2018թ. մայիսի 12-30-ին ԵՊՀ Իջևանի մասնաճյուղում կայացավ 2017-2018 ուստարվա ամփոփիչ ատեստավորումը (առկա և հեռակա ուսուցման ավարտական աշխատանքների պաշտպանություններ)՝ 12 մասնագիտության գծով:

Ամփոփիչ ատեստավորման գործընթացն իրականացվել է սահմանված կարգով, ըստ հաստատված ժամանակացույցների, ամփոփիչ ատեստավորման հանձնաժողովների ներկայացուցիչները, ուսանողներն ու դասախոսները ավարտական աշխատանքների պաշտպանություններին մոտեցել են ամենայն պատասխանատվությամբ:

2018թ. մայիսի 12-ին տեղի ունեցավ «Քարտեզագրություն և կադաստրային գործ» մասնագիտության ավարտական աշխատանքների պաշտպանությունը:

Ամփոփիչ ատեստավորման հանձնաժողովը գլխավորում էր ՀՀ Կառավարությանն առընթեր անշարժ գույքի կադաստրի պետական կոմիտեի աշխատակազմի ղեկավար Վարդան Ռուբենի Հասրաթյանը:

Ամփոփիչ ատեստավորմանը մասնակցում էր 5 ուսանող (առկա), որոնցից 2-ը ստացավ «գերազանց», 3-ը` «լավ»:

Մայիսի 14-ին կայացավ «Մանկավարժություն և հոգեբանություն» մասնագիտության ավարտական աշխատանքների պաշտպանությունը:

Ամփոփիչ ատեստավորման հանձնաժողովը գլխավորում էր Երևանի Վ.Բրյուսովի անվան պետական լեզվահասարակագիտական  համալսարանի մանկավարժության և լեզուների դասավանդման մեթոդիկայի ամբիոնի պրոֆեսոր, մանկ. գիտ. դոկտոր Հայկ Հմայակի Պետրոսյանը:

Ամփոփիչ ատեստավորմանը մասնակցում էր 36 ուսանող (10-ը՝ առկա, 26-ը՝ հեռակա), որոնցից 5-ը ստացավ «գերազանց», 17-ը` «լավ»  14-ը` «բավարար»:

Հանձնաժողովն ավարտական աշխատանքների թեմաների ընտրության, դրանց իրականացման հետագա բարելավման ուղղությամբ առաջարկել է.

1. Ավարտական աշխատանքների թեմաների ձևակերպման հարցում մեծացնել մասնագիտական ամբիոնների պատասխանատվությունը:
2. Վերանայել ավարտական աշխատանքներին ներկայացվող պահանջները, մասնավորապես՝ առարկային, օբյեկտին, վարկածին, նշանակությանը վերաբերող մասով:
3. Ավարտական աշխատանքներում հիմնավորել հետազոտության մեթոդների և մեթոդիկաների ընտրությունը, դրանց համապատասխանությունը հետազոտության առարկային:

Մայիսի 17-ին տեղի ունեցավ «Էկոլոգիական քիմիա» մասնագիտության ավարտական աշխատանքների պաշտպանությունը:

Ամփոփիչ ատեստավորման հանձնաժողովը գլխավորում էր ՀՀ բնապահպանության նախարարության բնապահպանության և ընդերքի տեսչական մարմնի Տավուշի տարածքային բաժնի պետ Վահագն Վոլոդյայի Առաքելյանը:

Ամփոփիչ ատեստավորմանը մասնակցում էր 19 ուսանող (հեռակա), որոնցից 5-ը ստացավ «գերազանց», 9-ը` «լավ»  5-ը` «բավարար»:

Հանձնաժողովի կարծիքով՝ ավարտական աշխատանքներն ունեին անհրաժեշտ գիտականություն, անդրադառնում էին այնպիսի հիմնախնդիրների, որոնք ժամանակակից իրականության մեջ հրատապ լուծումներ են պահանջում (գլոբալ տաքացում, օզոնային շերտի պահպանություն): Դրվատանքի է արժանացվել այն փաստը, որ մեծ մասամբ ավարտական աշխատանքներում տեսական մասը տրամաբանորեն հիմնավորվել է կոնկրետ հետազոտական արդյունքների վկայակոչմամբ: Խրախուսելի է համարվել այնպիսի թեմաների ուսումնասիրումը, որոնք առավել ակնառու են ՀՀ-ում և հատկապես Տավուշի մարզում (շրջակա միջավայրի պահպանության հիմնախնդիրներ, քաղցրահամ ջրերի պահպանություն, նոր տնկարկների նախագծում և այլն): Ընդգծվել է, որ անհրաժեշտ է այդուհետ ևս կարևորել աշխատանքների թեմաների արդիականությունը, պրոբլեմատիկան, ինչպես նաև վերլուծել լաբորատոր հետազոտությունների արդյունքները և կոնկրետ հետևություններ ու գործնական առաջարկություններ կատարել: Նկատի ունենալով, որ շրջանավարտներին շնորհվում է նաև ուսուցչի որակավորում՝ հանձնաժողովը անհրաժեշտ է համարել, որ ավարտական աշխատանքների թեմաներ առաջադրվեն նաև էկոդաստիարակությունից, անդրադարձ կատարվի Կարմիր գրքում գրանցված կենդանիներին և բուսատեսակներին:   

Մայիսի 19-ին տեղի ունեցավ «Անգլերեն լեզու և գրականություն» մասնագիտության ավարտական աշխատանքների պաշտպանությունը:

Հանձնաժողովը գլխավորում էր Երևանի Վ.Բրյուսովի անվան պետական լեզվահասարակագիտական համալսարանի անգլերեն լեզվի բառագիտության և ոճաբանության ամբիոնի դոցենտ, բ.գ.թ. Լիլիթ Ասատուրի Բադալյանը:

Ամփոփիչ ատեստավորմանը մասնակցում էր 24 ուսանող (17-ը՝ առկա, 7-ը՝ հեռակա), որոնցից 7-ը ստացավ «գերազանց», 17-ը` «լավ»:

Հանձնաժողովի կարծիքով՝ շրջանավարտների մասնագիտական գիտելիքների իմացության և ըմբռնման մակարդակը եղել է լավ, դժվարություններ են նկատել այդ գիտելիքներն ու պատկերացումները կիրառելու դեպքում:

Ավարտական աշխատանքների թեմաների ընտրության և դրանց իրականացման հետագա բարելավման ուղղությամբ առաջարկվել է, որ աշխատանքը ներկայացնելիս առավել մեծ ուշադրություն դարձվի կատարված գործնական վերլուծությանը՝ թռուցիկ  անդրադառնալով աշխատանքի ներածական և տեսական հատվածներին:

Նույն օրը՝ մայիսի 19-ին, կայացավ «Ինֆորմատիկա և կիրառական մաթեմատիկա» մասնագիտության ավարտական աշխատանքների պաշտպանությունը:

Ամփոփիչ ատեստավորման հանձնաժողովը գլխավորում էր Ռուս-հայկական (սլավոնական) համալսարանի ՏՏ դեպարտամենտի ծառայության պետ,  ֆիզմաթ. գիտ. թեկնածու, դոցենտ Հարություն Վոլոդյայի Գասպարյանը:

Ամփոփիչ ատեստավորմանը մասնակցում էր 16 ուսանող (11-ը՝ առկա, 5-ը՝ հեռակա), որոնցից 4-ը ստացավ «գերազանց», 4-ը` «լավ»  8-ը` «բավարար»:

Ավարտական աշխատանքների թեմաների ընտրության և դրանց իրականացման հետագա բարելավման ուղղությամբ հանձնաժողովն առաջարկել է աշխատանքների թեմատիկայի մեջ ընդգրկել ժամանակակից ուղղությունները, մասնավորապես՝ արհեստական բանականություն, բլոկ-շղթաներ:

Մասնագետների պատրաստման որակի հետագա բարելավման հետ կապված՝ առաջարկվել է ուսումնական ծրագրերում ներառել ՏՏ ոլորտի ժամանակակից ուղղությունները՝ մաթեմատիկական կրթությունը համադրելով կիրառական ոլորտների հետ:

Մայիսի 21-ին տեղի ունեցավ «Հայոց լեզու և գրականություն» մասնագիտության ավարտական աշխատանքների պաշտպանությունը:

Ամփոփիչ ատեստավորման հանձնաժողովը գլխավորում էր ՀՀ ԳԱԱ Մանուկ Աբեղյանի անվան գրականության ինստիտուտի տնօրեն, բան. գիտ. դոկտոր Վարդան  Գևորգի Դևրիկյանը:

Ամփոփիչ ատեստավորմանը մասնակցում էր 22 ուսանող (6-ը՝ առկա, 16-ը՝ հեռակա), որոնցից 6-ը ստացավ «գերազանց», 12-ը` «լավ»  4-ը` «բավարար»:

Հանձնաժողովը լավ է գնահատել շրջանավարտների մասնագիտական գիտելիքների իմացության և դրանց կիրառման, իրենց մասնագիտության շրջանակներում դատողություններ անելու, հաղորդակցման կարողությունների և  ինքնակրթության հմտությունների դրսևորման մակարդակը:

Ուսումնառության ընդհանրական արդյունքների հետագա բարելավման ուղղությամբ առաջարկվել է, որ շրջանավարտները ուսումնառությունը շարունակեն մագիստրատուրայում:

Ավարտական աշխատանքների թեմաների ընտրության և դրանց իրականացման հետագա բարելավման ուղղությամբ առաջարկվել է, որ ընդգրկվեն ժամանակակից թեմաներ, ավելի կարևորվեն ուսանողների ինքնուրույնությունն ու ստեղծագործական մոտեցումները:

Մայիսի 25-ին կայացավ «Պատմություն» մասնագիտության ավարտական աշխատանքների պաշտպանությունը:

Ամփոփիչ ատեստավորման հանձնաժողովը գլխավորում էր «Խ.Աբովյանի անվան հայկական պետական մանկավարժական համալսարան» հիմնադրամի հայոց պատմության ամբիոնի դոցենտ, պ.գ թ. Ավետիս Հմայակի  Հարությունյանը:

Ամփոփիչ ատեստավորմանը մասնակցում էր 31 ուսանող (19-ը՝ առկա, 12-ը՝ հեռակա), որոնցից 16-ը ստացավ «գերազանց», 10-ը` «լավ»  5-ը` «բավարար»:

Հանձնաժողովը բարձր է գնահատել շրջանավարտների մասնագիտական գիտելիքների իմացության և դրանց կիրառման կարողությունների մակարդակը, բավարար՝ իրենց մասնագիտության շրջանակներում դատողություններ անելու կարողությունների մակարդակը, տեսանելի՝ ինքնակրթության հմտությունների դրսևորման մակարդակը:

Ուսումնառության ընդհանրական արդյունքների հետագա բարելավման ուղղությամբ առաջարկվել է, որ է՛լ ավելի մեծ ուշադրություն դարձվի ուսանողների կրթական որակների բարձրացմանը, ընդլայնվի համալսարանի գիտատեղեկատվական համակարգը:

Ավարտական աշխատանքների թեմաների ընտրության և դրանց իրականացման հետագա բարելավման ուղղությամբ առաջարկվել է թեմատիկայում ավելի շատ ներառել նոր թեմաներ:

Մայիսի 26-ին տեղի ունեցավ «Ֆրանսերեն լեզու և գրականություն» մասնագիտության ավարտական աշխատանքների պաշտպանությունը:

Ամփոփիչ ատեստավորման հանձնաժողովը գլխավորում էր Երևանի Վ.Բրյուսովի անվան պետական լեզվահասարակագիտական համալսարանի ֆրանսերեն լեզվի ամբիոնի դոցենտ, բ.գ.թ. Մելանյա Սմբատի Ղազարյանը:

Ամփոփիչ ատեստավորմանը մասնակցում էր 14 ուսանող (առկա), որոնցից 4-ը ստացավ «գերազանց», 10-ը` «լավ»:

Հանձնաժողովի կարծիքով՝ ավարտական աշխատանքների պաշտպանության ընթացքում ուսանողները հիմնականում ցուցաբերում էին թեմայի բավարար իմացություն, վերլուծելու, համապատասխան գրականությունը սինթեզելու պատշաճ մակարդակ: Ցանկալի կլիներ, որ առաջարկված թեմաները լինեին ավելի արդիական և համեմատական բնույթի, ինչն ուսանողներին հնարավորություն կտար ցուցաբերելու ավելի շատ ինքնուրույնություն և ստեղծագործական մոտեցում: Նշվել է, որ գրականության ընտրությունը հիմնականում համապատասխանել է հետազոտության պահանջներին, սակայն երբեմն նորագույն հետազոտությունների ծավալն անբավարար է եղել:

Մայիսի 26-ին (առկա) և 27-ին (հեռակա) տեղի ունեցան «Տնտեսագիտության տեսություն» մասնագիտության ավարտական աշխատանքների պաշտպանությունները:

Հանձնաժողովը գլխավորում էր ՀՀ Կենտրոնական բանկի դրամավարկային և ֆինանսական վիճակագրության բաժնի պետ Արթուր Արծրունի Ղալթախչյանը:

Ամփոփիչ ատեստավորմանը մասնակցում էր 28 ուսանող, որոնցից 11-ը ստացավ «գերազանց», 6-ը` «լավ»  11-ը` «բավարար»:

Հանձնաժողովը լավ է գնահատել շրջանավարտների մասնագիտական գիտելիքների իմացության, դատողություններ անելու, հաղորդակցման կարողությունների, ինքնակրթության հմտությունների դրսևորման մակարդակը,  բավարար է համարել գիտելիքների կիրառման կարողությունների մակարդակը:

Ավարտական աշխատանքների թեմաների ընտրության և դրանց իրականացման հետագա բարելավման ուղղությամբ առաջարկվել է ուշադրություն դարձնել ԵԱՏՄ-ին անդամակցության հետ կապված թեմաների նախատեսմանը, դասավանդման գործընթացում տեսական գիտելիքներն ավելի շատ զուգորդել պրակտիկ գիտելիքների հետ: 

Մայիսի 27-ին կայացավ «Սերվիս» մասնագիտության ավարտական աշխատանքների պաշտպանությունը:

Ամփոփիչ ատեստավորման հանձնաժողովը գլխավորում էր ՀՀ տնտեսական զարգացման և ներդրումների նախարարության զբոսաշրջության պետական կոմիտեի նախագահի առաջին տեղակալ Մեխակ Վեմիրի Ապրեսյանը:

Ամփոփիչ ատեստավորմանը մասնակցում էր 22 ուսանող (10-ը՝ առկա, 12-ը՝ հեռակա), որոնցից 7-ը ստացավ «գերազանց», 9-ը` «լավ»  6-ը` «բավարար»:

Հանձնաժողովը բավարար է գնահատել շրջանավարտների մասնագիտական գիտելիքների իմացության և դրանց կիրառման, դատողություններ անելու, ինքնակրթության հմտությունների դրսևորման մակարդակը,  լավ է համարել հաղորդակցման կարողությունների մակարդակը:

Ավարտական աշխատանքների թեմաների ընտրության և դրանց իրականացման հետագա բարելավման ուղղությամբ առաջարկվել է դրանցում է՛լ ավելի ուժեղացնել գործնական և հետազոտական բաղադրիչները, բուհի բյուջեով նախատեսել որոշակի գումարներ՝ հետազոտական նպատակով իրականացվող գործուղումների համար, որպես ավարտական աշխատանքների ղեկավարներ և գրախոսներ ավելի շատ ներգրավել գործող մասնագետներին, աշխատանքների թեմատիկայում մեծացնել սերվիսին վերաբերող հարցերը: 

 Մայիսի 30-ին տեղի ունեցան «Կիրառական արվեստ» և «Դիզայն» մասնագիտությունների ավարտական աշխատանքների պաշտպանությունները:

Ամփոփիչ ատեստավորման հանձնաժողովները գլխավորում էր ՀՀ նկարիչների միության նախագահի տեղակալ-քարտուղար, պրոֆեսոր Խաչատուր Սուրենի Ազիզյանը:

«Կիրառական արվեստ» մասնագիտության ամփոփիչ ատեստավորմանը մասնակցում էր 8 ուսանող, որոնցից 4-ը ստացավ «գերազանց», 4-ը` «լավ»:

«Դիզայն» մասնագիտության ամփոփիչ ատեստավորմանը մասնակցում էր  10 ուսանող, որոնցից 7-ը ստացավ «գերազանց», 3-ը` «լավ»:

Հանձնաժողովները լավ են գնահատել  շրջանավարտների մասնագիտական գիտելիքների իմացության և դրանց կիրառման, ինչպես նաև հաղորդակցման կարողությունների մակարդակը:

Իրենց մասնագիտության շրջանակներում դատողություններ անելու հարցի կապակցությամբ արտահայտված տեսակետները տարբեր էին. «Կիրառական արվեստ» մասնագիտության շրջանավարտների դեպքում կարծիքը եղել է լավ, մինչդեռ «Դիզայն» մասնագիտության շրջանավարտների դեպքում նկատվել են բացթողումներ:

Ավարտական աշխատանքների թեմաների ընտրության և դրանց իրականացման հետագա բարելավման ուղղությամբ առաջարկվել է ընտրել թեմաներ, որոնց միջոցով արտացոլվի իրական կյանքը, պատրաստվեն կենցաղում օգտագործելու համար պիտանի իրեր, մեծ ուշադրություն դարձվի աշխատանքների շրջանակներին:

Կիրառական արվեստի ֆակուլտետի ուսանողների ավարտական աշխատանքների պաշտպանության մասին տե՛ս նաև հետևյալ հղումով:

 2018թ. մայիսի 30-ին ԵՊՀ Իջևանի մասնաճյուղում կայացավ Կիրառական արվեստի ֆակուլտետի ուսանողների ավարտական աշխատանքների պաշտպանությունը՝ «Դիզայն» և «Կիրառական արվեստ» մասնագիտությունների գծով:

Այս տարվա ամփոփիչ ատեստավորման հանձնաժողովները հետևյալ կազմով էին.

1. Ազիզյան Խաչատուր Սուրենի –   նախագահ, ՀՀ նկարիչների միության նախագահի տեղակալ-քարտուղար, պրոֆեսոր,
2. Մարգարյան Ալեքսան Շամիլի –   Կիրառական արվեստի ֆակուլտետի դեկանի  ԺՊ, ֆ/մ. գիտ. թեկնածու,
3. Ասատրյան Համլետ Միհրդատի –   Գծանկարի, գունանկարի և քանդակի ամբիոնի  վարիչի ԺՊ, ՀՀ նկարիչների միության անդամ,  արվեստագիտության դոցենտ,
4. Հարությունյան Մարտին Վարդանի –   Դեկորատիվ-կիրառական արվեստի և դիզայնի  ամբիոնի վարիչ, ՀՀ դիզայներների միության անդամ, արվեստագիտության թեկնածու,
5. Մխիթարյան Համլետ Խաչատուրի –   Տավուշի մարզի Իջևանի արվեստի դպրոցի տնօրեն,
6. Ղուլիջանյան Կարո Հայկազի –   Տավուշի մարզի Կողբի գեղարվեստի դպրոցի տնօրեն:

Ավարտական աշխատանքների պաշտպանությանը ողջույնի խոսք ասաց և ավարտական կուրսերի ուսանողներին հաջողություններ մաղթեց Կիրառական արվեստի ֆակուլտետի դեկան Ա.Մարգարյանը:

Ինչպես ամեն տարի, այս անգամ էլ Կիրառական արվեստի ֆակուլտետի ուսանողների ավարտական աշխատանքներն աչքի էին ընկնում թեմատիկ, ժանրային և ոճական բազմազանությամբ, հետաքրքիր լուծումներով:

Պաշտպանությունն անցավ հաճելի մթնոլորտում՝ մասնակիցներին պատճառելով գեղագիտական հաճույք ու բավականություն:

Արդյունքները գոհացուցիչ էին. «Դիզայն» մասնագիտության 10 ուսանողից 7-ը ստացավ «գերազանց» գնահատական, 3-ը՝ «լավ» գնահատական:

Ամփոփիչ ատեստավորման հանձնաժողովը «գերազանց» գնահատեց Մարիամ Հասանյանի (ԵՊՀ ԻՄ գրաֆիկական  նոր  ոճի ձևավորում), Գևորգ Ադամյանի (Բազմաֆունկցիոնալ  սեղան), Զարուհի Առուստամյանի (Բազմաֆունկցիոնալ էտյուդնիկ), Մանե Շահինյանի (Հագուստի մոդելավորման  նախագիծ /Հ. Այվազովսկու  200/) աշխատանքները, որոնք ղեկավարում էր Մարտին Հարությունյանը, Էդիտա Խաչատրյանի (Ֆունկցիոնալ փռոց-պայուսակ, գոբելեն, ղեկավար՝ Դոնարա Չիբուխչյան), Լիլիյա Բայրամյանի (Գրապահարան, ղեկավար՝ Քրիստինե Մխիթարյան), Աննա Խաչատրյանի (Գծագրական սեղան, ղեկավար՝ Քրիստինե Մխիթարյան)  աշխատանքները:

«Լավ» գնահատվեցին Գայանե Աբովյանի (Բազմաֆունկցիոնալ պահարան, ղեկավար՝ Մհեր Ստեփանյան), Անի Ղուկասյանի (Բազմաֆունկցիոնալ սեղան, ղեկավար՝ Միսակ Մելքումյան) և Էդիտա Սուքոյանի (Մանկական սենյակի դեկորատիվ լուսամփոփ, ղեկավար՝ Անուշ Չիբուխչյան)  աշխատանքները:   

«Կիրառական արվեստ» մասնագիտության 8 ուսանողից 4-ը ստացավ «գերազանց»  գնահատական, 4-ը՝ «լավ»:

«Գերազանց»  գնահատվեցին Արինա Դավթյանի (Սրբապատկերների շարք,  մանրանկարչություն, ղեկավար՝ Լիլիթ Ֆլջյան), Անի Մխիթարյանի  (Կենաց ծառ, գոբելեն, ղեկավար՝ Անուշ Չիբուխչյան), Գարիկ Դալլաքյանի  (Գյուղական  մոտիվ, գեղանկար, ղեկավար՝ Համլետ Ասատրյան), Լալվար Մնացականյանի (Սևանի վանական համալիր, գեղանկար, ղեկավար՝ Արևիկ Խաչատրյան) աշխատանքները:   

 «Լավ» գնահատվեցին Թեհմինե Հարությունյանի (Աշուն, գեղանկար, ղեկավար՝ Դոնարա Չիբուխչյան), Մերի Ալավերդյանի (Մայրություն, ասեղային  գոբելեն, ղեկավար՝ Անուշ Չիբուխչյան), Արման Ալեքսանյանի (Երաժիշտներ, գեղանկար, եռանկար, ղեկավար՝ Սերգեյ Հովհաննիսյան) և Կորյուն Փարսադանյանի (Կանացի իրան, քանդակ, ղեկավար՝ Տիգրան Բագամյան)  աշխատանքները: 

Վերջում Կիրառական արվեստի ֆակուլտետի վարչական ու պրոֆեսորադասախոսական անձնակազմի ներկայացուցիչները բակալավրի որակավորում ստանալու առթիվ շնորհավորեցին իրենց շրջանավարտներին՝ նրանց հղելով բարեմաղթանքներ, ցանկանալով մասնագիտական ու անձնական մեծ հաջողություններ:

2018թ. մայիսի 25-ին ԵՊՀ Պալեանների անվան դահլիճում տեղի ունեցավ Ուսանողական գիտական ընկերության՝ 2017-2018 ուստարվա երկրորդ կիսամյակի ընդլայնված նիստը:

Նիստի սկզբում ԵՊՀ ՈՒԳԸ նորընտիր նախագահ Վանատուր Շերենցը, ողջունելով մասնակիցներին, ներկայացրեց կատարված աշխատանքները, մասնավորապես նշեց, որ կիսամյակի ընթացքում անցկացվել են 116 սեմինար քննարկումներ, ԵՊՀ ՈՒԳԸ 5-րդ միջազգային գիտաժողովին մասնակցել են ավելի քան 20 երկրներից 606 մասնակիցներ:

Ընդլայնված նիստի ընթացքում անցկացվեց «Ժամանակի կառավարում» և «Գործատուների հետ շփումն ու գործընկերային փոխհարաբերությունների կարևորությունը» խորագրերով սեմինար-քննարկումներ, որոնք վարում էին Անուշ Ալեքսանյանը և Գոռ Վարդանյանը:

Անուշ Ալեքսանյանը նշեց, որ ուսանողների կարծիքով՝ ժամանակը վատնող միջոցներն են հայելին, սոցիալական ցանցերը, հեռուստացույցը, ընկերների հետ հաճախակի հանդիպումները, սակայն փաստեց, որ ժամանակը չկառավարելու պատճառներից են նաև մարդկանց չմերժելը և մշտապես «այո» ասելը:

Գոռ Վարդանյանը ներկայացրեց, թե ինչպես ճիշտ ներկայանալ գործատուին՝ կարևորելով թեկնածուների իրազեկվածությունը կազմակերպության գործունեության վերաբերյալ, խոսեց նաև աշխատանքի ընդունվելու և ազատվելու նրբությունների մասին:

Ակտիվ գործունեություն ծավալած ֆակուլտետային ՈՒԳԸ-ները, քարտուղարները և անդամները պարգևատրվեցին հավաստագրերով և մասնագիտական գրքերով։

ԵՊՀ Իջևանի մասնաճյուղի ՈՒԳԸ-ն, ըստ այս կիսամյակի արդյունքների, ԵՊՀ 4 ֆակուլետների ՈՒԳԸ-ների հետ արժանացել էր «գերազանց» գնահատականի: Պարգևը ստացավ ՈՒԳԸ նախագահ Հրանտ Ղարագյոզյանը:

Մասնաճյուղի ՈՒԳԸ ակտիվ անդամ էր ճանաչվել Բնական գիտությունների ֆակուլտետի ՈՒԳԸ նախագահ Աղավնի Օրդինյանը, ով պարգևատրվեց մասնագիտական գրքով:

2017-2018 ուստարվա II կիսամյակում Հայ Առաքելական Եկեղեցու Տավուշի թեմը, Եգիպտահայ ընկերակցության «Մաշտոց» հիմնադրամի աջակցությամբ և ԵՊՀ Իջևանի մասնաճյուղի հետ համագործակցությամբ, սահմանել է մասնակի կրթաթոշակ ԵՊՀ ԻՄ-ի` սահմանամերձ համայնքների 25 ուսանողի (յուրաքանչյուրին` 100.000-ական ՀՀ դրամի չափով) համար:

Կրթաթոշակին արժանանալու համար մինչև 2018թ. ապրիլի 10-ը ուսանողները ներկայացրել էին սոցիալական կարգավիճակի և ուսման առաջադիմության վերաբերյալ տեղեկանք, Տավուշի մարզում կամավորական հիմունքներով հասարակական և բարեսիրական աշխատանքներին մասնակցության հավաստագիր:

Հանձնախումբը՝ մասնակցությամբ Տավուշի թեմի առաջնորդ գերաշնորհ Տեր Բագրատ եպիսկոպոս Գալստանյանի, արժանապատիվ Տեր Հայրեր՝ Բերդի հոգևոր հովիվ Տեր Արամ քահանա Միրզոյանի, Նոյեմբերյանի հոգևոր հովիվ Տեր Սմբատ քահանա Աբրահամյանի, ԵՊՀ ԻՄ արհբյուրոյի նախագահ Ալեքսան Մարգարյանի և Տավուշի թեմի հանրային կապերի պատասխանատու Սյուզաննա Ղուկասյանի, ընտրեց 25 ուսանողներին:

ԵՊՀ Իջևանի մասնաճյուղը, սիրով շնորհավորելով կրթաթոշակի արժանացած ուսանողներին, խորին շնորհակալություն է հայտնում Եգիպտահայ ընկերակցության «Մաշտոց» հիմնադրամին և Հայ Առաքելական Եկեղեցու Տավուշի թեմին.

«Թո՛ղ Աստված առատորեն օրհնի ձեր հայրենանվեր գործունեությունը, համատեղ բարի գործերը` ուղղված Հայոց աշխարհի և մասնավորապես սահմանամերձ Տավուշի մարզի բարօրությանը, զորացմանն ու բարգավաճմանը…

Խորապես շնորհակալ ենք, և Աստված ձեզ պահապան»: