Ընդհանուր տվյալներ
«Երևանի պետական համալսարան» հիմնադրամի Իջևանի մասնաճյուղի ներքին աուդիտի անցկացման կարգ
ԸՆԴՀԱՆՈՒՐ ԴՐՈՒՅԹՆԵՐ
Ներքին աուդիտի (այսուհետ՝ Աուդիտ) անցկացման կարգը (այսուհետ՝ Կարգը) սահմանում է «Երևանի պետական համալսարան» հիմնադրամի Իջևանի մասնաճյուղի (այսուհետ՝ ԵՊՀ ԻՄ կամ Մասնաճյուղ) ներքին աուդիտի սկզբունքները, միջավայրը, համակարգը, գործունեության նպատակը, ներքին աուդիտ անցկացնող հանձնաժողովի իրավունքներն ու պարտականությունները, ինչպես նաև ներքին աուդիտի գործունեության հետ կապված այլ հարաբերություններ։
Կանոնակարգը մշակված է «Կրթության մասին», «Բարձրագույն և հետբուհական մասնագիտական կրթության մասին» և «Ներքին աուդիտի մասին» ՀՀ օրենքների, ԵՊՀ ԻՄ-ի կանոնադրության, ԵՊՀ ԻՄ-ի զարգացման ռազմավարական ծրագրի, Կրթության որակի բնագավառում ԵՊՀ ԻՄ-ի քաղաքականության հիման վրա:
ԵՊՀ ԻՄ-ի տնօրենն ապահովում է մասնաճյուղի ներքին աուդիտի համակարգի առկայությունը և պատասխանատու է նրա գործունեության համար:
Ներքին աուդիտն անց է կացնում ԵՊՀ ԻՄ-ի տնօրենի և Որակի կառավարման մշտական հանձնաժողովի կողմից ձևավորված հանձնաժողովը:
Ներքին աուդիտ անցկացնող հանձնաժողովն անկախ, անկողմնակալ, օբյեկտիվ, հավաստիացնող և խորհրդատվական մարմին է, որը գործում է որպես Մասնաճյուղի ղեկավարմանն աջակցող ծառայություն և ուղղված է նրա գործունեության բարելավմանը:
Մասնաճյուղի տնօրենը, ստորաբաժանումների ղեկավարները և գործընթացների պատասխանատուները պարտավոր են համագործակցել ներքին աուդիտորների հետ, առաջադրանքի շրջանակներում բացահայտել և տրամադրել Մասնաճյուղին վերաբերող տեղեկություններ:
Ներքին աուդիտն իրականացվում է աուդիտի ստանդարտներին, սույն կարգին, համապատասխան ստորաբաժանումների կանոնադրություններին և ԵՊՀ ԻՄ այլ իրավական ակտերին համաձայն, այդ թվում՝ բավարար տեղեկությունների բացահայտման, վերլուծության, գնահատման և փաստաթղթային ամրագրման հիման վրա խնդիրների նկատմամբ կարծիքի ձևավորմամբ: