Օրերս ամփոփվել են 2023 թ. դեկտեմբերի 30-ին Ռուսաստանի Նիժնի Նովգորոդ քաղաքում անցկացված «Տարվա ուսանող 2023» միջազգային մրցույթի արդյունքները, որոնց համաձայն՝ ԵՊՀ ԻՄ բնական գիտությունների ֆակուլտետի «Ինֆորմատիկա և կիրառական մաթեմատիկա» կրթական ծրագրի 3-րդ կուրսի ուսանող Սահակ Գեղամի Գուլակյանը 5 անվանակարգում արժանացել է դիպլոմների:

«Տարվա ուսանող 2023» միջազգային մրցույթին մասնակցել են Հայաստանի, Տաջիկստանի, Ղազախստանի և Ռուսաստանի բուհերի բակալավրատի, մագիստրատուրայի և ասպիրատուրայի ուսանողներ:

Միջազգային մրցույթը, ինչպես նշում են կազմակերպիչները, ակտուալ և նշանակալից իրադարձություն է, որի նպատակն է ճանաչել և աջակցել տաղանդավոր ուսանողներին ամբողջ աշխարհում: Այն թույլ է տալիս ընդգծել և ոգեշնչել երիտասարդ առաջնորդներին, ովքեր կկարողանան լուծել արագ փոփոխվող տեխնոլոգիաների, սոցիալական և բնապահպանական  խնդիրները և ստեղծել պայծառ ապագա:

«Տարվա ուսանող 2023» միջազգային մրցույթն անցկացվել է 17 անվանակարգում: Ընդհանուր թվով 47 մասնակիցներ արժանացել  են 1-ին, 2-րդ և 3-րդ կարգի 80 մրցանակի:

Հայաստանից «Տարվա ուսանող 2023» միջազգային  մրցույթին մասնակցել է ԵՊՀ Իջևանի մասնաճյուղի բնական գիտությունների ֆակուլտետի ուսանող Սահակ Գուլակյանը՝ 5 անվանակարգում ստանալով տարբեր կարգի դիպլոմներ:

«Երիտասարդ նորարար» անվանակարգում Ս. Գուլակյանն արժանացել է 1-ին կարգի դափնեկրի դիպլոմի, «Տարվա էկոլոգիական պաշտպան» անվանակարգում՝ հաղթողի 2-րդ կարգի դիպլոմի, «Տարվա միջազգային ուսանող», «Երիտասարդ հետազոտող» և «Տարվա բեկում» անվանակարգերում՝ հաղթողի 3-րդ կարգի դիպլոմի:

Միջազգային մրցույթին նախապատրաստվելու գործում Սահակ Գուլակյանին ցուցաբերված մասնագիտական աջակցության և տարբեր անվանակարգերում դիպլոմներ ստանալու համար շնորհակալագրերի է արժանացել գիտական ղեկավար, ԵՊՀ ԻՄ ընդհանուր մաթեմատիկայի և բնագիտության ամբիոնի դոցենտ, ֆ.մ.գ.թ. Ալեքսան Մարգարյանը:

Մասնաճյուղի ղեկավարության և ամբողջ անձնակազմի անունից սիրով շնորհավորում ենք Սահակ Գուլակյանին՝ նրան մաղթելով նորանոր ձեռքբերումներ ու հաջողություններ ուսման մեջ և կյանքում, նախաձեռնողականություն և նպատակասլացություն, ամենայն բարիք:

Մրցույթի մանրամասներին կարող եք ծանոթանալ հետևյալ հղումով՝ http://students.interclover.ru/econ/student.html:

 2024 թ. փետրվարի 3-ին ԵՊՀ Իջևանի մասնաճյուղում կայացավ «Ընդհանուր մանկավարժություն» մասնագիտության «Դպրոցական մանկավարժություն և մեթոդիկա» կրթական ծրագրի ավարտական կուրսի մագիստրոսական թեզերի պաշտպանությունը:

ԵՊՀ ԻՄ տնօրենի պաշտոնակատար Ա. Մակարյանը պաշտպանությունից առաջ ողջունեց ապագա մագիստրոսներին և հանձնաժողովի անդամներին՝ նրանց ցանկանալով հաջող և արդյունավետ պաշտպանություն:

Ամփոփիչ ատեստավորման հանձնաժողովը նախագահում էր Վ․ Բրյուսովի անվան պետական համալսարանի մանկավարժության և լեզուների դասավանդման մեթոդիկայի ամբիոնի վարիչ, մ․գ․թ․, դոցենտ Լուիզա Միլիտոսյանը:

Աշխատանքներն իրականացվել էին համաձայն ԵՊՀ Իջևանի մասնաճյուղում հեռակա ուսուցման մագիստրոսական թեզի պատրաստման և գնահատման կարգի։ 

Ըստ արդյունքների՝ պաշտպանությանը մասնակցող 13 ուսանողներից 8-ը գնահատվել է «գերազանց», 5-ը՝ «լավ»:

Ամփոփիչ ատեստավորման հանձնաժողովի կարծիքով՝ պաշտպանությունը կազմակերպված էր բարձր մակարդակով, ապահովված էին բոլոր պայմանները բնականոն ընթացքի համար: Ընդհանուր առմամբ բոլոր աշխատանքներում տեսական, գործնական և հետազոտական արդյունքները արժանահավատ և հիմնավորված էին: Հետազոտության արդյունքները մշակված էին և արտահայտված տրամագրերում՝ համապատասխան որակական վերլուծություններով:

Մագիստրոսական թեզերի թեմաները հետաքրքիր էին, արդիական, մասնագիտական որակավորմանը համապատասխան: Դրանք շարադրված էին գիտական լեզվով, պահանջների համաձայն:

Որոշ աշխատանքներ կարող են հետագայում ունենալ իրենց զարգացումը՝ խորացնելով հետազոտությունը ուսումնառության հաջորդ մակարդակում:

Հետագա բարելավման ուղղությամբ հանձնաժողովն արել է հետևյալ նկատառումները և դիտարկումները.

• Որոշ դեպքերում հետազոտության նպատակը և խնդիրները հստակ ձևակերպման կարիք ունեին:
• Ցանկալի է օգտագործել նաև հայալեզու մասնագիտական գրականություն՝ ներառելով նորագույն հետազոտություններ:

ԵՊՀ Իջևանի մասնաճյուղի ղեկավարության և անձնակազմի անունից սիրով շնորհավորում ենք «Ընդհանուր մանկավարժություն» մասնագիտությամբ մագիստրատուրայի 2024 թ. շրջանավարտներին, նրանց ցանկանում մասնագիտական առաջընթաց և հաջողություններ, ձեռք բերված գիտելիքների, կարողությունների և հմտությունների նպատակային և արդյունավետ կիրառում:

 ԵՊՀ Իջևանի մասնաճյուղի հումանիտար գիտությունների ֆակուլտետում կայացավ հանդիպում, որի ընթացքում Գիտության և մշակույթի Երևանի ռուսական կենտրոնի սահմանած «Տարվա լավագույն ուսանող» մրցանակը հանձնվեց, և շնորհավորանքներ ուղղվեցին ԵՊՀ ԻՄ «Ռուսաց լեզու և գրականություն» կրթական ծրագրի երրորդ կուրսի ուսանողուհի Նազելի Եսայանին:

Ձևավորված ավանդույթի համաձայն՝ ս.թ. հունվարի 25-ին Մ. Վ. Լոմոնոսովի անվան Մոսկվայի պետական համալսարանի Երևանի մասնաճյուղում կայացավ Ուսանողների օրվան նվիրված հանդիսավոր միջոցառում, որը կազմակերպել էր Գիտության և մշակույթի Երևանի ռուսական կենտրոնը` Մոսկվայի պետական համալսարանի Երևանի մասնաճյուղի հետ համատեղ:

Միջոցառման շրջանակներում տեղի ունեցավ «Տարվա լավագույն ուսանող» անվանակարգում մրցանակաբաշխության ավանդական արարողությունը, որի ընթացքում Հայաստանում գործող համալսարանների ռուսական բանասիրության ֆակուլտետի 2023 թվականին իրենց ուսումնառությամբ առանձնացած 16 ուսանողները ստացան հավաստագրեր և խրախուսական մրցանակներ:

Լավագույն ուսանող ընտրելու առաջարկ էր ուղարկվել նաև ԵՊՀ Իջևանի մասնաճյուղին: Ի պատասխան Երևանում գիտության և մշակույթի ռուսական կենտրոնի ուղարկած հրավերի՝ ԵՊՀ ԻՄ հումանիտար գիտությունների ֆակուլտետի կողմից «Տարվա լավագույն ուսանող» միջոցառման պարգևատրման համար ներկայացվել էր «Ռուսաց լեզու և գրականություն» կրթական ծրագրի 3-րդ կուրսի ուսանողուհի Նազելի Գարիկի Եսայանի թեկնածությունը՝ նկատի ունենալով մարզի դպրոցներում ռուսաց լեզվի և ռուսական մշակույթի հանրայնացման ուղղությամբ նրա կատարած կամավորական աշխատանքները, առաջադիմությունը, ուսանողական գիտական և հասարակական կառույցներում նրա ունեցած  ակտիվությունը:

«Տարվա լավագույն ուսանող» անվանակարգում Նազելի Եսայանին շնորհվել է դիպլոմ և խրախուսական մրցանակ:

ԵՊՀ Իջևանի մասնաճյուղի ղեկավարության և ողջ անձնակազմի անունից սիրով շնորհավորում ենք Նազելի Եսայանին, նրան մաղթում ուսման մեջ և կյանքում նոր ձեռքբերումներ և շարունակական վերելքներ:

 2024 թ. հունվարի 28-ը Հայոց բանակի կազմավորման 32-րդ տարեդարձի օրն է, որի առթիվ ԵՊՀ Իջևանի մասնաճյուղի ղեկավարության և ողջ անձնակազմի անունից սիրով շնորհավորում ենք հայ ագին, մեր բոլոր զինծառայողներին՝ շարքայինից մինչև բարձրագույն սպայական անձնակազմ…

Բանակի օրը հնարավորություն է վերստին հիշելու և արժևորելու, մեր խորին խոնարհումն ու երախտագիտությունն արտահայտելու բոլոր ազատամարտիկներին, Հայոց բանակի ստեղծման և կայացման բոլոր երախտավորներին, հայրենի հողի սուրբ պաշտպաններին, բոլոր զինծառայողներին, մեր այն համալսարանականներին, ովքեր Արցախյան պատերազմների օրերին աննկուն պայքար մղեցին հանուն հայրենիքի, մեր երկրի պաշտպանության, հանուն սեփական հողի վրա ազատ ապրելու և արարելու մեր իրավունքի…

Հայոց բանակը ստեղծվել է Արցախյան ազատամարտի բովում` երկրապահ-կամավորական ջոկատների հիմքի վրա` դառնալով մեր պատմության նշանակալի ձեռքբերումներից մեկը, հայրենիքի պաշտպանության ու անվտանգության երաշխավորը:

1990 թվականին` Անկախության հռչակագրի ընդունումից հետո, կազմավորվել է Երևանի հատուկ գունդը, Արարատում, Գորիսում, Վարդենիսում, Իջևանում ու Մեղրիում ձևավորվել են վաշտեր: 1991 թ. կառավարության որոշմամբ ստեղծվել է նախարարների խորհրդին առընթեր Պաշտպանության պետական կոմիտեն: 1992 թ. հունվարի 28-ին Կառավարությունն ընդունել է ՀՀ պաշտպանության նախարարության մասին որոշում:

1992-1993 թթ. երկրապահ կամավորական ջոկատների և բանակ զորակոչված զինակոչիկների միավորումով ստեղծվեց շարժունակ և կարգապահ բանակ:

1994 թ. հունիսից վերջնականապես ընթացք ստացան բանակաշինության, կայուն զարգացման, զորքերի մարտունակության բարձրացման, կարգապահության ամրապնդման, միջին և բարձր սպայական անձնակազմի պատրաստման ու վերապատրաստման աշխատանքները:

2001 թվականին օրը դարձավ տոն, երբ Տոների և հիշատակի օրերի մասին օրենքում ամրագրվեց որպես Բանակի օր:

Կազմավորման 32-րդ տարեդարձի առթիվ Հայոց բանակին ցանկանում ենք հզորացում, բարձր մարտունակություն և հաղթանակներ, մեր բանակի քաջարի արծիվներին՝ փառք ու պատիվ, հաղթական ոգի և տոկունություն, անփորձանք ծառայություն և բարի վերադարձ…