2016թ. մարտի 3-ին ԵՊՀ Իջևանի մասնաճյուղում կայացավ «Ֆրանսերեն լեզու և գրականություն» մասնագիտության երկրորդ կուրսի ուսանողուհի Մերի Գասպարյանի անդրանիկ՝ «Մոխրագույն լուսին» գրքի շնորհանդեսը:
Ներկա էին մասնաճյուղի վարչական և պրոֆեսորադասախոսական անձնակազմի ներկայացուցիչներ, ուսանողներ, հեղինակի հարազատ դպրոցի սաներ, Իջևանի զորամասի զինվորներ, լրատվամիջոցների ներկայացուցիչներ, հյուրեր, պոեզիայի սիրահարներ:
Գրքույկը նվիրված է իր քեռու՝ Մարատ Բաղինյանի հիշատակին և ընդգրկում է թարմ, հետաքրքիր մտքեր ու բանաստեղծություններ՝ ստեղծագործական ներշնչանքի պահի (Էջը բացվեց ու գրվեց. /Սկիզբը հաճելի էր այնքանով,/ Որ անկեղծ էր,/ Անկեղծ՝ մանկական սիրո կերտվածքով,/ Իսկ հետոն լեցուն էր հասունությամբ/ Եվ համեմված գեղեցիկով), սիրո (Սերը կարիք է,/ Իսկ սիրո կարիքը ջերմությունն է:/…Սերն ուզում է,/Որ իսկապես սիրես/ Իսկական մարդկանց…), հայրենասիրության (Սիրտս ձուլել եմ սրտիդ, հայրենիք,/ Տե՛ս ոնց են զարկում զույգ սրտերը մեր…) անձնավորված բնության (Քամին ուռենու մազերն է սանրում,/ Գիշերն է հուշեր շշնջում նրան, /Նոր երգ է ծնվում գիշերվա գրկում, /Լուռ համառության հանդերձը վրան) Մարդու մասին, ինչպես՝
Մարդն էլ կարծես ծառի պես է,
Բերք տվողին երանի,
Ու ծառի պես ծաղիկներով
Ծիծաղողին երանի:
Սուրբ է մարդը
Եվ անրջանք,
Անհագության
Ծով է նա:
Սուրբ տենչերով
Դեպի բարձունք
Մագլցողին երանի:
Գրքի շնորհանդեսի ժամանակ «Հայոց լեզու և գրականություն» մասնագիտության ուսանողները ներկայացրին Մերի Գասպարյանի բանաստեղծություններից («Էջը բացվեց, «Գիշեր», «Քուն», «Հավքերի պես…», «Թունոտ թշնամի», «Քունս չի տանում»):
Կիթառի ուղեկցությամբ կատարվեցին նաև այդ բանաստեղծությունների հիման վրա գրված հոգեբուխ երգեր («Տավուշի քաջեր», «Ծեր խաչքար»), որոնք իրենց ասելիքով, մեղեդայնությամբ ու անկեղծ կատարումով հուզեցին ունկդիրների սրտերը:
Շնորհանդեսի ընթացքում հեղինակին ուղղվեցին հարցեր, թե ինչ է կյանքը, նրա խորհուրդը, պատերազմը, որն է կյանքի պատկերման նրա սկզբունքը և այլն:
Հեղինակը պարզաբանեց իր կերտած լուսնային պատկերների խորհուրդը, գրքի «Մոխրագույն լուսին» վերնագիրը, որի համաձայն՝ լուսինն իր կարոտն է և ինքը դա տեսնում է մոխրագույն:
Մեր ուսանողուհու գրական նորամուտը ողջունեցին, գնահատանքի և արժևորման խոսք ասացին Հումանիտար գիտությունների ֆակուլտետի դեկան Վ.Ալեքսանյանը, ՄԿՈԱ բաժնի մասնագետ, սոցիոլոգ Է.Կյուրեղյանը, Օտար լեզուների ամբիոնի դասախոսներ Ա.Մարդանյանը, Ն.Դավթյանը, գրքի հեղինակի հայոց լեզվի և գրականության ուսուցչուհին՝ նրան մաղթելով ստեղծագործական կանաչ ճանապարհ, մտքի սրություն, բեղուն գրիչ: