Иджеванский филиал Ереванского государственного университета

«ՄԱԹԵՎՈՍՅԱՆ ԿՐԹԱՎՃԱՐ» 2014-2015 ուստարվա ուսանողների համար

ՀՕՖ-ը «Մաթևոսյան կրթավճար» ծրագրի շրջանակներում Երևանի պետական համալսարան, Հայաստանի պետական ճարտարագիտական համալսարան, Հայաստանի պետական տնտեսագիտական համալսարան, Հայաստանի ազգային ագրարային համալսարան և նրանց մասնաճյուղերն ընդունված  բարձր առաջադիմություն ցուցաբերած առաջին կուրսեցիների համար հայտարարում է մրցույթ:

Մրցույթին կարող են մասնակցել այն ուսանողները, ովքեր ունեցել են բարձր առաջադիմություն դպրոցում, միասնական և ԲՈՒՀ-ի քննությունները հանձնել են գերազանց կամ բարձր գնահատականներով,  ընդունվել վճարովի ուսուցման համակարգ և պարտավորվում են ուսման ավարտից հետո նվազագույնը 4 տարի ապրել և աշխատել Հայաստանի Հանրապետությունում կամ Արցախում:

«Մաթևոսյան կրթավճար» ծրագրի մրցույթին մասնակցելու կարգը.

Մրցույթին մասնակցել ցանկացողները  մինչև օգոստոսի 11-ը ք. Երևան, Մովսես Խորենացի 22 հասցեում գտնվող ՀՕՖ-ի Հայաստանի մասնաճյուղ  (կամ մինչև օգոստոսի 10-ը` ԵՊՀ Իջևանի մասնաճյուղի ընդունող հանձնաժողով)  պետք է ներկայացնեն հետևյալ փաստաթղթերը.

ԴԻՄՈՒՄ (ձևը կարող եք վերցնել նաև ՀՕՖ-ից, բուհի ընդունելության հանձնաժողովից),

• Անձնագրի պատճենը,

• Միջնակարգ կրթության վկայականի պատճենը,

• Միասնական քննությունների գնահատականները,

• ՀՀ ԿԳ նախարարության բուհերի ընդունելության քննությունների հաշվիչ կենտրոնի կամ ԲՈՒՀ-ի տեղեկանքը համապատասխան ֆակուլտետ ընդունվելու վերաբերյալ,

• Ընտանիքի սոցիալական անձնագրի պատճենը (առկայության դեպքում),

• Տեղեկանք ծնողների աշխատավայրից՝ նրանց աշխատանքի և աշխատավարձի վերաբերյալ, եթե չեն աշխատում՝ տեղեկանք զբաղվածության տարածքային կենտրոնից կամ աշխատանքային գրքույկի պատճենը:

Անհրաժեշտության դեպքում կարող են պահանջվել նաև տեղեկանքներ բնակության վայրից, համայնքի սոցիալական ծառայությունից և այլն: Թերի փաստաթղթերը չեն դիտարկվի:

Շահառուների ընտրությունը տեղի է ունենալու 3 փուլով.

1. Ներկայացված փաստաթղթերի քննում,

2. Ուսանողների տուն կատարված այցերի արդյունքների ամփոփում,

3. Անհրաժեշտության դեպքում հարցազրույցի անցկացում:

Ծրագրում ուսանողի ընդգրկման վերջնական որոշումը կայացնելու է ՀՕՖ-ի կրթական ծրագրերի հանձնաժողովը:

Լրացուցիչ տեղեկությունների համար զանգահարել ծրագրի համակարգող Էդուարդ Կարապետյանին (060) 52 66 60 հեռախոսահամարով:

Աղբյուրը` www.facebook.com/farusa

 

Տեղի ունեցավ դիպլոմների հանձնման հանդիսավոր արարողությունը

2014թ. հուլիսի 12-ին ԵՊՀ Իջևանի մասնաճյուղում տեղի ունեցավ դիպլոմների հանձնման հանդիսավոր արարողությունը: Այս տարվա շրջանավարտների դիպլոմների հանձնումը կազմակերպվել էր ըստ տարածաշրջանների: Հուլիսի 9-ին դիպլոմները հանձնվեցին Բերդի տարածաշրջանում, հուլիսի 10-ին` Նոյեմբերյանի տարածաշրջանում, իսկ հուլիսի 12-ին ԵՊՀ ԻՄ-ում հանձնվեցին Իջևանի, Դիլիջանի տարածաշրջաններից և մյուս մարզերից մեր շրջանավարտների դիպլոմները:

 

Հանդիսավոր արարողությանը ներկա էին մասնաճյուղի վարչական ու պրոֆեսորադասախոսական անձնակազմի անդամներ, շրջանավարտներ, ծնողներ, հրավիրված էին մարզի տարբեր ստորաբաժանումների ներկայացուցիչներ:

 

2014թ. շրջանավարտներին դիպլոմներ հանձնեցին և շնորհավորեցին մասնաճյուղի տնօրեն Սամվել Առաքելյանը, ֆակուլտետների դեկանները:

 

«Այսօր հավաքվել ենք շատ հաճելի արարողություն կատարելու` դիպլոմներ հանձնելու համար: Դիպլոմը ոչ միայն կրթություն, այլև դաստիարակություն է այնքանով, որքանով դուք կարող եք ազդեցություն ունենալ ձեր շրջապատի, ձեր երեխաների վրա»,- մասնավորապես նշեց Ս.Առաքելյանը:

 

Եվս մեկ անգամ շնորհավորելով և բարեմաղթանքներ հղելով շրջանավարտներին` տնօրենը համոզմունք արտահայտեց, որ դիպլոմը կարևոր ուղեգիր կդառանա կյանքում իրենց տեղը գտնելու համար:

 

Շնորհակալական խոսքով հանդես եկավ «Անգլերեն լեզու և գրականություն» մասնագիտության շրջանավարտ Ռուզաննա Ափինյանը. «Ինչպես Ալբերտ Այնշտայնն է ասել, կրթությունը այն է, ինչը մնում է այն բանից հետո, երբ մոռանում ես այն ամենը, ինչը սովորեցրել են»:

 

Ուսումնառության տարիները պատկերավոր ձևով համեմատելով եղինջի վրայից լեզվով մեղր վերցնելու գործընթացի հետ` նա շնորհակալություն հայտնեց ոչ միայն տրված գիտելիքների, այլև ուսումնառության ընթացքում հանդիպած դժվարությունների համար, որոնց հաղթահարումը է՛լ ավելի կոփեց և տոկուն դարձրեց իրենց:

 

 

 

Ելույթ ունեցավ «Հայոց լեզու և գրականություն» մասնագիտության շրջանավարտ Մերի Սահակյանի տատիկը` վաստակավոր մանկավարժ Վերա Պետրոսյանը, շնորհակալություն հայտնեց մասնաճյուղի վարչական և պրոֆեսորադասախոսական անձնակազմին` ուսանողներին տված որակյալ կրթության համար:

Ի գիտություն 2014թ. շրջանավարտների

Ի գիտություն 2014թ. շրջանավարտների

ԵՊՀ  Իջևանի մասնաճյուղի առկա և հեռակա ուսուցման համակարգերի 2014թ. շրջանավարտների դիպլոմների հանձնման արարողությունները տեղի կունենան ըստ տարածաշրջանների` հետևյալ ժամանակացույցով.

  • Բերդի տարածաշրջան – 09.07.2014թ., ժամը 12:00, Բերդ քաղաքի երաժշտական դպրոցի դահլիճ,
  • Նոյեմբերյանի տարածաշրջան – 10.07.2014թ., ժամը 12:00, Նոյեմբերյան քաղաքի երաժշտական դպրոցի դահլիճ,
  • Իջևանի, Դիլիջանի տարածաշրջաններ և մյուս մարզեր – 12.07.2014թ., ժամը 11:00 (առկա ուսուցում), 13:00 (հեռակա ուսուցում), ԵՊՀ ԻՄ-ի Կիրառական արվեստի ֆակուլտետի դահլիճ:

STEP «ԳԱՂԱՓԱՐԻՑ ԴԵՊԻ ԲԻԶՆԵՍ» ԴՐԱՄԱՇՆՈՐՀԱՅԻՆ ՄՐՑՈՒՅԹ 2014

STEP «ԳԱՂԱՓԱՐԻՑ ԴԵՊԻ ԲԻԶՆԵՍ» ԴՐԱՄԱՇՆՈՐՀԱՅԻՆ ՄՐՑՈՒՅԹ 2014

ԱՄՆ Քաղաքացիական հետազոտությունների և զարգացման հիմնադրամը (CRDF Global), ՀՀ Էկոնոմիկայի նախարարությունը և Ձեռնարկությունների ինկուբատոր հիմնադրամը (ՁԻՀ) բոլոր հետաքրքրված նորարարներին, սկսնակ ընկերությունների թիմերին (startups), գիտնականներին և տեխնոլոգիական ոլորտի ձեռներեցներին հրավիրում են մասնակցել STEP ծրագրի շրջանակում «Գաղափարից դեպի բիզնես» դրամաշնորհային մրցույթին:

Մրցույթի նպատակն է խթանել խոստումնալից նոր տեխնոլոգիաների և սկսնակ ընկերությունների բացահայտումն ու զարգացումը Հայաստանում՝ հետևյալ ոլորտներում.

  • ՏՀՏ, ճարտարագիտություն և բարձր տեխնոլոգիաներ
  • Մաքուր տեխնոլոգիաներ
  • Գյուղատնտեսություն

Մրցույթին ներկայացվող ծրագրերը պետք է ուղղված լինեն նոր, առևտրային տեսանկյունից կենսունակ տեխնոլոգիական արտադրանքի, գործընթացի կամ ծառայության ստեղծմանը և/կամ հետագա զարգացմանը:

Մասնակցության հայտերը պետք է մինչև 2014թ. հուլիսի 28-ը ներկայացնել ՁԻՀ (mari.barseghyan@eif.am հասցեով), որտեղ կստուգվի դրանց համապատասխանությունը ներկայացված պայմաններին:

Այնուհետև վերջնական հայտերը էլեկտրոնային եղանակով ներկայացվում են CRDF Global-ին www.crdfglobal.org/fromideatomarket կայքէջում և ՁԻՀ` mari.barseghyan@eif.am էլ. փոստով մինչև 2014թ. օգոստոսի 8-ը, ժամը 23:59-ը (EST):

Մրցույթի մանրամասն հայտարարությունը, ներառյալ հայտերի ներկայացման կարգը, և դիմումի ձևը (անգլերեն/հայերեն) կարող եք նեռրբեռնել ստորև կամ ստանալ էլ.փոստով՝ համապատասխան նամակ ուղարկելով mari.barseghyan@eif.am հասցեով:

Competition Announcement

Application Form

ՄՐՑՈՒՅԹԻ ՀԱՅՏԱՐԱՐՈՒԹՅՈՒՆ

ԴԻՄՈՒՄԻ ՁԵՎ

Աղբյուրը` www.eif.am

Գիտական խորհրդի նիստում

2014թ. հունիսի 28-ին ԵՊՀ ԻՄ-ում տեղի ունեցավ Գիտական խորհրդի նիստ, որը նախագահում էր մասնաճյուղի գիտական խորհրդի նախագահ, տնօրեն Ս.Ա. Առաքելյանը:

Գիտական խորհրդի նիստում

 

Նիստում քննարկվեցին ԵՊՀ ԻՄ-ի` 2014թ. բակալավրի և մագիստրոսի կրթական ծրագրերով առկա և հեռակա ուսուցման ամփոփիչ ատեստավորման արդյունքներին, 2014-15 ուստարվա մասնագիտությունների ցանկին, ԵՊՀ ԻՄ-ի կազմում կառուցվածքային փոփոխություններին, ԵՊՀ ԻՄ-ի զարգացման ռազմավարական ծրագրի կատարման ընթացքին, ԵՊՀ ԻՄ-ից ստացած կրթությունից շրջանավարտների բավարարվածության վերաբերյալ 2014թ. հարցման արդյունքներին վերաբերող մի շարք հարցեր:

Գիտական խորհրդի նիստում

 

Նախ ըստ մասնագիտությունների ներկայացվեցին ԵՊՀ ԻՄ-ի` 2014թ. բակալավրի և մագիստրոսի կրթական ծրագրերով առկա և հեռակա ուսուցման ամփոփիչ ատեստավորման արդյունքները, կատարվեց համեմատական վերլուծություն:

Առանձնահատուկ ուշադրություն դարձվեց ամփոփիչ ատեստավորման հանձնաժողովների նախագահների կողմից տրված կարծիքներին և առաջարկներին, դիտարկվեցին թերություններն ու առավելությունները:

ԵՊՀ ուսումնական աշխատանքների գծով պրոռեկտոր Ալեքսանդր Գրիգորյանը Կիրառական արվեստի ֆակուլտետում արձանագրված առաջընթացի կապակցությամբ նշեց, որ կարելի է անդրադառնալ այդ ֆակուլտետում մագիստրատուրան բացելու խնդրին:

Ինչ վերաբերում է ուսանողների` այլալեզու գրականությունից քիչ օգտվելու հանգամանքին, Ա. Գրիգորյանը փաստեց, որ Մայր բուհում ևս առկա է այդ խնդիրը, որը լուծելու համար նախատեսվում է գոնե մեկ առարկա դասավանդել օտար լեզվով:

Գիտական խորհրդի նիստում

 

ԵՊՀ ԻՄ-ի` 2014-15 ուստարվա մասնագիտությունների ցանկի կապակցությամբ ներկայացվեց ԿԳՆ-ի կողմից առաջադրված մասնագիտությունների նոր ցանկը, որտեղ չկան մասնաճյուղում գործող որոշ մասնագիտություններ, հանձնարարվեց համապատասխան ստորաբաժանումներին այդ ուղղությամբ մշակել արդյունավետ ռազմավարություն:

Պրոռեկտոր Գրիգորյանը նշեց, որ բուհերի դիմորդների թիվը նվազում է, մրցակցությունը բարդանում է, ուստի պետք է հստակեցնել այդ ուղղությամբ ռազմավարությունը, ուշադրություն դարձնել հեռակա ուսուցման որակի վրա, քանի որ հեռակա ուսուցման դիմորդների թիվը տարեցտարի աճում է:

Որոշվեց սեպտեմբերյան գիտխորհրդի նիստի օրակարգում ընդգրկել հեռակա ուսուցման որակի հետ կապված հարց: ԵՊՀ ԻՄ-ի կազմում որոշվեց կատարել հետևյալ կառուցվածքային փոփոխությունները.

  • Լուծարել Ընդհանուր ֆիզիկայի, Անտառագիտության, Բարձրագույն մաթեմատիկայի և ինֆորմատիկայի ամբիոնները:
  • Ձևավորել Ծրագրավորման և ինֆորմացիոն տեխնոլոգիաների, Ընդհանուր մաթեմատիկայի և բնագիտության ամբիոններ,
  • Գծանկարի և գունանկարի ամբիոնը վերանվանել Գծանկարի, գունանկարի և քանդակի ամբիոն, Դեկորատիվ կիրառական արվեստի ամբիոնը` Դեկորատիվ կիրառական արվեստի և դիզայնի ամբիոն, Պատմության և քաղաքագիտության ամբիոնը վերանվանել Հայոց պատմության և հասարակագիտության ամբիոն:
  • Բնական գիտությունների ֆակուլտետի դեկանի պարտականություններից ազատել Ա. Ցուցուլյանին և նրան նշանակել Ընդհանուր մաթեմատիկայի և բնագիտության ամբիոնի վարիչի ժամանակավոր պաշտոնակատար:
  • Կիրառական արվեստի ֆակուլտետեի դեկանի պարտականնություններից ազատել Կ.Այվազյանին և նրան նշանակել Վարչատնտեսական վարչության պետ:
  • Բնական գիտությունների ֆակուլտետի դեկանի ժամանակավոր պաշտոնակատար նշանակել Մ.Զաքարյանին:
  • Կիրառական արվեստի ֆակուլտետի դեկանի ժամանակավոր պաշտոնակատար նշանակել Ա.Մարգարյանին:

Քննարկելով ԵՊՀ ԻՄ-ից ստացած կրթությունից շրջանավարտների բավարարվածության վերաբերյալ 2014թ. հարցման արդյունքները` առաջարկվեց հարցումներ անել նաև ԵՊՀ-ում ուսումը շարունակող մեր ուսանողների շրջանում, առանձնացնել առկա և հեռակա ուսուցման հարցումները և վերլուծությունները: