2015թ. օգոստոսին Ստամբուլում կայացավ ԵՊՀ ԻՄ-ի Տուրիզմի կառավարման և մշակութաբանության ամբիոնի ասիստենտ Լևոն Լաճիկյանի «Պոլիսը՝ մոտ ու հեռու» 10-րդ անհատական ցուցահանդեսը: Այն ներառում էր շուրջ 3 տասնյակ գրաֆիկական աշխատանքներ, որոնցում ցոլանում էին հիմնականում Պոլսի հայկական հիշատակները: 

 Մեծ տեղ էր հատկացված նաև Գնալը հայաշունչ կղզուն, որտեղ ամռանը շուրջ 30 հազար հայ է հավաքվում աշխարհի տարբեր ծայրերից: 

«Այս կերպ ուզեցի վերահաստատել Կ.Պոլսի անփոխարինելի տեղը հայերիս կյանքում՝ որպես մեկը հայ մշակույթի մայրաքաղաքներից,- ասում է արվեստաբան-նկարիչ Լ.Լաճիկյանը և շարունակում. -Գաղտնիք չէ, որ Պոլիսը Պոլիս են դարձրել մեր հայրենակիցները, ուստի հարկ համարեցի Թուրքիո այդ ամենամեծ քաղաքի հիշարժան վայրերն ու գեղակառույցները պատկերել իրենց անցյալի գեղեցկությամբ և ներկա անանց հմայքով: Ի վերջո, չպետք է մոռանալ նաև, որ Պոլիսը եղել է ինչպես մեր տխուր, այնպես էլ շատ ուրախ օրերի վկան ու ականատեսը»: 

 «Սփիւռք» գիտաուսումնական կենտրոնի տնօրեն, պրոֆ. Սուրեն Դանիելյանը գրում է. «Լևոն Լաճիկյանը 2 ժամանակների Պոլիսները կամրջելու իր շնորհն է բերել այս զարմանալի, «տաք» գծանկարներում: Դրանց ենթաբնագրերում նա վերակազմում է այդ 2 Պոլիսների պատմամշակութային շաղախը»:

Իրոք, հայաստանցի արվեստագետի աշխատանքներում ներդաշնակվում են պատմականն ու այժմեականը, իրականն ու երևակայականը: 

 «Պոլիսը՝ մոտ ու հեռու» ցուցահանդեսի այցելուների թվում էին Թուրքիո խորհրդարանի հայ երեսփոխան Սելինա Դողանը, Սբ. Փրկիչ ազգային հիվանդանոցի հոգաբարձության ատենապետ Պետրոս Շիրինօղլուն, Շիշլիի փոխքաղաքապետ Վազգեն Պարընը, ինչպես հայ, այնպես էլ թուրք հայտնի արվեստագետներ, գրողներ, երգիչներ: 

 Նման ցուցահանդես բացելու գաղափարը ծնվել էր դեռ 2011թ. դեկտեմբերին, երբ հայ գծանկարիչն իր «Հայկական աշխարհն» էր ցուցադրում Նյու Յորքում: Այդտեղ նրան շատ պոլսահայեր են մոտեցել՝ ասելով. «Իսկ ո՞ւր է մերին Պոլիսը»: 

 Հաջորդած երեք այցերը դեպի Բոսֆորի ափեր բավական են եղել վերոհիշյալ ցուցահանդեսը կազմակերպելու համար: Լ.Լաճիկյանը հիացմունքով է խոսում Ստամբուլ-Պոլսի գրավչության մասին:

 «Դա Արևելքի ու Արևմուտքի մի անկրկնելի համադրություն է ներկայացնում: Նման բան ուրիշ որևէ տեղ չես հանդիպի: Դրան գումարվում էր նաև այն օրինական հպարտությունը, որ յուրաքանչյուր հայի է պարուրում այդ քաղաք մուտք գործելիս: Շատ զգուշությամբ էի քայլում Ստամբուլի փողոցներով՝ չտրորելու համար Գրիգոր Զոհրապի ու Սիամանթոյի, Դանիել Վարուժանի ու Ռուբեն Սևակի ոտնահետքերը»,- պատմում է Լևոն Լաճիկյանը և ավելացնում, որ Գնալը կղզին ևս մշակութային հարուստ ավանդույթներ է ունեցել և այսօր ցանկալի է դրանք շարունակել: 

 Այդ կղզում են ապրել ու ստեղծագործել Վահրամ Փափազյանն ու Զապել Ասատուրը, Կոմիտասը, Հակոբ Մնձուրին ու Զահրատը: 

«Պոլիսը՝ մոտ ու հեռու» հոբելյանական 10-րդ ցուցահանդեսի և ծննդյան 60-ամյակի կապակցությամբ ԵՊՀ Իջևանի մասնաճյուղը շնորհավորում է իր աշխատակցին` մաղթելով նրան ստեղծագործական նորանոր ձեռքբերումներ:

2015թ. սեպտեմբերի 16-ին ԵՊՀ Իջևանի մասնաճյուղ այցելեցին Վալանսի պատվիրակության ներկայացուցիչները` Վալանսի փոխքաղաքապետի գլխավորությամբ:

Նախ` մասնաճյուղի տնօրեն, պատմ. գիտ. թեկն., դոցենտ Սամվել Առաքելյանի հետ տեղի ունեցավ հանդիպում, որին ներկա էին մարզի հոգևոր դասի ներկայացուցիչներ, Իջևանի քաղաքապետ Վ.Ղալումյանը, պատվիրակության անդամները, Օտար լեզուների ամբիոնի դասախոսներ, լրագրողներ:

Հանդիպման ընթացքում տնօրենի կողմից ներկայացվեց մասնաճյուղի, նրանում գործող մասնագիտությունների` հատկապես ֆրանսերեն լեզվի և գրականության վերաբերյալ ընդհանուր տեղեկատվություն, նշվեց, որ մեզանում պետության կողմից ամեն ինչ արվում է ֆրանսերեն լեզվի ուսուցումը բարձր մակարդակով կազմակերպելու, այդ լեզուն ոչ միայն պահպանելու, այլև տարածելու, զարգացնելու ուղղությամբ, Իջևանում գործում են և ֆրանսերեն լեզվի ուսուցման կենտրոններ, որոնցում անվճար ֆրանսերեն է ուսուցանվում:

Ընդգծվեց, որ 2016-2017 ուստարվանից մասնաճյուղում հավասար ժամաքանակով ֆրանսերեն կանցնեն նաև «Անգլերեն լեզու և գրականություն» մասնագիտության ուսանողները:

Քննարկվեցին մասնաճյուղում ֆրանսերեն լեզվի ուսուցման, ուսանողների փոխանակման, դասընթացներ ու դասալսումներ կազմակերպելու վերաբերյալ մի շարք հարցեր:

Մասնավորապես նշվեց, որ Վալանսում մեկամսյա ուսումնական պրակտիկա անցած մեր ուսանողներն անչափ տպավորված են և՛ հյուրընկալությունից և՛ ուսուցումից, առաջարկվեց, որ Վալանսի ուսանողներն էլ այցելեն մասնաճյուղ, հյուրընկալվեն Իջևանում:

Այնուհետև ֆրանսերենի ուսուցման սրահում Վալանսի փոխքաղաքապետը հանդիպեց «Ֆրանսերեն լեզու և գրականություն» մասնագիտության մի խումբ ուսանողների հետ, ովքեր ֆրանսերենով հաղորդակցվեցին փոխքաղաքապետի հետ, խոսեցին իրենց ուսանողական առօրյայից, ստացան իրենց հետաքրքրող հարցերի պատասխանները, վստահեցրին, որ սիրով ու պատասխանատվությամբ են ուսումնասիրում ֆրանսերենը:

Հայ-ֆրանսիական համագործակցությունն ավելի սերտացնելու, լեզվամշակութային հաղորդակցությունը խորացնելու նպատակով առաջարկվեց 2016թ. գարնանը Իջևանի քույր քաղաք Վալանս մեկնող պատվիրակության կազմում ընդգրկել մասնաճյուղից ներկայացուցիչներ, հետագայում կնքել համաձայնության հուշագիր:

Վերջում ԵՊՀ ԻՄ-ի կիրառական արվեստի ֆակուլտետի ուսանողների աշխատանքներից մեկը Վալանսի փոխքաղաքապետին տրվեց նվեր:

2015թ. սեպտեմբերի 1-ին` Գիտելիքի և դպրության օրը, «ԵՊՀ» հիմնադրամի Իջևանի մասնաճյուղում մեկնարկեց նոր` 2015-2016 ուսումնական տարին:

Վերստին բացվեցին հարազատ կրթօջախի դռները, ու նա դարձյալ իր գիրկն առավ իր դասախոսներին և ուսանողներին, ովքեր նոր ուստարին դիմավորում են նոր հույզերով, հույսերով ու ակնկալիքներով:

Նոր ուսումնական տարում ԵՊՀ Իջևանի մասնաճյուղն ընդունեց 164 առաջին կուրսեցիների, որոնց համար Ուսանողական խորհուրդը կազմակերպել էր տոնական միջոցառում:

Ներկա էին ԵՊՀ ԻՄ-ի տնօրեն Սամվել Առաքելյանը, վարչական և պրոֆեսորադասախոսական անձնակազմի ներկայացուցիչները, Իջևանի զորամասի հրամանատարական կազմը և նվագախումբը, ուսանողներ, ծնողներ, հյուրեր:

Միջոցառումը բացվեց տերունական աղոթքով, ՀՀ պետական օրհներգով, այնուհետև համալսարանականներին Գիտելիքի և դպրության օրվա կապակցությամբ շնորհավորեց ԵՊՀ ԻՄ-ի տնօրեն, պատմ. գիտ. թեկն., դոցենտ Սամվել Առաքելյանը:

Տնօրենը բարի գալուստ մաղթեց առաջին կուրսեցիներին, նրանց պատգամեց ձեռք բերել գիտելիքների մեծ պաշար, դրսևորել նպատակասլացություն, տոկունություն և հաստատակամություն, դառնալ հասարակությանը պիտանի մարդ և հայրենիքի արժանի զավակ:

Նոր ուսումնական տարվա կապակցությամբ ուսանողներին շնորհավորեց և բարեմաղթանքի խոսքեր հղեց Իջևանի զորամասի հրամանատարի տեղակալ, փոխգնդապետ Սահակյանը, ում մասնաճյուղի կողմից հանձնվեց Կիրառական արվեստի ֆակուլտետի ուսանողներից մեկի աշխատանքը` իբրև երախտագիտության նշան:

Այնուհետև առաջին կուրսեցիներին բարի գալուստ մաղթեց մասնաճյուղի ուսանողական խորհրդի նախագահ Ռազմիկ Հովսեփյանը, կոչ արեց նրանց պատասխանատվությամբ վերաբերվել ուսանողի կոչմանը, ակտիվորեն մասնակցել ուսանողական ծրագրերին:

Գիտելիքի բանալին հանձնվեց առաջին կուրսեցի, մասնաճյուղի այս տարվա լավագույն դիմորդ Աստղիկ Սարիբեկյանին, որից հետո տեղի ունեցավ առաջին կուրսեցիների երդման հանդիսավոր արարողությունը: Նրանք երդվեցին հպարտությամբ կրել ուսանող լինելու պատիվը, լինել մասնաճյուղի արժանավոր սաներ:

Տոնական միջոցառումն ընթացավ գեղեցիկ երգ ու պարով, ասմունքով և եզրափակվեց Իջևանի զորամասի նվագախմբի տղաների խրոխտ կատարումով:

2015թ. օգոստոսի 24-ին ՀՀ կրթության և գիտության նախարար Արմեն Աշոտյանը այցելեց «ԵՊՀ» հիմնադրամի Իջևանի մասնաճյուղ:

Նախարարին դիմավորեցին Տավուշի մարզպետ Հ.Աբովյանը, ԵՊՀ ԻՄ-ի տնօրեն Ս.Առաքելյանը, մասնաճյուղի վարչական և պրոֆեսորադասախոսական անձնակազմի ներկայացուցիչներ, ուսանողական խորհրդի, ուսանողական գիտական ընկերության, «Տավուշ» ռազմահայրենասիրական ակումբի անդամները, ԶԼՄ-ների ներկայացուցիչներ:

Պարոն Աշոտյանը մասնակցեց իր այցելության պատվին կազմակերպված` Կիրառական արվեստի ֆակուլտետի դասախոսների և ուսանողների ստեղծագործությունների ցուցահանդեսին և մասնաճյուղի դասախոսների հեղինակած գրքերի ցուցադրությանը:

Այնուհետև ՀՀ ԿԳ նախարարի հետ անցկացվեց խորհրդակցություն, որի ընթացքում ԵՊՀ ԻՄ-ի տնօրեն Ս.Առաքելյանը ներկայացրեց մասնաճյուղում իրականացվող առկա և հեռակա ուսուցման, գործող մասնագիտությունների վերաբերյալ ընդհանուր տեղեկատվություն, քննարկվեցին ուսումնական գործընթացին վերաբերող մի շարք հարցեր:

2015թ. օգոստոսի 2-13-ը Երևանում կայացան Համահայկական 6-րդ ամառային խաղերը, որոնցում ընդգրկված էին աշխարհի 165 երկրների 6350-ից ավելի մեր հայրենակիցներ` 17 թիմային մարզաձևերում (ֆուտբոլ, մինի ֆուտբոլ, բասկետբոլ, վոլեյբոլ, ատլետիկա, թենիս, սեղանի թենիս, շախմատ, բադմինթոն, լող, լողափնյա վոլեյբոլ, բազկամարտ, գոլֆ, հանդբոլ, սպորտային պարեր, հրաձգություն, հեծանվասպորտ):

Համահայկական 6-րդ խաղերում` «Բադմինթոն» մարզաձևում, Իջևան քաղաքը պատվով ներկայացրեց ԵՊՀ Իջևանի մասնաճյուղի արտակարգ իրավիճակների, մարմնակրթության և սպորտի ամբիոնի վարիչ, փետրագնդակի միջազգային կարգի սպորտի վարպետ, Հայաստանի բազմակի չեմպիոն, Սովետական միության (1980թ.), Եվրոպայի չեմպիոն (Գերմանիա, 1980թ.), Ֆրանսիայի բաց առաջնության չեմպիոն (Ֆրանսիա, 1981թ.), Համահայկական 5-րդ խաղերի ոսկե մեդալակիր (2011թ.) Վարդիթեր Գուրգենի Պողոսյանը:

«Բադմինթոն» մարզաձևում մրցապայքարի մեջ էր մտել ընդհանուր թվով 16 զույգ:
Միջազգային կարգի սպորտի վարպետ Վ.Պողոսյանին զուգախաղում ընկերակցեց նրա եղբոր դուստրը՝ Հայաստանի բազմակի չեմպիոն Լիլիթ Պողոսյանը:

Հաղթելով 3 զույգի՝ Վարդիթեր և Լիլիթ Պողոսյանները դուրս եկան եզրափակիչ:
2:0 հաշվով առավելության հասնելով Երևան քաղաքը ներկայացնող Մարիետա Միկոյան և Քնարիկ Մարգարյան զույգի նկատմամբ` նրանք գրավեցին առաջին տեղը:

Չեմպիոնները պարգևատրվեցին ոսկե մեդալով և դիպլոմով:

ԵՊՀ Իջևանի մասնաճյուղը սիրով շնորհավորում է իր վաստակավոր աշխատակցուհուն` մաղթելով նորանոր հաջողություններ, առավել մեծ բարձունքների նվաճումներ: