Ինչպես տեղեկացրել էինք «1991 ստորաբաժանման» նախապատրաստական դասընթացների 2-րդ փուլի մասին հայտարարության մեջ, FAST հիմնադրամը դասընթացների այդ փուլին մասնակցությունը հասանելի է դարձրել բոլոր մարզերի զորակոչի ենթակա տղաների, ինչպես նաև  STEM ոլորտի բակալավրական աստիճան ունեցող աղջիկների համար:

ԵՊՀ ԻՄ-ի և FAST հիմնադրամի միջև ձեռք բերված պայմանավորվածության համաձայն՝ տվյալագիտության և արհեստական բանականության ոլորտների վերաբերյալ 6-ամսյա անվճար դասընթացները կիրականացվեն մասնաճյուղում։ Դասընթացները կանցկացվեն ԵՊՀ ԻՄ-ի համակարգչային սրահում, այն կվարեն մեր դասախոսները՝ նախապես վերապատրաստված «1991 ստորաբաժանման» հետևյալ 4 ծրագրային մոդուլներից մեկով կամ մի քանիսով.

1. Մաթեմատիկան տվյալագիտության համար,
2. Ծրագրավորում տվյալագիտության համար,
3. Մեքենայական ուսուցման դասական մեթոդներ,
4. Խորը ուսուցում:

Ստորև ներկայացնում ենք «1991 ստորաբաժանման» նախապատրաստական դասընթացի հակիրճ նկարագրությունը:

«1991 ստորաբաժանում»

Հայաստանի գիտության և տեխնոլոգիաների հիմնադրամը (FAST), ՀՀ պաշտպանության նախարարությունը և «Հայ Տեք» կիբեռանվտանգության կենտրոն հիմնադրամը 2019 թվականի սեպտեմբերին ստորագրել են փոխըմբռնման հուշագիր՝ համագործակցելու «1991 ստորաբաժանման» շրջանակում։ Այս եզակի ստորաբաժանման հմուտ զինծառայողները ռազմավարական և մարտավարական առաջադրանքների կատարման համար կստեղծեն առաջադեմ տեխնոլոգիաներ, որոնք ՀՀ զինված ուժերի համար մեծ պահանջարկ ունեն:

Ծրագիրը հաջողությամբ իրականացնելու համար FAST-ը կազմակերպում է՝

• Նախազորակոչային կրթական դասընթացներ ՀՀ բոլոր մարզերում,
• Կրթական դասընթացներ «1991 ստորաբաժանում» ընդունված զինծառայողներ համար՝ նրանց հանձնարարված հետազոտության և մշակման (R&D) նախագծերի կարիքներին համապատասխան:

«1991 ստորաբաժանման» նախապատրաստական դասընթաց

FAST հիմնադրամի «1991 ստորաբաժանման» նախապատրաստական դասընթացն ապահովում է մրցակցային կրթության հնարավորություններ զորակոչի ենթակա տղաների, ինչպես նաև այն աղջիկների համար, ովքեր ունեն STEM ոլորտի առնվազն բակալավրի աստիճան և դասընթացն ավարտելուց հետո պատրաստ են ներգրավվելու ՀՀ ՊՆ առաջադրած նախագծերում կամավոր կամ պայմանագրային հիմունքներով։ 6-ամսյա անվճար դասընթացի ընթացքում մասնակիցները ձեռք են բերում գիտելիքներ տվյալագիտության և արհեստական բանականության ոլորտների վերաբերյալ, որի շնորհիվ նրանք առավել պատրաստված կլինեն ծառայության անցնել «1991 ստորաբաժանում»-ում։ Դասընթացները պարբերական են. մեկնարկում են յուրաքանչյուր զորակոչից 6 ամիս առաջ։

Առավելություններ

Ծառայության ընթացքում երիտասարդները ձեռք կբերեն գործնական գիտելիքներ և կկարողանան նպաստել գիտական առաջընթացին ու բարձր տեխնոլոգիական ոլորտի զարգացմանը՝

• աշխատելով ՀՀ պաշտպանության նախարարության համապատասխան ստորաբաժանումներում,
• աշխատելով բարձր տեխնոլոգիական ընկերություններում,
• ներգրավվելով հետազոտական լաբորատորիաներում,
• ձևավորելով սեփական ստարտափը:

Ծանոթացեք «1991 ստորաբաժանման» նախապատրաստական դասընթացի բոլոր մանրամասներին: Նախապատրաստական երկրորդ դասընթացի դիմումներն ընդունվում են մինչև հունիսի 8-ը ներառյալ։

Դասընթացի հակիրճ նկարագրության անգլերեն տարբերակը տե՛ս այստեղ:

ՀՀ ԿԳՄՍՆ գիտության կոմիտեն կազմակերպում է գիտական և գիտատեխնիկական գործունեության պայմանագրային (թեմատիկ) ֆինանսավորման նպատակով գիտական թեմաների հայտերի ընտրության «Ասպիրանտների և երիտասարդ հայցորդների հետազոտությունների աջակցության ծրագիր – 2020» մրցույթը:

Մրցույթին մասնակցելու հայտ ներկայացվում է համացանցային առցանց (on-line) ռեժիմով` Գիտության կոմիտեի մրցույթների հայտերի և հաշվետվությունների ընդունման համակարգով (https://grants.scs.am), մինչև 2020 թ. հուլիսի 17-ը ներառյալ (հայտի ուղարկման հնարավորությունն արգելափակվում է Երևանի ժամանակով ժամը 18:00-ին):

Մրցույթի վերաբերյալ լրացուցիչ տեղեկություններ և խորհրդատվություն կարելի է ստանալ Գիտության կոմիտեի գիտական գործունեության կազմակերպման վարչությունից՝ աշխատանքային օրերին ժամը 14:00-17:00, հետևյալ հեռախոսահամարներով՝ 010-210140 (*113) / 043-496364, 010-210140 (*116) / 077-465831 կամ, տեխնիկական հարցերով,  010-210140 (*108) / 094-542472:

Մրցույթի հրավերի փաթեթը

Ուշադրություն.հայտերն ընդունվում են միայն առցանց եղանակով:

Աղբյուրը՝ http://scs.am/:

ԵՊՀ ԻՄ-ի տարածքում գործող «Ամերիկյան գրադարան և դասընթացների կենտրոն»-ում անվճար հիմունքներով կիրականացվի «Բանավեճը՝ որպես քաղաքացիական հասարակության ձևավորման սկիզբ» թեմայով դասընթաց այն անձանց համար, որոնք հետաքրքրված են բանակցությունների վարմամբ և հռետորաբանությամբ, ցանկանում են զարգացնել իրենց գիտելիքներն ու կարողություններն այս ոլորտում:

Այն կազմակերպվում է ԱՄՆ պետքարտուղարության կողմից ֆինանսավորվող և «Փրոջեքթ Հարմոնի Ինթերնեշնլ» կազմակերպության կողմից (www.ph-int.org) իրականացվող «Տավուշում կրթական-տեղեկատվական դասընթացներ ծրագրի» (AM Tavush Outreach Program) շրջանակում:

Դասընթացին կարող են դիմել 18 և բարձր տարիքի անձինք, որոնք ունեն համակարգչից և ինտերնետից օգտվելու հմտություններ։

Դիմելու համար խնդրում ենք լրացնել հետևյալ առցանց հայտադիմումը։

Գրանցման վերջնաժամկետն է 2020 թ. մայիսի 17-ը՝ ժամը 18:00-ն:

Դասընթացը կանցկացվի առցանց եղանակով՝ Zoom հարթակում:

Այն նպատակ ունի մասնակիցներին տրամադրել տեղեկատվություն ու գործիքակազմ՝ հմուտ բանավիճողի հմտություններ ունենալու համար։

Դասընթացի մասնակիցները՝

• կունենան բանակցությունների վարման հմտություններ,
• ձեռք կբերեն հռետորական վարպետություն,
• կզարգացնեն իրենց քննադատական մտածողությունը,
• հնարավորություն կունենան վերհանել հարցեր և առաջարկել դրանց լուծումները,
• կդառնան նախաձեռնությունների իրականացման մասնակից:

Բանավեճը մասնակիցներին հնարավորություն կտա ձեռք բերված հմտությունները կիրառել առօրյա կյանքում և համայնքում, կնպաստի նրանց՝ որպես ակտիվ անհատ-քաղաքացի ձևավորմանը։

Դասընթացը բաղկացած է 3 մասից.

1. Բուն դասընթաց (1 օր տևողությամբ, 5 խմբերի համար), որը բաղկացած է տեսական և գործնական մասերից (յուրաքանչյուրի տևողությունը՝ 4 ժամ) և կիրականացվի հետևյալ գրաֆիկով.

• Խումբ 1 – մայիսի 24,
• Խումբ 2 – մայիսի 30,
• Խումբ 3 – հունիսի 6,
• Խումբ 4 – հունիսի 7,
• Խումբ 5 – հունիսի 14:

2. Բանավեճի 2 մրցույթներ, որոնք կկազմակերպվեն Իջևանում հուլիսի 18-ին և 25-ին (յուրաքանչյուրի տևողությունը՝ 4 ժամ):

3. Դասընթացավարների դասընթաց (TOT) Իջևանում 10 մասնակիցների համար.

– Խմբի ֆասիլիտացիա՝ «Ֆասիլիտատորի (դասընթացավար) հմտություններ» թեմայով, օգոստոսի 16-ին։

Դասընթացը հաջողությամբ ավարտելու հավաստագիր կստանան միայն ամբողջական մասնակցություն ցուցաբերած մասնակիցները:

Այն կվարի «Գյումրու երիտասարդական նախաձեռնությունների կենտրոն»-ի գործադիր տնօրեն Արթուր Նաջարյանը, ով 15 տարի ներգրավված է տեղական և միջազգային երիտասարդական աշխատանքի մեջ՝ որպես երիտասարդության և ոչ ֆորմալ կրթության ոլորտի փորձագետ։ 2006 թվականից դասավանդում է ոչ ֆորմալ կրթության ոլորտում։

Նա աշխատում է Շիրակի պետական համալսարանում որպես  դասախոս, դասավանդում է «Երիտասարդական աշխատանքի հիմունքներ և երիտասարդության սոցիոլոգիա»։

Ա.Նաջարյանը SALTO Արևելյան Եվրոպա և Կովկաս ռեսուրսային կենտրոնում երիտասարդական և ոչ ֆորմալ կրթությունների գնահատման փորձագետ է։