2015թ. հուլիսի 8-ին ԵՊՀ ԻՄ-ի տնօրեն Ս.Առաքելյանը հանդիպեց մասնաճյուղի այն լավագույն շրջանավարտների հետ, ովքեր նախապես գրանցվել էին մասնաճյուղի «Կադրային բանկ»-ում և էլեկտրոնային տարբերակով ուղարկել իրենց ինքնակենսագրությունները:

Հանդիպումը կայացավ մասնաճյուղի դասախոսական, վարչական և ուսումնաօժանդակ անձնակազմը բուհի շրջանավարտներով համալրելու նախաձեռնության շրջանակներում:

«Մեր շրջանավարտներից շատերն այսօր աշխատում են ԵՊՀ Իջևանի մասնաճյուղում և լիովին արդարացնում են իրենց: Մենք պիտի շարունակենք կիրառել արդեն հաջողված կադրային այդ քաղաքականությունը»- իր խոսքում ընդգծեց Ս.Առաքելյանը:

Հանդիպման ընթացքում քննարկվեցին շրջանավարտների ստացած կրթությանը (բակալավրական և մագիստրոսական), աշխատանքային փորձին, նրանց կողմից ակնկալվող աշխատանքներին վերաբերող հարցեր:

Շրջանավարտներին նաև առաջարկվեց անդամագրվելու մասնաճյուղին կից ստեղծվող «Շրջանավարտների միություն» հասարակական կազմակերպությանը:

Քննարկումից հետո որոշվեց, որ նոր ուսումնական տարվանից մի քանի շրջանավարտներ կհրավիրվեն փորձաշրջանով աշխատելու մասնաճյուղում:

2015թ. հուլիսի 7-ին ԵՊՀ Իջևանի մասնաճյուղում տեղի ունեցավ 2015թ. առկա ուսուցման կենտրոնացված («Հայոց լեզու և գրականություն», «Անգլերեն», «Ֆրանսերեն») և ներբուհական («Գծանկար», «Գունանկար», «Կոմպոզիցիա») ընդունելության քննություններից վերջինը` ֆրանսերենի քննությունը: 

Քննություններում ցուցաբերված արդյունքներից հայտնի դարձավ մեր լավագույն դիմորդը` ԵՊՀ ԻՄ-ի հումանիտար գիտությունների ֆակուլտետի «Ֆրանսերեն լեզու և գրականություն» մասնագիտության դիմորդ Աստղիկ Բագրատի Սարիբեկյանը:

Այդ կապակցությամբ Աստղիկի հետ ունեցանք փոքրիկ հարցազրույց` բուհի և մասնագիտության ընտրության շուրջ.

-Ինչպե՞ս եք տեղեկացել ԵՊՀ Իջևանի մասնաճյուղի մասին:

 -Մասնաճյուղի մասին տեղեկացել եմ ծանոթներիս և բուհի ներկայացուցիչների` մեր դպրոց կատարած այցելության միջոցով:

-Մեր բուհն ընտրելիս ի՞նչ չափանիշներ եք հաշվի առել (նրա վարկանիշը, կրթության որակը, վարձավճարը, այլ չափանիշներ):

– Ընտրել եմ   ԵՊՀ Իջևանի մասնաճյուղը` հաշվի առնելով նրա տրամադրած կրթության որակը:

-Ձեր մասնագիտությունն ընտրելիս ի՞նչ սկզբունք եք հաշվի առել:

-Ես ընտրել եմ «Ֆրանսերեն լեզու և գրականություն» մասնագիտությունը, քանի որ շատ եմ սիրում այն: Թեև դպրոցում անցել եմ անգլերեն, բայց ֆրանսերենի նկատմամբ սերը, այդ լեզվի հմայքը` նրբությունը, երաժշտականությունը, մղեց ինձ ընտրելու հենց այդ մասնագիտությունը:  

-Գո՞հ եք արդյոք ընդունելության քննություններից, դրանց անցկացման գործընթացից:

-Այո՛, ես շատ գոհ եմ ընդունելության քննություններից, դրանք անցկացվեցին թափանցիկ, օբյեկտիվ: Կարծում եմ, որ դիմորդները անկաշկանդ կերպով հանձնեցին քննությունները և ստացան իրենց արժանի գնահատականները:  

-Ի՞նչ առաջարկներ ունեք` ընդունելության քննությունների հետ կապված:

-Ես կուզենայի, որ չլինեին շտեմարաններ, քանի որ դրանք, ըստ իս, մեխանիկական վարժեցման վտանգ ունեն իրենց մեջ:

-Ի՞նչ ակնկալիքներ ունեք ԵՊՀ Իջևանի մասնաճյուղից:

– ԵՊՀ Իջևանի մասնաճյուղից ես ակնկալում եմ, որ կստանամ որակյալ կրթություն, կդառնամ պահանջված մասնագետ, հասարակությանը պիտանի մարդ և կկարողանամ իմ լուման ներդնել մեր երկրի զարգացման գործում:

Հարցազրույցը վարեց ԵՊՀ ԻՄ-ի հասարակայնության հետ

կապերի և մամուլի պատասխանատու Հասմիկ Վանյանը

2014-2015 ուստարվա երկրորդ կիսամյակում ԱՄՆ Խաղաղության կորպուսի անգլերեն լեզվի ուսուցման կամավոր, պրոֆեսոր Պամելա Ուոթքինսը ավարտեց իր աշխատանքը ԵՊՀ Իջևանի մասնաճյուղի հումանիտար գիտությունների ֆակուլտետի օտար լեզուների ամբիոնում:

Երկու տարվա բեղմնավոր գործունեության արդյունքում մեր ուսանողները կարողացան մասնագիտական խոր գիտելիքներ ձեռք բերել և զարգացնել խոսակցական անգլերենի իրենց հմտությունները:

Նրա շնորհիվ մեր ուսանողները նաև հաղթեցին հանրապետական
և միջազգային մրցույթներում՝ անգլերեն լեզվով ներկայացնելով շարադրություններ:

2015թ. հուլիսի 7-ին` հրաժեշտի ժամանակ, պրոֆեսոր Ուոթքինսը Անգլերեն լեզվի ռեսուրս կենտրոնին նվիրեց բազմաֆունկցիոնալ տպիչ սարք:

Հումանիտար գիտությունների ֆակուլտետի պրոֆեսորադասախոսական անձնակազմը և ուսանողները իրենց երախտագիտությունն են հայտնում սիրելի դասախոսին` նրան մաղթելով նոր հաջողություններ:

2015թ. հուլիսի 1-7-ը ԵՊՀ Իջևանի մասնաճյուղում կայացան 2015թ. առկա ուսուցման կենտրոնացված («Հայոց լեզու և գրականություն», «Անգլերեն», «Ֆրանսերեն») և ներբուհական («Գծանկար», «Գունանկար», «Կոմպոզիցիա») ընդունելության քննությունները:

Կենտրոնացված քննությունների նվազագույն շեմը 57 դիմորդներից հաղթահարել է 50-ը (հայոց լեզուն և գրականությունը` 17-ից 15-ը, անգլերենը` 31-ից 27-ը, ֆրանսերենը` 9-ից 7-ը):

Ներբուհական քննությունների նվազագույն շեմը 23 հանձնողներից հաղթահարել է 21-ը (գծանկարը` 23-ից 22-ը, գունանկարը` 23-ից 21-ը, կոմպոզիցիան` 23-ից 21-ը):

Կայացած քննությունների ընդհանուր համապատկերում առավել գոհացուցիչ էին ֆրանսերենի բանավոր քննության արդյունքները:

Քննական հանձնաժողովի նախագահ Մելանյա Ղազարյանը փաստեց, որ դիմորդների պատրաստվածության աստիճանը բարձր էր, քննությունները կազմակերպված էին պատշաճ մակարդակով:

2015թ. հուլիսի 4-ին Տավուշի մարզի Ենոքավան համայնքի «Ապագա տուր» տուրիստական կազմակերպության տարածքում կայացավ «Հայաստանի բույսերը» փառատոնը, որի հիմնական խնդիրը հայկական խոտաբույսերի բազմազանությունը հանրամատչելի դարձնելն էր:

«Հայաստանի բույսերը» փառատոնում գործում էին տարբեր հարթակներ` նախատեսված դեղաբույսերի տոնավաճառի, ազգային խոհանոցի, կերպարվեստի, բրդի ներկման և թաղիքագործության վարպետության դասընթացների, ազգային խաղերի համար:

Փառատոնին մասնակցում էր նաև ԵՊՀ Իջևանի մասնաճյուղը` կիրառական արվեստի ֆակուլտետի դասախոսների և ուսանողների բազմաժանր ստեղծագործություններով:

Այցելուները մեծ բավականություն և տեղեկատվություն ստացան մասնաճյուղի կիրառական արվեստի ֆակուլտետում իրականացվող գործընթացների, ստեղծագործական աշխատանքների վերաբերյալ: