2015թ. նոյեմբերի 5-ին ԵՊՀ ԻՄ-ի բնական գիտությունների ֆակուլտետում «Փնտրման և տեսակավորման դասական ալգորիթմներ: Ալգորիթմների ծրագրային ապահովման մշակում և բարդությունների գնահատում» թեմայով գիտական զեկուցում կարդաց ԵՊՀ դիսկրետ մաթեմատիկայի ամբիոնի ասպիրանտ Ներսես Խաչատրյանը, ում հրավիրել էր մասնաճյուղի ծրագրավորման և ինֆորմացիոն տեխնոլոգիաների ամբիոնը:

Ներկայացվեց, որ տեսակավորման ալգորիթմները գնահատվում են կատարման արագությամբ և հիշողության օգտագործման արդյունավետությամբ, դիտարկվեցին կիրառական խնդիրների օրինակներ, որոնց համար A ալգորիթմի կատարման ժամանակը ուղիղ համեմատական է f(n) ֆունկցիային:

Վերլուծվեցին նույն խնդիրը լուծող տարբեր ալգորիթմների էֆեկտիվության համեմատության հնարավորությունները:

Մանրամասն ներկայացվեցին տեսակավորման ալգորիթմները.

• Պղպջակների մեթոդ (անգլ՝ Bubble sort), ալգորիթմի դժվարությունը` O(n2), ինդեքսի յուրաքանչյուր զույգի համար իրականացվում է փոխանակում, եթե էլեմենտները տեղաբաշխված են ոչ հերթականությամբ։

• Կոկտեյլային տեսակավորում (Cocktail sort, bidirectional bubble sort), ալգորիթմի դժվարությունը` O(n2):

• Բլոկային տեսակավորում (տեսակավորում Bucket sort) ալգորիթմի դժվարությունը` O(n), պետք է O(k) լրացուցիչ հիշողություն և տեսակավորվող տվյալների էության իմացություն, «տեղափոխել» և «համեմատել» ֆունկցիաների սահմանների մեջ։

• Հաշվարկող տեսակավորում (Counting sort) ալգորիթմի բարդությունը ` O(n+k), անհրաժեշտ է O(n+k) լրացուցիչ հիշողություն:

• Միաձուլման տեսակավորում (Merge sort) ալգորիթմի բարդությունը` O(n log n), անհրաժեշտ է O(n) լրացուցիչ հիշողություն, շարել ցանկի առաջին և երկրորդ մասը առանձին, իսկ հետո միաձուլել հաջորդականացված ցանկերը։

• Ծառային տեսակավորում (անգլ.՝ Tree sort) ալգորիթմի բարդությունը` O(n log n), անհրաժեշտ է O(n) լրացուցիչ հիշողություն։

• Ընտրանքային տեսակավորում (Selection sort) ալգորիթմի բարդությունը ` O(n2), ամենամեծ կամ ամենափոքր էլեմենտի փնտրում և տեղադրում հաջորդականացված ցանկի վերջում կամ սկզբում:

• Շելլի տեսակավորում (Shell sort) ալգորիթմի դժվարությունը ` O(n log2 n) և փորձ լավացնելու մուտքային տեսակավորում:

• Խմբային տեսակավորում (Heapsort) ալգորիթմի բարդությունը՝ O(n log n), վերածել ցանկը խմբի, վերցնել ամենամեծ էլեմենտը և ավելացնել ցանկի վերջում։

• Արագ տեսակավորում (Quicksort), հիշողության նվազագույն ծախս, ալգորիթմի բարդությունը` O(n log n), միջին ժամանակը, O(n2) վատագույն դեպք. լայն տարածում ունի որպես ամենաարագը դասավորելու մեծ պատահական ցանկերի համար՝ բաժանելով 2 մասի սկզբնական տվյալները, այնպես, որ առաջին կեսի ցանկացած էլեմենտ դասավորված է երկրորդ կեսի ցանկացած էլեմենտի համեմատ։ Հետո ալգորիթմը օգտագործել ռեկուրսիվ ամեն կեսում։ O(n) լրացուցիչ հիշողության դեպքում կարելի է տեսակավորումը ավելի կայուն անել։

Զեկուցումից հետո ուսանողներին առաջարկվեցին տրամաբանական խնդիրներ, որոնք քննարկվեցին մեծ ոգևորությամբ:

2015թ. նոյեմբերի 4-ին` Սոցիալական աշխատողի միջազգային օրվա առթիվ, ԵՊՀ Իջևանի մասնաճյուղում տեղի ունեցավ միջոցառում, որը նախաձեռնել և կազմակերպել էր մասնաճյուղի ուսանողական գիտական ընկերությունը:

Միջոցառման ընթացքում ներկայացվեցին Սոցիալական աշխատողի օրվան նվիրված զեկուցումներ:

«Սոցաշխատողի գործառույթները» թեմայով զեկուցում կարդաց Հումանիտար գիտությունների ֆակուլտետի «Անգլերեն լեզու և գրականություն» մասնագիտության առաջին կուրսի ուսանողուհի Արինա Պարոնյանը:

«Սոցիալական աշխատանքը մարդկության խիղճն է» թեմայով զեկուցում ներկայացրեց նույն կուրսի ուսանողուհի Սուսաննա Սարուխանյանը:

Զեկուցումներից հետո Սոցիալական աշխատողի գործունեության դերի, նպատակի, խնդիրների շուրջ ծավալվեց հետաքրքիր քննարկում:

2015թ. նոյեմբերի 3-ին «Սերվիս» մասնագիտության IV կուրսի ուսանողները «Հյուրանոցային և ռեստորանային մարքեթինգ» դասընթացի շրջանակներում այցելեցին Ենոքավան համայնքում գործող հյուրանոցային համալիր: 

Այցի նպատակն էր տեսական գիտելիքները կիրառել գործնականում` կատարել դաշտային հետազոտություն և ստանալ հետևյալ հարցերի պատասխանները.

• ինչպիսի՞ն է հյուրանոցային և ռեստորանային ծառայությունների պահանջարկը,

• ի՞նչ ծառայություններ են մատուցվում. դրանց իրականացման ձևերը,

• ո՞րն է բիզնեսի նպատակային շուկան,

• ի՞նչ գնային քաղաքականություն է կիրառվում,

• ինչպիսի՞ն է մրցակցային դաշտը,

• որքա՞ն է մարքեթինգային բյուջեն,

• ի՞նչ մարքեթինգային ռազմավարությամբ է առաջնորդվում բիզնեսը,

• զարգացման ի՞նչ հեռանկարներ կան:

Ուսանողներին դիմավորեցին համալիրի տնօրենը̀ Տիգրան Չիբուխչյանը, երկու աշխատակիցներ̀ Արամն ու Նարեկը (նա, ի դեպ, ԵՊՀ ԻՄ-ի շրջանավարտ է):

Նրանք նախ ուսանողներին ներկայացրին համալիրի լյուքս, դելյուքս և ստանդարտ տիպի հյուրատները, նրանց հիմնական տարբերությունները, գները և լրացուցիչ ծառայությունները̀ ձիարշավներ, երեկոյան խարույկ, ձկնորսություն, սպորտային խաղեր, այցելություն մարզի տեսարժան վայրեր, ինչպես նաև սեփական արտադրության կաթնամթերք և մսամթերք (էկոսնունդ):

 Յուրաքանչյուր հյուրատան բաց պատշգամբից բացվում էր աշնանային հիասքանչ բնապատկեր:

Պարոն Չիբուխչյանը նշեց, որ համալիրն ընդգրկում է էկո, գյուղական, ռեկրեացիոն և էքստրեմալ տուրիզմի ձևերը, ներկայացրեց նոր` “Zip Line” ծառայությունը, որն առաջինն է ՀՀ-ում:

Նա անակնկալ մատուցեց ուսանողներին` որպես համալսարանից առաջին այցելուների` հնարավորություն տալով նրանց օգտվել ծառայությունից:

Այցելության վերջում համալիրի տնօրենը կատարեց մի քանի գործնական առաջարկ.

• բիզնես համագործակցություն,

• աշխատատեղ (գիդ, մենեջեր, մատուցող, նկարիչ),

• տուրիստական ծառայությունների ոլորտում կարևոր չորս համակարգչային ծրագրերի ուսուցում համալսարանում և ապագա մենեջերների պատրաստում:

Դեպի «Ապագա Տուր» կատարած այցելությունից ուսանողները վերադարձան հաճելի տպավորություններով, հյուրանոցային տնտեսությանը և ընդհանրապես զբոսաշրջությանը վերաբերող օգտակար գիտելիքներով ու գործնական հմտություններով:

2015թ. նոյեմբերի 3-ին ԵՊՀ ԻՄ-ի տնօրեն Սամվել Առաքելյանը հեռակա ուսուցման դասերի մեկնարկի կապակցությամբ հանդիպեց Հեռակա ուսուցման բաժնի ուսանողների հետ:

2015-2016 ուսումնական տարում մասնաճյուղն ընդունեց հեռակա ուսուցմամբ 199 առաջին կուրսեցիների: 

Հանդիպմանը ներկա էին Հեռակա ուսուցման բաժնի աշխատակիցները` Մ.Զուրաբյանի գլխավորությամբ, Անձնակազմի կառավարման բաժնի վարիչ Ա.Հովհաննիսյանը, մասնաճյուղի դասախոսներ, ուսանողներ:

Հանդիպման ընթացքում մասնաճյուղի տնօրեն Ս.Առաքելյանը հեռակա ուսուցման համակարգի ուսանողներին և մասնավորապես առաջին կուրսեցիներին շնորհավորեց նոր ուսումնական տարվա կապակցությամբ, նրանց մաղթեց, որ լինեն ուսումնատենչ, աշխատասեր, նպատակասլաց, դառնան երկրի օրինավոր քաղաքացիներ ու հայրենիքի արժանավոր զավակներ:

Տնօրենն ընդգծեց նաև, որ յուրաքանչյուր բուհի գնահատականը նրա շրջանավարտներն են: Իր 20-ամյա գործունեության ընթացքում ԵՊՀ Իջևանի մասնաճյուղը տվել է շուրջ 4000 շրջանավարտ, որոնց մեծամասնությունը հաջողությամբ աշխատում է հասարակական կյանքի տարբեր ոլորտներում, պետական և հանրային կառույցներում, բանկային համակարգում և այլն:

Շուրջ մեկ տասնյակ շրջանավարտներ պաշտպանել են թեկնածուական ատենախոսություն և աշխատում են մասնաճյուղում:

Նա ուսանողներին ևս մեկ անգամ կոչ արեց ակտիվորեն մասնակցել ուսանողական նախաձեռնություններին, դառնալ համալսարանական միջավայրի լիիրավ ներկայացուցիչներ, հպարտությամբ կրել ԵՊՀ ԻՄ-ի ուսանող լինելու պատիվն ու պատասխանատվությունը:

2015թ. հոկտեմբերի 31-ին ԵՊՀ Իջևանի մասնաճյուղում տեղի ունեցավ գիտական խորհրդի նիստ` մասնաճյուղի տնօրեն, գիտական խորհրդի նախագահ Ս.Առաքելյանի նախագահությամբ:

Գիտխորհրդի նիստում քննարկվեցին ԵՊՀ ԻՄ-ի` 2016-2020թթ. ռազմավարական ծրագրի նախագիծը, Հայոց լեզվի և գրականության ամբիոնի ասիստենտ, բ.գ.թ. Գ.Մկրտչյանին ԵՊՀ գիտխորհրդում դոցենտի գիտական կոչման համար երաշխավորելու հարցը, մասնաճյուղի մեթոդական խորհրդի և գիտական խորհրդին կից որակի կառավարման հանձնաժողովի կազմերում փոփոխություններ կատարելու վերաբերյալ մի շարք հարցեր:

 Ընթացիկ հարցերից հատկանշական են ԵՊՀ ԻՄ-ի կառուցվածքում, մասնաճյուղի ուսանողական նպաստների, պետական և ներբուհական կրթաթոշակների հատկացման կանոնակարգում փոփոխություններ կատարելու, ԵՊՀ ԻՄ-ի գերբի, դրոշի, օրհներգի և ոսկե մեդալի նախագծերն ու էսքիզները նախապատրաստելու մասին հարցերը, որոնց կապակցությամբ որոշվեց ստեղծել համապատասխան հանձնաժողովներ և նրանց աշխատանքներն ամփոփել մասնաճյուղի գիտխորհրդի տարեվերջյան նիստում:

Նիստի ընթացքում հաստատվեցին ԵՊՀ ԻՄ-ի գիտական խորհրդի նոր կանոնակարգը և մասնաճյուղի ֆակուլտետների նոր
կանոնադրությունները: