2018թ. մայիսի 12-ին ԵՊՀ Իջևանի մասնաճյուղում կայացավ «1918թ. Մայիսյան հերոսամարտերը և Հայաստանի առաջին հանրապետության արարման գործընթացը» խորագրով հանրապետական գիտաժողովը՝ նվիրված Առաջին հանրապետության հիմնադրման 100-ամյակին:

Գիտաժողովին մասնակցում էին հանրապետության գիտաուսումնական հաստատությունների ավելի քան 50 ներկայացուցիչներ (ոչ միայն դասախոսներ, ուսումնագիտական ոլորտի աշխատակիցներ, այլև ուսանողներ ու շրջանավարտներ):

«1918թ. Մայիսյան հերոսամարտերը և Հայաստանի առաջին հանրապետության արարման գործընթացը» խորագրով գիտաժողովն անցկացվեց չորս բաժանմունքներում.

1. «Հայոց պատմություն, տնտեսագիտություն, հասարակագիտություն և արվեստ» (համանախագահներ՝ Դավիթ Ֆերդինանդի Թինոյան /ամբիոնի վարիչ/, Նաթելլա Սերոժի Գրիգորյան /կրթական ծրագրի պատասխանատու/):
   
2. «Հայոց լեզու և գրականություն» (համանախագահներ՝ Վաչագան Վարազդատի Ավագյան /ամբիոնի վարիչ/, Աիդա Ասիլբեկի Սարհատյան  /կրթական ծրագրի պատասխանատու/):
   
3. «Մանկավարժություն և հոգեբանություն» (համանախագահներ՝ Լիանա Միքայելի Հարությունյան  /ամբիոնի վարիչ/, Աննա Սերյոժայի Քամալյան    /կրթական ծրագրի պատասխանատու/):
   
4. «Անգլերեն լեզու և գրականություն» (համանախագահներ՝ Հարությունյան Քրիստինե Մուրադի /ամբիոնի վարիչ/, Աստղիկ Վահանի Սիմոնյան /կրթական ծրագրի պատասխանատու/):
   

Նախ տեղի ունեցավ լիագումար նիստ, և բացման խոսքով հանդես եկավ ԵՊՀ Իջևանի մասնաճյուղի տնօրեն, պատմ. գիտ. թեկն., դոցենտ Սամվել Առաքելյանը: Նա ողջունեց բոլոր ներկաներին, գիտաժողովի կազմակերպիչներին, մասնակիցներին, հրավիրվածներին և հատկապես երիտասարդներին՝ համոզմունք արտահայտելով, որ շատ կարճ ժամանակամիջոցում մեր երիտասարդները կունենան այն Հայաստանը, որ մեր բոլորիս համար եղել է երազանք: Պարոն Առաքելյանը խորհրդանշական համարեց այն հանգամանքը, որ Հայաստանի 1-ին Հանրապետության 100-ամյակին նվիրված գիտաժողովը և մյուս միջոցառումները սկսում ենք այս պայմաններում՝ նոր Հայաստանում, նոր մտածողությամբ, նոր գիտակցությամբ և նոր երիտասարդներով: Նա ընդգծեց գիտաժողովի կարևորությունը և նպատակը, հիմնական գծերով ներկայացրեց 1918թ. Մայիսյան հերոսամարտերը և Առաջին հանրապետության արարման գործընթացը՝ ընդգծելով սեփական պայքարով մեր ազատ-անկախ պետությունը կերտելու պատմական ճշմարտությունը.

«Կարծեք թե այնպես է ստացվում, որ ուրիշներին նվեր է տրվում, մեզ, ընդհակառակը, տրված է պայքարով կերտելու մեր ազատությունը, և այս Երկիր մոլորակի վրա՝ մի փոքր անկյունում, մենք ազատ-անկախ ապրելու իրավունքի համար պիտի պայքարենք. սա է մեր՝ հայի ճակատագիրը, և մենք պիտի ընդունենք, որ դա է մերը, և չպիտի բողոքենք այդ ճակատագրից, որովհետև երևի Աստված մեզ շատ է սիրում, այդ իսկ պատճառով մեզ տալիս է նման ճակատագիր և փորձում է տեսնել՝ մենք կարող ենք այդ իրականության մեջ հաջողությունների հասնել և հաղթանակ տանել … Անհնար է բացատրել Սարդարապատի, Բաշ-Ապարանի, Էջմիածնի, Շուշիի հաղթանակները: Կարո՞ղ ենք բացատրել, թե ինչպես հայ շինականը եղանով, գերանդիով, քարով, փայտով կարող էր հաղթել թուրքական բանակին, այն էլ՝ լավ զինված բանակին: Դժվար է բացատրել այն ինչ, ոգեղեն է: Այ սա՛ է մեր ժողովրդի ուժը. ես հպարտ եմ, որ մի ժողովրդի զավակ եմ, որը զրոյից պետականություն է ստեղծել, որը նման հաղթանակներ է տարել, մենք պիտի պարծենանք դրանով, և էլ երբեք չասենք, որ այս երկիրը երկիր չէ. այս երկիրը երկիր է (այս վերջերս, փառք Աստծո, ասվում է), հզոր երկիր է, այս երկրում ապրող մարդիկ հրաշք մարդիկ են, հրաշք ժողովուրդ, որը  հաղթել է Սարդարապատում, Բաշ-Ապարանում, Շուշի է ազատագրել: Շնորհավորում ենք բոլորիս՝ նման ժողովրդի զավակ լինելու համար, և յուրաքանչյուրս պարտավոր ենք դողալ այս պետության արժեքների համար, պետք է պայքարենք պահել ամեն մի կաթիլը, որ ձեռք ենք բերել մեր պետականության կերտման ընթացքում, սիրենք մեր պետությունը (հայրենիքը այլ գաղափար է, պետությունը՝ այլ)…»:

Ապա ելույթ ունեցավ Հումանիտար գիտությունների ֆակուլտետի դեկան, պատմ. գիտ. դոկտոր, պրոֆեսոր Աշոտ Ներսիսյանը և ներկայացրեց գիտաժողովի կազմկոմիտեի մոտեցման հայեցակետը, այն է՝ գիտաժողովի բուն թեման պետք է առիթ ծառայի, որպեսզի մասնակիցներն արծարծեն այնպիսի խնդիրներ, որոնց միջոցով տվյալ ժողովրդի, նրա ունեցած պետականության, դրա զարգացման գործընթացների, ժողովրդի ապրած ու ապրելիք տարիների, գիտության տարբեր ոլորտների վերաբերյալ ներկայացնեն իրենց տեսակետները, որոնցից լավագույնները կհրատարակվեն: Լիագումար նիստում պարոն Ներսիսյանը նաև հանդես եկավ զեկուցումով՝ նոր լույսի տակ ներկայացնելով Առաջին հանրապետության ձևավորման, զարգացման և անկման պատմությունը, որոշ զուգահեռներ անցկացնելով ՀՀ ներկայիս քաղաքական զարգացումների հետ:  

Այնուհետև գիտաժողովի աշխատանքներն ընթացան բաժանմունքներում:

Զեկուցումների թեմատիկան ազատ էր:

«Հայոց պատմություն, տնտեսագիտություն, հասարակագիտություն և արվեստ»  բաժանմունքում զեկուցումներով հանդես եկան Արա Ազատյանը, Արփինե Եգանյանը, Ալիխան Բալդրյանը, Շիրակ Գասպարյանը, Լարիդա Ղազումյանը, Ծովինար Կարապետյանը, Տիգրան Ղուշչյանը, Հրանտ Ղարագյոզյանը, Նոննա Բեգնազարյանը, Սոսե Խաչատրյանը, Ասյա Սարգսյանը, Նարա Թադևոսյանը:

«Հայոց լեզու և գրականություն» բաժանմունքում զեկուցումներ կարդացին Վաչագան Ավագյանը, Աիդա Սարհատյանը, Վահան Աղաբաբյանը, Հասմիկ Վանյանը, Զարուհի Յայլայանը: 

«Մանկավարժություն և հոգեբանություն» բաժանմունքում զեկուցումներով հանդես եկան Քնարիկ Ասմարյանը և Արևիկ Խուգեյանը, Մարիաննա Ավագյանը, Աննա Սիմոնյանը և Թամարա Նալբանդյանը, Աննա Քամալյանը, Թագուհի Բարսամյանը, Իրինա Պոնոմարենկոն և Գայանե Խաչատրյանը, Վիկտորյա Մելիքսեթյանը, Նելլի Այվազյանը, Սիրանուշ Ղուշչյանը, Գոհար Գասպարյանը, Տաթևիկ Կիրակոսյանը, Իրինա Պոնոմարենկոն, Քնարիկ Ասմարյանը և Մանե Ղազարյանը, Մարիաննա Ամիրաղյանը, Վանուհի Հարությունյանը:

«Անգլերեն լեզու և գրականություն» բաժանմունքում զեկուցումներ ներկայացրին Աստղիկ Չուբարյանը և Աստղիկ Սիմոնյանը, Գայանե Մուրադյանը, Քրիստինե Հարությոինյանը, Նարինե  Գասպարյանը, Գոհար Մադոյանը, Զարուհի Անտոնյանը, Անահիտ Գալստյանը, Աննա Կարապետյանը, Մարիամ Խաժակյանը, Աննա Խաչատրյանը, Նուարդա Երնջակյանը, Սոնա Գուլյանը, Նաիրա Գասպարյանը և Արտավազդ Դարբինյանը, Շուշանիկ Գրիգորյանը, Էմմա Թեմրազյանը, Հասմիկ Մխիթարյանը, Հասմիկ Մկրտչյանը, Մարկուհի Ոսկանյանը, Նարինե Եթիմյանը, Նաիրա Մարտիրոսյանը, Զարուհի Վարտանյանը:

Վերջում գիտաժողովի մասնակիցներին տրվեցին հավաստագրեր:

Գիտաժողովի խմբագրական խորհրդի փորձաքննությունն անցած աշխատանքները կտպագրվեն առանձին ժողովածուով:

Գիտաժողովի ծրագիրը

Գիտաժողովի լուսանկարները

2018թ. ապրիլի 16-20-ը կայացավ ԵՊՀ ուսանողական գիտական ընկերության  5-րդ միջազգային ուսանողական գիտաժողովը, որը նվիրված էր Հայաստանի Առաջին Հանրապետության հիմնադրման 100-ամյակին: Գիտաժողովին մասնակցում էին աշխարհի ավելի քան մեկ տասնյակ երկրների շուրջ 50 գիտաուսումնական հաստատությունների գրեթե 400 ներկայացուցիչներ:

Գիտաժողովի հանդիսավոր բացմանը ներկա էին ԵՊՀ ուսանողների և շրջանավարտների հետ տարվող աշխատանքների գծով պրոռեկտոր Ռուբեն Մարկոսյանը, ԵՊՀ ՈՒԳԸ նախագահ Մհեր Հակոբյանը, դասախոսներ, ՈՒԳԸ անդամներ, գիտաժողովի մասնակիցներ:

Մհեր Հակոբյանը հանդես եկավ ողջույնի խոսքով: Նա շնորհակալություն հայտնեց բոլոր մասնակիցներին՝ ցուցաբերած հետաքրքրության համար, ՈՒԳԸ ողջ թիմին՝ կատարված աշխատանքի համար, ԵՊՀ ղեկավարությանը՝ ցուցաբերած աջակցության համար:

Ռուբեն Մարկոսյանն իր ելույթում նշեց, որ ՈՒԳԸ միջոցառումներն աչքի են ընկնում կազմակերպվածության բարձր մակարդակով և փորձում են ապահովել համապատասխան գիտական մակարդակ:

Գիտաժողովի աշխատանքներն ընթացան մասնագիտական 20 բաժանմուքներում, որոնք շարունակվեցին մինչև ապրիլի 20-ը ներառյալ:

Փակման արարողության ժամանակ Մհեր Հակոբյանը նշեց. «Այս գիտաժողովը տարբերվում է նախորդից: Մենք կարող ենք արձանագրել, որ մեկ քայլ առաջ ենք գնացել ու կատարելագործել մեր ամենակարևոր միջոցառումը: Այս տարի գիտաժողովի և՛ մասնակիցների թիվն էր շատ, և՛ կազմակերպչական աշխատանքներում ներգրավված մարդկանց: ԵՊՀ ՈՒԳԸ ամենամյա գիտաժողովն աշխարհում երիտասարդական կարևոր միջոցառումներից մեկն է դառնում»:

 Գիտաժողովին մասնակցում էին ԵՊՀ Իջևանի մասնաճյուղի 6 ներկայացուցիչներ:

