ԵՊՀ Իջևանի մասնաճյուղի լավագույն շրջանավարտներից Վլադիմիր Արմենի Պողոսյանի` իբրև հայրենիքի արժանի զինվորի դաստիարակության գործում մեծ ներդրում ունենալու համար ԼՂՀ ՊԲ-ի կողմից շնորհակալական նամակ է ստացել ԵՊՀ ԻՄ-ի տնօրեն Ս.Առաքելյանը:

Վլադիմիր Պողոսյանը ծառայում է Լեռնային Ղարաբաղի Հանրապետության Պաշտպանության Բանակում: Ծառայության առաջին իսկ օրերից նա բարեխղճորեն է կատարում իր սահմանադրական և ծառայողական պարտքը հայրենիքի հանդեպ, կարճ ժամանակամիջոցում կարողացել է տիրապետել իր զինվորական մասնագիտությանը, դարձել է ուսման գերազանցիկ և կարգապահ մարտիկ:

Լինելով «Հայ ասպետ» թիմի անդամ 2014 թվականին` «Հայ ասպետ» ակումբների համաբանակային մրցույթում գրավել է առաջին տեղը` մեծ պատիվ բերելով զորամասին:

2015թ. հունիսից նախաձեռնել է զորամասի «Ասպետ» ամսաթերթի հրատարակությունը` որպես գլխավոր խմբագիր:

Կազմակերպել է բազմաթիվ ինտելեկտուալ և մշակութային միջոցառումներ, մասնակցել համաբանակային մրցույթներին և հանդես եկել ելույթներով:

Պարգևատրվել է «Քաջարի մարտիկ», «Հայոց բանակի գերազանցիկ» կրծքանշաններով, պատվոգրերով և նվերներով:

2015թ. նոյեմբերի 26-ին «Տավուշ» ռազմահայրենասիրական ակումբը ճանաչողական այց կատարեց ԵՊՀ, ուր արդեն հարազատ դարձած «Վարդանանք» ռազմահայրենասիրական դաստիարակության ակումբը տավուշցիներին ներկայացրեց ԵՊՀ-ն իր ֆակուլտետներով:

Ջերմ ընդունելությունից հետո ակումբականները եղան ԵՊՀ-ի պատմության թանգարանում, մոտիկից ծանոթացան Մայր բուհի պատմությանը։

Ապա «Տավուշ» ռազմահայրենասիրական ակումբի անդամները մասնակցեցին «Վարդանանք» ՌՀԴ-ի կողմից կազմակերպված միջոցառմանը` ներկայանալով ասմունքով, երգով։

«Վարդանանք» ակումբի նախաձեռնությամբ տարիներ շարունակ անցկացվում է «Անմահները հրամայում են…» խորագրով միջոցառումների շարքը, որի նպատակն է հուշ-ցերեկույթների միջոցով փառաբանել այն ուսանող-ազատամարտիկներին, դասախոսներին, ովքեր Արցախյան ազատամարտում նշանակալի դերակատարություն են ունեցել:

Ամենամյա միջոցառումները յուրաքանչյուր անգամ Արցախյան ազատամարտի մասնակիցների սխրանքներն ու նրանց հայրենանվեր գործունեությունը համալսարանականներին ներկայացնելու առիթ են:

ԵՊՀ-ի պատմության ֆակուլտետն այն եզակի ֆակուլտետներից է, որն ունեցավ անհամեմատ մեծ թվով կամավորներ: Ուսանողական լսարանները փոխարինելով մարտի դաշտով՝ նրանք նախընտրեցին որպես կամավոր մասնակցել հայրենիքը պաշտպանելու կարևոր ու նպատակային գործին:

Փա՛ռք ու պատիվ մեր համալսարանական հերոսներին`Վարդան Դալլաքյանին, Թաթուլ Կրպեյանին, Վարդան Բախշյանին, Զաքար Ավանեսյանին, Արթուր Մկրտչյանին, Ռոմա Մկրտչյանին, ովքեր, իրենց կյանքը նվիրաբերելով հայրենիքին, դարձան մեր պատմության կերտողները:

«Իմ կենացը մի՛ խմեք, իմ գործը շարունակեք». իրենց գործունեությամբ ակումբականները մոնթեական այս պատգամի կրողներն են:

2015թ. նոյեմբերի 27-ին ԵՊՀ ԻՄ-ի օնլայն լսարանում տեղի ունեցավ «Ղազախստանի և Հայաստանի համագործակցությունը արդի ժամանակաշրջանում» թեմայով միջազգային կոնֆերանս, որը կազմակերպվել էր ՀՀ-ում Ղազախստանի Հանրապետության դեսպանության, Գլոբալիզացիայի և տարածաշրջանային համագործակցության վերլուծական կենտրոնի և ԵՊՀ Իջևանի մասնաճյուղի կողմից:

Կոնֆերանսի աշխատանքային լեզուն ռուսերենն էր:
Ներկա էին ԵՊՀ Իջևանի մասնաճյուղի վարչական և պրոֆեսորադասախոսական անձնակազմի ներկայացուցիչներ, առկա և հեռակա ուսուցման համակարգերի տարբեր կուրսերի ուսանողներ:

Ողջույնի խոսքով հանդես եկան ՀՀ-ում Ղազախստանի Հանրապետության դեսպանության գործերի ժամանակավոր հավատարմատար Կանատ Խասենովը և ԵՊՀ Իջևանի մասնաճյուղի հեռակա ուսուցման բաժնի վարիչ Մարատ Զուրաբյանը:

Կոնֆերանսի ընթացքում «Հայաստանի և Ղազախստանի միջև երկկողմ և տարածաշրջանային համագործակցությունը որպես փոխշահավետ և բարեկամական կապերի ներուժ» թեմայով ելույթ ունեցան ՀՀ-ում Ղազախստանի Հանրապետության դեսպանության գործերի ժամանակավոր հավատարմատար Կանատ Խասենովը և Գլոբալիզացիայի և տարածաշրջանային համագործակցության վերլուծական կենտրոնի (ԳՏՀՎԿ) ղեկավար Ստեփան Գրիգորյանը:

«Ղազախստանի առաջին նախագահի ինստիտուտը որպես հզոր խթան և մեխանիզմ` «Ազգային պլան. 100 քայլ» ինստիտուցիոնալ հինգ բարեփոխումների իրականացման համար» թեմայով զեկուցում ներկայացրեց «Ինտեգրացիա և զարգացում» հետազոտության և վերլուծության հասարակական կազմակերպության նախագահ Արամ Սաֆարյանը:

Ներկայացված զեկուցումների շուրջ տեղի ունեցավ հետաքրքիր քննարկում. ուսանողների և դասախոսների կողմից զեկուցողներին տրվեցին հարցեր, որոնք ստացան սպառիչ պատասխաններ:

ՀՀ-ում Ղազախստանի Հանրապետության դեսպանության կողմից մասնաճյուղին նվիրվեցին Ղազախստանին վերաբերող գրքեր, բուկլետներ, օրացույցներ:

Կոնֆերանսի օրակարգը տե՛ս այստեղ: