2016թ. սեպտեմբերի 26-ին` Եվրոպական լեզուների միջազգային օրվա կապակցությամբ, ԵՊՀ Իջևանի մասնաճյուղի օնլայն լսարանում տեղի ունեցավ «Միսս օտար լեզու» լեզվի գեղեցկության մրցույթը, որը կազմակերպվել էր Օտար լեզուների ամբիոնի դասախոս Շուշանիկ Գրիգորյանի և Հումանիտար գիտությունների ֆակուլտետի ուսանողական խորհրդի կողմից:
Հրավիրված էին Հումանիտար գիտությունների ֆակուլտետի դեկանի ԺՊ Ա. Ա. Ներսիսյանը, Օտար լեզուների ամբիոնի դասախոսները, մասնաճյուղի տարբեր ֆակուլտետների ուսանողներ:
«Միսս օտար լեզու» մրցույթին մասնակցում էին Հումանիտար գիտությունների ֆակուլտետի «Անգլերեն լեզու և գրականություն», «Ֆրանսերեն լեզու և գրականություն», «Պատմություն» մասնագիտությունների, Տնտեսագիտության ֆակուլտետի «Սերվիս» մասնագիտության ուսանողներ:
Մրցույթի կարգախոսն էր «Փոխենք աշխարհի քարտեզը մեկ օրով»:
Աշխարհի քարտեզը ներկայացվեց ծառի տեսքով, որի արմատները սնվում էին խաղաղությամբ, սիրով, բարությամբ և գեղեցկությամբ, իսկ տերևների փոխարեն աշխարհիի լեզուներն էին, որոնք պետք է արտացոլեին միայն դրականը: Խրախուսվեց բազմալեզվությունը՝ որպես անձի բազմակողմանի զարգացման բանալի:
Լեզվակիր դասականների ստեղծագործությունների միջոցով մրցույթի 32 մասնակիցները ցույց տվեցին եվրոպական 12 լեզուների (հայերեն, ռուսերեն, ուկրաիներեն, վրացերեն, ֆրանսերեն, իտալերեն, իսպաներեն, անգլերեն, գերմաներեն, հնդկերեն, կորեերեն, չինարեն) գեղեցկությունը:
Ուսանողները համապատասխան շնորհանդեսների ուղեկցությամբ ներկայացրին տարբեր լեզվամշակութային խորհրդանիշներ, որոնք ամփոփված էին այդ երկրների օրհներգերում ու դասական երկերում:
Միջոցառումը բավականին հետաքրքիր էր և ուսանելի. արժանացավ Հումանիտար գիտությունների ֆակուլտետի դեկան Ա.Ներսիսյանի և դասախոսների խրախուսանքին ու գոհունակությանը:
Միջոցառման բոլոր լուսանկարները տե՛ս Պատկերասրահում:
