Նիստում քննարկվեցին ԵՊՀ ԻՄ տնօրենության տարեկան աշխատանքային պլանի հաստատմանը, նոր՝ 2025-2026 ուսումնական տարվա նախապատրաստական աշխատանքներին, 2025-26 ուստարվա 1-ին կիսամյակի անվանական կրթաթոշակների (Վազգեն Սարգսյան, Մոնթե Մելքոնյան) տրամադրմանը, այս ուստարվա առկա ուսուցման ընդունելության արդյունքներին և խնդիրներին, ԵՊՀ ԻՄ-ում իրականացվող միջին մասնագիտական ուսումնական հաստատությունների (քոլեջների) շրջանավարտների ընդունելության ընթացքին վերաբերող հարցեր:

Նախ պարոն Օթարյանը նիստի մասնակիցներին ներկայացրեց տնօրենության նոր անդամ, ԵՊՀ ԻՄ բնական գիտությունների ֆակուլտետի նորանշանակ դեկանի պաշտոնակատար, տեխն. գիտ. թեկնածու, դոցենտ Ռ. Յոլչյանին՝ նրան մաղթելով բեղուն և արդյունավետ աշխատանքային գործունեություն, ապա անդրադարձ կատարվեց օրակարգային հարցերին: 

Առաջին հարցը վերաբերում էր ԵՊՀ ԻՄ տնօրենության տարեկան աշխատանքային պլանին, որում ընդգրկված էին 2025-2026 ուստարվա ուսումնական գործընթացի կազմակերպման հետ կապված հիմնական աշխատանքները՝ իրենց պատասխանատուներով, ժամկետներով, համագործակցող ստորաբաժանումներով: Տնօրենության տարեկան աշխատանքային պլանը հաստատվեց՝ առաջարկված փոփոխություններով հանդերձ:

2025-26 ուստարվա նախապատրաստական աշխատանքների առնչությամբ ներկայացվեց, որ իրականացվել են անհրաժեշտ աշխատանքներ՝ պրոֆեսորադասախոսական կազմի անհատական բեռնվածության, դասացուցակների, դասամատյանների, ըստ կուրսերի և խմբերի՝ լսարանային ֆոնդի բաշխման և այլնի հետ կապված: Հաստատված դասացուցակները տեղադրվել են ԵՊՀ ԻՄ պաշտոնական կայքէջում և ուղարկվել են դասախոսների էլեկտրոնային հասցեներին: ԵՊՀ ԻՄ-ը պատրաստ է նոր ուսումնական տարվա մեկնարկին:

Այս ուստարվա 1-ին կիսամյակի անվանական կրթաթոշակների տրամադրման կապակցությամբ քննարկվեցին ֆակուլտետների առաջարկած ուսանողների թեկնածությունները, և որոշվեց դրանք ներկայացնել Գիտխորհրդի առաջիկա նիստի հաստատմանը: Պաշտպանության նախարարության կողմից տրամադրվող «Վազգեն Սարգսյան» և «Մոնթե Մելքոնյան» անվանական կրթաթոշակներին հավակնող ուսանողների թեկնածությունները հաստատվեցին տնօրենության նիստում:

Հաջորդ հարցի՝ 2025-26 ուստարվաառկա ուսուցման ընդունելության արդյունքների և խնդիրների մասին նշվեց, որ այս ուստարում մասնաճյուղ է դիմել 272 դիմորդ (նախորդ տարվա համեմատ այս թիվը աճել է 25 %-ով), որոնցից ընդունվել է 193-ը (1-ին փուլի մրցույթի արդյունքների համաձայն՝ 186, թափուր մրցույթի արդյունքների համաձայն՝ 7 դիմորդ):

Նախորդ տարվա համեմատ մոտ 6 %-ով ավելացել է ԵՊՀ Իջևանի մասնաճյուղ ընդունված դիմորդների թիվը (182/193 դիմորդ): Բոլոր անվճար տեղերը համալրվել են: Ընդհանուր առմամբ նկատելի է դրական դինամիկա: 

Ընդունելության ամենաբարձր ցուցանիշներըը գրանցվել են «Ֆինանսներ (ըստ ոլորտի)» (54 դիմորդ), «Զբոսաշրջություն» (37 դիմորդ), «Ինֆորմատիկա» (35 դիմորդ), «Անգլերեն լեզու և գրականություն» (32 դիմորդ), «Պատմություն» (30 դիմորդ), «Դիզայն» (21 դիմորդ)  կրթական ծրագրերում: Համեմատաբար ցածր ցուցանիշներ են գրանցվել «Ռուսաց լեզու և գրականություն» (8 դիմորդ), «Հայոց լեզու և գրականություն» (8 դիմորդ), «Ֆրանսերեն և գրականություն» (7 դիմորդ) կրթական ծրագրերում:

Վերջին հարցը վերաբերում էր ԵՊՀ ԻՄ-ում իրականացվող միջին մասնագիտական ուսումնական հաստատությունների (քոլեջների) շրջանավարտների ընդունելության ընթացքին: Նշվեց, որ ս.թ. օգոստոսի 29-ի դրությամբ մասնաճյուղի հեռակա ուսուցման համակարգ է դիմել միջին մասնագիտական ուսումնական հաստատությունների 27 շրջանավարտ: Փաստաթղթերի ընդունելության գործընթացը կշարունակվի մինչև ս.թ. օգոստոսի 30-ը:

Նիստի վերջում ԵՊՀ ԻՄ տնօրեն Մ. Օթարյանը շնորհավորեց համալսարանականներին նոր ուսումնական տարվա մեկնարկի կապակցությամբ և մաղթեց արդյունավետ ուսումնական գործընթաց: