2015թ. սեպտեմբերի 11-ին ԵՊՀ ԻՄ-ի Բնական գիտությունների ֆակուլտետում անցկացվեց բնապահպանական դասընթաց, որի ժամանակ «Կարմիր գիրք, վտանգված տեսակներ», «Կարմիր գրքում գրանցված հյուսիսարևելյան Հայաստանի կենդանատեսակները և բուսատեսակները» թեմաներով զեկուցումներ կարդացին Ծրագրավորման և ինֆորմացիոն տեխնոլոգիաների ամբիոնի ասիստենտ, տեխն. գիտ. թեկնածու Աննա Սիմոնյանը, Տուրիզմի կառավարման և մշակութաբանության ամբիոնի ասիստենտ Պավել Ասիլբեկյանը: 

Ներկա էին Տավուշի մարզպետարանի Բնապահպանության բաժնի վարիչ Սամվել Գևորգյանը, մասնաճյուղի վարչական և պրոֆեսորադասախոսական անձնակազմի ներկայացուցիչներ, «Քարտեզագրություն և կադաստրային գործ», «Սերվիս» մասնագիտության ուսանողներ:

Դասընթացի ժամանակ տրվեց հագեցած տեղեկատվություն Հայաստանի Կարմիր գրքում զետեղված և ՀՀ հյուսիսարևելյան շրջաններում առկա տեսակների մասին:

Օգտագործվեց «GIZ Կենսաբազմազանության կայուն կառավարում Հարավային Կովկասում» ծրագրի, Հայաստանի բնության պետական թանգարանի և Տավուշի մարզպետարանի կողմից տրամադրված գրականությունը:

Տեղի ունեցան ակտիվ քննարկումներ Տավուշի մարզի վտանգված տեսակների, դրանց պահպանության ուղղությամբ ներկայումս տարվող աշխատանքների վերաբերյալ:

Ուսանողներին առաջարկվեց ներկայացնել տեսակի պաշտպանության սեփական լուծումները:

Առանձնակի ուշադրություն դարձվեց այնպիսի տեսակների, ինչպիսիք են կենին, արջատխլենին, նռնենին, արևելյան կակաչը, ծնեբեկը, անդրկովկասյան գորշ արջը, կովկասյան անտառային կատուն, կատվաօձը, միջերկրածովյան կրիան, բեզուարյան այծը, երկարականջ ոզնին, որոնցից ուսանողները պետք է ընտրեն «դրոշակակիր» (որոշակի էկոհամակարգ, սպառնալիք, կազմակերպություն կամ տարածաշրջան ներկայացնող) տեսակ:

 Ուսանողների ոգևորվածությունը բավականին մեծ էր, ուստի և պայմանավորվածություն ձեռք բերվեց առաջիկայում այցելել նաև Իջևանի դենդրոպարկ` գործնական հետազոտություններ ու քննարկումներ կատարելու նպատակով:

2015թ. սեպտեմբերի 10-ին «ԵՊՀ» հիմնադրամի Իջևանի մասնաճյուղում տեղի ունեցավ գիտական խորհրդի նիստ, որը նախագահում էր մասնաճյուղի տնօրեն, գիտական խորհրդի նախագահ Ս.Առաքելյանը:

Գիտական խորհրդի նիստում քննարկվեցին ԵՊՀ ԻՄ-ի` 2016-2017 ուստարվա բակալավրի կրթական ծրագրով մասնագիտությունների ցանկին, 2014-2015 ուստարվա արդյունքներով ԵՊՀ ԻՄ-ի ուսանողների փոխատեղմանը (ռոտացիային), կառուցվածքային փոփոխություններին վերաբերող մի շարք հարցեր:

Նիստի ընթացքում հաստատվեցին ԵՊՀ ԻՄ-ի գիտական խորհրդի` 2015-2016 ուստարվա I կիսամյակի նիստերի ժամանակացույցը, նույն կիսամյակի անվանական կրթաթոշակները, ըստ մասնագիտությունների` ուսման վարձաչափերը և կրեդիտները:

ԵՊՀ ԻՄ-ի` 2016-2017 ուստարվա բակալավրի կրթական ծրագրով մասնագիտությունների վերաբերյալ մասնավորապես նշվեց, որ Հումանիտար գիտությունների ֆակուլտետում ներդրվել են «Տարրական մանկավարժություն և մեթոդիկա», «Սոցիալական աշխատանք» մասնագիտությունները:

Օտար լեզուների` անգլերենի և ֆրանսերենի հետ կապված` կատարվել են այնպիսի փոփոխություններ («Անգլերեն լեզու և գրականություն» մասնագիտության ուսանողները հավասար ժամաքանակով կանցնեն ֆրանսերեն և հակառակը), որոնց արդյունքում մասնաճյուղը կտա 2 օտար լեզվի համահավասար իմացությամբ շրջանավարտներ: Սա, ի դեպ, առաջին փորձն է Հայաստանի Հանրապետությունում:

Տնտեսագիտության ֆակուլտետում (որը կվերանվանվի Տնտեսագիտության և կառավարման ֆակուլտետ) «Սերվիս» մասնագիտությունը փոխարինվել է «Զբոսաշրջության կառավարում» մասնագիտությամբ:

Կիրառական արվեստի ֆակուլտետը կվերանվանվի Արվեստի ֆակուլտետ ու կունենա «Դիզայն» և «Համակարգչային գրաֆիկա» մասնագիտությունները:

ԵՊՀ ԻՄ-ի` 2016-2017 ուստարվա բակալավրի կրթական ծրագրով մասնագիտությունների ցանկը որոշվեց ներկայացնել ԵՊՀ գիտխորհրդի հաստատմանը:

Կառուցվածքային փոփոխությունների հետ կապված` նշվեց, որ մասնաճյուղում կստեղծվի մի նոր` Միջազգային կապերի բաժին:

Սեպտեմբերի 6-ին «Տավուշ» ռազմահայրենասիրական ակումբի տաղանդավոր եւ շնորհաշատ երիտասարդները՝ ակումբի նախագահ Էրիկ Սահակյանի գլխավորությամբ, այցելեցին Տավուշի մարզի Սեւքար գյուղի մոտակայքում գտնվող դիրքեր, հանդիպեցին մեր հերոս սպաներին եւ զինվորներին, ոգեւորությամբ անցկացրին հայրենասիրական միջոցառում, որը նպատակ ուներ բարձրացնելու զինծառայողների տրամադրությունը, ոգեւորելու եւ գոտեպնդելու նրանց: 

Միջոցառումը հագեցած էր հայրենասիրական երգերով, ժողովրդական պարերով, պատմության հերոսական դրվագների, զորավարների փառաբանումներով: Հարկ է նշել, որ միջոցառումը տեղի ունեցավ հենց այն վայրում, որտեղ պայթել էր թշնամու արկը:

Զինվորները մեծ ուրախությամբ դիմավորեցին երիտասարդ հայրենասերներին: Այն հարցին, թե ինչպիսին է մեր զինվորների տրամադրությունը, բոլորի շուրթերից միահամուռ լսվեց «ՄԱՐՏԱԿԱՆ» պատասխանը: Մենք հպարտ ենք, որ ունենք այսպիսի հերոսներ, որոնք ամուր կանգնած են մեր սահմանին:

Նշեմ, որ «Տավուշ» ռազմահայրենասիրական ակումբն իր գործունեությունն սկսել է 2014 թվականի փետրվար ամսից, սակայն այս կարճ ժամանակահատվածում անգամ ակումբն իր ակտիվության շնորհիվ հասցրել է բավականին լուրջ աշխատանքներ կատարել:

Ի դեպ, նշված աշխատանքների կարիքը իրոք զգացվում է, հատկապես` սահմանամերձ Տավուշի մարզում, իսկ թե հատկապես որքանով, կարծում եմ, կհասկանա յուրաքանչյուրը, ով գեթ մեկ անգամ եղել է սահմանում կամ գոնե ծանոթ է Հայոց պատմությանը:

Աղբյուրը` http://www.hayzinvor.am