2022թ. ապրիլի 15-ին և 16-ին ԵՊՀ ԻՄ-ի հումանիտար գիտությունների ֆակուլտետում կայացան Սուրբ Հարության տոնին նվիրված միջոցառումներ, որոնք կազմակերպել էր Օտար լեզուների  ամբիոնը (ի դեմս ամբիոնի վարիչ, բ.գ.թ., դոցենտ Ք.Հարությունյանի և ամբիոնի ասիստենտ, բ.գ.թ. Ա.Կարապետյանի):

Միջոցառումների լեզուն անգլերեն էր:

Ապրիլի 15-ին «Հայոց լեզու և գրականություն» ու «Ռուսաց լեզու և գրականություն» մասնագիտությունների առաջին կուրսի ուսանողները դասախոս Աննա Կարապետյանի հետ միասին անգլերենի դասը վերածեցին փոքրիկ դաս-միջոցառման՝ նվիրված Սուրբ Հարության տոնին: Միջոցառման ընթացքում ուսանողները գեղեցիկ ու բովանդակալից տեսասահիկների միջոցով ներկայացրին Զատկի տոնի ծագումը, խորհուրդը, տոնի հետ կապված՝ տարբեր քրիստոնյա երկրներին բնորոշ ավանդույթները, ինչպես նաև իրենց ձեռքով պատրաստված զատկական որոշ ուտելիքներ: Այդ ամենի միջոցով ավելի լավ պատկերացում կազմվեց տոնի մասին, և որոշակիորեն հարստացավ անգլերենի բառապաշարը:

Ապրիլի 16-ին Քրիստինե Հարությունյանի կազմակերպած համանուն միջոցառման ընթացքում «Օտար լեզու և գրականություն» մասնագիտության 1-ին կուրսի ուսանողները ներկայացրին տոնի պատմությունը, ավանդույթները և խորհրդանիշները ԱՄՆ-ում և Հայաստանում, նշեցին նմանություններն ու տարբերությունները:

Մասնավորապես ներկայացվեց, որ Հիսուս Քրիստոսի հրաշափառ Հարության տոնը կոչվում է նաև Զատիկ, որը նշանակում է զատում, բաժանում, հեռացում մեղքերից և վերադարձ առ Աստված: Հիսուս Քրիստոսի խաչելությունից և մահվանից հետո` երեկոյան, բարեպաշտ մարդիկ Նրա մարմինը իջեցրին խաչից և դրեցին վիմափոր գերեզմանի մեջ՝ փակելով մեծ քարով: Երեք օր հետո` կիրակի առավոտյան, Մարիամ Մագդաղենացին, Հակոբի մայր Մարիամը և Սողոմեն, գնացին գերեզման՝ անուշաբույր յուղերով օծելու Քրիստոսի մարմինը, սակայն զարմանքով տեսան, որ քարայրի մուտքի քարը հեռացված է, իսկ գերեզմանը` թափուր: Մինչ նրանք տարակուսում էին, երևացին երկու հրեշտակ և ասացին. «Ինչո՞ւ եք ողջին մեռելների մեջ փնտրում: Այստեղ չէ, այլ Հարություն առավ»: Հարության լուրը կանայք ավետեցին առաքյալներին, որից հետո Հիսուսը երևաց նրանց: Քրիստոսի Հարությունը դարձավ քրիստոնեական վարդապետության և հավատի հիմքը:  Ս. Հարության տոնի նախընթաց երեկոյան եկեղեցիներում մատուցվում է Ճրագալույցի Ս. Պատարագ, որով սկսվում են զատկական տոնակատարությունները: Առավոտյան եկեղեցիներում կատարվում է ժամերգություն, Անդաստանի արարողություն, ապա մատուցվում տոնական Ս. Պատարագ: Զատկի տոնին հավատացյալները հավկիթ են ներկում: Ներկված հավկիթը  համարվում է Հարության և նոր կյանքի խորհրդանիշ: Կարմիր գույնը խորհրդանշում է խաչյալ Հիսուսի կենդանարար արյունը, որ թափվեց մարդկության փրկության համար:

Միջոցառումն անցավ հաճելի մթնոլորտում, ավարտվեց ավանդական հավկթախաղով և տոնական հյուրասիրությամբ:

 2022թ. ապրիլի 15-ին ԵՊՀ Իջևանի մասնաճյուղում էր ՀՀ ԳԱԱ Երկրաբանական գիտությունների ինստիտուտի պրոֆ. Հ.Կարապետյանի անվան երկրաբանական շրջիկ թանգարանը՝ միներալների 100 բացառիկ ցուցանմուշներով:

Թանգարանն իր առջև խնդիր է դրել և իրականացնում է գիտակրթական և սոցիալ-մշակութային համատեղ ծրագրեր ՀՀ տարբեր բուհերի հետ:

Բացման խոսքով հանդես եկավ ԵՊՀ ԻՄ-ի տուրիզմի կառավարման և մշակութաբանության ամբոնի ասիստենտ Պավել Ասլիբեկյանը՝ նշելով հանդիպման կարևորության և անհրաժեշտության մասին:

Զեկուցումով հանդես եկավ թանգարանի վարիչ Գայանե Գրիգորյանը՝ անդրադառնալով թանգարանի գործունեությանը, բաժիններին, իրականացվող ծրագրերին  և առաջիկայում կայանալիք  երիտասարդական գիտաժողովին՝ նվիրված Արա Ցոլակի Դիլդիլյանի նվիրատվության հիման վրա թանգարանում ստեղծված «Աշխարհի քարերը…» միներալների սրահի բացման 10-ամյակին:

Ուսանողների և դասախոսների ուղղած բազմաթիվ հարցերին սիրով պատասխանեց Գ.Գրիգորյանը և հավաստիացրեց, որ մարզի վերաբերյալ երկրաբանության ինստիտուտի գիտական ուսումնասիրություններն ավելի կհարստացնեն ուսանողների գիտելիքները:

Թանգարանի աշխատակիցներ Նարինե Պողոսյանը և Ռուբեն Դավթյանը  հետաքրքիր կերպով ու հանգամանորեն ներկայացրին շրջիկ թանգարանի ցուցանմուշները:

Անդրադարձ կատարվեց ցուցանմուշների ձեռքբերման պատմությանը, եզակի երկրաբանական գոյացություններ հանդիսացող միներալների տեսակներին, գիտական դասակարգումներին, տարբերակելու մեթոդներին, ՀՀ գունագեղ քարերի հանքավայրերին, օգտագործման բնագավառներին:

Խոսվեց ժամանակակից թանգարանների դերի և նշանակության՝ որպես ուսանողների ուսումնասիրությունների և ապագայում ՀՀ-ում թանգարանային տուրիզմի զարգացումը խթանելու համար հզոր բազայի մասին:

Թանգարանի հետ կնքված հուշագրի շրջանակներում մեր ուսանողներն իրենց ուսումնական պրակտիկան կանցկացնեն նաև ՀՀ ԳԱԱ ԵԳԻ պրոֆ. Հ.Կարապետյանի անվան՝ հանրապետական նշանակության միակ երկրաբանական թանգարանում:

Երկկողմ համագործակցության կարևորությանն անդրադարձավ ԵՊՀ ԻՄ-ի ՈՒՄՎ մինչհամալսարանական կրթության և պրակտիկաների կազմակերպման բաժնի վարիչ, «Թանգարանագիտություն» դասընթացի վարող, պ.գ.թ. Լ.Բեգինյանը:

Շրջիկ թանգարանի ցուցանմուշներին ծանոթացան շուրջ 70 այցելուներ՝ ԵՊՀ Իջևանի մասնաճյուղի «Զբոսաշրջություն» և «Պատմություն» մասնագիտությունների ուսանողներ և պրոֆեսորադասախոսական անձնակազմի անդամներ:

 2021-2022 ուստարվա 2-րդ կիսամյակի համար Հայաստանյայց Առաքելական Սուրբ Եկեղեցու Տավուշի թեմը Եգիպտահայ ընկերակցության «Մաշտոց» հիմնադրամի աջակցությամբ և ԵՊՀ Իջևանի մասնաճյուղի հետ համագործակցությամբ սահմանել է յուրաքանչյուրին մինչև 100.000 ՀՀ դրամի չափով մասնակի կրթաթոշակ ԵՊՀ ԻՄ-ի՝ սահմանամերձ համայնքների և սոցիալապես անապահով ընտանիքների 65 ուսանողի համար:

Կրթաթոշակին արժանանալու համար 2022թ. մարտի 15-31-ը ուսանողները ներկայացրել էին սոցիալական կարգավիճակի և ուսման առաջադիմության վերաբերյալ տեղեկանք, Տավուշի մարզում կամավորական հիմունքներով հասարակական և բարեսիրական աշխատանքներին մասնակցության հավաստագիր:

2022թ. ապրիլի 13-ին Տավուշի թեմի առաջնորդարանում տեղի ունեցավ կրթաթոշակային ծրագրում ընդգրկված ուսանողների հետ հանդիպում, որին մասնակցում էին Տավուշի թեմի առաջնորդը, թեմի ներկայացուցիչներ, ԵՊՀ ԻՄ-ի փոխտնօրեն Մ.Օթարյանը, Արտաքին կապերի բաժնի աշխատակիցներ, ուսանողներ:

Ողջույնի խոսքով հանդես եկավ Տավուշի թեմի առաջնորդ Գերաշնորհ Տեր Բագրատ եպիսկոպոս Գալստանյանը: ԵՊՀ ԻՄ-ի փոխտնօրեն Մհեր Օթարյանը շնորհակալություն հայտնեց Բագրատ Սրբազանին՝ ուսանողների ուսման վարձի փոխհատուցման համար:

Հանձնախումբը՝ Տավուշի թեմի առաջնորդ Գերաշնորհ Տեր Բագրատ եպիսկոպոս Գալստանյանի, Արժանապատիվ Տեր հայրեր՝ Իջևանի հոգևոր հովիվ Տեր Սիմեոն քահանա Առաքելյանի, Նոյեմբերյանի հոգևոր հովիվ Տեր Սմբատ քահանա Աբրահամյանի, «Տահույս» սոցիալ-կրթական ՀԿ նախագահ Մերի Առաքելյանի, ԵՊՀ ԻՄ-ի փոխտնօրեն Մհեր Օթարյանի և ԵՊՀ ԻՄ-ի արտաքին կապերի բաժնի մասնագետ Էրինե Ղարայանի մասնակցությամբ, որոշեց կրթաթոշակին դիմած բոլոր ուսանողներին ընդգրկել ուսման վարձի փոխհատուցման ծրագրում: Բարերարների և Տեր Բագրատ եպիսկոպոս Գալստանյանի ջանքերի շնորհիվ այս տարի կրթաթոշակառուների թիվը, նախորդ տարիների համեմատությամբ, եռապատկվել է:

Հանդիպման վերջում ԵՊՀ Իջևանի մասնաճյուղի կողմից Տեր Բագրատ եպիսկոպոս Գալստանյանին տրվեց նվեր ԵՊՀ ԻՄ-ի՝ 2020-2021 ուստարվա «Դիզայն» մասնագիտության շրջանավարտ Անահիտ Կոնջորյանի աշխատանքը («Եղիցի լույս». հագուստի մոդելավորում, ղեկավար՝ Լ.Մելիքյան)՝ ստեղծված Բագրատ Սրբազանի համար:

ԵՊՀ Իջևանի մասնաճյուղի անունից սիրով շնորհավորում ենք կրթաթոշակի արժանացած մեր ուսանողներին ու խորին երախտագիտություն ենք հայտնում Եգիպտահայ ընկերակցության «Մաշտոց» հիմնադրամին և Հայ Առաքելական Եկեղեցու Տավուշի թեմի առաջնորդ գերաշնորհ Տեր Բագրատ եպիսկոպոս Գալստանյանին՝ բարերարության, հայրենանվեր մեծ գործունեության համար:

2022թ. ապրիլի 9-ին ԵՊՀ Իջևանի մասնաճյուղում կայացավ «ԴիջիԿոդ» կիրառական ծրագրավորման պատանեկան ամենամյա մրցույթը, որն իրականացվում է «Առաջատար տեխնոլոգիաների ձեռնարկությունների միություն» հասարակական կազմակերպության կողմից:

Մրցույթի հիմնական նպատակն է խրախուսել և զարգացնել դպրոցականների ալգորիթմական մտածողությունը, աշակերտներին խաղ սպառողից վերածել խաղ ստեղծողի, բացահայտել տաղանդավոր պատանիներին և հնարավորություն տալ զարգացնել ստեղծագործական ունակությունները, բացահայտել ակտիվություն ցուցաբերած դպրոցներին և անհատներին:

Մրցույթին մասնակցում էին գլխավորապես այն դպրոցների աշակերտները, որտեղ առկա է «Արմաթ» աշխատանոց: Այս պահին Արմաթը գործում է Հայաստանի 610 դպրոցներում, Վրաստանի/Ջավախքի 10 և Հնդկաստանի Գուջարաթ նահանգի 3 կենտրոններում:

Արդեն 7-րդ անգամ՝ սկսած 2015 թվականից, իրականացվում է մրցույթը, որին այս ընթացքում մասնակցել են շուրջ 3500 դպրոցականներ, և եղել են 50-ից ավել հաղթած թիմեր, որոնք ստացել են տարբեր մրցանակներ, ճամբարների ուղեգրեր, պարգևատրումներ և տարբեր տեսակի խրախուսումներ:

Այս տարի «ԴիջիԿոդ» մրցույթն անցկացվում է 2 փուլով՝ մարզային (ԴիջիԿոդ՝ Շիրակ, Լոռի, Հյուսիս, Հարավ, Կենտրոնական) և հանրապետական:

Ապրիլի 9-ին իրենց աշխատանքներն են ներկայացրել Տավուշի և Գեղարքունիքի մարզերի ներկայացուցիչները:

Դիջիկոդի ծրագրավորման լեզուններն են՝ Աղվես/scratch, Կրիայ/kturtle և Python:

Մարզային փուլի անվանակարգերն են՝

• 4 անվանակարգ Աղվես/scratch ծրագրի համար (2 հատ՝ 10-13 տարեկան, 2 հատ՝ 14 և բարձր տարիքային),
• 2 անվանակարգ Python ծրագրի համար (1 հատ՝ 10-13, 1 հատ՝ 13 և բարձր տարիքային),
• 3 անվանակարգ Կրիայ օլիմպիադայի համար (10-12 տարեկան, 13-15 տարեկան, 16-18 տարեկան):

Տավուշի և Գեղարքունիքի մարզերի մարզային փուլին ներկայացվել է 94 նախագիծ Աղվես/scratch ծրագրով, որոնցից մարզային եզրափակիչ են անցել 40 նախագիծ, 4 նախագիծ Python ծրագրով, որոնցից մարզային եզրափակիչ են անցել 4 նախագիծ, 74 հայտ Կրիայ օլիմպիադային, որոնցից մարզային եզրափակիչ է անցել 30-ը:

Նախատեսված էր, որ Աղվես/scratch և Python ծրագրերով ներկայացված նախագծերի հաղթող անվանակարգերը որոշվեն մրցույթի ավարտին, իսկ Կրիայ օլիմպիադայի պատասխանները հրապարակվեն մրցույթից 3 օր անց:

Ժյուրիի կազմում ընդգրկված էին “Leviathan” ընկերության տնօրեն Սաթենիկ Մնացականյանը, ԵՊՀ ԻՄ-ի ծրագրավորման և ինֆորմացիոն տոխնոլոգիաների ամբիոնի ասիստենտ Մարիետա Ճաղարյանը, “Luseen Mobile” ընկերության համահիմնադիր Վարազդատ Ավետիսյանը, “NWS Lab” ընկերության Back End ինժեներ Վիկտոր Օհանյանը, «Արմաթ» ԻԼ Արարատի մարզի համակարգող Վյաչեսլավ Իսրայելյանը:

Հանրապետական փուլը տեղի կունենա ս.թ. ապրիլի 23-ին Հայաստանի ամերիկյան համալսարանում, որին կմասնակցեն մարզային փուլը հաղթահարած մասնակիցները:

Մրցույթի պատասխանատուները շնորհակալություն հայտնեցին ԵՊՀ Իջևանի մասնաճյուղին՝ աջակցության, մասնավորապես՝ մրցույթի իրականացման համար անհրաժեշտ պայմաններ տրամադրելու համար:

2022թ. ապրիլի 2-ին ԵՊՀ Իջևանի մասնաճյուղն իրականացրել էր ԵՊՀ-ի հետ համատեղ անցկացվող 2022թ. դպրոցական օլիմպիադայի 1-ին փուլը: Օլիմպիադան նախատեսված էր անցկացնել 2 փուլով՝ ս.թ. ապրիլի 2-ին և 16-ին՝ բացի «Ինֆորմատիկա» առարկայից, որն անցկացվել է մեկ փուլով՝ ապրիլի 2-ին:

Արդեն հայտնի են օլիմպիադայի 1-ին փուլի արդյունքները և 2-րդ փուլ անցած մասնակիցների անունները:

Տավուշի մարզի հանրակրթական ուսումնական հաստատություններից օլիմպիադայի 1-ին փուլին 11 առարկայից մասնակցել է 253 աշակերտ:

Օլիմպիադային 1-ին փուլի արդյունքներին, ըստ առարկաների, կարող եք ծանոթանալ այստեղ.

1. մաթեմատիկա,
2. ֆիզիկա,
3. քիմիա,
4. կենսաբանություն,
5. աշխարհագրություն,
6. հայոց պատմություն,
7. հայոց լեզու և գրականություն,
8. ռուսաց լեզու,
9. անգլերեն,
10. գերմաներեն,                                             
11. ֆրանսերեն:

Օլիմպիադայի 2-րդ փուլ է անցել 9 առարկայից 49 աշակերտ:

2-րդ փուլ անցած մասնակիցների անունները կարող եք տեսնել այստեղ.

1. մաթեմատիկա,
2. ֆիզիկա,
3. քիմիա,
4. հայոց պատմություն,
5. հայոց լեզու և գրականություն,
6. ռուսաց լեզու,
7. անգլերեն,
8. գերմաներեն,
9. ֆրանսերեն:

I փուլի հաղթողները կմասնակցեն օլիմպիադայի II փուլին, որը տեղի կունենա ս.թ. ապրիլի 16-ին՝ ժամը 11:00 -ին, Երևանի պետական համալսարանում: