Ցուցահանդեսներ
2025 թ. մարտի 28-ին Իջևանի «Վերնատուն» պատկերասրահում բացվեց ԵՊՀ Իջևանի մասնաճյուղի կիրառական արվեստի ֆակուլտետի դասախոսների և ուսանողների աշխատանքների ցուցահանդեսը՝ նվիրված կանանց տոնին:
Ցուցահանդեսի հանդիսավոր բացմանը մասնակցում էին ԵՊՀ Իջևանի մասնաճյուղի ղեկավարությունը, աշխատակազմի անդամներ և ուսանողներ, մարզային և քաղաքային իշխանությունների ներկայացուցիչներ, պատվավոր հյուրեր, արվեստագետներ, ուսուցիչներ, աշակերտներ և քաղաքացիներ:
Բացման խոսքով հանդես եկան ԵՊՀ Իջևանի մասնաճյուղի տնօրեն Մ․ Օթարյանը, տնօրենի խորհրդական Ա. Մակարյանը, Իջևանի համայնքապետարանի մշակույթի բաժնի վարիչ Լ. Ղալումյանը, ԵՊՀ ԻՄ կիրառական արվեստի ֆակուլտետի դեկանի պաշտոնակատար Վ․ Աղաբաբյանը, Գծանկարի, գունանկարի և քանդակի ամբիոնի վարիչի պաշտոնակատար, դոցենտ, ՀՆՄ անդամ Հ. Ասատրյանը՝ ջերմորեն շնորհավորելով գեղեցիկ սեռի ներկայացուցիչների տոնը և մեծապես կարևորելով նման միջոցառումների դերը ոչ միայն համալսարանական միջավայրում, այլև Տավուշի տարածաշրջանում:
Ցուցահանդեսն ընդգրկում է տարբեր ժանրերի՝ ավելի քան 70 աշխատանք (գեղանկարչական գործեր, բնապատկերներ, նատյուրմորտներ, գրաֆիկա, բատիկա, քանդակ, գոբելեն գրաֆիկական աշխատանքներ և այլն):
«Կանանց տոնին նվիրված այս ցուցահանդեսը նոր գույներ է բերել քաղաքին: ԵՊՀ Իջևանի մասնաճյուղի բազմափորձ դասախոսների և ուսանողների՝ ցուցահանդեսում ներկայացված բազմաժանր ստեղծագործություններն աչքի են ընկնում գույնի և ծավալների տեխնիկական հետաքրքիր լուծումներով: Աշխատանքները հիմնականում արված են դեկորատիվ և դասական արվեստի սկզբունքներով», - իր խոսքում նշեց ԵՊՀ ԻՄ գծանկարի, գունանկարի և քանդակի ամբիոնի վարիչի պաշտոնակատար, դոցենտ, ՀՆՄ անդամ Համլետ Ասատրյանը:
Այցելուները գեղագիտական հաճույքով ու մեծ հետաքրքրությամբ էին դիտում ցուցադրված նկարները և անմիջապես հեղինակներից ստանում նկարներին առնչվող իրենց հարցերի պատասխանները:
ԵՊՀ ԻՄ կիրառական արվեստի ֆակուլտետի դասախոսների և ուսանողների աշխատանքների ցուցահանդեսը կտևի երկու շաբաթ: Մուտքն ազատ է:
Լուսանկարներ
Տարածել նյութը
