Մեկնարկել է «Երիտասարդության ձայնը» հռետորության ամենամյա համապետական մրցույթը, որը հնարավորություն է ընձեռում երիտասարդներին ձեռք բերել հանրային ելույթի վերաբերյալ անհրաժեշտ գիտելիքներ և հմտություններ:

 

Լուսավոր Հայաստան Կուսակցության մասնագետները կմատուցեն ելույթներ գրելու, ազդեցիկ խոսքի և առաջնորդության դասընթացներ:

 

Դիմել կարող են 18-22 տարեկան երիտասարդները ՀՀ բոլոր մարզերից: 

Ի՞նչ տևողություն և բովանդակություն ունեն նախընտրական և եզրափակիչ փուլերը

Նախընտրական փուլը յուրաքանչյուր մարզում կտևի երկու օր: Առաջին օրում մասնակիցները կմասնակցեն արդյունավետ հաղորդակցության, հռետորության և խնդիրների լուծման հմտություններ զարգացնող սեմինարների: Երկրորդ օրը բոլոր մասնակիցները ելույթներով հանդես կգան, որոնց հիման վրա էլ կորոշվեն եզրափակիչ փուլ անցնող մասնակիցները: Եզրափակիչ փուլը կտևի մեկ օր, որի ընթացքում մասնակիցները կներկայացնեն իրենց մարզերը, ապա ելույթեր կունենան, որոնց հիման վրա կորոշվեն առաջին 3 տեղերի մրցանակակիրները:

Ւնչպե՞ս են տեղափոխվելու և գիշերելու եզրափակիչ անցած մասնակիցները

Ծրագիրը ստանձնում է բոլոր մասնակիցների երկու կողմանի տրանսպորտի և սնդդի,

ինչպես նաև Երևանում գիշերակացի ծախսերը (բացառությամբ Երևանի, Արմավիրի,

Լոռու և Արարատի մարզերի եզրափակիչ անցած մասնակիցների):

Ի՞նչ է անհրաժեշտ

Անհրաժեշտ է լրացնել մրցույթի մասնակցության հայտը՝ http://goo.gl/forms/BIaJ93Axjq

մինչև մարտի 10-ը: Մասնակիցները պետք է անտարբեր չլինեն իրենց շրջապատող համայնքային և մարզային խնդիրներին և ցուցաբերեն պատրաստակամություն իրենց հաղորդակցության հմտությունները զարգացնելու և կիրառելու համար:

Աղբյուրը՝ armacad.info

2016թ. փետրվարի 23-ին ԵՊՀ Իջևանի մասնաճյուղում կայացավ հանդիպում «Կրթություն Հայաստան» հասարակական կազմակերպության ներկայացուցիչների հետ:

Հանդիպմանը ներկա էին մասնաճյուղի շրջանավարտներ, տարբեր մասնագիտությունների չորրորդ կուրսերի ուսանողներ և դասախոսներ:

Ծրագրի պատասխանատուները ներկայացրին  ծրագրի առաքելությունը, դիմելու կարգը, պատասխանեցին մասնակիցներին հետաքրքրող հարցերին։

Նշվեց, որ ծրագրի առաքելությունն է բարելավել Հայաստանի բոլոր երեխաների կրթության որակը՝ ներգրավելով և վերապատրաստելով համալսարանների շրջանավարտների որպես ուսուցիչներ և այնուհետև 2 տարով գործուղել նրանց Հայաստանի մարզային դպրոցներ, որտեղ կա տվյալ մասնագիտությամբ ուսուցչի կարիք։

Ծրագրի առանձնահատկությունն այն է, որ պարտադիր չէ մասնակիցը լինի մասնագիտությամբ մանկավարժ, միայն հարկավոր է դասավանդելու և Հայաստանի զարգացմանը նպաստելու ցանկություն, մյուս խնդիրները, ինչպիսիք են՝ վերապատրաստումը, աշխատանքի տեղավորումը մարզային դպրոցներում, վարձատրությունը, կլուծի ծրագիրը։

Ներկայացվեց, որ «Կրթություն Հայաստան» ծրագիրն իր մասնակիցներին հնարավորություն է ընձեռում անմիջական ազդեցություն ունենալու աշակերտների ներկայի և ապագայի վրա՝ միաժամանակ նաև զարգացնելով սեփական կարիերան:

Ծրագրի մասնակիցները կօգտվեն հետևյալ արտոնություններից.

• Աշխատավարձ և կրթաթոշակ,
• Դասավանդման վկայականի կամ մանկավարժության մագիստրոսի աստիճանի ձեռքբերման համար ուսումնական վարձի վճարում,
• «Կրթություն Հայաստան» և «Կրթություն բոլորի համար» ծրագրերի շրջանավարտի կարգավիճակ,
• Գործընկեր կազմակերպություններում մասնագիտական և մշակութային զարգացման հնարավորություններ,
• Առաջնորդական հմտությունների զարգացում և վերապատրաստող մասնագետի շարունակական աջակցություն:

Հանդիպման ընթացքում ներկայացվեց և ծրագրին մասնակցելու կարգը, որ հարկավոր է գրանցվել՝ http://teachforarmenia.org/hy/apply/ հղումով լրացնելով առցանց հայտադիմումը, իսկ ծրագրին ավելի մանրամասն կարելի է ծանոթանալ հետևյալ հղումով ՝ http://teachforarmenia.org/hy/:

2016թ. փետրվարի 22-ին ԵՊՀ ԻՄ-ի «Հայոց լեզու և գրականություն» մասնագիտության չորրորդ կուրսի ուսանողների մասնակցությամբ կայացավ Մայրենի լեզվի միջազգային օրվան նվիրված դաս, որը վարում էր Հայոց լեզվի և գրականության ամբիոնի դոցենտ, բ.գ.թ. Աիդա Սարհատյանը:

«Մեր ժառանգության մեծագույն գանձի» մասին ներածական խոսքով հանդես եկավ Ա.Սարհատյանը՝ հուզական անմիջականությամբ և լեզվական նուրբ զգացողությամբ ներկայացնելով լեզվի անփոխարինելի դերն ու նշանակությունը մարդու կյանքում.

«Ի՞նչ է լեզուն… Լեզուն մեր գոյությունն է, մեր էությունը, մեր մտքերն արտացոլող կախարդական բանալին, մեզ տրված աստվածային պարգևը…

Լեզուն մեր առաջին թոթովանքն է, մեր արտասանած առաջին բառերը, մեր ապրած բոլոր զգացումները…

Լեզուն մեր սերն է, սիրո անուշ շշուկների վերածված մեր առաջին խոստովանությունը, մեր ասված ու չասված թաքուն մտքերը…

Լեզուն մեր կարոտի կանչն է, մեր սպասման թախիծը, հանդիպման երջանկությունը…

Լեզուն մեր ապրած տառապանքն է, մեր ցավի ու հիասթափության արձագանքը, մեր վշտի մորմոքն ու մեր անբառ արցունքները…

Լեզուն մեր սերն է հայրենիքի հանդեպ, մեր բնության հանդեպ, արևի, ծառ ու ծաղկի հանդեպ…

Լեզուն մեր հայացքի խորունկ խորհուրդն է, ասված ու չասված խոսքերը, մեր երազանքը, մեր կյանքը…

Լեզուն հենց մենք ենք…»:

Դասախոսին հաջորդեցին ուսանողները, որոնք հանդես եկան մայրենի լեզուն անաղարտ պահելու կոչով, որ շատ կարևոր է մեր օրերում, երբ հաճախ աղավաղվում, խեղաթյուրվում է մեր մայրենին: Մինչդեռ, ինչպես մեծն Սևակը կասեր, լեզուն որբի գլուխ չէ, որի վրա վարսավիրություն են սովորում…

Ուսանողներին իրենց սրտառուչ խոսքով, գեղարվեստական գրականությունից (չափածո և արձակ) մեջբերված հյութեղ օրինակներով գնահատեցին մայրենին, վերհանեցին նրա՝ որպես ժողովրդի ազգային գոյության և էության ամենախոշոր փաստի, ինքնուրույնության ու հանճարի ամենախոշոր դրոշմի արժանիքները: