Միջոցառումն ուսանողներին հնարավորություն էր տալիս կապ ստեղծելու իրական գործատուների, գործատուներին՝ ապագա մասնագետների հետ, իսկ առաջին կուրսեցիներին ծանոթանալու համալսարանական կյանքի հնարավորություններին:
Այս տարի ևս «ԲանՈՒԳործ» էքսպոյին ներկայացուցչական խմբով և առանձին տաղավարով մասնակցեց ԵՊՀ Իջևանի մասնաճյուղը՝ ցուցադրելով իր կրթագիտական հնարավորությունները և Կիրառական արվեստի ֆակուլտետի դասախոսների, ուսանողների և շրջանավարտների աշխատանքները:

Բուկլետների, թռուցիկների, սթիքերների, էջանշանների միջոցով էքսպոյի այցելուներին ներկայացվեց ԵՊՀ ԻՄ ֆակուլտետների գործունեությանը, բակալավրական և մագիստրոսական ծրագրերին վերաբերող տեղեկատվություն:
Ցուցահանդեսում հատուկ ուշադրության արժանացան Կիրառական արվեստի ֆակուլտետի կողմից ներկայացված բազմաժանր աշխատանքները՝ գոբելեն, մանրանկարչություն, ապակենկարչություն, բատիկ, կարպետներ, քանդակներ:

«ԲանՈՒԳործ․ ԵՊՀ էքսպո-2025»-ը ԵՊՀ Իջևանի մասնաճյուղի համար լավ հարթակ էր մարզից դուրս ներկայացնելու իր կրթագիտական ներուժը, ինչպես նաև ծանոթանալու ԵՊՀ գործընկեր կազմակերպությունների կողմից ներկայացվող աշխատանքի առաջարկներին և հնարավորություններին, աշխատաշուկայի հիմնական միտումներին:

«ԲանՈՒԳործ․ ԵՊՀ էքսպո-2025»-ի մանրամասներին կարող եք ծանոթանալ ԵՊՀ պաշտոնական կայքում՝ https://www.ysu.am/news/86358: