Orange-ը Հայ Գրքի Կենտրոնի հետ իրականացնում է երրորդ «Orange Գրքի մրցանակ» ամենամյա մրցույթը:
Մրցույթին կարող են մասնակցել բոլոր նրանք, ովքեր
- ստեղծագործում են հայերեն (արևելահայերեն կամ արևմտահայերեն)
- նախկինում երբեք չեն հրատարակել մրցույթին ներկայացվող իրենց ստեղծագործությունը (բլոգերում, ինտերնետային հանդեսներում և հրատարակման էլեկտրոնային այլ ձևերում հրապարակված գործերը, ինչպես նաև ստեղծագործության մինչև 10%-ի չափով ոչ էլեկտրոնային ձևաչափով հրատարակված գործերը համարվում են չհրատարակված):
Մրցույթին մասնակցելու համար անհրաժեշտ է ներկայացնել հայերենով գրված ստեղծագործություն և դրա համառոտ բովանդակությունը/հատված:
Ստեղծագործությունները պետք է ուղարկել մինչև 2013թ.-ի դեկտեմբերի 26-ը`orangebookprize@orangearmenia.am էլեկտրոնային փոստի հասցեով, Word կամ PDF ֆորմատով: Նամակի թեմա (subject) դաշտում լրացրեք Orange Book Prize: Նամակի տեքստում նշեք Ձեր անձնական տվյալները` իրական անունը, բնակության երկիրը, քաղաքային և բջջային հեռախոսահամարները:
Մասնակիցն իրավունք ունի ի լրումն իրական անվան նշել նաև կեղծանուն, որով ցանկանում է հանդես գալ որպես ներկայացված ստեղծագործության հեղինակ: Նման նշում չլինելու դեպքում որպես ստեղծագործության հեղինակի անուն ներկայացվում է մասնակցի իրական անունը:
Մասնակցության համար ներկայացվող ստեղծագործությունը պետք է պատկանի հետևյալ ժանրերից որևէ մեկին`
- պատմվածք/նովել
- վեպ/վիպակ
- հեքիաթ
- բանաստեղծական շարք (մինչև 5 գործ)
Ի դեպ, ժանրերը թեմատիկ սահմանափակում չունեն, իսկ ստեղծագործությունը կարող է ներկայացնել ցանկացած գրական ուղղություն:
Մրցույթին մասնակցության տարիքային սահմանափակումներ նույնպես չկան:
Աղբյուրը` www.orangearmenia.am