Համալսարանականների այցն իրականացվեց ԵՊՀ Իջևանի մասնաճյուղի և Դիլիջանի կենտրոնական դպրոցի միջև 2023 թ. հունվարի 20-ին կնքված համագործակցության հուշագրի  գործողությունների կատարման շրջանակներում:

Դիլիջանի կենտրոնական դպրոցում ուսանողները նախ կատարեցին շրջայց, որի ժամանակ ծանոթացան դպրոցի ենթակառուցվածքներին ու ռեսուրսներին:

Այնուհետև տեղի ունեցավ դպրոցի տնօրեն Արամ Մեհրաբյանի հետ կլոր սեղան-քննարկում՝ կողմերին հետաքրքրող թեմաների արծարծմամբ: Նախ պարոն Մեհրաբյանը ներկայացրեց «Այբ» կրթական հիմնադրամի հովանու ներքո գործող Դիլիջանի կենտրոնական դպրոցի և դասավանդման ոլորտում դպրոցում կիրառվող ապագային միտված նորարարական մոտեցումների առանձնահատկությունները: Ծավալվեց ուսուցչի կոչման, կրթության բովանդակության և որակի, մասնագիտության արդի հիմնախնդիրների շուրջ հետաքրքիր քննարկում:

Երկկողմ սերտ համագործակցությունը շարունակելու պայմանավորվածություն ձեռք բերվեց. ԵՊՀ ԻՄ ուսանողներին առաջարկվեց իրենց մանկավարժական պրակտիկաներն անցնել Դիլիջանի կենտրոնական դպրոցում, փոխադարձ այցելելությունները դպրոց դարձնել պարբերական, իրականացնել դասալսումներ, կատարել փորձի փոխանակում ավագ սերնդի հետ: Դպրոցի տնօրենությունն էլ հրավեր ստացավ այցելել մասնաճյուղ, հանդիպումներ ունենալ դասավանդող մանկավարժների, հոգեբանների և մյուս ուսանողների հետ, մասնակցել նրանց ավարտական աշխատանքների և թեզերի պաշտպանություններին՝ լավագույն շրջանավարտներին աշխատանքի հրավիրելու նպատակով: