2015թ. հուլիսի 1-7-ը ԵՊՀ Իջևանի մասնաճյուղում կայացան 2015թ. առկա ուսուցման կենտրոնացված («Հայոց լեզու և գրականություն», «Անգլերեն», «Ֆրանսերեն») և ներբուհական («Գծանկար», «Գունանկար», «Կոմպոզիցիա») ընդունելության քննությունները:

Կենտրոնացված քննությունների նվազագույն շեմը 57 դիմորդներից հաղթահարել է 50-ը (հայոց լեզուն և գրականությունը` 17-ից 15-ը, անգլերենը` 31-ից 27-ը, ֆրանսերենը` 9-ից 7-ը):

Ներբուհական քննությունների նվազագույն շեմը 23 հանձնողներից հաղթահարել է 21-ը (գծանկարը` 23-ից 22-ը, գունանկարը` 23-ից 21-ը, կոմպոզիցիան` 23-ից 21-ը):

Կայացած քննությունների ընդհանուր համապատկերում առավել գոհացուցիչ էին ֆրանսերենի բանավոր քննության արդյունքները:

Քննական հանձնաժողովի նախագահ Մելանյա Ղազարյանը փաստեց, որ դիմորդների պատրաստվածության աստիճանը բարձր էր, քննությունները կազմակերպված էին պատշաճ մակարդակով:

2015թ. հուլիսի 4-ին Տավուշի մարզի Ենոքավան համայնքի «Ապագա տուր» տուրիստական կազմակերպության տարածքում կայացավ «Հայաստանի բույսերը» փառատոնը, որի հիմնական խնդիրը հայկական խոտաբույսերի բազմազանությունը հանրամատչելի դարձնելն էր:

«Հայաստանի բույսերը» փառատոնում գործում էին տարբեր հարթակներ` նախատեսված դեղաբույսերի տոնավաճառի, ազգային խոհանոցի, կերպարվեստի, բրդի ներկման և թաղիքագործության վարպետության դասընթացների, ազգային խաղերի համար:

Փառատոնին մասնակցում էր նաև ԵՊՀ Իջևանի մասնաճյուղը` կիրառական արվեստի ֆակուլտետի դասախոսների և ուսանողների բազմաժանր ստեղծագործություններով:

Այցելուները մեծ բավականություն և տեղեկատվություն ստացան մասնաճյուղի կիրառական արվեստի ֆակուլտետում իրականացվող գործընթացների, ստեղծագործական աշխատանքների վերաբերյալ:

2015թ. հուլիսին ԵՊՀ ԻՄ-ի «Սերվիս» մասնագիտության մի խումբ ուսանողներ` Տուրիզմի կառավարման և մշակութաբանության ամբիոնի ասիստենտ, ուսումնական խորհրդատու Պավել Ասիլբեկյանի և «Տավուշի տուրիզմի զարգացման գործակալություն» ՀԿ-ի ղեկավար Հովհաննես Ղահրամանյանի գլխավորությամբ, իրականացրին ամառային պրակտիկա Լուսահովիտ (նախկինում` Ծռվիզ) գյուղում։

Կազմակերպված պրակտիկան մասնաճյուղի «Սերվիս» մասնագիտության և Տավուշի տուրիզմի զարգացման գործակալության համագործակցության շղթայի հերթական օղակն էր:

Պրակտիկայի նպատակը Լուսահովիտ գյուղի հարավ-արևմտյան ձորակի աջ ափին գտնվող Մորու ձորի վանքի զբոսաշրջային ներուժն ուսումնասիրելն էր:

Մորու ձորի վանքը (Մորո Ձորո կամ Ծռվիզի վանք) կառուցվել է մոտավորապես 5-7 դարերում։

Վանքի Սբ. Աստվածածինը փոքր քառախորան կենտրոնագմբեթ եկեղեցի է՝ կառուցված 5-րդ դարում մոխրագույն բազալտի տաշած քարերով՝ կրաշաղախով։ Խորանները ներսից պայտաձև են, դրսից՝ կիսաշրջանաձև:

Մորո Ձորո վանքը բարգավաճել է 12-13-րդ դարերում և դարձել Մահկանաբերդի գավառի հոգևոր կենտրոններից։

Եկեղեցին հարուստ է վիմական արձանագրություններով։ Դրանցից առավել արժեքավորն ու պատմական նշանակություն ունեցողը Վրաստանի Գեորգի 3-րդ թագավորի՝ Թամարա թագուհու հոր արձանագրությունն է, որում ասվում է, որ 1177-78թթ. Մահկանաբերդի տեր և վանքի հովանավոր իշխան Քուրդ Արծրունին վանքն ազատել է բոլոր հարկերից, իսկ այդ վճիռը հաստատել է վրաց Գեորգի թագավորը։

Կան նաև սպասալարների տոհմի ականավոր դեմքերի նվիրատվական արձանագրություններ։ 1197թ. իշխան Իվանե Զաքարյանը և իր քույր Նանան նորոգել են վանքը, վերականգնել Սբ. Աստվածածին եկեղեցու գմբեթը և ծածկը։

1213թ. եղբայրներ Իվանե և Զաքարե Զաքարյան իշխանները վերստին նորոգել են վանքը և նրա վանահայր հաստատել հայր Եվագրին։ 1980-ական թթ. վերանորոգվել են վանքի Սբ. Աստվածածին եկեղեցու գմբեթն ու խորանների ծածկերը:

Լուսահովտի գյուղապետի և գյուղացիների ջերմ ընդունելությունից հետո մեր ուսանողներն այցելեցին Մորու ձորի վանք, բարեկարգեցին վանքի շրջակա տարածքը:

Այնուհետև արշավախմբի անդամները հրաշք բնության գրկում ծավալեցին ռեկրեացիոն հզոր ռեսուրսների մասին քննարկում, գնահատեցին գյուղի և վանքի զբոսաշրջային ներուժը:

Հաճելի տպավորություններով և օգտակար գիտելիքներով «զինված»` մեր ուսանողները վերադարձան Իջևան։

2015թ. հունիսին ԵՊՀ ԻՄ-ից Տավուշի տարածաշրջանային պետական քոլեջի` 2014-2015 ուստարվա «Ֆինանսներ» և «Էկոնոմիկա. հաշվապահական հաշվառում և աուդիտ» մասնագիտությունների ավարտական քննություններին մասնակցեց Ընդհանուր տնտեսագիտության ամբիոնի ասիստենտ, տնտ. գիտ. թեկնածու, ՄԿՈԱ բաժնի մասնագետ Գ.Ավետիսյանը:

Քննությունների արդյունքներից ելնելով` 17 շրջանավարտներ երաշխավորվեցին 2015-2016 ուստարում իրենց ուսումը շարունակելու մասնաճյուղի հեռակա ուսուցման բաժնի «Տնտեսագիտության տեսություն» մասնագիտությամբ:

«Շրջանավարտների ցուցաբերած արդյունքները վկայում են, որ նրանք ունեն մասնագիտական անհրաժեշտ գիտելիքներ, կարողություններ և հմտություններ՝ մասնաճյուղում ուսումը շարունակելու համար», – նշեց Գ.Ավետիսյանը:

Դեռևս 2011 թվականից մասնաճյուղը քոլեջի հետ ունի պայմանագիր, որը հնարավորություն է տալիս բարձր առաջադիմություն ցուցաբերած շրջանավարտներին հարցազրույցով ընդունվել մասնաճյուղ և շարունակել ուսումը համապատասխան մասնագիտությամբ: Մինչ օրս մասնաճյուղում ուսումը շարունակել և շարունակում են տարբեր քոլեջների 27 շրջանավարտներ:

ԵՊՀ Իջևանի մասնաճյուղը Արարատի տարածաշրջանային, Դիլիջանի, Նոյեմբերյանի, Բերդի պետական քոլեջների հետ ևս ունի պայմանագրեր, որոնց շրջանակներում համագործակցում է ուսումնական պլանների և առարկայական ծրագրերի փոխհամաձայնեցման և վերամշակման աշխատանքներում, ուսումնական գործընթացն ավելի արդյունավետ կազմակերպելու նպատակով ցույց է տալիս համապատասխան մեթոդական և մասնագիտական օգնություն (դասախոսությունների, դասալսումների իրականացում, կիսամյակային և պետական որակավորման քննություններին մասնակցություն, մասնաճյուղի գրադարանի ռեսուրսների հասանելիություն և այլն):