ՀՀ պաշտպանության նախարարությունը հայաստանյան մի շարք բուհերի բակալավրիատի և մագիստրատուրայի վերջին կուրսերի ուսանողներին առաջարկում է ձեռք բերել 2-րդ՝ ռազմական մասնագիտություն և ՀՀ ԶՈՒ-ում պարտադիր զինծառայության անցնել ոչ որպես շարքային զինվոր, այլ որպես սպա:
Հյուրերին նախ ողջունեց ԵՊՀ ուսումնամեթոդական վարչության պետ Հրանտ Ժամհարյանը, ինչից հետո ՀՀ ՊՆ կադրերի և ռազմական կրթության բաժնի պետ, գնդապետ Սուրեն Դավթյանն ուսանողներին ներկայացրեց ծրագրի մանրամասները:
Հանդիպմանը ներկա էին նաև ՊՆ մարշալ Արմենակ Խանփերյանցի անվան ռազմաավիացիոն և Վազգեն Սարգսյանի անվան ռազմական ինստիտուտների դասախոսները:
Այս տարի նույնպես ՊՆ բարձրագույն ռազմաուսումնական հաստատություններում ընդունելություն է իրականացվելու երեք՝ ՊՆ Վ. Սարգսյանի անվան ռազմական ինստիտուտում հրետանավորի, մարշալ Արմենակ Խանփերյանցի անվան ռազմաավիացիոն ինստիտուտում կապավորի և հակաօդային պաշտպանության մասնագիտություններով:
Մեկամյա ուսումն ավարտելուց հետո զինծառայողը նախկին 3 տարվա փոխարեն այժմ 2 տարի ժամկետով պարտադիր ծառայության պայմանագիր է կնքում, ինչից հետո հնարավորություն է ստանում ազատ որոշում կայացնելու՝ շարունակել կարիերա կառուցել (այդ թվում` վերապատրաստվել) զինված ուժերո՞ւմ, թե՞գործունեություն ծավալել քաղաքացիական մասնագիտությամբ:
Մեկամյա դասընթացներն ավարտելուց հետո շրջանավարտը ստանում է լեյտենանտի կոչում և դասակի հրամանատարի որակավորում, այնուհետև վիճակահանության սկզբունքով պարտադիր զինծառայության է անցնում ՀՀ տարածքում տեղակայված զորամասերից որևէ մեկում:
Հանդիպման վերջում ՊՆ ներկայացուցիչները պատասխանեցին համալսարանականներին հետաքրքրող հարցերին:
Աղբյուրը՝ ysu.am