2016թ. ապրիլի 5-ին ԵՊՀ ԻՄ-ի «Պատմություն» մասնագիտության առաջին կուրսում հայրենասիրության թեմայով դաս անցկացրեց Վարուժան Կարապետյանը՝ Հերոսը:
Ներկա էին մասնաճյուղի տնօրեն Ս.Առաքելյանը, Հումանիտար գիտությունների ֆակուլտետի դեկան Վ.Ալեքսանյանը:
Վարուժան Կարապետյանը հանդես եկավ պատմական համառոտ ակնարկով՝ ներկայացնելով 20-ական թվականներին ծավալված «Նեմեսիս» գործողության, «Հայաստանի ազատագրության հայ գաղտնի բանակ» (անգլ.՝ Armenian Secret Army for the Liberation of Armenia (ASALA) կազմակերպության հիմնադրման և գործունեության մասին:
Իր խոսքում Հերոսը շեշտեց, որ արյան մեծ կանչն էր, արյան ցավը, ստրկության, ամոթի և անպատվության սև մրուրը, որ ստիպեց նրանց պայքարելու հանուն ազգային շահերի:
Հերոսը անկախության սերնդի ներկայացուցիչներին, ապագա պատմաբաններին, որոնց մի մասը, հայրենիքի նկատմամբ սուրբ պարտքը կատարած, նոր էր զորացրվել Հայոց բանակից, պատգամեց անմնացորդ կերպով նվիրվել հայրենիքին, կոչ արեց չկորցնել զգոնությունը:
Մեջբերելով գեղարվեստական մի հատված Պ.Սևակի «Անլռելի զանգակատուն» պոեմից («Արեգակն ինչ արեգակ է, նա ունի ստվեր…»)՝ պարոն Կարապետյանն ընդգծեց, որ պետականությունն էլ չի կարող զերծ լինել թերություններից, բայց պետք է վտանգի պահին, ստեղծված իրավիճակում մի կողմ դնել բոլոր հակասությունները, լինել միահամուռ, համերաշխ, նեցուկ կանգնել իրար: