2019թ. փետրվարի 14-ին ԵՊՀ Իջևանի մասնաճյուղում կայացավ տնօրենության նիստ՝ Ա. Վ. Ցուցուլյանի նախագահությամբ:
Տնօրենության նիստում քննարկվեցին 2018-2019 ուսումնական տարվա II կիսամյակում ԵՊՀ ԻՄ-ի մասնագիտական ամբիոններում առարկայական ծրագրերի առկայությանը, նույն կիսամյակում մի շարք ուսանողների ուսանողական իրավունքների վերականգնմանը վերաբերող և մի քանի ընթացիկ հարցեր:
Մասնավորապես նշվեց, որ 2019թ. փետրվարի 1-8-ը Ուսումնամեթոդական վարչության աշխատակիցները, ԵՊՀ ԻՄ-ի մասնագիտական ամբիոններում և Հեռակա ուսուցման բաժնում իրականացնելով առարկայական ծրագրերի ստուգում, հայտնաբերել են որոշ թերություններ:
Ըստ այդմ՝ տնօրենությանն առաջարկվեց.
- հանձնարարել մասնագիտական ամբիոններին սեղմ ժամկետներում վերացնել հայտնաբերված թերությունները,
- այդ նպատակով առարկայական ծրագրեր և այլ անհրաժեշտ փաստաթղթեր (մասնավորապես՝ դասընթացի փաթեթ՝ պորտֆոլիո) կազմելու փորձ չունեցող աշխատակիցների համար կազմակերպել դասընթաց, տրամադրել անհրաժեշտ խորհրդատվություն,
- սահմանված ժամկետից հետո կատարել կրկնաստուգում և թերությունների հայտնաբերման դեպքում պատասխանատուներին ենթարկել կարգապահական պատասխանատվության:
Տնօրենության նիստում որոշվեց ԵՊՀ ԻՄ-ի մասնագիտական ամբիոնների վարիչներին հանձնարարել մինչև 2019թ. մարտի 1-ը ապահովել 2018-2019 ուսումնական տարվա II կիսամյակի առարկայական բոլոր ծրագրերի (առկա և հեռակա) առկայությունը ամբիոններում:
Որոշվեց նաև 2018-19 ուստարվա II կիսամյակում ԵՊՀ ԻՄ-ի առկա և հեռակա ուսուցման համակարգերում վերականգնել 14 ուսանողների ուսանողական իրավունքները:
