Ընդհանուր տվյալներ
«Երևանի պետական համալսարան» հիմնադրամի Իջևանի մասնաճյուղում բակալավրի ավարտական աշխատանքի պատրաստման եվ գնահատման կարգ
ԸՆԴՀԱՆՈՒՐ ԴՐՈՒՅԹՆԵՐ
Սույն կանոնակարգով սահմանվում է «Երևանի պետական համալսարան» հիմնադրամի Իջևանի մասնաճյուղում (այսուհետ՝ ԵՊՀ ԻՄ կամ Մասնաճյուղ) բակալավրի ավարտական աշխատանքի պատրաստման և գնահատման կարգը:
Կանոնակարգը մշակվել է «Կրթության մասին» և «Բարձրագույն և հետբուհական մասնագիտական կրթության մասին» ՀՀ օրենքների, ԵՊՀ և ԵՊՀ ԻՄ-ի կանոնադրությունների, «ՀՀ բարձրագույն մասնագիտական կրթական ծրագրեր իրականացնող հաստատությունների շրջանավարտների ամփոփիչ ատեստավորման» կարգի (7.11.2017, թիվ 1282-Ն, ՀՀ ԿԳ նախարար), «ԵՊՀ-ում բակալավրի ավարտական աշխատանքի պատրաստման և գնահատման» կարգի (14.02.2018, ԵՊՀ ԳԽ), «ԵՊՀ ԻՄ-ի ակադեմիական ազնվության» կանոնակարգի (26.12.2015 ԵՊՀ ԻՄ ԳԽ) հիման վրա:
Բակալավրի ավարտական աշխատանքն ինքնուրույն, տեսական կամ կիրառական նշանակության աշխատանք է, որն արտացոլում է տվյալ մասնագիտության շրջանակներում ուսանողի ձեռք բերած գիտելիքները կիրառելու և մասնագիտական ոլորտին առնչվող խնդիրներ բարձրացնելու ու լուծումներ առաջադրելու հմտությունները։
Բակալավրի ավարտական աշխատանքի կատարումը և հրապարակային պաշտպանությունը բակալավրի կրթական ծրագրի ավարտական պահանջներից են։
Ավարտական աշխատանքը բակալավրի կրթական ծրագրի անհատական և ամփոփիչ բաղադրիչն է, որի պատրաստումը և պաշտպանությունն առկա ուսուցման դեպքում իրականացվում են 8-րդ կիսամյակում, իսկ հեռակա ուսուցման դեպքում՝ 10-րդ կիսամյակում։ Բոլոր ուսանողները մինչև 7-րդ (հեռակա ուսուցման դեպքում՝ 9-րդ) կիսամյակի ավարտը պետք է ունենան բակալավրի ավարտական աշխատանքի հրամանագրված թեմաներ և ղեկավարներ։ Ավարտական աշխատանքի պատրաստման և պաշտպանության համար բակալավրի կրթական ծրագրում նախատեսվում է 20 կրեդիտ աշխատածավալ։
Ավարտական աշխատանքի թեմայի հաստատման համար ուսանողը գրավոր դիմում է ամբիոնի վարիչին:
Ընտրված թեմաների ցանկը (ըստ ուսանողների և ավարտական աշխատանքների ղեկավարների) նախ հաստատվում է ամբիոնի, այնուհետև՝ ֆակուլտետի գիտական խորհրդի նիստում:
Թեմաների հաստատված ցանկի մեկական օրինակ պահվում է ամբիոնում, դեկանատում և ՈՒՄՎ-ում:
Գիտական ղեկավարի փոփոխությունը թույլատրվում է միայն բացառիկ դեպքերում (օրինակ՝ ղեկավարի երկարատև գործուղում, ուսումնական տարվա ընթացքում աշխատանքից ազատում, երկարատև հիվանդություն), իսկ թեմայի փոփոխությունը` համապատասխան հիմնավորման առկայության դեպքում: