ԵՊՀ ԻՄ գիտական խորհուրդը երաշխավորել էր Հումանիտար գիտությունների ֆակուլտետի «Ռուսաց լեզու և գրականություն» կրթական ծրագրի առկա ուսուցման 4-րդ կուրսի ուսանողուհի Նազելի Եսայանին և Բնական գիտությունների ֆակուլտետի «Ինֆորմատիկա և կիրառական մաթեմատիկա» կրթական ծրագրի 4-րդ կուրսի ուսանող Սահակ Գուլակյանին՝ մասնակցելու 2024 թ. «Լավագույն ուսանող» հանրապետական մրցույթին:

Վերջինիս նպատակն է խրախուսել ՀՀ բուհերի՝ բարձր առաջադիմություն ունեցող և գիտահետազոտական, ստեղծագործական, ուսանողական ինքնակառավարման և սպորտի ասպարեզներում ակտիվ գործունեություն ծավալող ուսանողներին:

ՀՀ բուհերի լավագույն առաջադիմությամբ ուսանողների անվանական կրթաթոշակների տրամադրման մրցույթն անցկացվում է երկու փուլով՝ ներբուհական և միջբուհական (հանրապետական), բակալավրի և մագիստրոսի կրթական ծրագրերով` ըստ հետևյալ ոլորտների՝

1. բնագիտական (այդ թվում՝ մաթեմատիկական-տեղեկատվական և հաղորդակցման տեխնոլոգիաներ (ՏՀՏ),
2. բժշկություն,
3. հումանիտար գիտություններ,
4. հասարակագիտություն,
5. ճարտարագիտություն (այդ թվում` ճարտարապետական, գյուղատնտեսական),
6. մշակույթ-սպորտ,
7. հայագիտություն:

Մրցույթի առաջին (ներբուհական) փուլը կազմակերպում են բուհերը, երկրորդ (հանրապետական) փուլը՝ նախարարությունը: Մրցույթի երկրորդ փուլի մրցութային հանձնաժողովը մինչև դեկտեմբերի 10-ը յուրաքանչյուր ոլորտում որոշում է հաղթողներին (1-ին, 2-րդ և 3-րդ տեղեր)՝ հավաքած առավելագույն միավորների քանակի հիման վրա: Մրցույթի հաղթողները պարգևատրվում են հավաստագրերով և ՀՀ պետական բյուջեով նախատեսված ֆինանսական միջոցների հաշվին Հայաստանի Հանրապետության կրթության և գիտության նախարարի սահմանած մեկանգամյա անվանական կրթաթոշակներով:

Մրցույթի արդյունքների համաձայն՝ ԵՊՀ ԻՄ «Ինֆորմատիկա և կիրառական մաթեմատիկա» բակալավրի կրթական ծրագրի 4-րդ կուրսի ուսանող Սահակ Գեղամի Գուլակյանը ՀՀ բարձրագույն մասնագիտական կրթական ծրագրեր իրականացնող ուսումնական հաստատությունների լավագույն առաջադիմությամբ ուսանողների անվանական կրթաթոշակների տրամադրման 2024 թ. մրցույթի երկրորդ փուլում՝ բնագիտական ոլորտում, գրավել է 1-ին տեղը՝ արժանանալով հավաստագրի և ՀՀ պետական բյուջեից հատկացված դրամական կրթաթոշակի:

ԵՊՀ ԻՄ «Ռուսաց լեզու և գրականություն» բակալավրի կրթական ծրագրի 4-րդ կուրսի ուսանողուհի Նազելի Գարիկի Եսայանը մրցույթի երկրորդ փուլում՝ հումանիտար գիտությունների ոլորտում, գրավել է 3-րդ տեղը՝ պարգևատրվելով հավաստագրով և կրթաթոշակով:

ԵՊՀ ԻՄ տնօրենության, ամբողջ անձնակազմի և ուսանողության անունից սիրով շնորհավորում ենք 2024 թ. «Լավագույն ուսանող» հանրապետական մրցույթում հաղթած մեր ուսանողներին և նրանց մաղթում շարունակական վերելքներ, մասնագիտական ու անձնական նորանոր ձեռքբերումներ և հաջողություններ, ամենայն բարիք:

Հիրավի, յուրաքանչյուր բուհի հարստությունը նրա ուսանողներն են, իրական գնահատականը` նրա շրջանավարտները. մենք հպարտանում և ուրախանում ենք մեր ուսանողների և շրջանավարտների մեծ ու փոքր հաջողություններով….