ԵՊՀ ԻՄ «Green Ground” թիմը 2022 թ. փետրվարին կայացած “Agro-Tech 2022” ստարտափի դրամաշնորհի մրցույթի եզրափակչում հաղթող ճանաչված թիմերից մեկն էր, որի կազմում էին Բնական գիտությունների ֆակուլտետի ուսանողներ Մովսես Մարդանյանը, Գառնիկ Խաչատրյանը, Հասմիկ Ստեփանյանը, Տնտեսագիտության ֆակուլտետի ուսանողուհի Անահիտ Եսայանը և նույն ֆակուլտետի շրջանավարտ, ԵՊՀ ԻՄ ուսանողական խորհրդի նախկին քարտուղար և այն ժամանակ (2022 թ.) մագիստրատուրայի ուսանողուհի Լուիզա Մադաթյանը: Թիմի ղեկավարն էր ԵՊՀ ԻՄ բնական գիտություննների ֆակուլտետի ծրագրավորման և ինֆորմացիոն տեխնոլոգիաների ամբիոնի դոցենտ, տեխ.գ.թ. Ռոբերտ Յոլչյանը: Մինչև եզրափակիչ հասնելը թիմն անցավ 4-ամսյա ինկուբացիոն շրջան, որի ընթացքում մյուս մրցակից խմբերի հետ ծանոթացավ այն ժամանակ դեռևս նոր տարածում գտնող ստարտափի անցկացման նրբություններին ու հանդես գալու պահանջներին: Ինկուբացիոն շրջանը կազմակերպված էր և անցավ անչափ հետաքրքիր, իսկ ձեռք բերված հմտությունները հետագայում շատ մեծ փորձ ու կարողություններ հաղորդեցին եզրափակչում հաջող հանդես գալու համար: Եզրափակչում հաղթելուց հետո թիմին հատկացված պարգևը տրամադրվեց նորագույն տեխնոլոգիական ու հետազոտական սարքավորումներ ձեռք բերելու համար: Մասնավորապես ձեռք բերվեցին քիմիական անալիզատորներ, պրոֆեսիոնալ անօդաչու թռչող սարք և 3D տպիչ, CNC և գերժամանակակից դյուրակիր համակարգիչներ, արևային էլեկտրակայան և այլ արդիական սարքավորումներ: Սարքավորումների տեսակն ու տիպը ընտրել է թիմը՝ ելնելով ֆակուլտետում բնագիտական հետագա հետազոտությունների ու գիտատեխնիկական մշակումների բնույթից և թեմատիկայից:
Բացման հանդիսավոր արարողությունից հետո պարոն Յոլչյանը մասնակիցներին ներկայացրեց ծրագրի շրջանակներում ուսանողների մշակումները, ինչպես նաև պլանավորվող աշխատանքները, որոնց ժամանակ օգտագործվելու են տրամադրված և մասնաճյուղի դրամաշնորհային ծրագրերի շրջանակներում ձեռք բերած սարքավորումները:
Ձևավորված տեխնոլոգիական բազան թույլ կտա առաջիկայում Բնական գիտությունների ֆակուլտետում իրականացնել առավել խորքային հետազոտություններ տարածաշրջանային բնապահպանական խնդիրների ուղղությամբ: Այդ գործում ներգրավված կլինեն ֆակուլտետի ուսանողները, ովքեր օրեցօր ավելի մեծ հետաքրքրություն են ցուցաբերում ծրագրավորման, թվային անվտանգության և ռոբոտատեխնիկայի կիրառական խնդիրների լուծումների նկատմամբ:
- Գլխավոր
- Նորություններ
- ԵՊՀ ԻՄ-ՈՒՄ ԲԱՑՎԵՑ ԵՎՐՈՊԱԿԱՆ ՄԻՈՒԹՅԱՆ ԵՎ ԱՎՍՏՐԻԱԿԱՆ ԶԱՐԳԱՑՄԱՆ ԳՈՐԾԱԿԱԼՈՒԹՅԱՆ ԱՋԱԿՑՈՒԹԱՄԲ ՎԵՐԱԶԻՆՎԱԾ ՄԻՋԳԻՏԱԿԱՐԳԱՅԻՆ ԱԳՐՈՏԵԽՆՈԼՈԳԻԱԿԱՆ ԼԱԲՈՐԱՏՈՐԻԱ