Ապրիլի 18-ին Լեզվաբանության բաժանմունքում “The Old English Vocabulary and Word-Formation” թեմայով գիտական զեկուցում կարդաց «Անգլերեն լեզու և գրականություն» մասնագիտության 3-րդ կուրսի ուսանողուհի Սյուզաննա Արտաշեսի Շահնազարյանը:

Մյուս ներկայացուցիչները գիտաժողովին մասնակցեցին ապրիլի 19-ին:

Աշխարհագրության և երկրաբանության բաժանմունքում ելույթ ունեցավ «Քարտեզագրություն և կադաստրային գործ» մասնագիտության 4-րդ կուրսի ուսանող Հակոբ Սամվելի Դավթյանը: Նա ներկայացրեց «Տավուշի մարզի Սևքար գյուղի և հարակից տարածքների զբոսաշրջային ռեսուրսների վերհանում, հաշվառում և քարտեզագրում» թեմայով գիտական զեկուցում:

Պատմության բաժանմունքում «Պատմություն» մասնագիտության 3-րդ կուրսի ուսանողուհի Իրինա Արսենի Սաֆարյանը ներկայացրեց Ջոն Քենեդու դերը Կարիբյան ճգնաժամում:

Ընդհանուր մաթեմատիկայի և բնագիտության ամբիոնի դասախոս Սլավիկ Սամվելի Ալավերդյանը ելույթ ունեցավ Մանկավարժության բաժանմունքում: Նա ներկայացրեց «Շախմատի դերը աշակերտի մոտ մաթեմատիկակական հասկացությունների վերաբերյալ պատկերացումների զարգացման գործում»:

«Հայոց լեզու և գրականություն» մասնագիտության 2-րդ կուրսի ուսանողուհիներ Աստղիկ Արթուրի Ղազարյանը և Ռոզա Արմենի Մելքումյանը մասնակցեցին Հայ ևարտասահմանյան գրականության բաժանմունքի աշխատանքներին:

Աստղիկ Արթուրի Ղազարյանը ներկայացրեց «Առասպելաբանական և վիպական մոտիվները Խ. Աբովյանի «Վերք Հայաստանի» վեպում» թեմայով գիտական զեկուցում:

Ռոզա Արմենի Մելքումյանը կարդաց «Ամպրոպային հերոսի գործառույթների հայտնաբերումը Երուանդի և Երուազի` երկվորյակ եղբայրների անուններում» թեմայով զեկուցում:

Բոլոր բաժանմունքների նախագահները և ներկաները բարձր գնահատեցին մասնաճյուղի ներկայացուցիչների աշխատանքների որակը, ողջունեցին հատկապես 2-րդ կուրսեցիների մասնակցությունը միջազգային գիտաժողովին:

Գիտաժողովից հետո ԵՊՀ ԻՄ-ի ներկայացուցիչներն այցելեցին Խաչատուր Աբովյանի տուն-թանգարան:

Գրախոսության փուլը հաջողությամբ հաղթահարած աշխատանքները հետագայում կտպագրվեն «ԵՊՀ ՈՒԳԸ գիտական հոդվածների ժողովածուում»:

2018թ. մարտի 23-ին Հումանիտար գիտությունների ֆակուլտետում Անգլերեն լեզվի և գրականության  ամբիոնի կողմից կազմակերպվել էր «Գույներն ու գունանվանումները լեզվամշակույթում» թեմայով գիտագործնական սեմինար, որը վարում էր ամբիոնի վարիչ բ.գ.թ., դոցենտ Ք.Հարությունյանը:

Ներկա էին պրոֆեսորադասախոսական անձնակազմի ներկայացուցիչներ և ուսանողներ:

Թեմայի շրջանակներում Ք.Հարությունյանը մասնակիցներին ներկայացրեց գույներն  ու գունաճանաչողությունը ժամանակակից անգլերենում և առհասարակ մշակույթում՝ մինչ այդ կատարելով պատմական անդրադարձ:

Գունաճանաչողության մասին խոսելիս բանախոսը նշեց, որ չնայած գույների նյութեղեն ուսումնասիրությամբ զբաղվում են այնպիսի գիտություններ, ինչպիսիք են քիմիան և ֆիզիկան, այդուհանդերձ տարբեր մշակույթներ կրող անհատների և հասարակության դեպքում դրա ընկալումը տարբեր է: Ընդգծվեց, որ այդ ուղղությամբ ուումնասիրություններ են իրականացնում հոգեբանությունը, արվեստաբանությունը, գրականագիտությունը, ոճագիտությունը և այլն:

Բանախոսը անցկացրեց զուգահեռներ հայերենի, ռուսերենի և անգլերենի միջև՝ ցույց տալով միևնույն գույնի կիրառման և ըմբռնման նմանություններն ու տարբերությունները տարբեր լեզուներում՝ որպես լեզվի համեմատական ուսումնասիրման կարևորագույն աղբյուր:

Այնուհետև հանգամանորեն ներկայացվեցին տարբեր լեզուներով դարձվածքներում գույնի իմաստային կիրառման, տարբեր մասնագիտություն ունեցող մարդկանց գունաճանաչման առանձնահատկությունները, միջբերվեցին կոնկրետ օրինակներ:

Ք.Հարությունյանը միևնույն ժամանակ փաստեց մի խումբ տեսաբանների ուսումնասիրություններն այն մասին, որ միևնույն գույնը կարող է տարբեր զգացողություններ առաջացնել տարբեր մարդկանց մեջ, և հակառակը, տարբեր տարիքի և սեռի ներկայացուցիչներ կարող են ունենալ տվյալ գույնի ընկալման տարբեր մակարդակներ:

Բովանդակալից տեղեկատվությամբ հագեցած գիտագործնական սեմինարն ուղեկցվեց մասնակիցների բուռն քննարկումներով, որը ևս մեկ անգամ ընդգծեց թեմայի արդիականությունն ու հետաքրքրությունը:

Սեմինարի վերջում Ք.Հարությունյանը ներկաներին նվիրեց համանուն թեմայով իր հեղինակային գիրքը:

2018թ. մարտի 9-ին ԵՊՀ ԻՄ-ի բնական գիտությունների ֆակուլտետի ընդհանուր մաթեմատիկայի և բնագիտության ամբիոնի դասախոս Սլավիկ Ալավերդյանը ներկայացրեց «Շարժվող օբյեկտի հայտնաբերման մի խնդիր» թեմայով գիտահանրամատչելի զեկուցում:

Միջոցառումը նախաձեռնել էր ֆակուլտետի ուսանողական գիտական ընկերությունը:

Ներկա էին ֆակուլտետի 3 տասնյակ ուսանողներ:

Ս.Ալավերդյանը ներկայացրեց փնտրման խնդրի էությունը, լուծման ալգորիթմը, պրեզենտացիայի միջոցով ցուցադրեց խնդրի լուծման ընթացքը:

Ընդգծվեց, որ փնտրման խնդիրները մեծ կարևորություն ունեն գիտության և տեխնիկայի բազմաթիվ բնագավառներում (մեխանիկա, տիեզերագնացություն, ռոբոտաշինություն և այլն)։ Տնտեսագիտության մեջ հանդիպող որոշ խաղեր և սպորտաձևերում հանդիպող որոշ իրավիճակներ կարելի է ներկայացնել որպես փնտրման խնդիրներ։

Բացատրվեց, որ ընդհանուր առմամբ փնտրման խնդիրը մի օբյեկտի կողմից մեկ այլ օբյեկտի հայտնաբերումն ապահովող ղեկավարման կառուցումն է։ Փնտրող և որոնվող օբյեկտները կարող են ունենալ տարբեր սահմանափակումներ՝ առավելագույն արագություն, արագությունը փոխելու առավելագույն անկյուն կամ փոփոխման առավելագույն քանակ, տարածության կամ հարթության մեջ տեղաշարժվելու հնարավորություն, գծային չափեր, տվյալ պահին փնտրողին հասանելի (հայտնի) տիրույթի չափ, տեսք ու փոփոխման օրենքներ և այլն։

  Ներկայացվեց հարթության վրա արագությամբ ղեկակավարվող շարժական կետային օբյեկտի փնտրման խնդիրը, որն իրականացվում է տարածության մեջ արագությամբ ղեկավարվող փնտրողի կողմից:

 2018թ. մարտի 6-ին ԵՊՀ ԻՄ-ի բնական գիտությունների ֆակուլտետի «Քարտեզագրություն և կադաստրային գործ» մասնագիտություն 2-րդ կուրսի ուսանողուհի Դիանա Ներսիսյանը ներկայացրեց «Հողամասերի օտարում» թեմայով գիտահանրամատչելի զեկուցում:

Միջոցառումը կազմակերպել էր ֆակուլտետի ուսանողական գիտական ընկերությունը:

Ներկա էին ֆակուլտետի դասախոսներ և ուսանողներ:

Զեկուցման մեջ ներկայացվեց, որ քաղաքացիների ու իրավաբանական անձանց հողամասերի նկատմամբ սեփականության իրավունքը հողամասերն իրենց հայեցողությամբ տիրապետելու, օգտագործելու և տնօրինելու իրավունքն է՝ օրենքով նախատեսված սահմանափակումների և այլ պայմանների պահպանմամբ: Հողամասերի նկատմամբ քաղաքացիների և իրավաբանական անձանց սեփականության իրավունքը ծագում է պետական ու համայնքային հողերի մասնավորեցման, ժառանգման, առքուվաճառքի, նվիրատվության և հողի հետ կապված այլ գործարքների ու իրավաբանական փաստերի հիման վրա:

Ընդգծվեց, որ երկու կամ մի քանի անձանց մոտ սեփականության, օգտագործման ներքո գտնվող հողամասը նրանց է պատկանում համապատասխանաբար՝ ընդհանուր սեփականության, ընդհանուր օգտագործման իրավունքով: Հողամասի նկատմամբ ընդհանուր սեփականության իրավունքը ծագում է երկու կամ մի քանի անձանց սեփականության իրավունքով այն հողամասն անցնելիս, որը չի կարող բաժանվել առանց դրա նպատակային նշանակության փոփոխման կամ օրենքի ուժով ենթակա չէ բաժանման: 

Սեփականատերերից մեկին պատկանող շենքի, շինության վերակառուցումը չի հանգեցնում ընդհանուր հողամասում նրա բաժնի մեծացմանը՝ առանց մյուս սեփականատերերի համաձայնության:

Նշվեց, որ քաղաքացիներին, իրավաբանական անձանց կամ համայնքներին չպատկանող հողերը պետության սեփականությունն են: Պետությունը կարող է սեփականության իրավունքով հողամասեր գնել համայնքներից, քաղաքացիներից և իրավաբանական անձանցից:

Համայնքների սեփականության են պատկանում տվյալ համայնքի սահմանագծի ներսում գտնվող հողերը՝ բացառությամբ պետությանը, քաղաքացիներին, իրավաբանական անձանց և սեփականության այլ սուբյեկտներին պատկանող հողերի:

Պետության սեփականության հողամասերն օտարվում են՝

 1) սեփականության իրավունքն անհատույց փոխանցելու միջոցով.

 2) ուղղակի վաճառելու միջոցով.

 3) աճուրդով:

Պետության և համայնքների սեփականության հողամասերը սեփականության իրավունքով անհատույց տրամադրվում են գյուղատնտեսական գործունեության համար և որպես տնամերձ կամ անհատական բնակելի տան կառուցման և սպասարկման համար:

Դ.Ներսիսյանը ներկայացրեց, որ պետության և համայնքների սեփականություն հանդիսացող հողամասերի վաճառքը կատարվում է աճուրդով:

Աճուրդի մեկնարկային գինը չի կարող պակաս լինել հողի կադաստրային արժեքի 50 տոկոսից: Աճուրդի մեկնարկային գինը յուրաքանչյուր համայնքի, ինչպես նաև համայնքների առանձին հատվածների համար սահմանում է համայնքի ղեկավարը՝ համաձայնեցնելով համայնքի ավագանու հետ:

Հայաստանի Հանրապետության կառավարության սահմանած ցանկում ընդգրկված սահմանամերձ, լեռնային, ծայրամասային բնակավայրերում աճուրդի մեկնարկային գինը չի կարող պակաս լինել հողի կադաստրային արժեքի 30 տոկոսից:

Զեկուցման ներկայացումից հետո ծավալվեց հետաքրքիր քննարկում՝ դասախոսների և ուսանողների մասնակցությամբ:

Վերջում ելույթ ունեցավ նաև Ծրագրավորման և ինֆորմացիոն տեխնոլոգիաների ամբիոնի դոցենտ, տ.գ.թ. Ա.Սիմոնյանը, ով ֆակուլտետի 2 մասնագիտությունների ուսանողներին առաջարկեց համագործակցել, ուսումնասիրել իրենց մասնագիտական գիտելիքների կիրառման հնարավորությունները և դրանց վերաբերյալ ներկայացնել զեկուցումներ: