Մայիսյան հերոսամարտերի (Սարդարապատի, Բաշ-Ապարանի, Ղարաքիլիսայի) բովում ծնունդ առավ Հայաստանի առաջին հանրապետությունը, որը մեր պատմության կաևորագույն իրադարձություններից է: Բագրատունյաց Հայաստանի անկումից շուրջ 1000 և Կիլիկյան Հայաստանից 600 տարի անց անկախ Հայաստան էր ստեղծվում:

Անկախ Հայաստանի առաջին վարչապետը դարձավ Հովհաննես Քաջազնունին: Հայաստանի ազգային դրոշ ընդունվեց եռագույնը: Անկախության տարեդարձի օրը` 1919 թ. մայիսի 28-ին, կառավարությունը, որն արդեն գլխավորում էր Ալեքսանդր Խատիսյանը, Հայաստանը հռչակեց Անկախ և Միացյալ Հանրապետություն:

Հայաստանի առաջին հանրապետությունն ունեցավ ընդամենը երկու տարվա կյանք՝ մինչև 1920 թվականի դեկտեմբերի 2-ը, երբ Երևան 11-րդ Կարմիր բանակի զորամասերի մուտք գործելուց հետո հանրապետությունը խորհրդայնացվեց: Սակայն մեծ է նրա պատմական նշանակությունը, անգնահատելի՝ նրա դերը հայոց պետականությունը վերագտնելու գործում:

Հանրապետության օրը պաշտոնապես նշվում է 1992 թվականից, երբ Հայաստանը կրկին անկախություն ձեռք բերեց:

1996 թ. փետրվարի 21-ին ՀՀ Ազգային ժողովի կողմից ընդունված «Հայաստանի Հանրապետության տոների և հիշատակի օրերի մասին» ՀՀ օրենքով մայիսի 28-ը նշվում է որպես Հանրապետության տոն:

ԵՊՀ Իջևանի մասնաճյուղի ղեկավարության և ողջ անձնակազմի անունից շնորհավորում ենք համայն հայությանը Հանրապետության տոնի առթիվ՝ ցանկանալով, որ մեր պետությունն օր օրի հզորանա և զարգանա, մերպետականություննավելի ամրապնդվի:

ՇնորհավորՀայաստանի առաջին հանրապետության հիմնադրման օրը, կեցցե՛ Մայիսի 28-ը, կեցցե՛ հայ ժողովուրդը….