Երևանի պետական համալսարանի Իջևանի մասնաճյուղ

Խորհրդատվություն

ԳՐԱՆՑՈՒՄ

Լրացնելով գրանցման թերթիկը /sylfaen տառատեսակով/ և ուղարկելով shrjanavartysuib@gmail.com էլեկտրոնային հասցեով՝ դուք կընդգրկվեք Շրջանավարտների և կարիերայի կենտրոնի բազայում և կենտրոնի կողմից պարբերաբար կստանաք տեղեկատվություն թափուր աշխատատեղերի, վերապատրաստման դասընթացների և կրթական այլ ծրագրերի մասին:

ԻՆՉՊԵՍ ԿԱԶՄԵԼ ՌԵԶՅՈՒՄԵ ԵՎ CV

Որն է ռեզյումեի և CV-ի տարբերությունը: Տարբերությունը հիմնականում ծավալի, բովանդակության և նպատակների մեջ է: Ռեզյումեն մեկ-երկու էջի սահմանում Ձեր գիտելիքների, փորձի և հմտությունների ամփոփագիր է, որը պետք է լինի շատ հակիրճ և որոշակի: Ռեզյումե կարդացողը պետք է ծախսի ընդամենը մեկ-երկու րոպե Ձեր որակներին ծանոթանալու համար:

Curriculum Vitae /CV/ թարգմանաբար նշանակում է կյանքի պատմություն: Այն ռեզյումեի ավելի ծավալուն տեսակն է և պետք է ներառի նաև Ձեր հետազոտական փորձը, հրապարակումները, մրցանակները, պատվոգրերը, ասոցիացիաներում կամ այլ խմբերում մասնակցությունը և այլն: ԱՄՆ-ում CV-ն կիրառվում է միջազգային, ակադեմիական, կրթական, գիտահետազոտական աշխատանքներին մասնակցության ժամանակ կամ կրթաթոշակների համար դիմելիս:

CV/ռեզյումեն շատ կարևոր փաստաթուղթ է: Այն պետք է լինի տպավորիչ, հակիրճ և ճիշտ: CV/ռեզյումե գրելը պահանջում է համապատասխան փորձառություն և գիտելիքներ: Դրա միջոցով Դուք պետք է պատշաճ կերպով ներկայացնեք Ձեր տաղանդը, հմտությունները, գիտելիքները և փորձը:

Եկեք այստեղ դիտարկենք ընտրության հոգեբանությունը: Գործատուն մարդ արարած է, ով, ինչպես բոլոր մարդիկ, ղեկավարվում է զգացմունքներով: Այսօր հիմնավոր է համարվում այն փաստը, որ ցանկացած բնագավառում մարդկանց որոշումներն ավելի շատ զգացմունքային են, քան բանական: Թե’ սպառողի վարվելակերպը, թե’ աշխատակիցների վերաբերմունքը և թե մարդկային լավ հարաբերությունները ղեկավարվում են զգացմունքներով: Նույնը վերաբերում է նաև CV/ռեզյումե կազմելուն: Տպավորիչ CV/ռեզյումե կազմելը հավասարազոր է անձնական իմիջի ձևավորմանը: Դա առաջին խնդիրն է, որը պահանջում է լուրջ և խելացի մոտեցում: Տպավորիչ CV/ռեզյումեի առավելություններից մեկն այն է, որ այն  բարձր մրցակցության առկայության դեպքում, ընտրության գործընթացում կարող է  օգնել Ձեզ` առանձնանալու մյուսներից: Lավ կազմված CV/ռեզյումեն մեծացնում է Ձեր հնարավորությունները` ստանալու տվյալ աշխատանքը, նույնիսկ նախքան հարցազրույցը:

Եվ վերջապես, խելացի կերպով կազմված CV/ռեզյումեն կարող է դրական ազդեցություն գործել Ձեր հարցազրույցի ընթացքի վրա: Շատ կարևոր է, որ Ձեր CV/ռեզյումեի մեջ գործածված բառերը ընթերցողի մեջ ցանկություն առաջացնեն հանդիպելու Ձեզ հետ և հրավիրելու Ձեզ այդքան սպասված հարցազրույցին: Այսպիսով, որո՞նք են այդպիսի տպավորիչ CV/ռեզյումե կազմելու հիմնական քայլերը.

1.Խնդրում ենք ժամանակ տրամադրել` տեղեկություններ հավաքելու այն կազմակերպությունների և պաշտոնների մասին, որոնց համար Դուք դիմում եք: Սա կարելի է համարել ամենակարևոր քայլը, սակայն, որքան էլ զարմանալի թվա, այն նաև ամենաանտեսված քայլն է: Ընկերության ինտերնետային կայքերը և հասարակությանը տրամադրված այլ տեղեկություններ իրենց մեջ պարունակում են որոշ կարևոր ակնարկներ: Դրանք կօգնեն Ձեզ հասկանալ, թե ինչ տեղեկություն պետք է ներառել Ձեր CV/ռեզյումեի մեջ:

2.Կազմեք Ձեր CV/ռեզյումեի մի քանի տարբերակներ, որոնցից յուրաքանչյուրը նախատեսված է համապատասխան արդյունաբերության, կազմակերպության, պաշտոնի համար: Սա անմիջական ազդեցություն է թողնում: Դուք չպետք է կազմեք ընդամենը մեկ CV/ռեզյումե, որը համապատասխանի բոլոր աշխատանքներին:

3.Հավաստիացեք, որ Դուք ընդգծում եք “ճիշտ” տեղեկությունը և չեք կենտրոնանում թերությունների վրա. Ձեր CV/ռեզյումեի առաջին էջը պետք է ներառի Ձեր անձնական տվյալները (կրթության, փորձի առավելությունները և անձնական հատկանիշները) և մասնագիտական խոշոր ձեռքբերումները: Հավատացեք, որ հարցազրույց վարողը ավելի լավ կիմանա` ինչ կարող եք անել և  ինչ չեք կարող անել: Այսպիսով, անհրաժեշտ է իմանալ, որ ապրանքանիշի ճանաչվածությունը ոչ միայն լավագույն որակի, գնի գործոն է, այլ նաև` սպառողի հետ զգայական կապ հաստատելու ունակություն: Տվյալ համատեքստում Ձեր անձնային ապրանքանիշը պետք է այդ կապը հաստատի հեռանկարային գործատուի հետ:

4.Ուշադիր ուսումնասիրեք աշխատանքի վերաբերյալ հայտարարությունը: Այն սովորաբար պարունակում է որոշակի կարևոր տեղեկություն պաշտոնի, ակնկալվող հմտությունների, գիտելիքների և փորձառության վերաբերյալ: Շատ հայտարարություններ նաև նկարագրում են որոշակի անձնական որակներ, որոնք, ըստ այդ կազմակերպության, կարող են օգնել անձին` աշխատանքային միջավայրում հասնելու հաջողությունների: Եթե Դուք անտեսեք նրանց կողմից տրամադրված տեղեկությունը, հատկապես այն մասը, որը վերաբերում է անձնային որակներին, և դա չներառեք Ձեր CV/ռեզյումեի մեջ, ապա Դուք կկորցնեք Ձեր այդ հնարավորությունը:

5.Հստակ և խելացի կերպով բացատրեք Ձեր ուժեղ կողմերը: Ձեր ուժեղ կողմերը գիտակցելը, դրանք հստակորեն ներկայացնելը պահանջում է ջանք և հմտություն, և սա շատ հաճախ, ի վնաս Ձեզ, այն վերջին ճանապարհն է, որ Ձեզ չի հաջողվում անցնել: Եկեք չմոռանանք, թե ինչ է ասել Պիտեր Դրաքերը. <>ՙ: Սա ինքնագիտակցության և ինքնավերլուծության մակարդակն է, ինչը շատ կարևոր է: Այս քայլը իրագործելու համար Դուք պետք է գրի առնեք Ձեր մտքերը`  Ձեր ուժեղ կողմերի վերաբերյալ:

6.Ազատ ժամանակ տրամադրեք և գրի առեք Ձեր հաջողություններն ու ուժեղ կողմերը` որպես անկախ և ինքնավերլուծական վարժություն. այնուհետև կարող եք ավելացնել սա` անմիջապես անձնային որակները նկարագրելուց հետո: Սա սովորաբար բարդ գործընթաց է, և մարդկանց մեծ մասը չի կարողանում պատշաճ կերպով իրագործել: Մի թերագնահատեք կամ գերագնահատեք Ձեր կարողությունները, իրատես եղեք: Այս ռազմավարությունը շատ ավելի մեծ տպավորություն է գործում, քան, ավելացնելով Ձեր CV/ռեզյումեի էջերի քանակը, բացատրել Ձեր կատարած ամբողջ աշխատանքը և հետո Ձեր CV/ռեզյումեի ինչ-որ հեռավոր անկյունում փորձել բացատրել Ձեր առավելությունները: Շատ CV/ռեզյումեներ զուրկ են հեռանկարային կապակցվածությունից: Ահա թե ինչն է հիանալի CV/ռեզյումեն արժանացնում ուշադրության:

ԻՆՉՊԵՍ ՊԱՏԱՍԽԱՆԵԼ ՀԱՐՑԱԶՐՈՒՅՑԻ ԺԱՄԱՆԱԿ

Հարցազրույցի ժամանակ շատ կարևոր է լավ տպավորություն գործել և ցույց տալ գործատուին, որ դուք առավելագույնս համապատասխանում եք տվյալ աշխատանքին:

1. Եղեք ճշտապահ: Միշտ հիշեք, որ Դուք երբեք չեք ունենա առաջին տպավորությունը գործելու այլ հնարավորություն: Աշխատեք ժամանակից շուտ գալ: Դուք միշտ կարող եք մոտակայքում սրճարան, խանութ կամ էլ այլ հարմար վայր գտնել սպասելու համար: Բայց, եթե  զգաք, որ ուշանում եք, զանգահարեք և տեղյակ պահեք:

2. Նախապատրաստվեք: Նախքան հարցազրույցին գնալը` այցելեք գործատուի ինտերնետային կայքը և որոշակի տեղեկություն ստացեք ընկերության գործունեության մասին:

3. Տնային աշխատանքը կատարեք նախօրոք: Ընկերության ինտերնետային կայքը կամ այլ տեղեկատվական աղբյուրներ կօգնեն Ձեզ տեղեկություններ ստանալ տվյալ կազմակերպության մասին, ինչը կօգնի Ձեզ վստահ պատասխանել յուրաքանչյուր հարցի և բանիմաց ու քաջատեղյակ մասնագետի տպավորություն գործել գործատուի վրա:

4. Եղեք ազնիվ: Իմաստ չունի ստել Ձեր կրթության, աշխատանքային փորձի կամ էլ հմտությունների մասին: Եթե սուտը բացահայտվի, և եթե նույնիսկ Ձեզ հաջողվի այդ տհաճ իրադրությունից դուրս գալ, միևնույն է, վստահ եղեք, որ Դուք երկար ժամանակ չեք կարող աշխատել այդ ընկերությունում:

5. Եղեք հանգիստ և անվրդով: Եթե զբոսանքը կամ ընթերցանությունը օգնում են Ձեզ լիցքաթափվելու, ապա զբաղվեք դրանցով` մինչ հարցազրույցի  ներկայանալը:

6. Ցույց տվեք դրական վերաբերմունք: Բոլորն էլ նախընտրում են աշխատել լավատես մարդկանց հետ: Անկախ նրանից, թե ինչ հարցեր են Ձեզ տալիս, աշխատեք լինել լավատես և եռանդուն:

7. Երբեք ցույց մի տվեք այլ մարդկանց թերությունները, հատկապես նախկին ղեկավարներինը կամ գործընկերներինը: Հարցազրույց վարողը անմիջապես կկարծի, որ Դուք նույնը կարող եք անել նաև իր ընկերությունում:

8. Հիշեք, որ հարցազրույց վարողը նույնպես մարդ է: Հանդիպման ժամանակ նա նույնպես կարող է հուզված լինել: Այս միտքը կօգնի Ձեզ իրավիճակը պահել հսկողության տակ:

9. Եթե Դուք քիչ աշխատանքային փորձ ունեք, նշեք այլ իրադարձություններ Ձեր կյանքում, որոնք տվել են Ձեզ գործնական փորձ, որը, կարծում եք,  կհամապատասխանի այդ պաշտոնին: Օրինակ` կամավոր հիմունքներով աշխատանքն անցյալում կարող էր Ձեզ սովորեցնել, թե ինչպես շփվել մարդկանց հետ և արդյունավետորեն օգտագործել ժամանակը:

10. Եղեք ազնիվ: Երբեմն ազնվորեն Ձեր հուզվածության մասին բարձրաձայնելը կարող է հեշտությամբ հանել լարվածությունը: Պետք չէ լինել կաշկանդված և խիստ պաշտոնական: Ցույց տվեք, որ Դուք շփվող անձնավորություն եք, սիրում եք տեղին կատակել` միաժամանակ երևան հանելով Ձեր արհեստավարժությունը:

11. Մի մոռացեք, որ հարցազրույցի եք մասնակցում: Եթե անգամ Ձեզ հաճելի է հարցազրույցը վարողի հետ շփվելը, այնուհանդերձ մտերմանալու և անձնական տեղեկություններ տրամադրելու կարիք չկա:

12. Կենտրոնացեք Ձեր նպատակի վրա: Հարցազրույցի ընթացքում օրինակներ բերեք տարբեր աշխատանքային իրավիճակներում որոշումներ կայացնելու վերաբերյալ: Ցույց տվեք, որ Դուք կարող եք մեծ արժեք ներկայացնել ընկերության համար:

13. Եղեք ճկուն: Երբեմն հարցազրույցը չի ընթանում այնպես, ինչպես պլանավորված էր: Եթե հարցազրույց վարողը ստիպում է Ձեզ երկար սպասել կամ տալիս է անսպասելի հարցեր, ապա գործեք ըստ իրավիճակի և ցույց տվեք, թե որքան հեշտությամբ եք Դուք կողմնորոշվում տարբեր իրավիճակներում:

14. Խուսափեք կարճայոկամոչպատասխաններից:  Երբ գործատուն Ձեզ հարց է տալիս, փորձեք տալ սպառիչ պատասխան` միաժամանակ բերելով տարբեր օրինակներ, որպեսզի մանրամասներով լրացնեք Ձեր պատասխանը:

15. Բացասականը վերածեք դրականի: Շատ հարցազրույց վարողներ խնդրում են, որպեսզի մարդիկ նկարագրեն իրենց թույլ կողմերը: Եթե այդպես է, եղեք պատրաստ ներկայացնելու Ձեր այն թույլ կողմը, որը իրականում կարող է շահավետ լինել Ձեր դիմած աշխատանքի համար: Օրինակ, եթե աշխատանքի պահանջներից մեկը  հավանական հաճախորդներին զանգահարելն է, ապա դուք կարող եք ասել, որ Ձեր թույլ կողմերից մեկն է երբեք չհանձնվել, նույնիսկ եթե իրավիճակն անհույս է: Սա կարող է բնավորության լավ գիծ լինել այն աշխատանքում, որը վճռականություն է պահանջում:

16. Հարցեր տվեք: Կազմակերպության գործունեության, ծառայության, նպատակների, ինչպես նաև Ձեր դիմած աշխատատեղի վերաբերյալ հարցեր տվեք աշխատատուին: Դա ցույց կտա Ձեր հետաքրքրվածությունն ու արհեստավարժությունը  տվյալ աշխատանքի նկատմամբ:

17. Հաստատեք անմիջական կապ: Նայելով մարդու աչքերին և հարմար պահի ժպտալով նրան` Դուք կթողնեք վստահ, գրավիչ և անբռնազբոսիկ մարդու տպավորություն:

18. Հնարավորինս խուսափեք որոշ թեմաներից: Փորձեք հարցազրույցը վարողի ուշադրությունը հրավիրել այն փաստի վրա, թե առանց սահմանափակումների Դուք ինչ կարող եք անել ընկերության համար: Եթե Ձեր երեխաներին խնամելու պատրվակով անհրաժեշտություն կլինի տուն գնալ աշխատանքից ամեն օր ուղիղ ժամը 17:00-ին, ապա իմացեք, որ սա այն պահը չէ այդ թեման շոշափելու համար:

19. Եվ վերաջապես, մի վհատվեք: Խնդիրն այն է, որ Ձեզ ամեն աշխատանք չեն առաջարկի, եթե նույնիսկ, ըստ Ձեզ, Դուք կատարյալ թեկնածուն եք դրա համար: Հարցազրույցների ժամանակ բացահայտած տեղեկությունը կարող է անգնահատելի լինել` ապագա արդյունքները բարելավելու համար:

Կարդացեք նաև՝