«Երևանի պետական համալսարան» հիմնադրամի Իջևանի մասնաճյուղում լրացուցիչ կրթական ծրագրերի և դասընթացների իրականացման կարգ

ԸՆԴՀԱՆՈՒՐ ԴՐՈՒՅԹՆԵՐ 

1. ««Երևանի պետական համալսարան» հիմնադրամի Իջևանի մասնաճյուղում լրացուցիչ կրթական ծրագրերի և դասընթացների իրականացման» կարգը (այսուհետև՝ Կարգը) սահմանում է լրացուցիչ կրթական ծրագրերի կազմակերպման և իրականացման, ուսուցման արդյունքների գնահատման և ճանաչման ընթացակարգը: 

2. Կարգը մշակվել է «Լրացուցիչ կրթական ծրագրերի կազմակերպման և իրականացման» և «Ոչ ֆորմալ և ինֆորմալ ուսուցման արդյունքների գնահատման և ճանաչման» կարգերի (ՀՀ կառավարության 10 սեպտեմբերի 2015 թվականի N 1062-Ն Որոշում), ԵՊՀ և ԵՊՀ ԻՄ կանոնադրությունների հիման վրա: 

3. «Երևանի պետական համալսարան» հիմնադրամի Իջևանի մասնաճյուղի (այսուհետև՝ ԵՊՀ ԻՄ կամ Մասնաճյուղ) կողմից լրացուցիչ կրթական ծրագրեր իրականացնելու նպատակն է հասարակության լայն խավերին հնարավորություն տալ ձևավորելու, կատարելագործելու, արդիականացնելու և լրացնելու մինչ այդ ձեռք բերած (նախընթաց) իրենց գիտելիքները, կարողություններն ու հմտությունները։ 

4. Մասնաճյուղը կարող է իրականացնել լրացուցիչ կրթական ծրագրեր և դասընթացներ կրթության պետական կառավարման լիազորված մարմնի սահմանած կարգով գրանցվելով ուսուցման ազգային ռեեստրում 1 , իսկ հավատարմագրված  մասնագիտությունների շրջանակներում Մասնաճյուղը կարող է ուսուցման ազգային ռեեստրում գրանցվել առանց նախապայմանների։

5. Լրացուցիչ կրթական ծրագրերը և դասընթացները Մասնաճյուղում կազմակերպվում են վերապատրաստումների, խմբային և անհատական մասնագիտական ուսուցման ու կարճաժամկետ ուսուցման դասընթացների միջոցով, որոնց ուսումնառության արդյունքները գնահատվելու և ճանաչվելու են Հայաստանի Հանրապետության օրենսդրությամբ սահմանված կարգով: 

6. Լրացուցիչ կրթական ծրագրով ուսուցումը (այսուհետև՝ Ուսուցում) չի հանգեցնում որակավորման աստիճանի շնորհման և ուսումնառառության արդյունքների պաշտոնական ճանաչման՝ բացառությամբ ՀՀ օրենսդրությամբ սահմանված դեպքերի: 

7. Լրացուցիչ կրթական ծրագրին կամ դասընթացին մասնակցելու իրավունք ունի յուրաքանչյուր ոք, եթե բավարարում է տվյալ ծրագրի/դասընթացի մուտքային պահանջներին: 

8. Լրացուցիչ կրթության իրականացման առավելագույն տևողությունը մինչև 5 ամիս է: 

9. Լրացուցիչ կրթության կազմակերպման մասնակիցներն են` Մասնաճյուղը, կրթական ծառայություններ մատուցողները, լրացուցիչ կրթություն ստացողները։ 

10. Լրացուցիչ կրթական ծրագիրը/դասընթացը իրականացվում է երկկողմ համաձայնությամբ` Մասնաճյուղի և կազմակերպության կամ անհատի միջև երկու հավասարազոր օրինակից կնքվող պայմանագրի հիման վրա, որի օրինակելի ձևը հաստատում է կրթության պետական կառավարման լիազորված մարմինը: 

11. Վճարովի լրացուցիչ կրթության իրականացումից հետո պատվիրատուին տրվում է Մասնաճյուղի կողմից հաստատված և կնքված` մասնագիտական որակավորում չպարունակող փաստաթուղթ: