2014թ. օգոստոսի 1-ին ԵՊՀ Իջևանի մասնաճյուղում տեղի ունեցավ Գոհար Համզյանի հետ հանդիպում, որին ներկա էին ԵՊՀ ԻՄ-ի տնօրեն Սամվել Առաքելյանը, Օտար լեզուների ամբիոնի դասախոսներ, մասնաճյուղի աշխատակիցներ, ուսանողներ:

Հանդիպման նպատակը «Հայ-ֆրանսիական բարեկամություն» կազմակերպության տնօրեն Պոլետ Կուտանի (Ուբուլյանի) կողմից մասնաճյուղի «Ֆրանսերեն լեզու և գրականություն» մասնագիտության մի շարք ուսանողներին հատկացված կրթաթոշակների հանձնումն էր:

Դեռևս 2012թ. սեպտեմբերի 28-ին ԵՊՀ Իջևանի մասնաճյուղում տեղի ունեցած հանդիպման ընթացքում «Հայ-ֆրանսիական բարեկամություն» կազմակերպության անդամներ Պոլետ Կուտանը և Բեռնար Կուտանը ներկայացրել էին կրթության ոլորտին վերաբերող ծրագիր, որը հավանության էր արժանացել տնօրեն Ս.Առաքելյանի կողմից` որպես ֆրանս-հայկական բարեկամությունն ամրապնդող կարևոր ձեռնարկում:

Ծրագիրը ներառում էր մի շարք դրույթներ` ուսանողների վերապատրաստում, վճարների փոխանցում, դպրոց-համալսարան կապի ամրապնդում, դասընթացների ու դասալսումների կազմակերպում, համապատասխան գրականության տրամադրում և այլն:

2012-2013թթ. «Հայ-ֆրանսիական բարեկամություն» կազմակերպությունը կրթաթոշակ էր հատկացրել մասնաճյուղի «Ֆրանսերեն լեզու և գրականություն» մասնագիտության 10 ուսանողների:

Ծրագրի շրջանակներում կրթաթոշակ ստացած ուսանողները պարբերաբար այցելում են սահմանամերձ գյուղեր և Անժելա Վանեսյանի անվան ֆրանկոֆոնիայի կենտրոն, աջակցում ֆրանսերեն լեզվի ուսուցման կազմակերպմանը:

Այս տարի կրթաթոշակ տրամադրվեց մասնաճյուղի «Ֆրանսերեն լեզու և գրականություն» մասնագիտության 13 ուսանողների` 2-րդ կուրսի 7 (Ամիրխանյան Հասմիկ, Խաչատրյան Արմինե, Հարությունյան Իրինա, Մադաթյան Գոհար, Մովսեսյան Էթերի, Պողոսյան Ալվինա, Սաֆարյան Մարգարիտա) և 4-րդ կուրսի 6 (Աբազյան Վանուհի, Այդինյան Բերկրուհի, Մարգարյան Դավիթ, Շահնազարյան Աննա, Վանեսյան Լուիզա, Վարդանյան Ազնիվ) ուսանողների:

Կրթաթոշակի չափը պայմանավորված է ուսանողների ցուցաբերած ակտիվությամբ:

2014թ. հուլիսի 12-ին ԵՊՀ Իջևանի մասնաճյուղում տեղի ունեցավ դիպլոմների հանձնման հանդիսավոր արարողությունը: Այս տարվա շրջանավարտների դիպլոմների հանձնումը կազմակերպվել էր ըստ տարածաշրջանների: Հուլիսի 9-ին դիպլոմները հանձնվեցին Բերդի տարածաշրջանում, հուլիսի 10-ին` Նոյեմբերյանի տարածաշրջանում, իսկ հուլիսի 12-ին ԵՊՀ ԻՄ-ում հանձնվեցին Իջևանի, Դիլիջանի տարածաշրջաններից և մյուս մարզերից մեր շրջանավարտների դիպլոմները:

Հանդիսավոր արարողությանը ներկա էին մասնաճյուղի վարչական ու պրոֆեսորադասախոսական անձնակազմի անդամներ, շրջանավարտներ, ծնողներ, հրավիրված էին մարզի տարբեր ստորաբաժանումների ներկայացուցիչներ:

2014թ. շրջանավարտներին դիպլոմներ հանձնեցին և շնորհավորեցին մասնաճյուղի տնօրեն Սամվել Առաքելյանը, ֆակուլտետների դեկանները:

«Այսօր հավաքվել ենք շատ հաճելի արարողություն կատարելու` դիպլոմներ հանձնելու համար: Դիպլոմը ոչ միայն կրթություն, այլև դաստիարակություն է այնքանով, որքանով դուք կարող եք ազդեցություն ունենալ ձեր շրջապատի, ձեր երեխաների վրա»,- մասնավորապես նշեց Ս.Առաքելյանը:

Եվս մեկ անգամ շնորհավորելով և բարեմաղթանքներ հղելով շրջանավարտներին` տնօրենը համոզմունք արտահայտեց, որ դիպլոմը կարևոր ուղեգիր կդառանա կյանքում իրենց տեղը գտնելու համար:

Շնորհակալական խոսքով հանդես եկավ «Անգլերեն լեզու և գրականություն» մասնագիտության շրջանավարտ Ռուզաննա Ափինյանը. «Ինչպես Ալբերտ Այնշտայնն է ասել, կրթությունը այն է, ինչը մնում է այն բանից հետո, երբ մոռանում ես այն ամենը, ինչը սովորեցրել են»:

Ուսումնառության տարիները պատկերավոր ձևով համեմատելով եղինջի վրայից լեզվով մեղր վերցնելու գործընթացի հետ` նա շնորհակալություն հայտնեց ոչ միայն տրված գիտելիքների, այլև ուսումնառության ընթացքում հանդիպած դժվարությունների համար, որոնց հաղթահարումը է՛լ ավելի կոփեց և տոկուն դարձրեց իրենց:

Ելույթ ունեցավ «Հայոց լեզու և գրականություն» մասնագիտության շրջանավարտ Մերի Սահակյանի տատիկը` վաստակավոր մանկավարժ Վերա Պետրոսյանը, շնորհակալություն հայտնեց մասնաճյուղի վարչական և պրոֆեսորադասախոսական անձնակազմին` ուսանողներին տված որակյալ կրթության համար:

2014թ. հունիսի 28-ին ԵՊՀ ԻՄ-ում տեղի ունեցավ Գիտական խորհրդի նիստ, որը նախագահում էր մասնաճյուղի գիտական խորհրդի նախագահ, տնօրեն Ս.Ա. Առաքելյանը:

Նիստում քննարկվեցին ԵՊՀ ԻՄ-ի` 2014թ. բակալավրի և մագիստրոսի կրթական ծրագրերով առկա և հեռակա ուսուցման ամփոփիչ ատեստավորման արդյունքներին, 2014-15 ուստարվա մասնագիտությունների ցանկին, ԵՊՀ ԻՄ-ի կազմում կառուցվածքային փոփոխություններին, ԵՊՀ ԻՄ-ի զարգացման ռազմավարական ծրագրի կատարման ընթացքին, ԵՊՀ ԻՄ-ից ստացած կրթությունից շրջանավարտների բավարարվածության վերաբերյալ 2014թ. հարցման արդյունքներին վերաբերող մի շարք հարցեր:

Նախ ըստ մասնագիտությունների ներկայացվեցին ԵՊՀ ԻՄ-ի` 2014թ. բակալավրի և մագիստրոսի կրթական ծրագրերով առկա և հեռակա ուսուցման ամփոփիչ ատեստավորման արդյունքները, կատարվեց համեմատական վերլուծություն:

Առանձնահատուկ ուշադրություն դարձվեց ամփոփիչ ատեստավորման հանձնաժողովների նախագահների կողմից տրված կարծիքներին և առաջարկներին, դիտարկվեցին թերություններն ու առավելությունները:

ԵՊՀ ուսումնական աշխատանքների գծով պրոռեկտոր Ալեքսանդր Գրիգորյանը Կիրառական արվեստի ֆակուլտետում արձանագրված առաջընթացի կապակցությամբ նշեց, որ կարելի է անդրադառնալ այդ ֆակուլտետում մագիստրատուրան բացելու խնդրին:

Ինչ վերաբերում է ուսանողների` այլալեզու գրականությունից քիչ օգտվելու հանգամանքին, Ա. Գրիգորյանը փաստեց, որ Մայր բուհում ևս առկա է այդ խնդիրը, որը լուծելու համար նախատեսվում է գոնե մեկ առարկա դասավանդել օտար լեզվով:

ԵՊՀ ԻՄ-ի` 2014-15 ուստարվա մասնագիտությունների ցանկի կապակցությամբ ներկայացվեց ԿԳՆ-ի կողմից առաջադրված մասնագիտությունների նոր ցանկը, որտեղ չկան մասնաճյուղում գործող որոշ մասնագիտություններ, հանձնարարվեց համապատասխան ստորաբաժանումներին այդ ուղղությամբ մշակել արդյունավետ ռազմավարություն:

Պրոռեկտոր Գրիգորյանը նշեց, որ բուհերի դիմորդների թիվը նվազում է, մրցակցությունը բարդանում է, ուստի պետք է հստակեցնել այդ ուղղությամբ ռազմավարությունը, ուշադրություն դարձնել հեռակա ուսուցման որակի վրա, քանի որ հեռակա ուսուցման դիմորդների թիվը տարեցտարի աճում է:

Որոշվեց սեպտեմբերյան գիտխորհրդի նիստի օրակարգում ընդգրկել հեռակա ուսուցման որակի հետ կապված հարց: ԵՊՀ ԻՄ-ի կազմում որոշվեց կատարել հետևյալ կառուցվածքային փոփոխությունները.

• Լուծարել Ընդհանուր ֆիզիկայի, Անտառագիտության, Բարձրագույն մաթեմատիկայի և ինֆորմատիկայի ամբիոնները:

• Ձևավորել Ծրագրավորման և ինֆորմացիոն տեխնոլոգիաների, Ընդհանուր մաթեմատիկայի և բնագիտության ամբիոններ,

• Գծանկարի և գունանկարի ամբիոնը վերանվանել Գծանկարի, գունանկարի և քանդակի ամբիոն, Դեկորատիվ կիրառական արվեստի ամբիոնը` Դեկորատիվ կիրառական արվեստի և դիզայնի ամբիոն, Պատմության և քաղաքագիտության ամբիոնը վերանվանել Հայոց պատմության և հասարակագիտության ամբիոն:

• Բնական գիտությունների ֆակուլտետի դեկանի պարտականություններից ազատել Ա. Ցուցուլյանին և նրան նշանակել Ընդհանուր մաթեմատիկայի և բնագիտության ամբիոնի վարիչի ժամանակավոր պաշտոնակատար:

• Կիրառական արվեստի ֆակուլտետեի դեկանի պարտականնություններից ազատել Կ.Այվազյանին և նրան նշանակել Վարչատնտեսական վարչության պետ:

• Բնական գիտությունների ֆակուլտետի դեկանի ժամանակավոր պաշտոնակատար նշանակել Մ.Զաքարյանին:

• Կիրառական արվեստի ֆակուլտետի դեկանի ժամանակավոր պաշտոնակատար նշանակել Ա.Մարգարյանին:

Քննարկելով ԵՊՀ ԻՄ-ից ստացած կրթությունից շրջանավարտների բավարարվածության վերաբերյալ 2014թ. հարցման արդյունքները` առաջարկվեց հարցումներ անել նաև ԵՊՀ-ում ուսումը շարունակող մեր ուսանողների շրջանում, առանձնացնել առկա և հեռակա ուսուցման հարցումները և վերլուծությունները:

2014թ. հունիսի 25-ին ԵՊՀ ԻՄ-ի հեռակա ուսուցման բաժնում տեղի ունեցավ «Պատմություն» մասնագիտության ամփոփիչ քննությունը:

Հանձնաժողովը գլխավորում էր Հայաստանի պետական ագրարային համալսարանի պատմության և փիլիսոփայության ամբիոնի վարիչ, պ. գ. թ., դոցենտ Վ.Ոսկանյանը:

Քննությանը մասնակցում էին 36 ուսանող, որոնցից «լավ» ստացան 16-ը, «բավարար»` 20-ը:

Հունիսի 26-ին կայացավ «Պատմություն» մասնագիտության ավարտական աշխատանքների պաշտպանությունը: 2 ուսանող ստացավ «գերազանց», 19-ը` «լավ», 15-ը` «բավարար»:

Հունիսի 21-ին տեղի ունեցավ «Տնտեսագիտության տեսություն» մասնագիտության ամփոփիչ քննությունը:

Հանձնաժողովը գլխավորում էր ՀՀ էկոնոմիկայի փոխնախարար Գ.Բադալյանը:

Քննությանը մասնակցում էին 38 ուսանող, որոնցից «լավ» ստացան 15-ը, «բավարար»` 23-ը:

Հունիսի 22-ին կայացավ «Տնտեսագիտության տեսություն» մասնագիտության ավարտական աշխատանքների պաշտպանությունը:

3 ուսանող ստացավ «գերազանց», 18-ը` «լավ», 17-ը` «բավարար»:

2014թ. հունիսի 20-ին ԵՊՀ ԻՄ-ի հեռակա ուսուցման բաժնում տեղի ունեցավ «Կիրառական մաթեմատիկա և ֆիզիկա» մասնագիտության ամփոփիչ քննությունը:

Հանձնաժողովը գլխավորում էր ՀՀ ԿԳ նախարարության գիտության կոմիտեի գիտական գործունեության կազմակերպման վարչության պետ, ֆիզմաթ. գիտ. դոկտոր Լ.Մարդոյանը:

Քննությանը մասնակցում էին 13 ուսանող, որոնցից «լավ» ստացան 4-ը, «բավարար»` 9-ը:

Հունիսի 21-ին կայացավ «Կիրառական մաթեմատիկա և ֆիզիկա» մասնագիտության ավարտական աշխատանքների պաշտպանությունը: 5 ուսանող ստացավ «լավ», 8-ը` «բավարար»:

2014թ. հունիսի 16-ին ԵՊՀ ԻՄ-ի հեռակա ուսուցման բաժնում տեղի ունեցավ «Հայոց լեզու և գրականություն» մասնագիտության ամփոփիչ քննությունը:

Հանձնաժողովը գլխավորում էր ՀՀ պետական կառավարման ակադեմիայի դոցենտ, մ.գ.թ., դոցենտ Լ.Միրզոյանը:

Քննությանը մասնակցում էին 8 ուսանող, որոնցից «լավ» ստացավ 1-ը, «բավարար»` 7-ը:

Հունիսի 17-ին կայացավ «Հայոց լեզու և գրականություն» մասնագիտության ավարտական աշխատանքների պաշտպանությունը, որին մասնակցում էին 13 ուսանող:

«Գերազանց» ստացավ 3 ուսանող, «լավ»` 9-ը, «բավարար»` 1-ը:

2014թ. հունիսի 13-ին ԵՊՀ ԻՄ-ի հեռակա ուսուցման բաժնում տեղի ունեցավ «Մանկավարժություն և հոգեբանություն» մասնագիտության ամփոփիչ քննությունը:

Հանձնաժողովը գլխավորում էր Խ.Աբովյանի անվան հայկական պետական մանկավարժական համալսարանի մանկավարժության տեսության և պատմության ամբիոնի պրոֆեսոր, մ. գ. դ., Մ.Մանուկյանը:

Քննությանը մասնակցում էին 40 ուսանող, որոնցից «լավ» ստացան 24-ը, «բավարար»` 16-ը:

Հունիսի 14-ին կայացավ «Մանկավարժություն և հոգեբանություն» մասնագիտության ավարտական աշխատանքների պաշտպանությունը:

2 ուսանող ստացավ «գերազանց», 28-ը` «լավ», 10-ը` «բավարար»:

2014թ. հունիսի 9-ին ԵՊՀ ԻՄ-ի հեռակա ուսուցման բաժնում տեղի ունեցավ «Բնապահպանություն և բնօգտագործում» մասնագիտության ամփոփիչ քննությունը:

Հանձնաժողովը գլխավորում էր «Դիլիջան ազգային պարկ» ՊՈԱԿ-ի տնօրեն Ա.Դավթյանը:

Քննությանը մասնակցում էին 29 ուսանող, որոնցից «գերազանց» ստացավ 1-ը, «լավ»` 10-ը, «բավարար»` 18-ը:

Հունիսի 10-ին կայացավ «Բնապահպանություն և բնօգտագործում» մասնագիտության ավարտական աշխատանքների պաշտպանությունը:

1 ուսանող ստացավ «գերազանց», 10-ը` «լավ», 18-ը` «բավարար»: