Պրակտիկան իրականացվեց հետևյալ երթուղով՝ Իջևան-Աբովյանի սբ. Հովհաննես եկեղեցի-Գեղարդավանք-Գառնիի տաճար-Ազատ գետի հովտի քարե սիմֆոնիաներ-Հայաստանի պատմության թանգարան-Ազգային պատկերասրահ-Կասկադ համալիրի սրահներ-Իջևան:

Կոտայքի մարզի և Երևանի գլխավոր զբոսաշրջային ռեսուրսների և ենթակառուցվածքների վերաբերյալ ուսանողները նախապես հավաքել էին տեղեկատվություն, իսկ այցելության ընթացքում տվյալ օբյեկտները նրանք  մասնագիտորեն ուսումնասիրեցին, ներկայացրին և գնահատեցին զբոսաշրջային փաթեթներում  դրանց ընդգրկվածությունը:

Ուսանողներին մեծապես տպավորեց այցելությունը Հայաստանի պատմության թանգարան, որտեղ, հիմնական ցուցանմուշներից բացի, ցուցադրված էին նաև Բրիտանական թանգարանից բերված Անահիտ աստվածուհու արձանից պահպանված բրոնզե գլուխն ու ձեռքը:

Ուղևորության ընթացքում ուսանողները ներկայացրին երթուղու ուղղությամբ գտնվող բնաաշխարհագրական օբյեկտները, զբոսաշրջային ռեսուրսներն ու ենթակառուցվածքները:

Ուսումնական պրակտիկան նպաստում է ուսանողների տեսական գիտելիքները գործնականորեն դրսևորելուն և ամրապնդելուն: Այն հնարավորություն է տալիս ուսանողներին հավաքագրելու, գնահատելու պրակտիկայի օբյեկտներին վերաբերող մասնագիտական տեղեկույթը, կատարելու խմբային, անհատական և կազմակերպչական աշխատանքներ, ընդլայնելու և զարգացնելու մասնագիտական աշխարհայացքը, կարողություններն ու հմտությունները: