Հայոց բանակը մեր պատմության նշանակալի ձեռքբերումներից մեկն է, հայրենիքի պաշտպանության և անվտանգության երաշխավորը, ստեղծվել է Արցախյան ազատամարտի բովում` երկրապահ-կամավորական ջոկատների հիմքի վրա:
1990 թվականին` Անկախության հռչակագրի ընդունումից հետո, կազմավորվել է Երևանի հատուկ գունդը, Արարատում, Գորիսում, Վարդենիսում, Իջևանում ու Մեղրիում ձևավորվել են վաշտեր: Կառավարության որոշմամբ 1991 թ. ստեղծվել է նախարարների խորհրդին առընթեր Պաշտպանության պետական կոմիտեն: 1992 թ. հունվարի 28-ին Կառավարությունն ընդունել է ՀՀ պաշտպանության նախարարության մասին որոշում:
1992-1993 թթ. երկրապահ կամավորական ջոկատների և բանակ զորակոչված զինակոչիկների միավորումով ստեղծվեց շարժունակ և կարգապահ բանակ:
1994 թ. հունիսից վերջնականապես ընթացք ստացան բանակաշինության, կայուն զարգացման, զորքերի մարտունակության բարձրացման, կարգապահության ամրապնդման, միջին և բարձր սպայական անձնակազմի պատրաստման ու վերապատրաստման աշխատանքները:
2001 թվականին օրը դարձավ տոն, երբ Տոների և հիշատակի օրերի մասին օրենքում ամրագրվեց որպես Բանակի օր:
Հայոց բանակի կազմավորման 33-րդ տարեդարձի կապակցությամբ ևս մեկ անգամ շնորհավորում և մեր երկրին ցանկանում ենք բարձր մարտունակություն ունեցող հզոր բանակ, մեր քաջարի զինվորականներին՝ տոկուն և հաղթական ոգի, մասնագիտական բարձր պատրաստվածություն և անփորձանք ծառայություն…