2015թ. փետրվարի 18-ին մասնաճյուղի տնօրեն Սամվել Առաքելյանը հանդիպում ունեցավ Ուսանողական խորհրդի անդամների հետ: Հանդիպմանը ներկա էին նաև Ուսումնամեթոդական վարչության պետ Արկադի Դավթյանը, տնօրենի օգնական Նաթելլա Գրիգորյանը:

Տնօրենը ուսանողներին կոչ արեց պարբերաբար հետևել ՀՀ կրթության և գիտության նախարարության, Երևանի պետական համալսարանի և ԵՊՀ Իջևանի մասնաճյուղի կայքէջերում պարբերաբար տեղադրվող նորություններին և հայտարարություններին, մասնակցել ինչպես բուհական, այնպես էլ հանրապետական տարաբնույթ մրցույթներին, մասնաճյուղում հաճախակի կազմակերպել միջոցառումներ, գիտաժողովներ, բանավեճեր, ինտելեկտուալ խաղեր:

Պարոն Առաքելյանը շեշտեց, որ ուսանողական ինքնակառավարման կառույցները յուրօրինակ փորձաքար են մեծ կյանքում լիարժեքորեն դրսևորվելու համար:

Հանդիպման ընթացքում նաև ուսանողներն առաջադրեցին իրենց հուզող հարցերը, ներկայացրին ուսանողական կյանքին, դասերին առնչվող խնդիրներն ու առաջարկները:

2015թ. փետրվարի 14-ին` Սիրահարների օրվա կապակցությամբ, ԵՊՀ Իջևանի մասնաճյուղի գրադարանում ուսանողական խորհուրդը նախաձեռնել էր տոնական միջոցառում, կազմակերպել էր բաց նամակագրություն, որին մասնակցեցին բոլոր ֆակուլտետների ուսանողները:

Այնուհետև մասնաճյուղի բակում ուսխորհրդի անդամները ուսանողներին նվիրեցին սրտաձև փուչիկներ:

Աշխարհի մոտ 100 երկրում փետրվարի 14-ը նշվում է որպես Սիրահարների օր:

Ի սկզբանե այն նշվել է որպես պատարագային տոն` նվիրված վաղ քրիստոնեական շրջանի սրբերից մեկի` Սբ. Վալենտինիուսի հիշատակին։

Վերջինիս, ըստ ավանդության, դատապարտել էին մահվան` զինվորներին գաղտնի պսակադրելու համար: Նա կալանավայրում բուժել է բանտապետի աղջկան, որին էլ հետագայում սիրահարվել է։

Նշվում է նաև, որ մինչև իր դատավճռի ի կատար ածումը նա հրաժեշտի նամակ է թողնում իր սիրած էակին, որի վերջում գրված է լինում «Քո Վալենտին»։

Այս պատմությունը թվագրվում է մոտ 269 թվականին՝ հռոմեական կայսր Կլավդիոս II-ի օրոք: Իսկ 496-ին Հռոմի պապ Հելասիուս I-ը փետրվարի 14-ը հայտարարեց Սուրբ Վալենտինի օր:

Այսօր աշխարհի շատ երկրներում այն պաշտոնապես նշվում է որպես սիրահարների տոն։
Այդ օրը բոլորը շնորհավորում են միմյանց, սեր խոստովանում, նվիրում խորհրդանշական նվերներ:

Որոշ երկրներում տղամարդը հագուստ է նվիրում իր սիրեցյալին, եթե նվերն ընդունվում է, նրանք ամուսնանում են:

Իտալիայում, որտեղից, ըստ լեգենդի, առաջացել է Սուրբ Վալենտինի տոնը, փետրվարի 14-ը անվանում են «քաղցր» օր: Այս օրերին այնտեղ մարդիկ միմյանց նվիրում են կոնֆետներ, թխվածքաբլիթներ և սրտաձև շոկոլադներ:

Քաղցրավենիք նվիրելու սովորությունը կա նաև Ամերիկայում: Դեռ ոչ վաղ անցյալում այստեղ սիրահարված աղջիկները և տղաները իրար նվիրում էին մարցիպաններ, դա համարվում էր շատ թանկարժեք նվեր, որովհետև մարցիպանը պարունակում էր շաքար, որն այն ժամանակ շատ թանկ արժեր:

Ֆրանսիայում Սուրբ Վալենտինի տոնի առիթով միմյանց առաջներում նվիրել են գեղեցիկ քառատողերով բացիկներ: Բացի այս բացիկներից՝ Ֆրանիսայում նվիրում են նաև կոնֆետներ, ռոմանտիկ ճանապարհորդության տոմսեր, արհեստական ծաղիկներ և այլն:

Ճապոնիայում Սուրբ Վալենտինի օրը նման է մարտի 8-ին, սակայն այս օրը սեր խոստովանում, նվերներ են տալիս միայն աղջիկները:

Միջնադարյան Անգլիայում տարածված էր մի սովորույթ, որի համաձայն՝ երիտասարդները հավաքվում էին, գրում աղջիկների անուններ, գցում գլխարկի մեջ և հերթով հանում դրանցից մեկը:Կազմավորված զույգերը դառնում էին ընկերներ` մինչև մյուս Սիրահարների տոնը:

Ուելսում (Միացյալ Թագավորության չորս կարևոր վարչադիվանագիտական մասերից մեկում) սիրահարները այս օրը շատ յուրովի նվեր են միմյանց համար պատրաստում: Նրանք, ծառը փորելով, հանում են գդալանման մի հատված` «սիրո գդալներ», այնուհետև դրանք զարդարում են տարբեր սրտերով և բանալիներով, որից հետո նվիրում իրար: Այս ամենը նշանակում է` «Դու գտել ես դեպի իմ սիրտը տանող ճանապարհը»:

Գերմանիայում Սուրբ Վալենտինը ոչ թե սիրահարների պաշտպանն է համարվում, այլ հոգեկան հիվանդների: Այս օրվա կապակցությամբ այստեղ հոգեբուժարանները զարդարում են, իսկ եկեղեցում հատուկ պատարագ են մատուցում:

Իսպանիայում այս տոնը նշվում է ոչ թե փետրվարի 14-ին, այլ մայիսի 1-ին, Բրազիլիայում ` հունիսի 12-ին:

Հայաստանում Սուրբ Վալենտինի տոնը համընկնում է Տյառնընդառաջի տոնին:

Ըստ եկեղեցական ավանդության` Տրնդեզի տոնը կապվում է Տիրոջ ծննդից 40 օր հետո նրան կրակներով ընդառաջ գնալու գաղափարի հետ։

Այդ օրը` վաղ առավոտյան, մեծահասակ կանայք, եկեղեցուց վերադառնալով, Տրնդեզի ուտեստներ էին պատրաստում ու բաժանում տնեցիներին։

Կեսօրից հետո նորահարս ունեցող ընտանիքներն իրենց բակում խարույկ էին վառում։

Խարույկի շուրջն սկսվում էր շուրջպարը։ Երբ կրակը փոքր-ինչ մեղմանում էր, սկսվում էին կրակթռուկները։

Կրակի վրայից առաջինը թռչելու իրավունքը վերապահվում էր նորահարսին։ Պտղավորվելու ակնկալությամբ խարույկի վրայից թռչում էին նաև ամուլ կանայք՝ այրելով իրենց զգեստի քղանցքը, ապա թռչում էին երիտասարդները, տղամարդիկ, իսկ վերջում՝ երեխաները։

Այս ավանդույթը մինչև օրս էլ մեզանում պահպանված է։

2015թ. փետրվարի 6-ին ԵՊՀ Իջևանի մասնաճյուղի գրադարանում տեղի ունեցավ հանդիպում Քրիստոնեական դաստիարակության կենտրոնի նախադպրոցական ոլորտի պատասխանատու, Բարեշնորհ Դավիթ սարկավագ Հովհաննեսի հետ:

Հանդիպմանը ներկա էին ԵՊՀ ԻՄ-ի գրադարանի վարիչ Ն.Ստեփանյանը, գրադարանի աշխատակիցները, հասարակայնության հետ կապերի և մամուլի պատասխանատու Հ.Վանյանը, ուսանողական կառույցների անդամներ, տարբեր ֆակուլտետների ուսանողներ:

Հանդիպման նպատակը մասնաճյուղի գրադարանին Մայր Աթոռ Սուրբ Էջմիածնում լույս տեսած հետևյալ գրքերի նվիրաբերումն էր.

1. Մաղաքիա արքեպիսկոպոս Օրմանյան, Համապատում, 4 Ավետարանների պարունակությունը շարադրելով, բաղդատելով և բացատրելով պատմված, Մայր Աթոռ Ս. Էջմիածին, 1997:

2. Ռուբեն Սևակ, Երկեր, Մայր Աթոռ Ս. Էջմիածին, 1997:

3. Վահրամ Մավեան, Ամբողջական երկեր, Մայր Աթոռ Ս. Էջմիածին, 1996:

4. Ստիլիանոս Պապադոպուլոս, Մի մեծի կյանքը, (Սուրբ Բարսեղ Կեսարացին), Մայր Աթոռ Ս. Էջմիածին, 2009:

5. Տեր-Մինասեանց Երուանդ վարդապետ, Ընդհանուր եկեղեցական պատմութիւն, Ս. Էջմիածին, 2013:

6. Ստիլիանոս Պապադոպուլոս, Վիրավոր արծիվը: Սուրբ Գրիգոր Աստվածաբան, Ս. Էջմիածին, 2012:

7. Գիրք երկրորդումն օրինաց, Քննական բնագիր, աշխատասիրութեամբ Անդրանիկ Սահակի Զէյթունեանի, Մայր Աթոռ Ս. Էջմիածին, 2002:

8. Առակներին ուսուցանում են, կազմող` Հովհաննես սարկավագ Գալստյան, Մայր Աթոռ Ս. Էջմիածին, 2014:

9. Քրիստոնեական ժամանակակից ընտանիքն իբրև հասարակության հենք, Մայր Աթոռ Ս. Էջմիածին, 2011:

10. Տուք զկայսերն` կայսեր եւ Զաստուծոյն Աստուծոյ, Մայր Աթոռ Ս. Էջմիածին, 1998:

11. Խրիմյան Հայրիկ, Դրախտի ընտանիք, Մայր Աթոռ Ս. Էջմիածին, 2011:

12. Տրոիցկի Իլարիոն արքեպիսկոպոս, Քրիստոնեություն չկա առանց Եկեղեցու, Մայր Աթոռ Ս. Էջմիածին, 2011:

13. Խորեն աբեղա Առաքելյան, Սուրբ երրորդության մասին` «Եհովայի վկաների» ուսմունքի քննադատությունը, Մայր Աթոռ Ս. Էջմիածին, 2010:

Բարեշնորհ Դավիթ սարկավագը ուսանողների հետ բանախոսության ընթացքում ներկայացրեց նվիրաբերվող գրքերի ընդհանուր բովանդակությունը, խոսեց հոգևոր արժեքների մասին, ուսանողներին կոչ արեց հաճախակի ընթերցել հոգևոր գրականություն:

Ելույթ ունեցավ գրադարանի վարիչ Ն.Ստեփանյանը` Գրադարանի խորհրդի և ուսանողության անունից մեծ գոհունակություն հայտնելով այդ արժեքավոր գրականությունն ընծա բերելու համար, որը կօգնի բուհում ավելի բարձր մակարդակի հասցնել հոգևոր դաստիարակությունը:

Այնուհետև տեղի ունեցավ հանդիպում մասնաճյուղի տնօրեն Սամվել Առաքելյանի հետ, որի ընթացքում տնօրենը նվիրաբերված գրքերի համար շնորհակալություն հայտնեց Քրիստոնեական դաստիարակության կենտրոնին, նշեց, որ ԵՊՀ Իջևանի մասնաճյուղում քրիստոնեական դաստիարակությունը բարձր հիմքերի վրա է, մասնաճյուղը սերտ համագործակցում է Հայ Առաքելական Եկեղեցու Տավուշի թեմի հետ, նախատեսվում է մասնաճյուղում բացել հոգևոր լսարան:

«Այս հանդիպումը բարի առիթ է համագործակցության, որ մասնաճյուղի գրադարանը հետայսու համալրվի Սուրբ Էջմիածնում լույս տեսնող հրատարակություններով»,- համոզմունք արտահայտեց Դավիթ սարկավագը:

2015թ. հունվարի 30-ին ԵՊՀ Իջևանի մասնաճյուղում տեղի ունեցավ Տնտեսագիտության ֆակուլտետի խորհրդի ընդլայնված նիստ, որը նախագահում էր ֆակուլտետի դեկան, տեխ. գիտ. թեկնածու, դոցենտ Ն.Խուդավերդյանը:

Ֆակուլտետի խորհրդի նիստին մասնակցում էին ԵՊՀ ԻՄ-ի տնօրեն Ս.Առաքելյանը, խորհրդի անդամները, ֆակուլտետի վարչական և պրոֆեսորադասախոսական անձնակազմի ներկայացուցիչները, հրավիրված էին Ուսումնամեթոդական վարչության պետ Ա.Դավթյանը, տնօրենի օգնական Ն.Գրիգորյանը:

Նիստի ընթացքում քննարկվեցին օրակարգով նախատեսված հետևյալ հարցերը.

1. Տնտեսագիտության ֆակուլտետի` 2014թ. գործունեության մասին հաշվետվություն
(զեկուցող` Ն.Խուդավերդյան)

2. 2014 -2015 ուստարվա առաջին կիսամյակի ստուգարքների և քննությունների արդյունքների ամփոփման և ներկայացման մասին
(զեկ.` Ն.Խուդավերդյան)

3. Տնտեսագիտության ֆակուլտետի` 2014-2015 ուստարվա երկրորդ կիսամյակի կազմակերպման համար նախապատրաստական աշխատանքների վիճակի մասին
(զեկ.` Ն.Խուդավերդյան)

4. Ընթացիկ հարցեր:

Նախ` դեկանը ներկայացրեց Տնտեսագիտության ֆակուլտետի` 2014թ. գործունեության մասին հաշվետվություն` հիմք ընդունելով մասնաճյուղի զարգացման` 2011-2015թթ. Ռազմավարական ծրագիրը և Տնտեսագիտության ֆակուլտետի մարտավարական ծրագիրը:

Մասնավորապես նշվեց, որ ֆակուլտետում բակալավրիական կրթություն է իրականացվում երկու` «Տնտեսագիտության տեսություն» և «Սերվիս» մասնագիտություններով: Գործում է երկու ամբիոն` Ընդհանուր տնտեսագիտության ու Տուրիզմի կառավարման և մշակութաբանության:

Ներկայումս ֆակուլտետում սովորում է 142 ուսանող, որոնցից 29-ը` անվճար (լրիվ փոխհատուցվող համակարգում), 113-ը` վճարովի համակարգում:

Բուհական համակարգում տեղի ունեցող բոլոր փոփոխություններն ու նորարությունները կանոնավոր կերպով իրականացվում են նաև Տնտեսագիտության ֆակուլտետում:

Քննաշրջանի ընթացքում ուսանողների` յուրաքանչյուր օրվա գրանցված արդյունքները փակցվում են ֆակուլտետի հայտարարությունների տախտակին, իսկ մասնագիտությունների ամփոփ թերթիկը տեղակայվում է մասնաճյուղի կայքէջում:

Վերահսկման այս համակարգի ներդրումը, ձևավորելով ուսանողների մեջ առողջ մրցակցության հոգեբանություն, ակնառու դրական է անդրադարձել ուսման առաջադիմության և կրթության որակի վրա:

Ֆակուլտետում թափանցիկ են իրականացվում նաև յուրաքանչյուր կիսամյակ կրթաթոշակների նշանակման և յուրաքանչյուր ուսումնական տարվա ավարտին իրականացվող փոխատեղման գործընթացները: 2014-15 ուստարվա առաջին կիսամյակին ֆակուլտետի 23 ուսանողներ ստացել են կրթաթոշակ, որոնցից երկուսը` անվանական:

Հատկանշական է, որ նշված գործընթացներում լիարժեք մասնակցություն են ունենում նաև ուսանողները` որպես գլխավոր շահառու:

Ֆակուլտետում ներդրված է ուսանողների հաճախումների համակարգչային ամփոփման ծրագիր, որը հնարավորություն է ընձեռում ամեն ամիս կանոնավոր ամփոփել ուսանողների հաճախումները և անհրաժեշտության դեպքում, գործող կարգապահական կանոնակարգի համաձայն, ձեռնարկել համապատասխան քայլեր (դիտողություն, բացատրական աշխատանքներ, գրավոր նկատողություններ և այլն):

Ֆակուլտետում խիստ ուշադրության կենտրոնում են պահվում Մասնագիտական կրթության որակի ապահովման բաժնի պահանջները, դրանք ժամանակին ներդրվում են ուսումնական գործընթացում և նույնպես միտված են կրթության որակի բարձրացմանը:

Նշված խնդրի լուծմամբ հիմնականում զբաղվում են մասնագիտացված ամբիոնները, որոնք մշակում և իրականացնում են նաև պրոֆեսորադասախոսական անձնակազմի հետ կապված անհրաժեշտ (կոմպետենտ) քաղաքականություն, դասախոսների մասնագիտական մակարդակի բարձրացմանն ուղղված աշխատանքներ:

Նշվածի վկայությունը ֆակուլտետում կանոնավոր կերպով կազմակերպվող դասալսումներն ու բաց դասերն են: 2014թ. ամբիոնների կողմից վերանայվել են առարկայական ծրագրերը, դասընթացների բովանդակությունը, ուսումնառության արդյունքների գնահատման չափանիշները:

Ստեղծվել են դասընթացների փաթեթներ` պորտֆոլիոներ, որոնք էլ պլանավորված և կանխատեեսելի են դարձրել ողջ դասընթացը` նպաստելով որակի բարձրացմանը: Նշվեց նաև, որ ֆակուլտետում 2014թ. գրանցվել է գիտական կյանքի աշխուժացում: Ընդհանուր տնտեսագիտության ամբիոնի դասախոսների կողմից ներկայացվել է 1 ուսումնական ձեռնարկ, 1 ուսումնամեթոդական ձեռնարկ, 1 զեկուցումների թեզիս, տպագրվել 7 գիտական հոդված: Տուրիզմի կառավարման և մշակութաբանության ամբիոնի դասախոսների կողմից տպագրվել է 9 գիտական հոդված:

2014թ. նոյեմբերին Ազգագրության և հնագիտության ինստիտուտում անց է կացվել ամբիոնի դասախոս Լ.Բեգինյանի `«Հուղարկավորության ծեսերն ու սովորույթները Տավուշում» թեմայով թեկնածուական ատենախոսության նախապաշտպանությունը:
Ֆակուլտետը պարբերաբար համալրվում է տեխնիկական միջոցներով, հագեցած լսարաններով, աշխատասենյակներով:

Օրեցօր ավելանում է ժամանակակից տեխնիկական միջոցների կիրառմամբ դասեր վարող դասախոսների թիվը: Ֆակուլտետի ամբիոնները համագործակցում են մասնաճյուղի ՈՒԽ -ի և ՈՒԳԸ-ի հետ` կոորդինացնելով ԵՊՀ Իջևանի մասնաճյուղի բոլոր ֆակուլտետների այն քննարկումները, որոնք նվիրված են տնտեսագիտական թեմաներով վերլուծություններին:

Դեկանատը ամբիոնների հետ մեկտեղ մեծ նշանակություն է տալիս ուսանողության շրջանում պարբերաբար իրականացվող հարցումների կարևորությանը: Քանի որ այս մեխանզմը թերությունները և թերացումները վերհանելու, վերացնելու դրականն ու առաջադիմականը խթանելու լուրջ գործիք է:

Ֆակուլտետում գործող ՈՒԽ-ն և ՈՒԳԸ-ն պարբերաբար կազմակերպում են գիտական միջոցառումներ, ինտելեկտուալ խաղեր: Եվ բնական է, որ այս ամենը միտված է ուսանողակենտրոն միջավայրի ձևավորմանը և պայմանավորված է կրթության որակի բարձրացման նպատակներով:

Ամփոփելով 2014-2015 ուստարվա առաջին կիսամյակի ստուգարքների և քննությունների արդյունքները` մասնավորապես նշվեց, որ 2014-2015 ուստարվա առաջին կիսամյակի քննաշրջանի ստուգարքների և քննությունների արդյունքները ըստ ֆակուլտետում գործող մասնագիտությունների դեկանատի կողմից ամփոփվել և վերլուծվել են ամենայն մանրամասնությամբ: Ֆակուլտետում քննաշրջանը կազմակերպվել է թվով 142 (անվճար` 29, վճարովի`113) ուսանողների համար:

Քննաշրջանի ընթացքում ֆակուլտետի 6 ուսանող (4 ուսանող` «Տնտեսագիտության տեսություն» մասնագիտության, 2 ուսանող` «Սերվիս» մասնագիտության) զորակոչվել են Հայոց բանակ և թվով 10 ուսանող (8-ը` «Տնտեսագիտության տեսություն», 2-ը`«Սերվիս» մասնագիտության) վերադարձել են տարկետումից:

Տվյալ կիսամյակում նախատեսված ստուգարքներն ու քննությունները դրական է հանձնել 95 (54-ը` ՏՏ, 41-ը` Ս) ուսանող: Պարտք ունի 47 (39-ը` ՏՏ, 8-ը` Ս) ուսանող: Ֆակուլտետի ընդհանուր առաջադիմությունը կազմել է 67%: նախորդ (2013-2014) ուստարվա առաջին կիսամյակի ցուցանիշների (59,62%) հետ համեմատած` ֆակուլտետում ընդհանուր առաջադիմությունը գրանցել է 7% աճ:

Դրական արձանագրվեց այն փաստը, որ ֆակուլտետում անվճար համակարգում ուսումնառող ուսանողները գրանցել են 100% առաջադիմություն:

Քննաշրջանի արդյունքում 8 ուսանող (2-ը` ՏՏ, 6-ը` Ս) գրանցել է գերազանց առաջադիմություն:

2014-2015 ուստարվա առաջին կիսամյակի ստուգարքների և քննությունների արդյունքների վերաբերյալ արտահայտվելով` մասնաճյուղի տնօրենը նշեց, որ Տնտեսագիտության ֆակուլտետի առաջին կիսամյակի ստուգարքների և քննությունների արդյունքների ցուցանիշները, համեմատած ԵՊՀ ԻՄ-ի մյուս ֆակուլտետների համանման արդյունքների հետ, համեմատաբար ցածր են, որը գնահատվեց որպես օբյեկտիվության դրսևորում:

Տնտեսագիտության ֆակուլտետի` 2014-2015 ուստարվա երկրորդ կիսամյակի նախապատրաստական աշխատանքների հետ կապված` նշվեց, որ լսարանային ֆոնդն ամբողջությամբ համապատասխանում է ուսումնական գործընթացի կազմակերպման պրոցեսին:

Ամբիոններում ընթանում է ծրագրերի նորացման, ընթացիկ և եզրափակիչ քննական հարցաշարերի համալրման և ներկայացման գործընթացը:

Ֆակուլտետում գործող երկու մասնագիտական ամբիոններում իրականացվում են երկրորդ կիսամյակի դասընթացների փաթեթների (պորտֆոլիոների) ստեղծման աշխատանքները: Կազմված է երկրորդ կիսամյակի դասացուցակը, որն ամբողջովին համապատասխանում է աշխատանքային ուսումնական պլաններին, ամբիոնային և անհատական ծանրաբեռնվածություններին:

Կատարված են բոլոր անհրաժեշտ նախապատրաստական աշխատանքները, և որևէ խոչընդոտ չկա երկրորդ կիսամյակի գործընթացը սկսելու համար:

Ընդմիջարկելով` Ս.Առաքելյանը նշեց, որ եզրափակիչ քննության հարցաշարը պետք է կազմված լինի այնպես, որ ընթացիկ քննության հարցաշարի հարցերը չներառվեն եզրափակիչ քննության հարցաշարի մեջ, իսկ եզրափակիչ քննությունների հարցերը` ամփոփիչ մասնագիտական հարցաշարի մեջ:

Ընթացիկ հարցերից հատկանշական է Ընդհանուր տնտեսագիտության ամբիոնի գործավար Ա.Զախարյանին պարգևատրելու մասին հարցը, որի վերաբերյալ կայացվեց դրական որոշում: