Սեմինար-քննարկմանը մասնակցում էին ԵՊՀ ԻՄ «Ռուսաց լեզու և գրականություն» կրթական ծրագրի ուսանողներ, Օտար լեզուների ամբիոնի դասախոսներ, հետազոտողներ և պատվավոր հյուրեր՝ ռուսալեզու գրական համայնքում հայտնի ռուս գրող և հրատարակիչ Անդրոնիկ Ռոմանովը, բանաստեղծուհի Էմմա Օգոլցովան, «За русский - 2025» ծրագրի ուսանող-կամավորներ Մոսկվայից՝ Ժենյա Օգաննիսյանը և Սոֆիա Գոլովկովան:

Պատվավոր հյուրերին և ներկաներին ողջունեց ԵՊՀ Իջևանի մասնաճյուղի տնօրեն Մհեր Օթարյանը՝ ընդգծելով համալսարանական միջավայրում նման միջոցառումների անցկացման դերն ու կարևորությունը:

Սեմինարը բացվեց «հաստափոր» գրական ամսագրերի դերի քննարկմամբ, որը եզակի երևույթ է ռուսական մշակութային կյանքում: Հենց այս հրատարակությունների միջոցով էր, որ 19-րդ դարում ռուս գրականության ամենակարևոր ստեղծագործությունները հասան ընթերցողներին, ի հայտ եկան նոր հեղինակներ, և ձևավորվեց հասարակական կարծիք: Աստիճանաբար նման ամսագրերը դարձան 19-րդ դարավերջի և 20-րդ դարասկզբի իսկական «մտքի առաջնորդներ»: Դրանցից յուրաքանչյուրն ուներ իր ուրույն գեղագիտական ձեռագիրը, հեղինակների հատուկ շրջանակն ու իր մշակութային առաքելությունը, և առանց այս հարուստ ժառանգության անհնար է պատկերացնել ժամանակակից ռուսական գրականության զարգացումը:

Չնայած դարերի փոփոխությանը և թվային դարաշրջանի հաստատմանը՝ այսօր էլ շարունակում են հրատարակվել այդ ամսագրերը: Թեև դրանք դժվարանում են մրցակցել էլեկտրոնային լրատվամիջոցների հետ, այնուամենայնիվ պահպանում են իրենց՝ որպես բարձրորակ գրական հարթակի կարգավիճակը:

«Ռուսաց լեզու և գրականություն» կրթական ծրագրի երրորդ կուրսի ուսանողները ներկայացրին հետազոտություններ՝ 19-րդ դարի ռուսական հիմնական ամսագրերի ձևավորման և զարգացման, իսկ կամավորները՝ Խորհրդային Միության ամսագրերի վերաբերյալ:

Անդրոնիկ Ռոմանովը ներկայացրեց հրատարակչական ոլորտում իր անձնական փորձը. նա քաջատեղյակ է, թե ինչ խնդիրներ և դժվարություններ են առկա ամսագրի հիմնադրման և կայացման գործում՝ քրտնաջան աշխատանք, կասկածներ, ճիշտ հնչերանգի որոնում, հեղինակների հետ շփում և խոչընդոտները հաղթահարելու անհրաժեշտություն:

Լինելով Ռուսաստանի առաջին էլեկտրոնային գրական ամսագրի («Лиterraтура») ստեղծողը՝ նա փաստացի հիմնադրեց նոր ձևաչափ, որը 2010-ականների սկզբին նոր էր ընթերցողներ ձեռք բերում: Այսօր Ռոմանովը շարունակում է այդ աշխատանքն իր նոր նախագծում՝ «Атма» ամսագրում, որն արդեն երկրորդ տարին է, ինչ հրատարակվում է: Երկու հրատարակություններն էլ դարձել են ոչ միայն հարթակներ տեքստերի համար, այլև ժամանակակից գրականության յուրօրինակ լաբորատորիաներ, որտեղ ծնվում են նոր ձայներ և փորձարկվում նոր ձևեր:

Նույնքան վառ տպավորություն թողեց նաև բանաստեղծուհի, թարգմանիչ և թատրոնի դերասանուհի Էմմա Օգոլցովայի ստեղծագործական ուղու հետ ծանոթությունը: Օգոլցովան միջազգային գրական մրցույթների դափնեկիր է, Հայաստանում և Ռուսաստանում անցկացվող փառատոների ու ստեղծագործական ֆորումների մասնակից:

Սեմինարի ընթացքում նա ներկայացրեց իր առաջին բանաստեղծական գիրքը՝ «Նախաբանը», որը հրատարակվել է 2025 թվականին: Ժողովածուի օրինակները նվիրաբերվել են ԵՊՀ ԻՄ-ում գործող Ռուսաց լեզվի և մշակույթի կենտրոնին, ինչպես նաև համալսարանի գրադարանին:

Ծրագրում առանձնահատուկ տեղ էր զբաղեցնում «Վետերան» ամսագրի նոր համարի շնորհանդեսը, որը մարշալ Բաղրամյանի անվան Հայաստանի վետերանների միավորման պաշտոնական հրատարակությունն է: Արդեն երկրորդ տարին է, ինչ ԵՊՀ ԻՄ ուսանողները համագործակցում են խմբագրական կազմի հետ՝ իրենց էսսեներն ու հետազոտությունները հրապարակելով ամսագրում, ինչը նրանց հնարավորություն է տալիս անել իրենց առաջին քայլերը մասնագիտական (գրական և լրագրողական) աշխատանքում:

Սեմինարը ԵՊՀ ԻՄ օտար լեզուների ամբիոնի դոցենտ, բ.գ.թ. Մ. Զուրաբյանի հետ համագործակցությամբ վարեց նույն ամբիոնի դասախոս Ելենա Շուվաևան, ով միաժամանակ Հայաստանի գրողների միության, Ռուսաստանի գրողների միության և Սուրբ Կիրիլի և Մեթոդիոսի անվան գրողների միջազգային միության անդամ է: 

Միջոցառումը դարձավ ուսանողների և գործող գրողների ու խմբագիրների միջև փորձի փոխանակման, մտավոր աճի և մասնագիտական ​​հաղորդակցության համար կարևոր հարթակ: