«WRITE ON! COMPETITION 2016» մրցույթի միջազգային՝ երրորդ փուլում ԵՊՀ ԻՄ-ի «Անգլերեն լեզու և գրականություն» մասնագիտության  II կուրսի ուսանողուհի Անուշ Հակոբյանը գրավել է մրցանակային տեղ:

Տասը տարուց ավելի է, ինչ ԱՄՆ Խաղաղության կորպուսի կամավորների ջանքերով գործում է «WRITE ON! COMPETITION» մրցույթը, որը նախատեսված է տարբեր երկրների 6-12-րդ դասարանների աշակերտների և բուհերի I-IV կուրսերի ուսանողների համար:

ԵՊՀ ԻՄ-ից այս տարի մրցույթին մասնակցեցին «Անգլերեն լեզու և գրականություն» մասնագիտության I-III կուրսերի մի խումբ ուսանողներ:

 «WRITE ON! COMPETITION 2016» մրցույթի հանրապետական փուլում հաղթեցին  «Անգլերեն լեզու և գրականություն» մասնագիտության I կուրսի ուսանողներ Հասմիկ Վարդանյանը (առաջին տեղ), Արինա Պարոնյանը (երկրորդ տեղ), Էմիլիա Փայտյանը (երրորդ տեղ), II կուրսի ուսանողներ Անուշ Հակոբյանը (առաջին տեղ), Ռաֆայել Հարությունյանը (երկրորդ տեղ), Հայկ Դանիելյանը (երրորդ տեղ), III կուրսի ուսանողներ Վարսիկ Սարգսյանը (երկրորդ տեղ) և Վանուհի Վանեսյանը (երրորդ տեղ):

Հանրապետական հանձնաժողովի կողմից միջազգային՝ երրորդ փուլ էին ուղարկվել Հասմիկ Վարդանյանի և Անուշ Հակոբյանի աշխատանքները:

Միջազգային փուլում ընդգրկված 18 երկրների  ներկայացուցիչների՝ հազարից ավելի շարադրությունների մեջ՝ 2-րդ կուրսեցիների անվանակարգում, Անուշ Հակոբյանի աշխատանքը գրավեց երրորդ տեղը:

«Ուսումնառության ընթացքում յուրաքանչյուր ուսանող պետք է անի մի այնպիսի քայլ, որով հետո կարողանա հպարտանալ և որի շնորհիվ կհպարտանան իրենով։ Իմ նման քայլը եղավ ԱՄՆ շարադրության միջազգային մրցույթին մասնակցելը և մրցանակային 3-րդ տեղը զբաղեցնելը,- հարցազրույցի ընթացքում նշեց մեր հաղթանակած ուսանողուհին՝ Անուշը: – Ես ուրախ եմ, որ ընդունվել եմ հենց ԵՊՀ Իջևանի մասնաճյուղ։ Այստեղ ես ունեմ լավ ընկերներ, հրաշալի դասախոսներ և ղեկավարություն, որ միշտ պատրաստ է խրախուսելու ուսանողի կատարած ամեն մի դրական քայլը: Բացառություն չէր և իմ ձեռքբերումը՝ «WRITE ON! COMPETITION 2016» միջազգային մրցույթում 18 երկրների մեջ մրցանակային տեղ զբաղեցնելը, որի համար շնորհակալ եմ բոլորին՝ թե՛ իմ դասախոսներին և թե՛ տնօրենությանը»:

2015-2016 ուստարվա II կիսամյակում ԵՊՀ ԻՄ-ի բնական գիտությունների ֆակուլտետի «Ինֆորմատիկա և կիրառական մաթեմատիկա» մասնագիտության 2-րդ կուրսի ուսանողները՝ Տուրիզմի կառավարման և մշակութաբանության ամբիոնի ասիստենտ Լևոն Լաչիկյանի գլխավորությամբ, «Մշակութաբանություն» առարկայի շրջանակներում այցելեցին Իջևանի Սբ. Ներսես Շնորհալի եկեղեցի:

Այցը համընկավ Մայրության և գեղեցկության օրվան, երբ Հայ առաքելական եկեղեցին նշում էր Սուրբ Մարիամ Աստվածածնի Ավետման տոնը:

Ուսանողները նախ խոնարհվեցին Տիրամոր պատկերի առջև, ապա մեծ հետաքրքրությամբ ծանոթացան նույն եկեղեցում արդեն մեկ շաբաթից ավելի ցուցադրվող Սրբոց նահատակաց սրբապատկերին:

Հիշենք, որ շուրջ մեկ տարի առաջ Մայր աթոռ Սուրբ Էջմիածնում տեղի ունեցավ Հայոց ցեղասպանության ժամանակ հանուն հավատի ու հայրենիքի զոհվածների հավաքական սրբադասման արարողությունը: Օրհնված 2 սրբանկարներից մեկը՝ Սրբոց նահատակաց մեծադիր կտավն, այդուհետ շրջում է թեմից թեմ՝ ի տես և ի երկրպագություն հավատավոր հայ ժողովրդի:

Սրբանկարի հեղինակ, գյումրեցի տաղանդավոր գեղանկարիչ Տիգրան Բարխանաջյանը մեր ուսանողներին սիրով բացատրեց նկարի ստեղծման պատմությունը, իր առջև դրված խնդիրները և սրբանկարի խորհուրդը: Ընդգծվեց, որ այս օրերին հայրենի սահմաններին զոհված հայ հերոսների հոգիները կարծես միախառնվեցին անցյալի մեր նահատակների անմահ հիշատակին՝ խորհրդանշելով սերունդների հոգևոր կապն ու շարունակական հանձնառությունը՝ հանուն հայրենյաց պաշտպանության:

Ուսանողները աղոթք հղեցին առ Աստված՝ Բարձրյալից խնդրելով խաղաղություն և անսասանություն երկրին:

Նրանք միաժամանակ խոստովանեցին, որ այս կերպ «Մշակութաբանություն» առարկան դառնում է ավելի շոշափելի. նման այցելություններն ու հանդիպումները նպաստում են գործնական հմտությունների ձեռքբերմանը: