2020թ. հոկտեմբերի 1-ին տեղի ունեցավ «Հայ-ֆրանսիական բարեկամություն և փոխանակում» միության ներկայացուցիչ Ջոս Միլիների հերթական այցը ԵՊՀ Իջևանի մասնաճյուղ։
Ջ.Միլիների հետ հանդիպմանը ներկա էին Ֆրանսերեն լեզվի և գրականության սեկցիայի պատասխանատու Ա.Մարդանյանը, դասախոսներ, ուսուցիչներ, ուսանողներ։
Մասնաճյուղի և միության համագործակցությունը, սկսվելով 2008 թվականին, հաջողությամբ շարունակվում է։
Միության նախագահ Պոլետ Կուտանի հայրենասիրության ու ջանքերի շնորհիվ հիմք է դրվել միության և ԵՊՀ ԻՄ-ի ֆրանսերեն լեզվի և գրականության դասախոսների և ուսանողների համագործակցությունը։
Ըստ համաձայնագրի՝ վճարովի համակարգում սովորող «Ֆրանսերեն լեզու և գրականություն» մասնագիտության ուսանողներին տրվում է կրթաթոշակ՝ նպատակ ունենալով զարգացնել ֆրանկոֆոնիան և օգնել սահմանամերձ մարզի ուսանողներին։
Ա.Մարդանյանը, ողջունելով Ջ.Միլիներին, իր երախտագիտությունը հայտնեց Ֆրանսիայի կառավարությանը՝ Հայաստանի համար ծանր ժամանակաշրջանում մեր ժողովրդի կողքին կանգնելու համար։ Նա անկեղծ շնորհակալություն հայտնեց տիկին Պոլետ Կուտանին և Ջ.Միլիներին՝ անգնահատելի օգնության և աջակցության համար։
Ջ.Միլիները կրթաթոշակներ հանձնեց IV կուրսի ուսանողուհի Վարսիկ Իսախանյանին, III կուրսի ուսանողուհի Մարուսյա Օհանյանին, II կուրսի ուսանողուհիներ Նելի Գասպարյանին և Ալլա Օհանյանին։
Ջ.Միլիները նշեց, որ իրենք պատրաստ են շարունակելու գործընթացը և կնքելու նոր համաձայնագիր։
Կրթաթոշակների հանձնումից հետո Իջևանի թիվ 1 դպրոցի ուսուցչուհի Հ.Ցուցուլյանի հետ քննարկվեցին ուսանողների և Ֆրանկոֆոնիայի կենտրոնի համակարգման աշխատանքները։
Այնուհետև կայացավ ԵՊՀ ԻՄ-ի տնօրենի պաշտոնակատար Ա. Մակարյանի հետ հանդիպում, որի ընթացքում Ջ.Միլիները նաև ներկայացրեց նոր ծրագիրը: Նա նշեց, որ Ֆրանսիայի ֆոնդը պատրաստվում է Իջևանում հիմնել գյուղատնտեսական լիցեյ, որտեղ ֆրանսերենի ուսուցումը կլինի պարտադիր։
Պարոն Մակարյանը շնորհակալություն հայտնեց ֆրանսիացի հյուրին, ով նույնիսկ համաճարակի և ռազմական դրության պայմաններում այցելել է ԵՊՀ Իջևանի մասնաճյուղ։ Նա պատրաստակամություն հայտնեց ստորագրել նոր համաձայնագիրը և աջակցել ֆրանկոֆոնիայի զարգացմանը։
