Շուրջ մեկ տարի է, ինչ ԵՊՀ ԻՄ-ի բնական գիտությունների ֆակուլտետում ձևավորվել և գործում է հետազոտական “Green Ground” («Կանաչ հող») խումբը: Մասնակցելով ԵՄ կողմից ներկայացված գյուղատնտեսական աշխատանքների աջակցության Ավստրիական գործակալության հայտարարած ստարտափի դրամաշնորհին՝ խումբը հասել է եզրափակիչ փուլ, որը կկայանա 2022թ. փետրվարի 19-ին «Սիներջի» ընկերությունում: Եզրափակիչ են անցել ևս 7 թիմեր, իսկ հաղթողներ են ճանաչվելու 3 թիմեր:

“Green Ground” թիմի աշխատանքների հիմքում դրվեցին Բնական գիտությունների ֆակուլտետի մի խումբ ուսանողների հետազոտական աշխատանքները, որոնք նվիրված էին բազմաֆունկցիոնալ թվաէլեկտրոնային կառավարմամբ չափիչ սարքերի ծրագրավորմանը: Դրա հիման վրա էլ կառուցվեցին հետագա մտահղացումները: Աշխատանքները կատարվել են ֆակուլտետում դեռ մեկ տարի առաջ հիմնված Բնագիտության և համակարգչային տեխնիկայի լաբորատորիայում:

Մրցույթին ներկայացվող աշխատանքը նվիրված է գյուղատնտեսական մշակաբույսերի աճի ընթացքում միկրոտարրերի յուրացման պրոցեսի չափմանն ու հսկողությանը: Դա անհրաժեշտ է աճեցվող բերքում քիմիկատների քանակության և աճեցման միջավայրում առկա քիմիական համար: Նման պարամետրի հսկողությունը բխում է ներկայիս գյուղատնտեսական արտադրանքին ներկայացվող որակական պահանջներից: Որոշակի ուսումնասիրություններից թթվայնության/հիմնայնության (pH-պարամետրի), էլեկտրահաղորդականության (EC պարամետրի) և միներալերի (TDS պարամետրի) քանակության չափման, ագրոքիմիական որոշումներ կայացնելու և սպասվող բերքի էկոլոգիական մաքրությունը գնահատելու հետո մշակվեց սարքի կառուցվածքը, և խնդիր դրվեց մշակել սկզբունքորեն նոր տիպի չափիչ-սենսոր, որի ցուցմունքները մշակվում են անմիջապես տեղում և հատուկ ծրագրավորմամբ: Նման «խելացի» սենսորի կիրառությունը թույլ կտա չափել մի շարք այլ կարևոր պարամետրեր ևս՝ այդպիսով սենսորին դարձնելով ունիվերսալ: Այս աշխատանքները կարիք ունեն լրացուցիչ հետազոտման:

Առհասարակ դրամաշնորհի շուկայական և ոլորտային ուսումնասիրությունները, ոլորտային մասնագիտական քննարկումները դուրս հանեցին մի շարք արդիական հետազոտություն պահանջող խնդիրներ, որոնցով խումբը պլանավորում է զբաղվել այս ստարտափից հետո: Միևնույն ժամանակ ունենալով արդեն առաջին տեսանելի արդյունքները՝ խումբը պատրաստվում է ներգրավել նոր անդամներ ու ձևավորել նոր խմբեր՝ փոխանցելով արդեն ձեռք բերված փորձը և ստեղծելով հետազոտական աշխատանքների համագործացության հարթակ: Բացի այդ, գյուղատնտեսական ոլորտի խնդիրները ըստ երևույթին դառնում են Բնական գիտությունների ֆակուլտետի հետազոտական գրավիչ ոլորտներից մեկը, որը պահանջում է մի շարք բնագավառների սերտ համագործակցություն:

Ստացված արդյունքները հետաքրքրել են ՀՀ-ում գործող ագրոտեխնոլոգիաներով զբաղվող մի շարք ընկերություններին և գյուղատնտեսներին, և ձեռք են բերվել բանավոր նախնական պայմանավորվածություններ սարքը փորձարկելու, ներդնելու և կիրառելու վերաբերյալ: Կարելի է ասել, որ խումբը հասել է արդեն դրված ամենակարևոր նպատակներից մեկին՝ առաջացրել է հետարքքրություն գործարարների մոտ, մասնավորապես՝ սկսել են տեղային հետազոտական աշխատանքները Իջևանում գործող ելակի հիդրոպոնիկ եղանակով աճեցման ջերմատներում: Նմանատիպ հետաքրքրություն կա Արմավիրի և Կոտայքի մարզերում գործող մի քանի ջերմատնային տնտեսություններում: Արդեն ավարտական տեսքին են մոտենում կիրառական փորձարկումներին պատրաստվող  մշակվող սարքի առաջին փորձանմուշի գործիքային ճշգրտման (կալիբրովկա) աշխատանքները:

Ստարտափում խումբը տրամադրված է հաղթելու, թեև թիմի անդամները համարում են, որ արդեն ձեռք են բերել մի կարևոր հաղթանակ՝ վստահություն սեփական ուժերի և համալսարանում մատուցվող գիտելիքների նկատմամբ: Այն արտահայտվում է նոր նախագծերի, նոր մոտեցումների ու խնդիրների նոր ու յուրատիպ լուծումների փնտրման և լուծման ուղիների որոնման տեսքով:

Հունվարի 29-ին Բնական գիտությունների ֆակուլտետում ներայացվեց թիմի ստարտափի ելույթը, որին մասնակցելու էին հրավիրվել ԵՊՀ ԻՄ-ի պրոֆեսորադասախոսական և վարչական անձնակազմի անդամներ: Մասնակցում էին նաև հետազոտական լաբորատորիայի ստեղծմանը ակտիվ մասնակցած և աջակցած ամերիկահայ բարերարներ Աննա Սիմոնյանը (ի դեպ, նա ԵՊՀ ԻՄ-ի նախկին աշխատակից է) և Հովհաննես Հակոբյանը: Ներկաների ակտիվ քննարկումները և վերջնական հաղթանակին հասնելու բարեմաղթանքները մեծացրին հաղթանակի կարևորությունը, և խումբը հաճելի պարտավորություն համարեց հաղթանակելու մղումը:

Հուսանք, որ թիմը հաղթանակած դուրս կգա այդ կարևոր և պատվաբեր մրցույթում՝ մեկնարկ տալով գիտահետազոտական նոր ծրագրերի իրագործման հետաքրքիր աշխատանքներին:

 Այսօր՝ 2022թ. հունվարի 28-ին, Հայոց բանակի կազմավորման 30-րդ տարեդարձն է: Հայոց բանակը ստեղծվել է Արցախյան ազատամարտի բովում` երկրապահ-կամավորական ջոկատների հիմքի վրա` դառնալով մեր պատմության նշանակալի ձեռքբերումներից մեկը, հայրենիքի պաշտպանության ու անվտանգության երաշխավորը:

 1990 թվականին` Անկախության հռչակագրի ընդունումից հետո, կազմավորվեց Երևանի հատուկ գունդը, Արարատում, Գորիսում, Վարդենիսում, Իջևանում ու Մեղրիում ձևավորվեցին վաշտեր:

 1991թ. կառավարության որոշմամբ ստեղծվեց նախարարների խորհրդին առընթեր Պաշտպանության պետական կոմիտեն:

1992թ. հունվարի 28-ին Կառավարությունը ընդունեց որոշում` «Հայաստանի Հանրապետության պաշտպանության նախարարության մասին»:

2001 թվականին օրը դարձավ տոն, երբ Տոների և հիշատակի օրերի մասին օրենքում ամրագրվեց որպես Բանակի օր:

Հայրենիքի պաշտպանության սուրբ պարտականությունից բացի՝ Հայոց բանակը բազմաթիվ երկրներում հաջողությամբ իրականացնում է նաև միջազգային խաղաղապահ առաքելություն:

Հայոց բանակի կազմավորման 30-ամյակի առթիվ ջերմորեն շնորհավորում ենք համայն հայությանը, մեր բանակին մաղթում ենք հզորացում և հաղթանակներ, հայրենի հողի պաշտպան մեր քաջ զինվորներին՝ անկոտրում ոգի, անփորձանք ծառայություն և բարի վերադարձ:

Տոնդ շնորհավո՜ր, Հայո՛ց բանակ…

2022թ. հունվարի 27-ին Ա. Հ. Մակարյանի նախագահությամբ ԵՊՀ Իջևանի մասնաճյուղում կայացավ Գիտական խորհրդի նիստ՝ առցանց միանալու հնարավորությամբ: Նիստին մասնակցում էր Գիտական խորհրդի անդամ, ԵՊՀ գիտական հարցերի գծով պրոռեկտոր Ռաֆայել Բարխուդարյանը:

Գիտխորհրդի նիստում քննարկվեցին 4 օրակարգային և 1 ընթացիկ հարցեր:

Առաջին հարցի՝ ԵՊՀ ԻՄ-ի 2021թ. եկամուտների և ծախսերի նախահաշվի
(բյուջե) հունվար–դեկտեմբեր կատարողականի մասին զեկուցման մեջ գլխավոր հաշվապահ Մ․Մխիթարյանը մանրամասն՝ ըստ հոդվածների, ներկայացրեց 2021թ. կտրվածքով ԵՊՀ ԻՄ-ի դրամական միջոցների մուտքերը (եկամուտներ) և ելքերը (ծախսեր): Նա նշեց, որ, ունենալով դրամական մուտքերի որոշակի աճ, համենայն դեպս բոլոր հոդվածներով մասնաճյուղը աշխատել է խնայողություններով։

Երկրորդ հարցի՝ Դասավանդման որակի և արդյունավետության վերաբերյալ 2020-2021 ուստարվա ուսանողական հարցումների արդյունքների մասին զեկուցեց Ուսումնամեթոդական վարչության պետ Ա․Դավթյանը: Նա նշեց, որ ԵՊՀ ԻՄ-ում կրթության որակի բարելավմանն ուղղված գործընթացներից են Դասավանդման որակի և արդյունավետության վերաբերյալ ուսանողական հարցումները։ Առաջին կիսամյակի հարցումներն իրականացվել են փետրվարի 5-20-ը՝ առկա ուսուցմամբ սովորողների և մարտի 10-25-ը՝ հեռակա ուսուցմամբ սովորողների համար, իսկ երկրորդ կիսամյակի հարցումները՝ հուլիսի 1-ից մինչև սեպտեմբերի 7-ը՝ առկա և հեռակա ուսուցմամբ սովորողների համար։ Թե՛ առկա, թե՛ հեռակա ուսուցման համակարգերում հարցումներն իրականացվել են առցանց եղանակով: Հաշվետու ուստարվա հարցումներին մասնակցել է մասնաճյուղի առկա ուսուցման ուսանողների 34․65%-ը, հեռակա ուսուցման՝ 28%-ը։ Ուսանողների մասնակցության ցածր ցուցանիշը պայմանավորված է ուսանողական էլեկտրոնային փոստերի քիչ գործածմամբ:

Հարցման արդյունքների ամփոփմամբ և՛ առկա, և՛ հեռակա ուսուցման ձևերում ամենաբարձր ցուցանիշներն ունեն Տնտեսագիտության ֆակուլտետի դեկանատը և ֆակուլտետն ամբողջությամբ, իսկ ամենացածրը՝ Բնական գիտությունների ֆակուլտետը և նրա դեկանատը:

Իրականացված հարցումների արդյունքներով դասախոսական կազմի՝ 2020-2021 ուստարվա տարեկան միջին գնահատականը կազմել է 4․71: Անհատական ցուցանիշները, ըստ կարգի, տրամադրվել են ֆակուլտետների դեկաններին՝ քննարկելու և վերլուծելու:

Առկա և հեռակա ուսուցման համակարգերում սովորող ուսանողների կողմից կատարված հիմնական առաջարկները հետևյալն են․

• դասերն իրականացնել առկա,
• հաշվի առնել ուսանողների կողմից գնահատված հարցման արդյունքները,
• ավելացնել գործնական պարապմունքների ժամաքանակը։

Երրորդ հարցի՝ ԵՊՀ ԻՄ-ի շրջանավարտների մասնագիտական հմտությունների վերաբերյալ արտաքին շահակիցների կարծիքի ուսումնասիրության՝ 2020-2021 թթ. հարցման արդյունքների վերաբերյալ զեկուցեց Արտաքին կապերի բաժնի մասնագետ Է․Ղարայանը: Նա նշեց, որ ԵՊՀ ԻՄ-ի կարևոր խնդիրներից է աշխատաշուկայի պահանջներին բավարարող, բարձր որակավորում ունեցող շրջանավարտներ պատրաստելը։ Իր կրթական գործունեության ընթացքում մասնաճյուղը մշտապես կարևորել է արտաքին շահակիցների կարծիքները և առաջարկները՝ դրանք հավաքագրելով ամենամյա իրականացվող հարցումների միջոցով։ 2011 թ․-ից իրականացվող այդ հարցումները թույլ են տալիս ժամանակին ու պատշաճ արձագանքել գործատուների պահանջներին։ Վերջին 4 տարիներին հարցումն իրականացվում է առցանց, անանուն, հարցմանը մասնակցում են մարզի գործատու կազմակերպությունների՝ հիմնականում բանկերի, դպրոցների, հյուրատների, հասարակական կազմակերպությունների, տեղական ինքնակառավարման մարմինների ղեկավարները։ 2021 թ․-ին իրականացված հերթական ուսումնասիրության համար էլեկտրոնային հարցաթերթ ուղարկվել է 157 գործատուի, արձագանքել է 70-ը (45%-ը)։

Ուսումնասիրության նպատակն էր պարզել արտաքին շահակիցների կարծիքը մասնաճյուղի շրջանավարտների մասնագիտական և անձնային որակների վերաբերյալ։ 5 բալանի սանդղակով գործատուները գնահատել են մասնաճյուղի շրջանավարտների տեսական գիտելիքներն ու գործնական հմտությունները, կազմակերպչական, ստեղծագործական ու հաղորդակցական կարողությունները, անձնային-բարոյական որակները, ինքնակատարելագործման դրսևորումը, թիմային աշխատանք կատարելու ունակությունները և այլն:

Հետազոտության արդյունքներն ընդհանուր առմամբ գոհացնող են, ինչը փաստում է, որ մասնաճյուղը շարունակում է կատարել իր առջև դրված գլխավոր ռազմավարական խնդիրներից մեկը, այն է՝ աշխատաշուկային տալ մրցունակ մասնագետներ։

Գիտխորհրդի անդամները նշեցին, որ հարցման արդյունքում վերհանված խնդիրների շուրջ լրացուցիչ ուսումնասիրությունների կարիք կա։ Հարցումներն առավել արդյունավետ իրականացնելու և դրանց արդյունքները նպատակային կիրառելու ուղղությամբ առաջարկներ եղան հարցաշարը հստակեցնելու և կրճատելու, շահակիցների կողմից նկատված խնդիրներին կոնկրետ լուծումներ տալու համար ուսումնասիրության արդյունքները դասակարգելու ըստ առանձին մասնագիտությունների:

Օրակարգի 1-ին, 2-րդ և 3-րդ հարցերի վերաբերյալ զեկուցումները որոշվեց ընդունել ի գիտություն:

Չորրորդ հարցի՝ ԵՊՀ ԻՄ-ի կրթական ծրագրերի ղեկավարների գործունեության կարգի հաստատման վերաբերյալ զեկուցեց Որակի կառավարման մշտական հանձնաժողովի նախագահ Ն.Գրիգորյանը: Նա նշեց, որ ներկայացված կարգի նախագիծը մշակվել է տնօրենի հանձնարարությամբ՝ ԿԲԴՎ բաժնի կողմից: Կրթական ծրագրերի ղեկավարների գործունեությունը կանոկակարգելու նպատակով բաժինը մշակել է կարգ և ծրագրերի ղեկավարների աշխատանքային պլանի օրինակելի ձև: Կարգի նախագիծը և աշխատանքային պլանը արժանանացել են տնօրենության և Որակի կառավարման մշտական հանձնաժողովի հավանությանը:

Կարգում ներկայացված են կրթական ծրագրերի ղեկավարներին  ներկայացվող պահանջները, նրանց պարտականություններն ու իրավունքները, կրթական ծրագրերի ղեկավարների աշխատանքների մշտադիրտարկումն ու հաշվետվողականությունը:

Քվեարկության արդյունքներով որոշվեց հաստատել ԵՊՀ ԻՄ-ի կրթական ծրագրերի ղեկավարների գործունեության կարգը:

Ընթացիկ հարցի՝ ԵՊՀ ԻՄ–ի ընդհանուր մաթեմատիկայի և բնագիտության ամբիոնի ասիսիտենտ, ֆ․մ․գ․թ․ Ա․Մարգարյանին ԵՊՀ-ի գիտական խորհրդում դոցենտի գիտական կոչում ստանալու համար երաշխավորելու և միջնորդելու մասին զեկուցեց ԵՊՀ ԻՄ-ի գիտական քարտուղար Մ.Աթոյանը: Նա նշեց, որ ԵՊՀ ԻՄ-ի ընդհանուր մաթեմատիկայի և բնագիտության ամբիոնի ասիստենտ, ֆ.մ.գ.թ. Ալեքսան Շամիլի Մարգարյանի գիտամանկավարժական գործունեության տվյալները լիովին համապատասխանում են ՀՀ կառավարության՝ 2001թ. հուլիսի 9-ի  «Հայաստանի Հանրապետությունում գիտամանկավարժական կադրերին պրոֆեսորի և դոցենտի գիտական կոչումներ շնորհելու մասին» N 615 որոշման 2-րդ՝ «Դոցենտի գիտական կոչում շնորհելը» բաժնի բ. ենթակետի, ինչպես նաև այդ հարցում նորմատիվային այլ փաստաթղթերի պահանջներին:

Ըստ նիստում անցկացված փակ, գաղտնի  քվեարկության դրական արդյունքների՝ որոշվեց.

1. Երաշխավորել ԵՊՀ ԻՄ-ի ընդհանուր մաթեմատիկայի և բնագիտության ամբիոնի ասիստենտ, ֆ.մ.գ.թ. Ալեքսան Շամիլի Մարգարյանին դոցենտի գիտական կոչում ստանալու համար:
2. Միջնորդել ԵՊՀ-ի գիտական խորհրդին՝ նրան շնորհել դոցենտի գիտական կոչում և համապատասխան առաջարկով դիմել ՀՀ ԲՈԿ:

 2022թ. հունվարի 25-ին Մ. Վ. Լոմոնոսովի անվան Մոսկվայի պետական համալսարանի Երևանի մասնաճյուղում կայացավ Ուսանողների օրվան նվիրված հանդիսավոր միջոցառում, որը կազմակերպել էր Մոսկվայի պետական համալսարանի Երևանի մասնաճյուղը՝ Երևանում Ռուսական տան աջակցությամբ, ՀՀ-ում ՌԴ դեսպանատան, Հայաստանում Ռուսաստանի բուհերի ուսանողների ասոցիացիայի և Մոսկվայի պետական համալսարանի Երևանի մասնաճյուղի ուսանողական խորհրդի մասնակցությամբ:

Ձևավորված գեղեցիկ ավանդույթի համաձայն՝ այդ օրը Մոսկվայի պետական համալսարանի Երևանի մասնաճյուղում հավաքվում են հյուրեր, ուսանողներ և դասախոսներ Երևանից և մարզային բուհերից՝ շնորհավորելու ուսման մեջ առաջադեմ և հասարակական գործունեությամբ ակտիվ ուսանողներին, նրանց շնորհելու դիպլոմներ և մեդալներ:

«2021 թվականի լավագույն ուսանող» անվանակարգում լավագույն էին ճանաչվել 16 ուսանողներ Երևանից, Վանաձորից, Գավառից, Շիրակից և իհարկե Իջևանից:

ԵՊՀ Իջևանի մասնաճյուղը, լավագույն ուսանող ընտրելու առաջարկին ի պատասխան, առաջադրել էր «Ռուսաց լեզու և գրականություն» մասնագիտության 2-րդ կուրսի ուսանողուհի Արփինե Վանեսյանի թեկնածությունը՝ հաշվի առնելով տվյալ մասնագիտության ուսանողների մեջ նրա ցուցաբերած բարձր առաջադիմությունը և հասարակական ակտիվությունը:

Մրցանակաբաշխությանը «2021 թվականի լավագույն ուսանող» անվանակարգում Արփինե Վանեսյանը ստացավ դիպլոմ և մեդալ:

Առաջադրվածներին ողջունեց Մոսկվայի պետական համալսարանի Երևանի մասնաճյուղի գործադիր տնօրենի՝ ուսումնական գծով տեղակալ Ժ. Գ. Բաղիյանը, Հայաստանում ՌԴ դեսպանատան դեսպանորդ-խորհրդական Մ. Վ. Սելեզնևը և Երևանում Ռուսական տան մշակութային և պատմական նախագծերի բաժնի վարիչ Ա. Ռ. Արզումանյանը:

Վերջում ուսանողներին ուղղված շնորհավորական խոսքով հանդես եկավ ԵՊՀ ԻՄ-ի ռուսաց լեզվի և գրականության սեկցիայի դոցենտ, մ.գ.թ. Սվետլանա Մինասյանը՝ մասնավորապես նշելով, որ ճանապարհին լինելու են տարբեր կրթական վերափոխումներ, որոնց պետք է արագ հարմարվել, համարձակորեն յուրացնել ժամանակակից տեղեկատվական տեխնոլոգիաները, հաղթահարել նոր հարթակներ: Նա շնորհակալություն հայտնեց միջոցառման կազմակերպիչներին՝ ընդգծելով, որ նման միջոցառումները բարձրացնում են ուսանողների մոտիվացիան և նրանց կողմնորոշում դեպի նոր գիտելիքներ:

ԵՊՀ Իջևանի մասնաճյուղի անունից մենք ևս սիրով շնորհավորում ենք Արփինե Վանեսյանին, մաղթում ենք նրան նորանոր ձեռքբերումներ և հաջողություններ, նպատակասլացություն և անսպառ եռանդ՝ իր գիտելիքներն ու կարողություններն արդյունավետ կիրառելու ճանապարհին: