ու խմբերի՝ լսարանային ֆոնդի բաշխման և այլնի հետ կապված անհրաժեշտ աշխատանքները: Հաստատված դասացուցակները տեղադրվել են ԵՊՀ ԻՄ-ի պաշտոնական կայքէջում: Այդ կապակցությամբ տնօրենը նաև դեկաններին հանձնարարեց հետևողական լինել, որ դասացուցակները գործավարների կողմից ուղարկված լինեն դասախոսների էլեկտրոնային հասցեներին: Նշվեց, որ մասնաճյուղը լիովին պատրաստ է նոր ուսումնական տարվան:

2022-2023 ուստարվա 2-րդ կիսամյակի բակալավրի առկա և բակալավրի ու մագիստրատուրայի հեռակա ուսուցման 2-րդ կիսամյակի քննաշրջանի ամփոփման (լուծարքային շրջանը ներառյալ) մասին նշվեց, որ 2022-2023 ուստարվա 2-րդ կիսամյակի քննաշրջանին մասնակցել են առկա ուսուցման 506 և հեռակա ուսուցման 402 ուսանողներ (ավարտական կուրսերը չհաշված): Քննաշրջանի արդյունքների համաձայն՝ մասնաճյուղից հեռացվում է 4 ուսանող (առկա ուսուցման համակարգի 1 և հեռակա ուսուցման 3): Ակադեմիական պարտքեր է կուտակել 21 ուսանող (2-ը՝ առկա, 19-ը՝ հեռակա ուսուցմամբ սովորող):

Ըստ քննաշրջանի արդյունքների՝ դասընթացը կրկնող ուսանողներ չունենք:

2023-2024 ուստարվա 2-րդ կիսամյակի անվանական կրթաթոշակների (Վազգեն Սարգսյան, Մոնթե Մելքոնյան) տրամադրման հարցի հետ կապված՝ «Մոնթե Մելքոնյան» անվանական կրթաթոշակի համար Հումանիտար գիտությունների ֆակուլտետի կողմից առաջարկվեց «Ռուսաց լեզու և գրականություն» կրթական ծրագրի 4-րդ կուրսի ուսանողուհի Արփինե Վահեի Վանեսյանի թեկնածությունը, իսկ «Վազգեն Սարգսյան» անվանական կրթաթոշակի համար Տնտեսագիտության ֆակուլտետի կողմից ներկայացվեց «Զբոսաշրջություն» կրթական ծրագրի 4-րդ կուրսի ուսանողուհի Մալվինա Հովհաննեսի Վարդապետյանի թեկնածությունը:

Առաջարկված թեկնածությունները հավանության արժանացան տնօրենության անդամների կողմից:

Ընթացիկ հարցը վերաբերում էր 1 ուսանողի ուսանողական իրավունքները վերականգնելուն: Նշվեց, որ Ուսումնամեթոդական վարչության կողմից ստուգվել է ուսանողի ներկայացրած փաստաթղթերի համապատասխանությունը «Հայաստանի Հանրապետության բարձրագույն ուսումնական հաստատությունների ուսանողների հեռացման (ազատման) և վերականգնման» կարգին, որի համաձայն՝ նրան թույլատրվում է վերականգնել իր ուսանողական իրավունքները:

Վերջում ԵՊՀ ԻՄ-ի տնօրենի պաշտոնակատար Ա.Մակարյանը շնորհավորեց նոր ուսումնական տարվա մեկնարկի առթիվ և բոլորին մաղթեց բարեհաջող ուսումնական գործընթաց: