2025 թ. ապրիլի 3-ին ԵՊՀ ԻՄ հեռակա ուսուցման «Ֆինանսներ (ըստ ոլորտի)» կրթական ծրագրի երրորդ կուրսի ուսանողներն իրենց դասախոսի՝ Ընդհանուր տնտեսագիտության ամբիոնի դոցենտ, տ.գ.թ. Ս. Պարսյանի գլխավորությամբ մասնակցեցին «Doing Digital Forum 2025»-ին:
Ֆորումը միավորել էր ոլորտի առաջատար փորձագետներին, բանկային և ՏՏ ոլորտների ղեկավարներին՝ քննարկելու այն ուղիները, որոնցով թվային տեխնոլոգիաները վերափոխում են ֆինանսների ոլորտը:
«Doing Digital Forum 2025» ֆորումի ընթացքում ներկայացվեցին նորարարական լուծումներ, թվային փոխակերպման օրինակներ, ինչպես նաև քննարկվեցին այն մարտահրավերները, որոնց բախվում են կազմակերպությունները և բանկերը թվայնացման ժամանակաշրջանում:
Քննարկված հիմնական թեմաները վերաբերում էին թվային բանկինգին, ֆինանսական ոլորտում արհեստական բանականությանը, հաճախորդների փորձի բարելավմանը, կիբեռանվտանգությանը և բիզնես մոդելների վերափոխմանը:
Ֆորումին մասնակցությունն ուսանողների համար ոչ միայն կրթական, այլև ոգեշնչող փորձառություն էր: Այն հնարավորություն տվեց ուսանողներին հետևել առաջատար ընկերությունների փորձին, ծանոթանալ միջազգային մասնագետների հայացքներին և պարզել, թե ինչ ուղղությամբ է շարժվում աշխարհի թվային ապագան:
Ուսանողներին հատկապես տպավորեցին այն քննարկումները, որոնցում ներկայացված էին, թե ինչպես կարելի է տվյալների միջոցով կանխատեսել հաճախորդների կարիքները, և ինչպես է նոր տեխնոլոգիան ազդում բիզնես որոշումների վրա:
Ֆորումը մասնակիցներին նաև թույլ տվեց շփվել տարբեր ոլորտների ներկայացուցիչների հետ և հասկանալ, թե ինչպես է թվայնացումը փոխում ամբողջ էկոհամակարգը:
Տարածել նյութը
